福源餐廳小廚 + 港記糖水 @ 官塘 ( 30-APR-2017 )

中式牛柳  


海味什菜煲

例湯  

@ 港記糖水 紅豆沙涼粉 (凍) 


( 30-APR-2017  SUN )

今朝 11 點半都起身   食埋早餐又番屋企抖 lu ~



又開機洗衫   睇下電視   瞓陣覺 ~

咁我都唔想食下午茶   所以叫里奧大人食埋尋日買嘅雞尾包算喇   今晚早啲食飯好過 ~

6 點幾出發去福源   食完再食埋糖水就番屋企喇 ~

難得呢幾日好天   所以再開機洗衫   終於洗哂之前果啲衫   爽 ~

睇下電視   又係 10 點唔夠都瞓   啲藥真係好勁呢 ~

粟米蛋花湯 ( 29-APR-2017 )

( 29-APR-2017  SAT )

今朝約咗家姐食早餐   勁開心呢 ~



食下傾下又到 8 點 45 分   係時候要番工 lu ~

番到菇場都係眼晾晾   完全唔知自己做緊咩   哈哈 ~

放工即番屋企   今日本來同里奧大人屋企人拜山同食自助餐   但最後我都無去啦   個人仲係飄飄浮浮咁 ~

咁我番到屋企即食抗生素   因為喉嚨仲好痛   食完無耐   勁想嘔呀   可能空肚食藥 ~

平時睇呢個醫生   我多數係每月一到先睇   咁好少食佢啲藥   因為我主要係瞓覺   但今次喉嚨痛   咁當然要食佢啲藥啦   點知里奧大人話做咩食佢啲藥   明知佢啲藥咁勁   我就慶啦   話喉嚨痛到死   梗係要食藥啦   唔係睇佢做咩 ?!

之後里奧大人又話我咀唇都白哂   佢話唔去拜山喇   之後話我負累佢   又負累到姑奶要自己去拜山   我好嬲咁話: 你走啦   我唔想負累你呀 ~

佢又想去又唔去咁   我話我瞓覺就 OK 啦   唔想負累你呀 ~

佢食完 Lunch 又買咗 2 個包比我   懶好咁   之後又問我點   我話無嘢   係咁 ~

4 點打完 5 點又打嚟   咁驚我有事就咪去啦   煩 ~

瞓醒咗又同冰姑傾下偈   傾咗個幾鐘   之後有啲餓   咁煮粟米湯啦   夠簡單 ~

抖多陣都已經 7 點幾   係時候沖涼喇   因為越遲就越唔想沖涼㗎   想瞓覺多啲囉 ~    

里奧大人 9 點幾打嚟   不過我無聽囉   原來佢 7 點半又打過嚟   不過我沖緊涼唔知   成日係咁打嚟   想好好地瞓都唔得   咁擔心就唔好出去啦 ~

佢番到嚟第一句問我有無嘢 ?!   我話無   心諗   有事就唔喺度啦 ~

10 點幾都瞓喇   真係好鬼攰呢 ~

翠河餐廳 @ 官塘 ( 28-APR-2017 )

芝士肉醬焗意粉



每一條意粉都有肉醬   好味道呀  



梅菜扣肉飯 - 好味但真係好 Heavy   哈哈  

( 28-APR-2017  FRI )

今朝起身打番去菇場請病假就繼續瞓   瞓到 11 點半 ~

一開手機   家姐又 Send 咗張麻油同麥片相比我   咁我刷埋牙   都幫佢去睇下啦 ~

去到又買唔夠 $100   所以唔買喇 ~

里奧大人話師父會 1 - 3 點嚟裝機   咁無問題啦   我全日喺屋企 ~

番到屋企都 12 點半   食埋個杯麵就抖下 ~

師父 1 點 10 分嚟到   1 點 45 分搞掂   咁我都開機衫洗下先 ~

里奧大人今日 3 點喺太子見客   應該都會早啲番到屋企呢 ~

晾埋衫就瞓喇   一瞓瞓到 5 點   啱啱里奧大人番嚟 ~

抖多陣就去食飯   食完去 759 睇麥片   里奧大人話幫我排定隊   我話唔駛喇   叫佢番屋企先   我好驚咁樣囉   好有壓力呀   所以真係唔鍾意咁 ~

即幫家姐再睇有無麥片啦   不過都係無   之後見到 Market O 好抵   佢話要   咁我買啦   排咗 40 分鐘隊呀   勁攰   無計啦   全場貨品 7 折真係好吸引嘅   啱買嘅話 ~



