辣醬焗金沙骨 + 鹹蛋菠菜 ( 31-MAR-2022 )

尋晚食剩嘅臘腸同白飯

好想食煎堆   所以又買嚟食

( 31-MAR-2022  THU )

尋晚瞓得好一般   其實呢排都係咁   唔知係咪個人有肝火   哈哈 ~

今朝里奧大人鬧鐘響   我話我起身先   因為要做快測   之後里奧大人話 7 點幾咋   因為尋晚無熄鬧鐘   真係比佢激死囉   咁之後我都瞓到 8 點 10 分先起身 lu ~

雖然里奧大人 WFH   但佢會陪我食早餐呢 ~

我同里奧大人講話聽日記得校啱鬧鐘   唔好再響兩次   之後叫佢 "醒定啲"   佢話妳啲語氣都幾夠霸氣   哈哈 ~

番到菇場   阿齋話又見到我   我話掛住妳嘛   佢話我講大話   之後我同 8 卦講話佢瘦咗   因為佢嘅女神無番   阿齋聽到又話我講大話    我話好喇喎   今朝成日話我講大話   我話唔係真心話啫   但唔代表係大話   哈哈 ~

勁忙呀   咁都好   真係眨下眼就到 11 點 45 分咁 ~

Lunch Time 去買菜同咖啡   之後買醬料同麵包   加加埋埋又好重   所以買埋炒麵就番菇場喇 ~

仍然超級忙呀   感恩做哂啲 Urgent 嘢   其他可以慢慢做 ~

4 點半準時放工   沖完涼又抖下   其實都接近 6 點   又要預備晚餐了 ~

我覺得 WFH 期間   真係好自然買定多啲嘢食   因為我唔會出街食嘢嘛   同埋如果同里奧大人一齊 WFH   就更加要買定多啲嘢食添呀

是日懶餐 - 辣醬焗金沙骨 + 鹹蛋菠菜

辣醬焗金沙骨 - 其實我都鍾意整金沙骨   因為就咁焗完加醬汁就搞掂 ~

鹹蛋菠菜 - 又清咗呢兩樣嘢   實在太開心 ~

洗完碗就一個鐘先   但其實依家仲未習慣   成日差啲走去沖涼呀   哈哈 ~

跳完舞都即開機洗衫   唔想搞到咁夜   咁再等到無流汗先沖涼 ~

睇陣 Youtube   話咁快就 12 點   係時候要瞓喇 ~

今個月只係番咗 9 日工   感覺真係好似放假   所以之後回復正常番工時間   真係要早啲瞓   始終要 7 點幾起身呢 ~

蒸臘肉 & 臘腸 + 菜心苗 ( 30-MAR-2022 )

里奧大人中午食剩半個飯盒   可以留番做晚餐   我話第時叫佢買定多一個都好   之後佢話都可以呀   番到嚟唔駛整就食得   我話我要再焗熱架   放咗半日點可以就咁食㗎

( 30-MAR-2022  WED )

尋晚瞓得勁差   里奧大人都係咁   可能無開風扇有啲熱   但我上床瞓覺係覺得好凍喎   咁無理由開風扇嘛 ~

9 點唔夠都醒咗   但整呢樣整嗰樣   差唔多 9 點半先食早餐 ~

抖陣就拖地   之後抹雪櫃   再將所有嘢入儲物盒   咁樣整齊好多嘛   所以又整咗個幾鐘 lu ~

沖埋涼就抖下   差唔多 1 點就食 Flakes + 乳酪   抖陣再飲雞骨草   好在無肚屙   哈哈哈哈 ~

呢隻 Flakes 都幾好味

對手仔好長咁

咩料呀   哈哈

佢應該係想瞓覺

3 點左右溫書   一溫就溫到 5 點半   時間過得真快   我以為溫咗個幾鐘咋 ~

里奧大人接近 6 點放工   咁我都要預備晚餐喇 ~

是日懶餐 - 蒸臘肉 & 臘腸 + 菜心苗

蒸臘肉 & 臘腸 - 想多一樣餸又唔想開焗爐   所以就蒸臘味 ~

菜心苗 - 食埋今餐又要諗食咩菜   可能又買番菠菜 ~    

洗埋碗就抖陣   今晚 7 點 45 分可以跳舞喇 ~

又出咗成身汗   希望好瞓啲啦   哈哈 ~

沖埋涼就睇陣 Youtube   11 點鬆啲都瞓喇   尋晚瞓得唔好   今晚真係好早眼瞓   哈哈 ~

燒肉汁焗雞翼 + 菜心苗 ( 29-MAR-2022 )

