翠河餐廳 @ 官塘 ( 31-JUL-2019 )

鹹魚蓉煎肉餅套餐 ($68) - 無鑊氣

家鄉小炒皇 ($62) - 難食到爆   見到幾粒腰果生勾勾咁   無啦啦又有雞柳魚柳叉燒   堅九唔搭八   哈哈

( 31-JUL-2019  WED )

里奧大人知我緊張   所以係都要陪我去考試會場   寧願送完我去會場先番學   今朝仲要 7 點起身   辛苦佢了 ~

沖埋涼就出發喇   今朝都係搭地鐵去   其實搭地鐵要轉來轉去都幾煩   不過搭巴士就真係驚塞車囉   始終番工時間同埋落雨 ~

諗住他他條條食早餐   咁我放低完份早餐   我就再睇多次時間   點知原來係 9 點考試呀   嚇死我啦   當時已經 8 點半嘛   所以乜嘢都放入口   真係唔夠 5 分鐘就食哂即走喇   最慘係陪唔到里奧大人一齊食囉 ~

咁去完廁所再入房啦   居然見到里奧大人   原來佢睇下我到咗未   哈哈 ~

我問佢做咩嚟會場 ?!   佢話擔心我未到   仲話我食完早餐走咗之後   佢過 2 分鐘都走   但落到去已經唔見到我嘅蹤影   因為行去會場都要一段路嘛   佢估唔到我行得咁鬼快   哈哈   大佬   考唔到試就慘喇 ~

真的感謝神   我終於 Pass 喇   我可以回復正常生活喇 ~

里奧大人話一陣掛 8 號風球   問我駛唔駛番工 ?!   我話應該唔駛啦   我番 1 點半   但風球 12 點 - 2 點就掛嘛 ~

咁坐巴士番屋企喇   番到屋企都只係 11 點唔夠   勁爽呀 ~

12 點左右收到西瓜 Wechat   叫我中午唔駛番   因為啲同事已經開始離開公司呢 ~

終於可以盡情睇 Youtube   之前睇親都唔係認真咁睇   始終想睇完快啲溫習   但又想睇咁囉 ~

今日開始飲中藥   每日 2 次   又唔係咁苦喎   呵呵 ~  

里奧大人 12 點半放學   番到屋企都 1 點半   咁出去食嘢喇 ~

同里奧大人 Share 食窩蛋免治牛肉飯   賣相唔掂   但其實好味喎   哈哈哈哈

講開今次考試都好驚險   首先朋友報咗另一個時間   第二又遇上不合作運動   第三我哋又記錯時間   所以考試 Pass 真係好感謝神呀 ~

食完去超市買嘢   之後番屋企喇 ~

里奧大人就睇功課   咁我就抹嘢啦   之前求其抹咋   今日就可以好細心慢慢抹呢 ~

差唔多 3 點   勁眼瞓   終於瞓咗 1 個鐘   里奧大人都瞓咗   佢就慘啲   因為陪我去考試   要咁早滕來滕去 ~

唉   點解塊臉仲爛㗎   好似爛多咗咁   勁煩   里奧大人成日安慰我   話考試完咗   會好快好番 ~

加埋又嚴重濕疹   仲要喺右手食指關節位   好難好囉    成日會郁家嘛   嗚嗚嗚嗚 ~

咁我又飲中藥嘛   里奧大人話沖咁細杯   我話夠啦   細細杯快啲飲哂嘛 ~

7 點左右去食飯   食完就番屋企喇 ~

沖埋涼再開機洗衫   搞掂哂就上網睇嘢   我要 Relax 呀 ~

今晚 10 點 45 分都自己瞓先喇   瞓得幾多得幾多   之前真係瞓得唔係幾好呢 ~

陶源酒家 @ 尖沙咀 ( 30-JUL-2019 )

( 30-JUL-2019  TUE )

今朝 7 點起身   同里奧大人一齊食早餐   因為今朝有 "不合作運動"   所以我食完都諗住出門口喇 ~

本來我係搭地鐵過海嘅   但我要搭嘅路線已經完全關閉   所以我即轉搭巴士   感恩車程好暢順   11 點唔夠已經去到灣仔   但我係考 1 點半   哈哈 ~