日清抹茶穀物麥片 / 日清果漬穀物麥片  ($42/包)   7折 之後就好抵呀   咁買滿 $100 再 95 折   真係超級抵囉



$15.9/盒  7 折後就$11.1/盒   我即買 2 盒比里奧大人番公司食呢   今次覺得自己好勁   居然無買到任何零食比自己



番到屋企抖多就沖涼   其實真係勁唔想沖涼洗頭   不過知道一定過唔到自己嗰關   哈哈   始於落過街   一定會污糟囉 ~

沖埋涼   睇多陣電視   10 點幾都瞓喇 ~

翠河餐廳 @ 官塘 ( 27-APR-2017 )

腐乳通菜炒牛肉



鎮江肉排 - 得個酸字



( 27-APR-2017  THU )

嗚嗚   喉嚨超級勁痛囉   加埋又骨痛   慘 ~

早餐食麵餐   雖然喉嚨痛食熱嘢辛苦   但真係想濕下個口囉 ~



菇場忙下停下啦   但我一路係咁中眼瞓囉 ~

$7.5/支都買啦   好過飲可樂+鹽   哈哈   因為單買一罐可樂要 $6.8   好貴囉 



當喉嚨劇痛嘅時候   我覺得佢哋其實無咩用   完全舒緩唔到痛楚嘅

Lunch time 本來諗住瞓   不過家姐打嚟話 759 買麥片好平   咁我幫佢買啦   佢肯定鍾意食先會咁問我囉   而我唔買都會唔安樂   哈哈 ~

買完番到菇場都差唔多要開工 lu   咁慢慢食埋個包裝蛋糕   其實無胃口   但無嘢落肚又唔得喎 ~

勁呀   我估我真係瞓鬼着咗   因為開眼嘅時候   好似斷咗片咁   咩都諗唔起 ~

今日里奧大人 3 點喺大陸見客   番到嚟香港應該同我差唔多時間   正呀   可以快啲食飯休息 ~

放工即去睇醫生   好在唔駛等咋 ~

但估唔到等藥先耐   咁我拎完藥一轉身   見到里奧大人喺我後面   嚇鬼死我咩 ~

買埋 2 個木瓜就去食飯   之後即番屋企喇 ~

沖埋涼就休息   9 點 45 分都瞓覺喇   真係勁攰囉 ~  

八方雲集餃子專門店 @ 官塘 ( 26-APR-2017 )

( 26-APR-2017  WED )

尋晚里奧大人醒咗 2 次叫我食 Panadol   又係咁摸我個身熱唔熱   辛苦佢呢 ~

佢今朝仲要 6 點起身上大陸   肯定好攰呀 ~

我今朝都瞓到 8 點 15 分   其實都唔係咁舒服   不過今日好多嘢做   費事請假 ~

買埋芝腿治就番菇場   不過食咗少少就唔想食   喉嚨好鬼痛呀   嗚嗚 ~

菇場忙到爆   不過我真係要慢慢做   周身骨痛   行步路都慢過人   哈哈 ~

Lunch Time 即瞓   瞓到 1 點 10 分   之後醒咗   但唔夠 5 分鐘又瞓番   瞓到 1 點 37 分   嚇死 ~

仍然忙下停下   好攰呀 ~

今晚里奧大人要訂埋洗衣機   所以叫我自己食嘢先呢 ~

食埋嘢就叫人搬走洗衣機   回收價十蚊雞   仲以為可以有五十蚊執添 ~

搞掂哂就沖涼   個人仲係好凍咁   捱多一晚   再唔好就聽晚睇醫生   咁順便等冷氣機安裝 ~

里奧大人 8 點幾先搞掂   之後佢買兩個木瓜番嚟   鞋都未除就切個木瓜比我食   真係唔食唔得啦   雖然個木瓜生生哋 ~

仍然有啲燒   仲係 39.2 度   但個人勁攰   10 點唔夠都瞓喇 ~ 

小王牛肉麵 @ 鑽石山 ( 25-APR-2017 )

半筋半肉麵 (粗麵) ($60) - 我覺得無咩味   定係因為我唔舒服   所以無味呢 ?! 