( 29-MAR-2022  TUE )

感恩一覺瞓天光   所以 8 點 10 分醒咗都即沖涼番工喇 ~

早餐食奶醬多   茶記阿哥一聽到我把聲就好開心咁   佢真係好搞笑   去到拎外賣   又即刻問點解咁耐唔見 ?!   咁我話依家隔日番工   同埋番晏咗   會喺屋企食埋早餐先番工呢 ~

菇場超級勁忙   真係飲杯水都唔得閒 ~

Lunch Time 出去買菜買包買米粉   之後去一田買年糕同魚肉燒賣   順便買 2 支雞骨草   最後買埋魚片頭米就番菇場喇   咁又已經 12 點半了 ~

唔想食嘅時候買嚟食   真係覺得唔好食   哈哈   但因為想食啲熱嘢   所以先買囉   唉

仍然忙   感恩 4 點左右搞掂   可以安心等放工 ~

放工即走   番到屋企放低嘢就去超市買椰子水   因為有生日 Coupon $15   所以買夠 12 支   但其實仲有 2 張就到期   咁番屋企放低椰子水   之後再出去睇下有無其他嘢啱買 ~

無嘢啱買   所以我再買多 12 支椰子水   咁比錢嘅時候   職員話積分可以換 $10   同樣都係月尾到期   而積分係無指定金額先可以用   諗住買鈣思寶 9 包   減咗就只係 $30   咁我唔知抵唔抵   因為我無買開嘛   所以即打電話比家姐   佢話如果係 $30 就抵呀   咁我即買夠 4 Pack 就可以用積分嘅 $10 同埋 2 張生日 Coupon ~

最後買咗 12 支椰子水 + 36 包豆奶   家姐話叫里奧大人幫手拎先買啦   我話唔等喇   唔想再行來行去 ~

里奧大人番嚟見到咁多飲品   佢都話睇見都重  我話加埋係 39 磅呀   依家條腰好痛呀   哈哈 ~

出一出去又用咗個幾鐘   真係無諗過咁耐   所以即刻沖涼再拿拿聲煮晚餐喇 ~

是日懶餐 - 燒肉汁焗雞翼 + 菜心苗

燒肉汁焗雞翼 - 用牛角燒肉汁醃咗兩晚   不過味道都唔係好夠咁 ~

菜心苗 - 今日買架   仍然要 $18/斤   所以買 1 斤算喇 ~

洗埋碗就抖下   之後食蕃薯糖水  我話想聽日食  但里奧大人話驚會壞   所以今晚食埋去呢 ~

串串共

對眼好大

沖埋涼就休息   膊頭勁痛呀   腰就更加唔駛講啦   所以唔敢跳舞呀 ~

睇下 Youtube   今晚都係 11 點幾瞓 ~

粉絲蝦米旺菜 + 蒸臘潤腸 + 蕃薯糖水 ( 28-MAR-2022 )

( 28-MAR-2022  MON )