咁唔緊要啦   我覺得最緊要早啲到   起碼個人定啲   今次無里奧大人陪我   又係第 1 次搭巴士去考試場地   感恩落車地點係之前經過嘅地方   里奧大人又 Cap 咗落車方向比我   咁就略略知道自己行咩方向呢 ~

見時間咁早   我都行咗陣   仲買咗 3 條裙 1 條褲   咁又幾開心喎   可能呢排成日溫習   無咩時間放鬆下 ~

咁買完就去大家樂坐下溫習下啦   不過之後開始多人    我都去會場等喇 ~

食唔到午餐   所以買咗個包   去到會場就一路食一路溫   雖然有啲把握   但都想繼續溫下 ~

咖啡酥 ($12)   又幾好味喎   可能個人緊張   食啲甜甜地嘅嘢係舒服啲   哈哈 

排隊登記嘅時候   職員話無我個名   再 Double Check 都真係無   真係晴天霹靂啦   之後即打比我朋友   原來真係聽朝先考   堅想喊出黎囉   唉   我唔係嬲佢   而係我好想快啲考   唔想又驚多日囉 ~

之後打比里奧大人啦   其實我把聲又未開   佢聽我電話嘅時候   佢又啱啱入 Lift   佢勁驚以為我發生咩事   把聲好似喊咁呀   哈哈 ~

成個人無哂心機   又要驚多日喎   咁我約咗中醫又未到時間   咁搭巴士出去啦 ~

去到彩虹村就搵地方食嘢喇   已經 3 點   又熱喎   開始無力同埋餓喇 ~

日式叉燒拉麵 配金桔檸檬珍珠綠茶 ($46) - 個麵條有啲硬   反正有時間   浸耐啲先食

食完抖陣就睇中醫   醫師話我個人勁濕又肝鬱結呀   之後幫我打脈   第 1 句問我   知唔知自己心跳得好快   我話個個中醫同西醫都咁講㗎   咁佢話我心跳好快   係 108   之後抖陣再 Check   居然係 111 添   佢個樣仲驚過我   哈哈   再量埋血壓   上壓 148   下壓 98   唉   之前我啲血壓指數好靚仔家嘛    真係考完試之後要好好調理番身體   同埋去徑步呀 ~

睇完都 4 點幾   咁我去完廁所就走人啦   之後問姑娘點樣開門 ?!   佢好尷尬咁同我講:  妳未比錢呀   我真係太大意喇   完全忘記比錢   咁佢話我星期五都會睇   到時比都可以   但我話咁都唔好啦   真係唔好意思囉   第 1 次睇就咁樣衰   佢一定記得我   因為我唔記得比錢   哈哈 ~   

又唔想周圍去   咁去圖書館溫習多一陣先   諗住溫到 6 點   但里奧大人 5 點放學   我又要走喇   溫得半個鐘   我自己都喺度笑   放低 Notes 無耐又話走 ~

今晚約咗姊妹 J & 弟兄 J 一家去尖沙咀   咁里奧大人就陪我拎藥先   之後再行去酒樓 ~

其實今晚係姊妹 J 公司嘅宴會   佢諗住幫我慶功   點知變咗加油   哈哈 ~

世界好細   姊妹 J 同事又帶朋友去   佢朋友係姊妹 J 老公嘅同事   咁到姊妹 J 嘅同事   原來又係我哋教友 ~

好開心我抽到 Table Prize   同埋我哋嗰枱幾乎個個中哂獎咁滯   我咃係 Guest 都有得抽㗎 ~

食到 9 點幾   影埋大合照都走人喇 ~

感恩去到即有巴士   番到屋企都即沖涼 ~

里奧大人 11 點瞓   我就 11 點半先瞓呢 ~

大家樂 @ 官塘 ( 29-JUL-2019 )

紐西蘭西冷牛扒 (蒜蓉汁) ($69) - 蒜蓉汁又幾好味喎

酥皮周打魚湯 - 個湯唔熱   好在酥皮無腍咋 

( 29-JUL-2019  MON )

