麻辣手撕雞 & 招牌餃子 (外賣) @ 屋企 ( 31-AUG-2020 )

( 31-AUG-2020  MON )

今朝鬧鐘響   咁啱係發緊夢   所以起身嘅時候都溫溫燉燉咁   點知原來係 7 點 20 分   做乜咁㗎   又校錯鬧鐘   之後即瞓番喇   瞓到 8 點 20 分起身 ~

起身都有啲攰   但沖完涼就精神啲喇 ~

食埋早餐先番菇場   難得無人   同埋我都唔想番到去抹完枱先食   食完又抹枱   今日有啲攰   唔想做咁多嘢   咁食完番到去只係抹一次就夠   嘻嘻 ~

菇場又壞咗冷氣   好似無空氣咁   所以呢排一入公司就唔多舒服咁   今日又多嘢做   直頭要慢動作   因為我覺得有啲好似缺氧咁呀 ~

Lunch Time 出一田行陣   之後再買燒賣 + 米粉番菇場慢慢食 ~

今日 4 點半放工   買埋外賣就番屋企喇 ~

沖埋涼就休息   今晚只係淥餃子就搞掂 ~

本來就咁食餃子   但真係好想食手撕雞   所以最後都買咗 ~

6 點開始煮餃子   好快有得食   今晚一於快食快休息   哈哈 ~

食完就開機洗衫   之後都係再沖多一次涼   始終有啲汗都唔係咁舒服呢 ~

同里奧大人一齊睇 10 點半嘅 "這麼遠，那麼近"   我鍾意睇呢啲節目   因為好多地方係自己唔會去嘛   知道下都好吖   哈哈 ~

睇完都即瞓覺喇   依家都係早啲瞓   唔係第時正常上班時間嘅話   會覺得唔瞓得唔夠呢 ~

焗三文魚柳 + 焗什錦丸拼腸仔 + 粟米蛋花湯 ( 30-AUG-2020 )

間唔中想食甜點   所以喺奇華買咗馬仔

( 30-AUG-2020  SUN )

感恩一覺瞓天光   里奧大人 7 點幾起身番工   之後我都一瞓瞓到 9 點 50 分起身 ~

食埋早餐都抖下   之後到我大清潔屋企 lu ~

抹哂所有嘢再拖地   大清潔廚房同廁所   之後沖涼喇 ~   

今日 11 點做到 1 點半   我真係當做運動㗎   徑步都無流咁多汗 ~

里奧大人 2 點幾先放工   所以 3 點 15 分先食下午茶 ~

食完就抖下   里奧大人仍然做公司嘢 ~

我 5 點左右勁眼瞓呀   真係完全無動力郁   但就唔敢瞓囉 ~

6 點左右預備   今晚煮稻庭烏冬   所以唔需要太多時間 ~

是日懶餐 - 焗三文魚柳 + 焗什錦丸拼腸仔 + 粟米蛋花湯

焗三文魚柳 - 醃嘅時候都諗住開鑊煎   但當煮嘅時候諗起要大清潔廚房   我都係覺得放入焗爐好啲   哈哈 ~

焗什錦丸拼腸仔 - 我驚里奧大人唔飽   所以加幾粒丸   同埋清埋 4 條腸仔   最後掃層蜜糖就搞掂 ~ 

粟米蛋花湯 - 無買菜呀   所以佢又出現了 ~

洗埋碗就開機洗衫   之後沖涼   抖陣就食生果 ~

睇下 Youtube   睇到 10 點 50 分開始眼瞓   所以即瞓喇 ~

手打牛丸米粉 + 招牌牛腩粗麵 + 腐乳生菜 (外賣) @ 屋企 ( 29-AUG-2020 )

(  29-AUG-2020   SAT )

