糖醋骨拚椒鹽豬扒 + 學斗 ( 31-DEC-2022 )

( 31-DEC-2022  SAT )

感恩一覺瞓天光呀   鬧鐘未響都醒 lu ~

早餐食芝士甜餐包   其實我鍾意食甜餐包多過芝麻餐包㗎 ~   

2022 年月曆功成身退   哈哈

菇場唔忙啦   今日勁 3D ~

家姐打嚟話一陣去奇華   有咩要食 ?!   仲以為有咩事咁急打比我添   哈哈 ~

準時放工   買完木瓜再買蕃鬼荔枝先番企   本身唔買蕃鬼荔枝㗎   但真係好大個好吸引   所以忍唔住買 3 個   一陣可以比埋家姐呢 ~

估唔到番到屋企都 2 點半  食咗兩三啖飯就即出發去旺角了 ~

糖醋骨拚椒鹽豬扒   其實我係要尖椒豬肚   但佢比錯椒鹽豬扒   可能戴住口罩   尖同椒個發音又差唔多   所以聽錯囉   下次大聲啲先

3 點半左右出到去   同家姐特登去女人街睇下有無利是封   不過唔係咁啱心水囉 ~

家姐之後去整嘢   我就買嘢食比里奧大人就番屋企 lu ~

番到屋企即沖涼   今日好熱咁嘅   定我行嚟行去呢 ~

估唔到仲未餓   所以抖到 7 點先開餐 ~   

是日懶餐 - 糖醋骨拚椒鹽豬扒 + 學斗

糖醋骨拚椒鹽豬扒 - 食番今日食唔哂嘅兩餸飯   仲剩 3 件就留番聽晚   里奧大人又唔食得煎炸嘢   唔係唔駛留啦   哈哈 ~

學斗 - 終於清哂喇   又係時候轉食另一種菜 lu ~

沖埋涼就睇 Youtube   穩陣起見   里奧大人仍然自我隔離   我睇到 11 點都瞓覺了 ~

咁又 2022 年最後一日   感謝神保守   今年平安健康渡過呢 ~

鹽水鴨 & 口水雞 & 菜飯 ( 30-DEC-2022 )

( 30-DEC-2022  FRI )

尋晚半夜去咗次廁所   感恩都好快瞓得番呢 ~

里奧大人今日唔駛番工   咁我都自己食早餐先 lu ~

早餐食花生醬芝麻包   焗熱係好味啲嘅 ~

菇場忙咗陣就 Hea 過   雖然傾下偈上下網嘅時間好快過   但我都係鍾意有嘢做多啲   哈哈 ~

Lunch Time 出去行陣   之後買雞翼紅薯粉就即番菇場   無諗過出面咁鬼凍囉   咁我同肥仔豪一齊番菇場   佢第一句都話比個陽光呃咗   等佢無着外套   但原來咁凍  哈哈 ~

仍然唔忙   本來有啲眼瞓   但阿花話車銀優續約   之後 JinJin Moonbin 同 Sanha 都續約   真係當堂精神哂   希望 Rocky 同 MJ 都續啦   我哋話 6 星先係 ASTRO 嘛 ~

放工就去買蕃鬼荔枝   之前好多㗎   今晚得番 3 份咋   好在我買嗰份都靚仔呢   感恩感恩 ~

番到屋企都未餓   所以開機洗衫再做大清潔   之後抹地   沖埋涼就可以食飯 ~

7 點幾先開餐   食完抖下再食橙   洗完碗就休息 lu ~

里奧大人要自我隔離   所以我睇 Youtube 睇到 11 點先瞓   嘻嘻 ~   

鹽水鴨 & 口水雞 (外賣) + 學斗 ( 29-DEC-2022 )

( 29-DEC-2022  THU ) 

尋晚去咗 2 次廁所   之後 6 點半都醒醒地咁   好在後尾都瞓得番咋   依家天氣凍   真係唔想咁早起身住呢 ~

早餐食醬占田園軟包 & 醬占芝麻餐包   尋日朝早食 2 塊包之後好快餓   所以今朝要焗多 1 個包喇 ~

菇場唔太忙   傾下計又到 11 點 45 分 lu ~

Lunch Time 出去行陣   之後去一田買盒零食比叻叻   搞掂就番菇場 ~

草莓窩夫曲奇 ($69)   我覺得幾好味咁   所以就買喇

唔知食咩好   所以又食烏冬喇 ~

自己加七味粉   咁樣好味好多㗎

里奧大人喉嚨有啲唔舒服   咁就番屋企休息   呢排天氣又凍又暖   所以好易攝親   阿齋同 8 卦又係喉嚨痛   因為成日食薯片   食完無事   係之後幾日先發出來呢 ~