今朝里奧大人上堂   所以又陪我食早餐 ~

菇場唔忙   今日係我最後衝刺喇 ~

Lunch Time 出去買墨丸河番菇場   其實我唔想出去   但菇場太凍   要食熱嘢暖身囉 ~

溫呀溫   好感恩係我答啱好多題   起碼有啲信心啦   哈哈 ~

放工即走   番到屋企抖陣   等埋里奧大人整埋啲嘢就出去食嘢   原本已經 7 點喇 ~   

我同里奧大人都唔太餓   所以 Share 食一個扒餐就夠 lu ~

食完即番屋企沖涼   之後再溫習   溫埋就唔駛再溫呢   好開心   哈哈 ~

里奧大人 10 點半瞓   我溫到 11 點半先瞓   聽朝要早起身呢 ~

韭菜餃 + 菜肉餃 (外賣) + 節瓜鹹蛋湯 ( 28-JUL-2019 )

( 28-JUL-2019  SUN )

今朝 7 點半起身   食埋早餐就番教會喇 ~

崇拜完畢之後   我就有姊妹友伴週   所以里奧大人就去圖書館   因為佢 12 點要去剪髮   唔想周圍滕 ~

我完咗之後都去圖書館溫習   等埋里奧大人剪完頭髮就一切去街市買水餃同生果   食埋下午茶就番屋企喇 ~

半溶芝士牛肉豬仔包件野菜沙律 ($34) - 都幾好味

炸香茅雞脾拚薯條 ($30) - 超級大隻   所以食唔哂呀 

里奧大人熨衫   我就溫習   5 點半勁眼瞓   好大聲同里奧大人講話頂唔住呀   嚇死里奧大人   哈哈   講完之後都瞓鬼着   好似鬼上身咁   嘩哈哈哈 ~

瞓到 6 點   咁都好   瞓咗陣真係精神啲嘅   但瞓得太耐就唔好喇   夜晚瞓唔到㗎 ~

6 點半預備滾湯   7 點幾先開餐 ~   

是日懶餐 - 韭菜餃 + 菜肉餃 (外賣) + 節瓜鹹蛋湯

韭菜餃 + 菜肉餃 (外賣) - 唔想出街食   最簡單就係煮餃子   我又鍾意食呢   哈哈 ~ 

節瓜鹹蛋湯 - 之前買咗幾隻鹹蛋   我驚壞呀   所以就滾呢個湯囉   無落肉㗎   都好好飲 ~

洗埋碗就大清潔廁所   沖埋涼就休息 ~

睇多陣電視就溫習   里奧大人就 10 點 45 分瞓覺   我溫完就睇多陣電視   11 點半先瞓 ~

京饌 @ 官塘 ( 27-JUL-2019 )

南翔小籠包 ($52) - 皮薄餡唔多   但都好味道

鴨菘配叉子燒餅 ($128) - 我覺得貴   但真係好味   我鍾意食松子仁同馬蹄

蔥油海蜇皮 ($75) - 又係我至愛   哈哈   好在里奧大人都幫手食咋

( 27-JUL-2019  SAT )

尋晚去咗 2 次廁所   所以今朝瞓到 10 點半   咁我起身嘅時候   里奧大人叫我估幾點 ?!   我話唔係 12 點呀嘛 ?!   我真係唔想瞓到咁晏囉   我想有時間溫習嘛 ~

沖埋涼就去食早餐   之後番屋企溫習 ~

食食下   我 Feel 到自己心跳突然 "迫迫卜卜"   勁驚呀   之後合埋眼嗰下係黑色   好似休克咁   好在之後大力呼一口氣   咁好番啲   但有啲啲暈   今次堅勁驚   好似同死神咁接近 ~

考完試   我一定要去睇中醫調理身體   命仔緊要呀 ~

今日去醫院做義工   所以 1 點要出門口   但其實我完全唔記得係今日做義工   好在里奧大人 Mark 低咗咋 ~

去到時間啱啱好   人齊就開始 Briefing   聽到要陪談就勁緊張喇 ~

院牧安排咗 1 位院友比我   原來係個婆婆   但佢唔去呀   佢話腳痛好攰   想瞓覺   咁我都唔會勉強嘅   但我就勁大打擊啦   唔會得我一個無病友呀嘛 ~

之後院牧再安排另一個比我   又係婆婆來㗎   佢好 Nice   咁我話我哋係基督教嘅   佢好驚咁講話佢係裝香   但我仲驚啦   唔知點回應佢嘛   所以我真係覺得自己要好好裝備自己呢 ~