今朝同里奧大人瞓到 10 點自然醒   之後里奧大人就去買早餐   我都要梳洗喇 ~

食埋早餐就抖下   里奧大人 11 點半出門口   我都沖涼喇   差唔多 12 點先出發去家姐屋企 ~

好熱呀真係   好在家姐開定冷氣   我真係抖陣先想郁呀 ~

差唔多 2 點先食嘢   家姐頭先去買㗎   因為今日無車   唔想出去食 ~

麥樂雞 + 1 件麥脆雞

抖到 2 點幾   我話幫家姐執雜物房   佢話唔駛   不過我會照執   因為上星期講過今日執呢 ~

今日唔陪 Berry 玩喇

家姐成日買嘢   但其實屋企超級多嘢   因為佢買完就咁放喺度   即係有位就放咁呢 ~

潔而亮都有 12 支   仲問我要唔要 ?!   我話我屋企都有 6 支啦   大佬   我哋住埋一齊真係肯定唔掂   哈哈 ~

之後我幫佢掉咗 1x 支淋浴露呀   佢勁唔捨得   我話過哂期用到皮膚病呀   我話成日買買埋埋又求其擺   依家變咗浪費喇 ~

佢本身想買黐毛嘅紙   好在我幫佢執嘢咋   真係有幾 Pack 呀 ~

終於執好哂一邊櫃   我同佢歸類哂所有物品   廁所/廚房/車用品   我話如果唔記得位置就問我啦   同埋唔好執完又整亂   我最憎人咁㗎下 ~

之後再執另一邊   佢居然話原來新嘅吸塵機喺度   我話買完都唔知放喺邊嘅咩 ~

有一個大箱裝咗 B 仔麥包嘅床仔   家姐話唔捨得掉   我同姐夫話掉啦   家姐都想喊㗎   不過我話無謂觸景傷情   媽咪走嘅時候   我將媽咪所有嘢一件不留   我知我一望到就會喊   仲要諗番好多嘢   感覺真係好難受囉 ~

終於執咗 2 個大嘅黑色膠袋   我話係咪浪費物品同浪費位置吖 ?!

4 點半終於搞掂雜物房   咁我話幫佢執廚櫃   又掉唔少嘢   我話要食就同我講   我一定即刻買比妳   唔駛驚無得食喎 ~

執咗個幾鐘就搞掂喇   執開有條路   幫佢再執個櫃   等佢拎紙巾同口罩順手啲   其實仲有幾個櫃同廁所嘅柜未執好   我話下星期再執   最鍾意執嘢   哈哈   但家姐話好驚喎   掉哂佢啲嘢 ~

6 點飲湯   坐多陣就番屋企喇   家姐送我搭車   係咁問我攰唔攰   我話如果攰就唔會執嘢囉 ~

好搞笑   家姐問佢屋企乾唔乾淨 ?!   我話乾淨呀   只係太多嘢   我話唔係因為妳係我家姐先話乾淨   咁我執柜嘅時候   我無打噴嚏   同埋個咀唇無敏感囉   我仲無帶口罩喎 ~

因為之前試過去姑奶屋企一陣咋   我成個咀唇敏感呀   里奧大人睇住我個咀變咗紅色   仲痛咗一個星期添呀   嗚嗚 ~ 

番到屋企即沖涼喇   我都係唔煮喇   叫里奧大人買外賣番嚟食 ~

里奧大人 8 點半番到屋企   叫佢沖埋涼就開餐喇 ~

睇多陣 Youtube   11 點幾都瞓 ~

馬蹄煎肉餅 ＆ 咕嚕肉 + 肉鬆蒽花蛋炒飯 + 魚丸豆腐絲瓜湯 ( 28-AUG-2020 )

( 28-AUG-2020  FRI )