原汁牛肉麵 (粗麵) ($53) - 里奧大人話 OK 喎
 


欖菜肉碎四季豆 ($58) - 就咁食欖菜肉碎好鹹   呢啲餸真係只可以送白飯呢   哈哈 
       


( 25-APR-2017  TUE )

呢排個人好攰   好似作唔舒服咁   唉 ~

個人又凍   所以今朝食米粉餐喇 ~



菇場忙下停下   但個人沾寒沾凍咁   睇黎作燒咁 lu ~

Lunch Time 出去幫里奧大人買麵包   順便買埋做 Lunch   其實唔想食包   不過貪佢夠方便囉   個人好攰   想快啲番菇場休息 ~

唉   應該發燒了   拿拿聲食粒 Panadol   諗住抖下啦   點知又忙 ~

做到 5 點 45 分先走喇   今晚去荷里活廣場睇洗衣機   本來唔想去   但真係好想快啲有洗衣機用囉 ~

里奧大人 7 點 15 分放工   我話食牛肉麵啦   因為得呢間唔駛等位   哈哈 ~

佢一嚟到   我叫佢除件褸比我着呀   好鬼凍囉   同埋食咩都無味咁   應該唔舒服 lu ~

食完再同里奧大人去睇洗衣機   送貨時間唔湯唔水   咁要諗諗先 ~

番到屋企即沖熱水涼   之後食粒 Panadol   探熱係 39.5   但咩都唔理喇   10 點就瞓覺喇 ~

睇嚟今晚里奧大人都瞓得唔好㗎喇   實會係咁摸摸摸我呢   哈哈 ~    

擔擔麵醬炒雞絲銀針粉 + 腐乳通菜 + 炸魚皮 (外賣) + 蕃茄薯仔紅衫魚湯 ( 24-APR-2017 )

( 24-APR-2017  MON )

又星期一了   涼咗好多呀   又要着番長袖衫   仲要係厚厚地果隻先夠暖 ~

早餐食腿蛋治   天氣凍   要食啲熱嘢 ~



菇場忙下停下   時間過得好快 ~

Lunch Time 行一田   之後就去 7 仔買咖哩烏冬   今次轉食墨魚丸   無咁悶   哈哈 ~



終於可以 Hea 到放工   今晚去改手機 Plan   之前喺電話講就話 4G 係快速   咁去到門市話轉 Plan   其實只係頭 3G 係快速   不過我都係會轉嘅   $136/月都抵   但就唔鍾意佢哋啲手法囉   完全同呃人無分別 ~

好快搞掂   之後去街市買橙   買埋包炸魚皮就走喇 ~

番到屋企已經 6 點半   滾落湯諗住抖   點知里奧大人 7 點放工了   咁又要即刻煮嘢 lu ~

是日晚餐 - 擔擔麵醬炒雞絲銀針粉 + 腐乳通菜 + 炸魚皮 (外賣) + 蕃茄薯仔紅衫魚湯  

擔擔麵醬炒雞絲銀針粉 - 又清埋樽擔擔麵醬   勁開心 ~  

腐乳通菜 - 清埋尋晚剩嘅半斤菜   仍都係蘸腐乳   好味道 ~ 

炸魚皮 (外賣) - 好想食香口嘢   所以買炸魚皮   感覺有益過薯片咁   哈哈 ~

蕃茄薯仔紅衫魚湯 - 呢兩晚滾嘅魚湯啲顏色都唔靚嘅   唔知關唔關啲魚事呢 ~

個洗衣機仍然漏水   本來約咗師傅 7 點整洗衣機   後尾佢話遲啲   之後話改聽晚   里奧大人話唔可以囉   第一我真係趕住用   第 2 佢咁拖   之後唔嚟都似 ~

佢 9 點先嚟到   之前叫我開住洗衣機   睇邊到漏水   終於知道邊到漏水   但佢無零件   要搵番  Whirlpool   咁即係嘥氣啦   保養期過咗 9 萬年   不過部機算係咁啦   用咗十幾年   係時候要退役了 ~

佢比番一半錢我哋   咁是但啦   拎番 $300 都好 ~

搞到接近 10 點   即沖涼啦   攰到我死死下 ~

睇多陣電視   11 點都瞓喇 ~     

雞絲炒油麵 + 腐乳通菜 + 蕃茄薯仔紅衫魚湯 ( 23-APR-2017 )

( 23-APR-2017  SUN )