仍然唔忙啦   可以準時放工 ~

買埋餸就番屋企   今晚只係淥菜同煲飯   超市簡單 ~

里奧大人嘅聖誕襪

佢特登拎番屋企比我拆禮物呀

估唔到我都有份   哈哈

另一間公司送比佢嘅

是日懶餐 - 鹽水鴨 & 口水雞 (外賣) + 學斗

鹽水鴨 & 口水雞 (外賣) - 無哂燒鴨所以買鹽水鴨   估唔到又幾好味噃 ~

學斗 - 買 1 斤最好   因為可以食兩晚   哈哈 ~ 

洗埋碗就開機洗衫   抖陣就食木瓜   之後同里奧大人一齊睇 "財閥家的小兒子"   終於睇哂喇 ~

11 點幾都瞓喇   里奧大人唔舒服怕傳染比我   所以要自我隔離   今晚我自己一個人瞓覺了 ~

雜丸豚骨拉麵 + 黑椒牛扒炒意粉 ( 28-DEC-2022 )

食意粉再飲埋剩咗嘅湯   又紅蘿蔔又栗子   真係飽過食一碗飯   哈哈

( 28-DEC-2022   WED )  

一覺瞓到 7 點 10 分醒咗   但想繼續瞓   估唔到又可以瞓到 7 點半先起身 ~

早餐食花生醬田園軟包   本身個包好 Soft   所以唔焗熱   慳番啲時間 ~

菇場忙呀   好快到 Lunch Time ~

送比阿花嘅 Melody 禮物   佢勁鍾意呀   仲整到咁靚嚟影相   哈哈

本身好餓想唔行   但又想去買菜   最後行行下都唔係話好餓   所以又係行咗半個鐘先去買炒果炒麵   下次買 1 個粉果好啲   食2個好似好滯咁 ~

家姐上次食中藥   所以話買包陳皮梅   點知佢話好酸唔食   我就話拎幾粒食下先   好味就比我   估唔到我覺得好味   因為夠酸呀   哈哈哈哈   今日仲大派用場添啦   用嚟消滯非常好㗎

忙到 4 點左右就搞掂   傾多陣計又放工了 ~

放工買埋麵包就番屋企   

是日晚餐 - 雜丸豚骨拉麵 + 黑椒牛扒炒意粉

雜丸豚骨拉麵 - 唔知煮咩呀   所以清埋啲雜丸同拉麵就算 lu ~

黑椒牛扒炒意粉 - 前晚嘅意粉   今晚點都要食㗎喇 ~

煮埋個炒麵比里奧大人就洗碗   搞掂哂即沖涼   之後食埋生果就休息下呢 ~

依排都會食橙   難得買到甜橙呀   哈哈

每月一到有啲攰   所以 9 點 50 分瞓喇   里奧大人依家喺我臨瞓前   幫我按條腰同背脊   因為呢幾日我半夜都痛醒呀   唉 ~

鹽酥雞肉燥飯 + 鹽酥魷魚鬚肉燥飯 + 黃金芋圓球 + 甜不辣 (外賣) @ 屋企 ( 27-DEC-2022 )

開餐

鹽酥魷魚鬚肉燥飯 ($51) - 魷魚鬚勁好味   仲有 5 條咁多呀

鹽酥雞肉燥飯 ($49) - 鹽酥雞份量都多   又好味   呢間食店真係好抵食

黃金芋圓球 (+$9) - 好想食甜品

甜不辣 (+$9) - 可以比里奧大人帶飯

大甲芋泥鮮奶 (+$17) - 呢期好想飲芋泥飲品   所以見到即叫

宇治抹茶鮮奶 (+$17) - 里奧大人就最鍾意抹茶飲品

( 27-DEC-2022  TUE )

尋晚起身去廁所   見里奧大人仲未瞓   望個鐘原來已經係 1 點 40 分瞓   睇劇睇到咁夜真係作哂反 ~

我今朝 9 點 45 分都醒咗   預咗里奧大人瞓晏啲㗎喇 ~

咁 10 點開手機   見到家姐即時 Whatsapp 我   仲叫我 Call 佢   我仲以為佢知我起咗身   所以即叫我添   因為我夜晚瞓覺會熄手機嘛   佢話 Whatsapp 咗我先   咁我一開手機就睇到 ~

原來佢想去旺角買腰封   因為糟糟話旺角有得睇   咁我話話一陣陪佢出旺角一齊買啦 ~

我頂到 10 點 45 分都開始餓   所以即焗熱麵包   諗住食啦   點知里奧大人起咗身   咁我焗埋佢嗰份再一齊食啦 ~

芝士菠蘿包 & 菠蘿油 Again

食完就睇阿仔   咁里奧大人就做其他嘢   因為佢已經睇咗   等我睇埋就今晚可以同步再睇新一集 ~

1 點幾要食午餐   因為里奧大人要番公司整嘢呀 ~    

XO 醬豬扒炒河粉

咁我喺屋企等佢啦   好在佢都好快手搞掂   可以一齊搭車出旺角 ~

一入到店人舖   里奧大人即睇護腰產品   又問職員啲產品係點點點   真係緊張過我   好感激佢幫手睇呀   之後佢再問佢家姐應該買啲咩腰封好   原來一定要買有鐵片嘅   好在里奧大人幫手問咋 ~