諗住尋晚早瞓實會瞓得好   點知都唔係   半夜醒一醒   之後好難先瞓得番囉 ~

本來里奧大人話同我食早餐   不過佢話瞓得唔好   所以唔陪我食   我話唔緊要喎   想瞓就瞓啦 ~

差唔多 9 點半先食早餐   真係算遲架喇   哈哈 ~

忙咗個幾鐘就搞掂   之後又做下自己嘢 lu ~

真係話咁快又 11 點 45 分   咁我落去行陣   買埋熱狗就番菇場喇 ~

10 點食完早餐   就算 12 點食都覺得早   所以我 12 點 50 分先食隻熱狗 ~

我覺得依家自己食嘢時間亂哂   又瞓得唔好喎   好在我番工係開心咋   唔係就慘 ~

忙下停下   但下星期就放 4 點半同埋暫停 WFH   我叫 8 卦提我唔好 4 點鐘就走咗去呀   哈哈 ~

放工即走   番到屋企沖埋涼就預備晚餐喇 ~

不過今日有啲餓   煮好哂都只係 6 點鬆啲   可以開餐喇 ~

是日晚餐 - 馬蹄煎肉餅 & 咕嚕肉 + 肉鬆蔥花蛋炒飯 + 魚丸豆腐絲瓜湯

馬蹄煎肉餅 & 咕嚕肉 - 尋晚食剩架   今晚再煎熱   其實勁想放入焗爐焗就算   不過炒飯都要開鑊   咁就慢慢煎香去啦 ~   

肉鬆蔥花蛋炒飯 - 里奧大人最鍾意食肉鬆   所以今晚佢食咗好多飯 ~

魚丸豆腐絲瓜湯 -諗住豆腐燜絲瓜   但都係想簡單啲   反正豆腐又過期一日   咁一鑊熟就最好啦   哈哈 ~

洗埋碗就大清潔   之後開機洗衫   沖埋涼就食生果 ~

睇下 Youtube 又 11 點幾   係時候瞓覺喇 ~

醬油燒汁豬軟骨 + 三杯馬蹄煎肉飯 + 菠蘿咕嚕肉 (外賣) @ 屋企 ( 27-AUG-2020 )

( 27-AUG-2020  THU )

今日我同里奧大人都 WFH   所以 8 點 45 分起身 ~

里奧大人去買早餐   我就去梳洗喇 ~

食完就抖陣   其實尋晚都瞓得唔好   差唔多 10 點幾   我都瞓着咗   一起身已經 11 點幾呀 ~

沖埋涼就煲石斛   之後又休息 lu ~

里奧大人要去買電池   所以 2 點幾就出去 ~

行完就去南記食嘢   之後去 MUJI 買零食   再去 Govida 食雪糕   食完就去烘焙店買嘢   搞掂哂就番屋企喇 ~

春卷魚片酸辣小鍋米線 + 可樂 ($36)

                           

家姐之前比咗 3 張 Coupon 比我   今次用住 1 張先   睇下到期前會唔會再出 Apeach 沙冰

                                 

沖埋涼煲羅漢果   咁聽日里奧大人可以喺屋企飲 ~

開機洗衫   之後休息   我仲係好攰咁呀   所以今晚唔煮喇 ~

家姐鍾意食棉花糖   所以都唔問佢要唔要喇   直接買 2 包比佢

                   

里奧大人 6 點出去買外賣   我同里奧大人講話成日要佢出去買嘢食   佢話係佢 WFH 工作之一   哈哈 ~

食完飯再食生果   之後都係抖   完全唔想郁 ~

今晚突然好眼瞓   10 點半都自己瞓先喇 ~

墨魚滑釀三色椒 + 芫茜皮蛋魚片湯 ( 26-AUG-2020 )

( 26-AUG-2020  WED )

尋晚瞓得麻麻哋   臨起身個夢仲恐怖   係我無戴口罩坐巴士   但當時唔覺    之後個場景轉咗係街市   見到有個女人係咁同我講嘢   我先知道自己無戴口罩呀   之後鬧鐘響喇 ~

勁唔想起身呀   呢排真係瞓得唔好   可能始終 WFH   次次假期後番工   就會有壓力瞓得唔好   驚唔知醒起身   但其實我已經校咗鬧鐘 ~

已經慢慢行   但都流哂汗   所以一定要飲凍嘢 ~

買完早餐就番菇場   真係無冷氣咁呀   唉 ~

最後我都忍唔住同 Receptionist 講話無冷氣   佢原來星期一都通知咗師父   不過唔知尋日有無到囉 ~

差唔多 12 點先出去買菠蘿叉燒包   其實想食熱狗   但無哂 ~

買完都即番菇場   之後師父到啦   原來成個 Office 真係無冷氣   除咗老闆房 ~

4 點準時放工   去埋街市買餸就番屋企喇 ~

一番到屋企就即沖涼   之後就預備晚餐 ~

里奧大人 6 點左右番到屋企   我話未食得呀   佢話唔緊要   8 點半先開會   本來我諗住買水餃   因為記得今晚要開會   點知去到街市又好想食釀辣椒   完全唔記得開會呢會事   怪不得我硬係覺得有啲嘢   但又諗唔到係啲咩 ~

是日晚餐 - 墨魚滑釀三色椒 + 芫茜皮蛋魚片湯

墨魚滑釀三色椒 - 好想食濃味嘢   所以就釀辣椒   買咗廿蚊墨魚滑   但釀三隻椒係唔多夠   本來想釀泡椒   但我好驚太辣呀   里奧大人話個汁好味道   見佢食飯都食得快   咁即係鍾意食   哈哈 ~

