( 31-JAN-2014 年初一 )
大年初一喇 祝個個都身體健康 龍馬精神 財源滾滾來 ~
10 點起身 叫里奧大人去麥當勞買早餐番屋企 share 食 都懶得落街 ~
本來諗住直接喺屋企樓下 join 埋媽咪 家姐去婆婆度 不過家姐話媽咪想我地去佢屋企拎利是 一馬當先喎 咁是但啦 去咗媽咪屋企先囉 最搞笑係媽咪唔知我地黎 係咁同家姐講話出門口 咁家姐即 whatsapp 比我 問我喺邊 其實我都差唔多到架喇 之後我叫佢入廁所啦 咁媽咪就唔會催啦 哈 ~
我叫里奧大人叫媽咪個名 媽咪以為真係有人搵佢呀 搞笑 ~
派完利是就出發喇 好感恩好快有的士 因為新年係好難有的士架 ~
今年婆婆唔煮新年飯喇 所以去酒樓食呀 ~
咁我比完錢再比利是個司機叔叔 佢收完之後就即刻去開車尾廂 我無為意架 之後家姐同我講話佢一收完利是即開車尾廂 但頭先黎嘅時候 係家姐自己開架咋 哈 ~
去肇順飲茶 不過就唔係叫點心囉 因為婆婆話尋晚食過條魚 覺得好好食 所以就黎呢間 同埋叫個餐喇 ~
年初一食飯 多數只係大舅父 舅母同護士表妹 大食同剪髮表妹 今次大食媽咪都有黎 因為想見我媽咪 所以我覺得好感動呀 ~
婆婆叫個餐係 $2,488 嘅 咁食到個馬拉糕之後 有個侍應同我地講 話同我地落單嘅侍應搞錯咗 我地食緊嘅份量係大份嘅價錢 叫我地同酒樓 share 個差額 一人讓一步喎 咁我即問差額幾多啦 佢話 $500 但我話事實係妳地錯喎 我話等婆婆番黎先再講 因為婆婆比錢家嘛 不過婆婆話無所謂 咁講真 新年流流都唔想嘈囉 ~
籠仔荷菜蒸蝦 - 好在食咗早餐 因為我唔慣早餐食蝦 哈哈
錦繡乳豬大拚盤 - 因為最尾先轉到黎 所以家姐第一句就話無咩乳豬嘅 仲想夾比阿妹食添 我聽到之後勁感動
翡翠象蚌帶子
脆皮沙律海皇卷
紅燒花膠雞絲翅
發財好市添大利
清蒸游水海石斑
脆皮一品燒雞 - 我都幾鍾意食脆皮燒雞架
臘味糯米飯 - 如果再煙韌 d 就更好呢
步步高陞 - 好巨好過癮 同埋都幾好味
原來佢地剔錯咗 $2988 不過我地個個睇都唔知係錯 因為係婆婆一早叫定咗呢
食到差唔多 3 點就走喇 大食表妹一家就去婆婆屋企坐 媽咪同家姐就打的番屋企 我同里奧大人就坐 106 去 Sogo 其實如果唔係里奧大人要買西裝 我都想去婆婆屋企坐囉 ~
好感恩去到 Sogo 買到西裝呀 1 套西裝 + 1 條西褲都係 $2,300 左右 抵呀 仲要係 last one 如果去婆婆屋企坐就真係可能買唔到架喇 因為都不斷有人黎試西裝 woo ~
勁想飲咖啡 所以去 McCafe 我想快 d 用哂 d coupon 呀 仲有 6 張未用 但 5 月就到期囉 我好驚拖下拖下又過期呀 ~
金榛朱古力咖啡 - 好飲呀
鮮奶咖啡
特濃朱古力蛋糕 - 又係好好味
坐 619 番屋企 今晚一定要煎糕食喇 ~
是日懶餐 - 金腿瑤柱蘿蔔糕 + 如意馬蹄糕
金腿瑤柱蘿蔔糕 - 家姐買比我地食架 喺翠園訂嘅 好足料呀 同埋好好味 加埋余均益辣椒醬同甜醬 真係絕配呢 ~