今朝 9 點唔夠都醒咗   咁都整早餐 lu～

抖陣就做下家務   之後熨衫   沖埋涼都已經 12 點 ~

見佢咁樣   我都想瞓   哈哈

1 點半食 Lunch   我想同平時番工食飯時間差唔多咁   唔想 2 點食下午茶時間先食呀 ~

整理下啲文件又用咗成個鐘   之後里奧大人瞓覺   我就溫書喇 ~

又係 6 點唔夠都預備晚餐   依家比多咗時間預備   個人舒服好多   煮完唔會發睥氣   哈哈 ~

是日懶餐 - 粉絲蝦米旺菜 + 蒸臘潤腸 + 蕃薯糖水

粉絲蝦米旺菜 - 醒起雪柜有蝦米   所以即刻拎出嚟浸喇   其實我唔鍾意食蝦米   但家姐係都要比我   咁我都要食嘛   唔想浪費呢 ~

蒸臘潤腸 - 仲有一大碗咖哩雞肉   所以今晚蒸臘潤腸算喇 ~

蕃薯糖水 - 我買栗子蕃薯   所以覺得好香好甜   今晚嘅晚餐同糖水   真係老人家餐   哈哈 ~

洗埋碗就休息   差唔多 9 點先開始跳舞 ~

跳完舞再 Cool Down   加埋都要 45 分鐘   所以早啲跳係好啲嘅   哈哈 ~

沖埋涼就睇 Youtube   今晚仍然唔駛開風扇瞓覺   呢啲天氣舒服   但就潮濕囉 ~

睇下睇下又 11 點幾   要即刻瞓喇   聽日大家都要番工呢 ~

咖哩雞肉拚司華力腸 + 福花 ( 27-MAR-2022 )

咖哩配刀削麵都好正

( 27-MAR-2022  SUN )

今朝 9 點 15 分食早餐   我其實朝朝食同一款包都得   但里奧大人話朝朝食同一樣嘢會反胃喎   搞到我今朝特登煮多隻蛋   之後又排包又糙米芝士包咁   等佢無咁悶囉 ~

食完抖陣就同里奧大人網上崇拜   完畢之後   里奧大人就繼續開工 ~

呢排天氣潮濕   真係全屋企做哂大清潔同消毒   我同里奧大人講話做到無嘢好做添   哈哈哈哈 ~

1 點半左右食 Lunch   咁今晚唔駛太夜食晚餐 ~

加咗煲仔飯豉油 & 辣豆板醬 & 甜醬   當堂勁重口味   哈哈

里奧大人 3 點幾話瞓晏覺   咁我溫書啦 ~

家姐工人每朝都飲朱古力奶   所以我成日幫佢睇下有無特價   今日家姐嚟咗貨   所以佢就一定話我知   等我唔駛特登去睇   家姐話朱古力奶同薯片都係比工人   我話工人肥咗都係因為妳   哈哈

6 點唔夠預備晚餐   所以今晚都好快可以開餐   嘻嘻 ~

是日懶餐 - 咖哩雞肉拚司華力腸 + 福花

咖哩雞肉拚司華力腸 - 田師傅咖哩包真係好味又方便   今晚材料有 4 件雞柳 + 2 條司華力腸 + 1 個細薯仔   咁樣應該可分 3 餐食   哈哈 ~

福花 - 終於食完   之後應該買菜心苗 ~

洗埋碗即開機洗衫  今晚飲咗米酒呀   所以唔跳舞喇   咁可以即沖涼 lu ~

呢兩晚要沖熱水涼   仲要沖完之後覺得凍   咁即係又凍咗   今晚都唔駛開風扇瞓 ~

最搞笑里奧大人望個鐘   之後話依家 9 點幾咁早咋 ?!   我話因為無跳舞   所以好似多咗好多時間咁囉 ~

睇下 Youtube   今晚都係 11 點幾瞓覺 ~   

黑椒金菇肥牛 + 福花 + 蕃茄薯仔湯 ( 26-MAR-2022 )

( 26-MAR-2022  SAT )

今日同里奧大人都係放假   所以瞓到自然醒   估唔到瞓到 10 點 15 分   其實我諗住自己最多瞓到 9 點就醒㗎喇 ~

里奧大人要開一陣會先可以食早餐   咁我自己食先 lu ~

食完又抖下   但里奧大人 12 點半要再開會   開咗半個鐘都有   仲以為今日放假可以休息添   哈哈 ~   

2 點左右食午餐   食番前晚剩嘅肉醬意粉 ~

家姐要 Update 電腦   所以 3 點幾左右嚟到我屋企   之後無啦啦又比利是比我同里奧大人   話上次佢出咗 Bonus 喎   又話我出雙糧同 Bonus 都會比埋 Berry   我話上年嘅事啦   比來比去麻鬼煩 ~

里奧大人幫家姐整電腦   我就可以同家姐傾偈   真係好耐無見真人咁呀   哈哈 ~

佢好開心話今晚煮新嘢呀   我話煮咩呀 ?!   佢好怕羞咁笑住話 "蝦滑蒸豆腐"   我話免治豬肉都得㗎   不過工人唔食豬   咁蝦滑就仲好啦   大家有得食 ~