我好感動   佢都投入詩歌敬拜   又好細心聽見証   之後我問佢想唔想聽福音 ?!   佢笑笑口話想   真的感謝神   佢仍都想參與呢啲活動   最搞笑佢話醫院遠呀   我話梗係唔會番嚟醫院參加啦   院牧會安排屋企附近嘅教會㗎   哈哈 ~

4 點唔夠就送齊哂院友上房   之後到我哋義工分享   我仲要第 1 個   真係毫無心理準備   哈哈 ~

但今次我真係覺得整個過程都係神嘅帶領   雖然我都驚唔知點做好   但感恩係當中都係平安嘅   起碼我嗰位婆婆好 Nice   更加感恩係佢想聽福音   所以我就更加開心呢 ~

大家分享完都走喇   咁去 APM 行陣啦   因為 5 點食飯真係早得滯   哈哈 ~

但行到 5 點 45 分又開始攰   咁我話去京饌食嘢喇   食完可以早啲番屋企 ~

食完番屋企   都原來已經 7 點幾喇   咁沖埋涼就休息一陣   溫習一下都唔溫喇   真係好攰 ~

我 11 點幾都瞓   里奧大人就繼續睇 Youtube ~

海皇粥店 @ 九龍灣 ( 26-JUL-2019 )

一品餐 ($61) 
海皇一品粥 + 輕盈鮮蝦腸粉 + 油炸鬼 (半份) 

蝦腸都 OK

唔脆嘅

炸兩 ($22) - 里奧大人話食少少   我話我幫佢食啦   叫完之後好後悔啦   其實佢食我套餐啲腸粉同油炸鬼咪得囉



芒芒彈彈 ($19)

( 26-JUL-2019  FRI )

今朝同里奧大人食早餐   反而係早咗食   怪不得成日覺得唔太餓啦 ~  

奶醬多

油醬多

菇場唔忙   繼續努力溫習 ~

Lunch Time 出去行陣   再買酸辣米線番菇場食 ~

仍然溫習   不過好鬼眼瞓呀 ~

放工即走   里奧大人送完機就番九龍灣   咁我唔想食飯   所以去食粥   但唔好食嘅   唉 ~

食完就番小組   今晚得 7 個人咋   第 1 次咁少人   但反而可以傾偈   哈哈 ~

10 點唔夠就散會   番到屋即都沖涼休息喇 ~

今晚真係唔溫習喇   呢排攰   好似越溫越唔入腦咁   睇埋新聞   11 點幾都瞓 lu ~

翠河餐廳 @ 官塘 ( 25-JUL-2019 )

豆豉鯪魚油麥菜套餐 ($68)

菠蘿咕嚕肉 ($59)

( 25-JUL-2019  THU )

唉   又嚟爛臉   真係好唔想照鏡囉   嗚嗚 ~

早餐食吞拿魚治烘底   好想食魚呀 ~

菇場唔太忙   繼續溫溫溫 ~

勁餓呀   所以 Lunch Time 一到就飛去買嘢食   買完之後即飛番菇場食呀 ~

忙咗陣就溫習   今日唔眼瞓   可能頭先飲咗杯咖啡 ~

放工即走   番到屋企等埋里奧大人整啲嘢   差唔多 7 點幾先去食飯 ~

今晚食咗包辣薯片   如果食埋呢啲辣椒乾就辣喇   不過我都覺得係辣   哈哈

食完飯去超市買嘢   之後都即番屋企   沖埋涼再開機洗衫   呢排都係叫里奧大人幫手熨衫   今晚佢又要熨 3 機衫了 ~

9 點半開始溫習喇   溫溫下習   里奧大人無啦啦同我講妳塊臉敏感紅哂呀   之後望住我笑   再話唔怪得妳唔想番小組啦   同埋其實呢次考試好大壓力   所以唔想見人呀   哈哈 ~

里奧大人 11 點就瞓   我就溫多 40 分鐘先瞓呢 ~

八方雲集餃子專門店 @ 官塘 ( 24-JUL-2019 )

韓式辣味鍋貼餐 ($39) + 5 隻招牌水餃

( 24-JUL-2019  WED )