如意馬蹄糕 - 又係好足料呀 大大粒馬蹄 正呀 ~
沖埋涼就睇之前錄嘅電視劇 睇到 12 點幾呀 但唔瞓唔得 因為聽朝要 10 點起身呢 ~
回鍋肉 - 都幾好味
宮保雞丁 - 姑奶食咗 3 嚿雞丁 話 d 雞丁應該係壞咗 有陣味 好在我無食咋
排骨粗炒 - 我無食呀
糖糟魚塊 - 後加嘅 都 ok 啦
酸辣湯雲吞 - 個湯係暖 雲吞就熱喇 @@
( 30-JAN-2014 THU )
今朝里奧大人 10 點要去九龍灣見客 所以又陪我食早餐喇 開心開心 ~
好多人其實都唔駛番工 所以我係包車坐 正到呢 哈哈 ~
菇場一定唔會忙啦 最忙係狂睇 email 囉 睇下有無得放早嘛 ~
好喇 10 點未收到 email 8 卦話最多 4 點 我話磁場要去 1 點就 1 點 之後 11 點喇 仍都收唔到 email 8 卦直頭話唔會放早 不過我話以前試過 12 點先出 email 我就話 11 點半會收到好消息 估唔到真係 11 點半先出 email 放 1 點 超勁開心呀 ~
放工即走啦 九龍灣橋底有好多檔口開咗呀 我都買啡色同深灰色嘅厚身絲襪 不過佢話無貨 但個客留咗仲未到 所以比我呀 哈 $100/2對 其實我唔知舖頭賣幾錢架 但我相信依家街邊檔都唔平囉 ~
非常之開心 因為有 $1 現金咭 雖然 $1 唔多 但平時係寫 d 咩幸運指數架咋 一係就買 d 咩飯盒蛋糕就平 $2 咁囉 不過果 d 嘢我都唔食嘅
番屋企等里奧大人 咁唔會做家務家嘛 咁就入利是同整好存盒 一路等佢啦 一入完就即打黎 時間啱啱好 ~
去金姆指食 tea 食食下佢話今晚同 3 姑奶食晚飯 我咪話佢囉 尋晚同佢講咗 2 次今晚要煎糕食 唔係無時間食 佢又話好好好 點知無啦啦又話上次姑奶話約我地年三十晚食飯 所以去食 大佬 好多嘢未做家嘛 ~
食到好飽 所以去馬莎睇西裝 之後再食埋冰雪新地就番屋企喇 原來都已經 5 點幾 lu ~
約咗 7 點半 咁我都唔抹嘢住喇 因為唔想抹到出汗又要沖涼 ~
等等等 等到 9 點 我發火喇 我話我仲有好多嘢未做 等到 9 點半 黎唔到就唔好食 唔好嘥我時間要我咁等囉 ~
咁 9 點 10 分里奧大人打比姑奶 佢話佢開始走喇 咁我地去金加利攞位啦 點知去到收咗舖 真係痴線架 5 點幾問佢今晚收幾點 佢答我地 11 點收 10 點半 last order 架 都唔知佢地點做嘢 ~
咁諗住去別府 不過姑奶唔食日本嘢 話去上海婆婆喎 咁是但啦 其實我唔鍾意上海婆婆架 因為佢地 d 服務態度唔係咁好 ~
食到 11 點就番屋企 即拖地抹嘢啦 好在 11 點就搞掂 ~
今晚 1 點先瞓呀又 好在聽日開始放假 可以瞓晏 d d 呵呵 ~
鎮江骨 - 今次勁唔好食呀 好似食緊煲湯瘦肉咁 因為媽咪話太耐無煮呢個餸 所以煮咗好小時間 d 肉唔淋呀 @@
羅漢齋
鴨舌 - 今次無咩味 所以我都忍唔住同媽咪講 婆婆整得好好食架