之後話工人嚟咗唔係好耐   但已經肥咗 10 磅   工人仲好開心話之前係有經痛   但依家無經痛   可能唔駛拎重嘢   咁都好   我成日覺得工人有病好慘   唔似我哋有 S/L   可以喺屋企休息咁呢 ~

家姐一場嚟到   又比十幾 Pack 快速測試包同泰國米粉比佢   始終唔係好似以前每星期見嘛   所以見有咩就比咩佢 lu ~

坐咗 45 分鐘都要走喇   因為佢要出去整嘢 ~

我諗住滾湯啦   點知家姐 Whatsapp 話有蒜蓉醬比我   我寫 "你唔要就比我"   家姐即用語音訊息講 "Sorry 喎   我唔係唔要   係我預咗比你   雖然係贈品   因為見妳成日鍾意呢啲醬   所以我就比妳   唔係唔要囉"   佢把聲串到暈呀   哈哈   我話無尾音同 icon   個意思真係差好遠呀   哈哈 ~

傾多陣就真係要滾湯喇   今晚算早喇   7 點左右可以開餐 ~

是日晚餐 - 黑椒金菇肥牛 + 福花 + 蕃茄薯仔湯

黑椒金菇肥牛 - 本來想煮金菇牛肉卷   不過我唔想開鑊煎   所以剪碎金菇同牛板腱就放入焗爐   之後再加汁炒兩炒   但里奧大人話咁樣仲好味喎 ~

福花 - 一個分兩餐食就最好   買都方便啦   一次搞掂 ~

蕃茄薯仔湯 - 唔知點解突然好想食薯仔   平時我滾蕃茄湯都唔加薯仔嘛 ~

洗埋碗就抖陣   之後熨衫   搞掂哂就跳舞喇 ~

沖埋涼就真正休息   但其實都係睇 Youtube   哈哈 ~   

今晚 11 點幾瞓   天氣涼咗好多   所以直頭唔駛開風扇   但我話蓋哂成張被好熱   里奧大人話最緊要蓋住膝頭哥同肚肚膊頭   之後佢自己都笑住話即係蓋哂成個身咁滯   哈哈 ~

麻辣肚絲 + 夫妻肺片 + 紅油蒜茸青瓜 + 炸墨魚餅 + 傷心酸辣粉 + 海帶綠豆沙 (外賣) @ 屋企 ( 25-MAR-2022 )

麻辣肚絲 - 好辣  但好鬼正   哈哈

夫妻肺片- 呢個都係辣   我覺得份量少咗 

紅油蒜茸青瓜 - 想食好耐啦   依家小青瓜都貴   所以唔會買住

炸墨魚餅 - 呢個好味呀

傷心酸辣粉 - 我食紅薯粉   里奧大人就食米線

海帶綠豆沙 - 每人食一碗清清熱氣

( 25-MAR-2022  FRI )

尋晚瞓到半夜   個上顎有啲痛   但就唔係喉嚨痛   可能我丫大個口瞓覺呀 ~

感恩起身個上顎無痛咋   真係又要食炸嘢又要驚   之前真係晚晚食薯片都唔驚㗎   但依家就真係無食薯片好耐   始終好怕喉嚨痛呢 ~

8 點幾都食早餐喇   里奧大人 WFH   我都要早啲起身 ~

天氣勁潮濕呀   感恩個人又唔係好攰 ~

食完早餐就大清潔屋企同廚房   抖陣再大清潔廁所   沖埋涼就要休息了 ~

好掛住 Berry 女呀

1 點半食 Lunch   之後聽下歌 Relax 下 ~

尋晚唔記得食燒餅呀   所以今日再焗熱食

里奧大人 5 點放工   所以即出去剪頭髮 ~

我話今晚會煮飯   但里奧大人係都話買傷心酸辣粉   話難得出去喎   買埋番嚟食   咁唔駛我煮咁辛苦 ~

食完抖到 8 點就跳舞   依家鍾意喺屋企跳舞   因為唔駛換衫出街咁麻煩   哈哈哈哈 ~ 

沖埋涼都休息 lu   今晚 11 點居然眼瞓   所以自己瞓先喇 ~