感恩瞓得唔錯   但係仲想瞓耐啲囉   哈哈 ~

早餐食奶醬多   唔想食咁飽 ~

番到菇場   忙咗陣又溫習喇 ~

同里奧大人食 Lunch   食完又番工   幾咁充實   哈哈 ~

仍然溫習   但之後勁忙   搞掂哂都放工 lu ~

放工即走   番到屋企抖陣先   差唔多 7 點先出去食嘢 ~

里奧大人話無咩胃口   咁我話食餃子啦 ~

食完去超市買嘢   之後都番屋企 lu ~

沖埋涼就開機洗衫   抖陣又溫習 ~

今晚有啲攰   11 點幾都要瞓喇 ~

韭菜餃子 (外賣) + 蠔油菜心 ( 23-JUL-2019 )

( 23-JUL-2019  TUE )

今朝起身都精神   所以又早咗出門口   哈哈 ~

早餐食蛋治   茶記阿姐們一定會再問我一次係咪唔烘底 ?!   因為我多數食烘底   但我覺得蛋治唔烘底都好好味呢 ~

菇場忙咗陣   做完就溫習   一溫習就開始有啲眼瞓   呵呵 ~

Lunch Time 出去買生果   之後再買牛筋丸米番菇場食   原來已經  1 點 ~

仍然 "洽" 住眼瞓溫習   所以差唔多放工就好精神喇   哈哈哈哈 ~

番到屋企抖陣就煮拉麵   雖然無益   但唔想成日出去食   想喺屋企抖囉 ~

7 點開餐   食麵真係要慢慢食   咁都好   順便當抖下 ~

是日懶餐 - 韭菜餃子 (外賣) + 蠔油菜心

韭菜餃子 (外賣) - 我叫里奧大人喺官塘廣場買架   $29/8隻   非常之唔好食   哈哈 ~    

蠔油菜心 - 好耐無食正氣嘅菜   但唔甜囉   今餐拉麵又唔好食 ~

洗埋碗再大清潔廚房   沖埋涼就食生果   之後休息喇 ~

溫習到 10 點半   真係溫唔到入腦   所以睇 Youtube   睇到 11 點半先有啲眼瞓   咁就瞓喇 ~ 

米線陣 @ 官塘 ( 22-JUL-2019 )

大汗霸氣雞扒蕃茄湯米線 ($57) - 湯底無味嘅

炸雞扒好味   但真係勁熱氣   哈哈   唔夠瞓食炸嘢真係驚驚哋㗎   不過好想食呢

蟹捧 + 紫菜 + 手打豬肉丸米線 (麻辣蕃茄湯底)

( 22-JUL-2019  MON )

感恩一覺瞓天光   呢排有啲壓力   所以有時瞓得都唔係咁好呢 ~

早餐食吞拿魚治烘底   餓呀 ~

菇場唔忙   大粒唔喺度   可以全力溫習   哈哈 ~

同里奧大人一齊食 Lunch   食下傾下都唔知原來已經 1 點半   要即番菇場喇 ~

辛味咖哩雞肉意大利麵 ($68) - 我覺得幾好味   可能我好想食意粉

香煎雞扒蛋包飯 (咖哩汁) ($58) - 今次個咖哩汁味道比較淡

估唔到 Lunch Set 有 Dreyers 雪糕   仲諗住埋單走人添

仍然溫習   做啲唔識嘅題目   真係令到我好似瞓着   哈哈   所以間唔中都會上網   比自己抖下 ~

放工即走   同里奧大人去官塘廣場買護髮素   行多陣就去米線陣食嘢喇 ~

食完就番屋企   因為里奧大人要影証件相   所以要換衫再去影   咁我問佢駛唔駛我陪 ?!   估唔到佢話要   仲話如果無我陪佢   佢唔識笑喎 ~

講到咁   唔陪都唔得啦   咁到佢試影嘅時候   佢都笑得比較含蓄   接近苦笑   所以再正式影嘅時候   我真係要做動作引佢   佢先識笑   同埋笑得自然啲   出面見到我咁樣   以為我氹緊細路仔影相添呀   哈哈 ~

番到屋企都即沖涼喇   睇完新聞就溫習 ~

今晚勁呀   溫到 11 點半   其實唔望個鐘都唔知咁夜添呀   所以要即刻瞓喇   里奧大人就繼續上網睇嘢 ~