煎帶子 - 媽咪煎嘅時候話出哂水 我都無為意 之後見到碟帶子就知咩事 我話係咪要撲生粉煎架 唔係點會金黃色喎 不過我都唔知係咪架 我又唔識煮嘢 哈
髮菜冬菇蠔豉豬橫脷湯
金車厘子
( 29-JAN-2014 WED )
好多人都收爐喇 不過我仲要番工 oh ~
早餐食腿蛋治烘底 今次 d 麵包好煙韌咁呀 勁正 因為好小會有咁嘅口感呢 ~
菇場靜啦 廠都收爐 其實我地真係應該唔駛番啦 哈哈 ~
晏晝同 8 卦出去食飯 之後再行一田買嘢 番到菇場啱啱好 1 點半 ~
超級勁大碗嘅牛腩河
8 卦嘅梅菜肉餅飯
放工番媽咪屋企食飯 家姐買埋嘢先番 所以 7 點幾先開飯呢 ~
糖不甩朱古力 - 喺舊式零食店賣 $10/包 點知一田賣 $18.5/2包 激鬼氣 所以買多 4 包 咁樣除番開去 覺得抵 d 哈哈
唔係好甜嘅朱古力 餡就煙煙韌韌 唔錯唔錯
差唔多 8 點半就走喇 番到屋企已經見到里奧大人食緊車仔麵 好似好慘咁 哈 ~
里奧大人就好啦 聽日放 2 點 我就咩都唔知囉 慘 ~
沖埋涼睇陣電視 今晚 11 點瞓喇 ~
沙律汁天婦羅雞球飯套餐
好有驚喜 因為 d 雞球好入味 正呀
薯仔沙律 - 太飽了 比里奧大人食
壽司 / 天婦羅烏冬定食
壽司好新鮮
好味呀 同埋唔會好油
我鍾意食呢 d 酸酸地嘅牛蒡 因為食完飯好鬼飽 食埋 d 酸嘢會消滯好多呢
三文魚腩壽司 - 好新鮮呀又
( 28-JAN-2014 TUE )
又好似暖番 d 咁 我終於可以着喺泰國買嘅褸 實在太神奇喇 泰國咁熱嘅地方買褸 講出黎 d 人都好大反應問我係咪買冬天褸 ?! 搞笑 ~
間唔中都會試下里奧大人聽唔聽我講嘢 咁我 jel 頭嘅時候 我話我好滿意今次嘅電髮 散發女人味之餘 又帶點少女情懷 ( 講完我都想嘔 哈哈 ) 之後條友呢 笑住做葫蘆嘅手勢 葫蘆只係曲一次 佢就曲幾次 即係話我 d 肉一節節呢 又話做親呢個手勢都好攰喎 之後又話郵筒同米芝蓮係我嘅戰友 呵呵 我話見你笑得咁開心 我真係唔捨得瘦呢 嘩哈哈 ~
今朝食芝腿治烘底 呢期嘅麵包烘得唔錯 希望之後都係咁啦 ~
菇場唔忙喇 可以做下自己嘢 lu ~
晏晝有 lunch box + 肉汁 所以係好鬼飽呢 ~
今晚去鰂魚涌睇中醫 不過唔叫家姐陪啦 佢又唔同我一齊食飯 所以唔想佢陪我 咁佢可以早 d 番屋企食飯呢 ~
感恩去到有得睇 差唔多 6 點 45 分就睇完 我搭地鐵番九龍灣 點知掛住同 frd 傾計 去咗北角 之後又要番轉頭去番鰂魚涌 唉 d 藥又重喎 勁辛苦 ~
今晚同里奧大人食團年飯 所以我要食定食 哈哈 去到要等位 感恩等咗 5 分鐘就有位呀 ~
佢 7 點半到 未到已經打黎叫我叫定壽司佢食 成日都係咁 大佬 我都啱啱坐低咋 ~
食完就去許留山食龜苓膏 話驚熱氣喎 ~
番到屋企即煲中藥同開機洗衫 之後就沖涼喇 實在太飽 所以熨 2 機衫當做運動 ~
之前行年宵買架 一個自己 一個媽咪比媽咪
今晚 11 點幾瞓 呢排瞓得都唔係咁好 可能成日食熱氣嘢呀 哈 ~