芫茜皮蛋魚片湯 - 係時間要飲魚湯   呢個最簡單   真係覺得自己好懶咁   但真係唔想煎魚呀 ~

洗埋碗又大清潔廚房   次次開鑊煎嘢都要抹個煮食爐   其實可以只抹一邊爐㗎   但唔鍾意好似做嘢做一半咁   真係自己攞嚟辛苦   哈哈 ~

沖埋涼就休息   里奧大人 8 點半準時開會   半個鐘頭就開完   算好快呀 ~   

11 點都都未眼瞓   咁睇 Youtube 睇到 12 點先瞓   但其實都唔眼瞓   但唔瞓唔得 ~

什錦丸拼金菇 + 自家制麵包 & 什果啫喱 ( 25-AUG-2020 )

( 25-AUG-2020  TUE )

今日 WFH   不過都係 8 點 20 分起身 ~

梳洗完就食早餐   之後就睇 Youtube ~

花生醬麵包   口感好 Soft

其實有時睇到攰   但唔敢瞓啦   一陣有人 Whatsapp 都唔知   咁就大鑊了 ~

沖咗個涼係精神啲   咁又打下機啦 ~

1 點幾食 Lunch   想正常時間食   唔係一陣夜晚又食唔落 ~

芝士肉鬆三文治 + 味噌湯

睇 youtube 又聽下歌   好快 6 點   預備晚餐   其實只係解凍   哈哈 ~

里奧大人 7 點幾先番到屋企   等佢沖埋涼都即開餐喇 ~

是日懶餐 - 什錦丸拼金菇 + 自家制麵包 & 什果啫喱

什錦丸拼金菇 - 好想打邊爐呀   所以拎哂冰格所有丸類出來   再加埋包金菇   之後蘸辣椒豉油   真係勁有打邊爐 Feel 㗎   食得勁滿足 ~

自家制麵包 & 什果啫喱 - 里奧大人同事整㗎   尋晚已經話定我知   佢哋今晚會同我會面   哈哈 ~

洗埋碗就即沖涼   之後又睇 Youtube ~

今晚好似有啲攰   所以 11 點 15 分都瞓覺 lu ~

黑椒牛扒 + 超甜粟米 ( 24-AUG-2020 )

( 24-AUG-2020  MON )

今朝 7 點 20 分鬧鐘響   但我明明已經 Off 㗎喎   咁熄咗就繼續瞓番啦   瞓到 8 點 20 分鬧鐘響 ~

里奧大人話攰   所以唔陪我食早餐   我話無問題啦   最緊要瞓夠 ~

今朝差唔多 9 點 25 分先食早餐   勁趕呀   食到髮尾都出汗   我覺得呢排菇場冷氣唔夠咁囉 ~

比錯奶茶   同埋個米粉係完全無味   最後食剩 1/3 真係食唔落   好反胃

食完都即開工喇   忙到顛咗 ~

唔知係咪飲咗杯奶茶   搞到成日想嘔咁   我唔可以飲正常奶茶㗎   一定要少奶   如果唔係我會好唔舒服 ~

12 點先出去買淨水餃   不過只得雲吞   咁照食喇   因為我想飲凍檸茶   飲完舒服好多 ~

做呀做   真係無時間飲水   次次焗完茶都只飲得 1 杯   嗚嗚 ~

今星期我番一三五   所以要快快手清哂手頭上嘅工作   感恩 3 點幾搞掂   可以抖下等放工 ~   

放工即走   番到屋企又係即沖涼 ~

里奧大人今日幫姑奶搬屋   其實好多都係垃圾   都唔知留番嚟做乜鬼   特別係佢啲衫   真係廿幾年前嘅款   仲話好貴㗎   我話貴又點 ?!   個款式仲要似登台衫   依家已經係 2020 年喇   我同里奧大人講話叫佢千奇唔好捐比人   一陣人哋皮膚病就慘   里奧大人喺度笑呀   因為我哋真係見個佢啲衫都已經發哂黃又發霉   真係咪害人啦 ~

今晚都係早食早休息   所以 6 點 15 分可以開餐喇   哈哈 ~

是日晚餐 - 黑椒牛扒 + 超甜粟米

黑椒牛扒 - 上星期六食剩㗎   所以今晚點都要煎埋去喇   再自己調黑椒汁   今次多汁   里奧大人最鍾意呢 ~

超甜粟米 - 上星期五買   又係要食埋去喇   諗起以前唔識煮飯嘅時候   真係以為粟米同超甜粟米有分別   依家就唔會上檔啦   哈哈 ~

洗埋碗就大清潔廚房   沖埋涼就食生果 ~

無花果 & 人參果   我兩樣都好鍾意食

好攰呀   所以唔做家務   所以里奧大人就幫手熨 2 機衫 ~

今晚 11 點幾都瞓  lu   依家番 10 點   所以比之前可以瞓多一個鐘   就係咁樣搞到自己啲時間亂哂   成日覺得夜啲瞓都唔驚   唉 ~

焗海鮮卷 + 廈門炒米粉 & 咸魚雞絲炒飯 ( 23-AUG-2020 )