睇完就去巴士站接家姐   里奧大人見到家姐就即刻扶住佢   當佢阿婆咁扶住   所以家姐隻腳肯定痛   唔係唔會比人扶囉 ~

全程係里奧大人幫家姐帶腰封   又幫佢着謢膝   我只係企喺度望住   真係正衰女   哈哈 ~

家姐話帶咗腰封真係舒服好多   感恩感恩 ~

佢又比咗袋食物比我   腳痛就唔好拎比我啦   激鬼死我   我話下次去佢屋企先比都未遲啦 ~

之後家姐要去整嘢   我同里奧大人去花園街買生果 ~

今次我真係好勁   完全無睇過衫   因為仲有啲衫未着   唔想嘥錢買嘢   嘻嘻 ~

買咗 6 個巨橙 + 2 個大木瓜   咁一定要里奧大人拎喇   因為真係好重 ~

最後買埋晚餐就搭小巴番屋企   果然好快番到屋企   哈哈 ~

家姐話張餅卡原來係 12 月 31 日到期   所以今日拿拿聲換埋去   佢以為張餅卡係 $50 左右啦   點知係 $368   家姐話好豪咁唔睇價錢咩都買呀   哈哈

感恩買到合心水腰封

呢間麵包店嘅麵包好食㗎   廿幾年前都已經幫襯   因為位置無變到   但就唔記得係咩名囉

開機洗衫就沖涼   今晚 5 點 45 分就開餐   好在里奧大人聽日帶飯   咁樣等如 3 個人食晚餐   唔駛咁飽   因為我一陣要食埋件芝士蛋糕 ~

食埋呢次   下次食就要自己比錢買喇   哈哈哈哈

8 點就睇阿仔   好想快啲睇哂   哈哈 ~   

今晚又係 10 點 50 分自己瞓先喇   里奧大人就睇下其他嘢先瞓呢 ~

香茅拚椒鹽雞翼 + 黑椒牛扒炒意粉 ( 26-DEC-2022 )

繼續飲

紅絲絨朱古力鬆餅 ($25) - 勁似發霉蛋糕   哈哈

紐約芝士蛋糕 ($36) - 我好鍾意食   但里奧大人唔鍾意食

( 26-DEC-2022  MON )

今朝 9 點要起身喇   都係喺屋企整早餐   咁樣時間易就啲 ~

我食芝士菠蘿包   里奧大人就食菠蘿油   間唔中食都唔錯   哈哈 ~

我只係切一少片牛油   同出面茶記一樣   哈哈哈哈         

食完抖陣就沖涼   之後要去大酒店喇   出席榴槤爸爸嘅安息禮拜   11 點幾左右完禮   所以出尖沙咀行下 ~

去到尖沙咀都 12 點   喺碼頭影陣相都去食午餐喇   因為呢段時間無咁多人 ~

差唔多 1 點走人   估唔到成間店都已經坐滿人   好在我哋早食咋 ~

招牌小籠包 ($43) - 頭先睇電視係介紹小籠包   搞到我都好想食呀   所以里奧大人叫我食 3 隻

姥姥家鄉粗炒 ($82) - 份量真係越來越少但就越來越貴   睇番記錄 2020 年係 $74   2021 年係 $78   今年係 $82   我都覺得加價係無可本厚非   但份量都要比番足囉

食飽要行下   行海港城真係行到眼瞓   因為好焗呀 ~

經過 Logon 買咗份聖誕禮物比阿花   行埋 Citysuper   最後去埋 Starbucks 買蛋糕就搭車番屋企喇 ~

SPY x FAMILY   比着以前   我真係唔理三七廿一買咗先㗎   但依家唔會 lu

呢期好鍾意 Anya

番到屋企都 3 點   我買完麵包再買蛋撻   突然間好想食蛋撻呀 ~

 

里奧大人就瞓晏覺   我就睇 Youtube   不過最後都瞓咗半個鐘 ~

今晚 6 點預備晚餐   但 7 點先食得 ~

是日晚餐 - 香茅拚椒鹽雞翼 + 黑椒牛扒炒意粉

香茅拚椒鹽雞翼 - 我覺得啲雞翼無咩味咁   所以我自己再加啲蝦麵醬再焗   乜鬼都加蝦麵醬   都仲剩少少   又係食極唔完好驚呀   哈哈 ~

黑椒牛扒炒意粉 - 想清埋啲蝦麵醬料   所以煮意粉喇 ~   

洗埋碗就開機洗衫   拿拿聲沖涼   一路食蛋糕一路睇阿仔 ~

個蛋糕都好實淨   因為依家好多麵包蛋糕都輕飄飄咁囉

我唔係咁鍾意食蛋糕   都覺得呢個蛋糕都好味道

今晚睇到 10 點 50 分都瞓先   睇呢啲燒腦劇   真係一路睇一路諗   次次睇完好鬼攰囉 ~