今朝 9 點半鬧鐘響   諗住番教會   但見里奧大人未醒   我都唔叫醒佢喇   佢呢排真係攰到甩轆呢 ~

之後一齊瞓到 11 點 15 分   夠哂精神啦   哈哈 ~

梳洗完就去食早餐   食完就去買餸   里奧大人就要番屋企做公司嘢 ~

無咩胃口   比埋半件脆豬比里奧大人食   唔通佢唔夠飽 ?!   平時成日話脆豬甜甜甜家嘛   哈哈  





番到屋企都 1 點   擺好哂啲嘢就熨 2 機衫   攰到我呢   要抖陣先沖涼 ~

今日體力勞動   所以好鬼餓   2 點幾即去食下午茶 ~

我真係好鍾意食碎蛋呢   但里奧大人就最唔鍾意食沙律醬





食完真係精神好多   番到屋企抹好哂嘢就休息   之前果排好攰   好似無咩做家務   真係周身唔聚財   依家抹乾淨哂   個人真係舒服好多呢   哈哈 ~

不過睇睇下電視   都瞓咗半個鐘   起身嘅時候已經 5 點   要開始預備煮飯喇   咁 7 點就可以開飯呢 ~

是日晚餐 - 雞絲炒油麵 + 腐乳通菜 + 蕃茄薯仔紅衫魚湯 

雞絲炒油麵 - 上次里奧大人話想食油麵   咁今晚煮啦   用辣擔擔麵一齊炒   咁唔駛自己再調汁   夠哂方便 ~

腐乳通菜 - $8/斤   但今晚要食湯渣   所以煮半斤   唔係又要格硬食好慘 ~         

蕃茄薯仔紅衫魚湯 - 好想飲湯   所以即煲啦   聽晚都係呢個湯 Again   哈哈 ~

搞掂哂就沖涼休息喇   睇下電視   今晚 11 點都瞓 lu ~

上海榮華川菜館 @ 官塘 ( 22-APR-2017 )

小籠包 - 無肉汁嘅   真係後悔叫到就真囉 



回鍋肉 - 味道 OK 呀  


排骨粗炒 - 賣相嚇死人   好似就咁將啲茨汁林落塊豬扒度咁   同埋好難食囉   得個鹹字 

@ 港記 
馬蹄露黑珍珠 - 都 OK 啦   但食落都係有陣蛋嘅腥味



一片片馬蹄   份量都多

綠豆沙涼粉



綠豆沙真材實料   唔知有無海帶呢 ?!   有就真係超級涼㗎   後生時食綠豆沙   食咗好多塊海帶   因為爽爽地好好食   第朝起身見暈呀   人生第一次暈就係食綠豆沙   所以對佢有啲抗拒呢   哈哈

 


( 22-APR-2017  SAT )

今朝 7 點 20 分起身 lu   因為約咗家姐食早餐 ~





之前萬寧買一送一   所以家姐就益我喇   哈哈 
  
              

咁傾呀傾   同家姐講話前晚胃痛到想死呀   可能食咗凍嘅糯米雞   估唔到家姐第一句話 : 媽咪唔會咁㗎   實整番熱囉 ~

家姐話佢朋友光光兩公婆   話我上次食海鮮都好細食   其實我想講係佢咃大食咋   之後話我個樣超勁似媽咪   完全成個媽咪咁   我話係咪似得咁交關呀   哈哈   不過我睇番媽咪後生啲相   我都覺得好似望緊自己咁㗎   到我依家老喇   睇番媽咪同我年紀相同嘅相   咁咪一樣樣囉   呵呵 ~

不過家姐啲舊同事同朋友   個個一見到我   就話我同媽咪一樣樣   剪髮表妹又係話我勁似姨媽   有時直頭叫我姨媽添㗎   衰   但里奧大人話我個樣唔似媽咪喎   可能佢未接受到我老咗個樣   哈哈 ~

今朝食到 8 點 45 分都走喇   番到菇場都係遲咗少少 ~

菇場忙   但無 Mood 做呢 ~

放工番屋企   差唔多 2 點幾 3 點有人嚟整洗衣機   整咗半個鐘   餓到我呢   整完即刻去食嘢喇 ~







買埋光管就番屋企   開機洗衫又抖下喇   本來想煮飯   但真係好攰   都係出街食好啲 ~

諗住 6 點出門口   點知洗衣機又漏水   激鬼氣   好在及時發現   唔係又變水塘了   又要 Call 番師傅黎整啦   不過最快都要星期一囉   唉 ~

搞掂哂都 6 點半   本來諗住去福源   但我話試下間上海菜 ~

呢間咁嘅榮華   服務態度勁差   不知所謂   唔會再有下一次 ~

下次真係要睇 Openrice 先試其他食店   因為如果一睇見服務態度差   我係唔會去   食飯係開心家嘛   唔係受你氣囉 ~

食完就去食糖水   因為啲嘢好鹹呀 ~

去埋駱駝漆拎嘢就番屋企   本來諗住徑步   但可惜落雨 ~

今晚涼咗好多   沖埋個涼   睇多陣電視   11 點幾都瞓喇 ~