里奧大人同事送咗罐鮑魚同隔熱夾比我呀   估佢唔到   哈哈

( 23-AUG-2020  SUN )

今朝瞓到 9 點 45 分起身   我覺得好晏咁 ~

食埋早餐就抖下先   抖到 11 點就大清潔屋企 ~

尋日喺 Market Place 買嘅栗子酥   里奧大人都拎咗 2 片番公司食   估唔到好好味   下次會再買嚟食

抹好嘢就執廚櫃   今次認真寫低哂廚櫃有啲咩喇   真係唔想重覆買   同埋最緊要睇下有無咩係就過期   要擺喺當眼位置   咁就記得煮架喇   哈哈 ~

寫好哂再執好去   之後即大清潔廁所   沖埋涼就抖喇 ~

話咁快又 1 點半搞掂   同我預計嘅差唔多   次次都差唔多兩個半鐘搞掂 ~

出咗好多好多汗   個人有啲攰   但又唔想瞓   所以飲支葡萄適 ~

里奧大人差唔多 2 點半番到屋企   等佢沖埋涼就一齊食下午茶 ~

食唔哂呀   所以留番夜晚再食

                                     

佢 4 點幾瞓到 6 點   我就聽歌   因為我飲完杯奶茶好精神呀   哈哈 ~

6 點幾預備晚餐  7 點半先開飯   但其實都無咩胃口 ~

是日懶餐 - 焗海鮮卷 + 廈門炒米粉 & 咸魚雞絲炒飯  

焗海鮮卷 - 唔想開鑊   咁就焗海鮮卷就算喇 ~

廈門炒米粉 & 咸魚雞絲炒飯 - 中午食唔哂   唯有夜晚食埋啦   仍然係焗熱佢   哈哈 ~

洗埋碗就開機洗衫   之後沖涼   抖陣就食生日蛋糕同生果 ~

以為只係得蛋糕

原來有榴槤蓉   估唔到都幾好味

Market Place 買嘅無花果算係大粒   只係 $58   都抵食

睇下 Youtube   其實諗住 11 點瞓   但居然瞓唔到呀   可能飲咗奶茶   最後 12 點先瞓呀 ~

黑椒牛扒 + 芋頭魚 & 香煎腐皮卷 & 什錦齋 (外賣) + 什果啫喱 + 榴槤蛋糕 ( 22-AUG-2020 )

( 22-AUG-2020  SAT )

今朝同里奧大人瞓到 10 點半自然醒   我話今日佢生日   不如同佢一齊出去食早餐   但佢話唔想   都係鍾意留喺屋企食   所以佢去買早餐喇 ~

一番到嚟就比封生日利是比佢   條友頭先話我無嘢比佢呀   咁我諗住今晚先比   不過比佢咁講   我都快快手比佢   等佢開心下   哈哈 ~

食食下早餐   家姐 Whatsapp 話想去淘大   之後同我食下午茶   咁又好喎   因為我本身都諗住去淘大買生日蛋糕比里奧大人呢 ~

食完抖陣就沖涼   里奧大人 12 點左右都出門口   點知原來家姐都上咗巴士   咁我都出發喇 ~

同家姐差唔多 12 點半到 DBS   之後再去滙豐   最後去埋渣打就搞掂哂所有嘢   咁同家姐一齊睇蛋糕   行到邊間都叫我買   但我話唔想要呢啲   之後佢話買啦   佢送比里奧大人食   終於明白點解係都要我買喇   不過我話想買雪糕蛋糕呢 ~

同家姐一齊行 Market Place   本來諗住就咁買牛角酥同栗子酥   之後又買埋蘋果同無花果同飲品   最後買埋今晚晚餐就走喇   哈哈~

家姐話請我去 Simply Life 食午餐   話賺咗利息喎   咁我都唔同佢爭喇   唔係一陣又比錢我 ~

烤蘑菇忌廉汁闊條麵 + 香草燒雞胸 + 燒野菌 ($88) - 個汁好味道   我同家姐都鍾意食烤蘑菇   估唔到雞胸都好味   哈哈

煎鰽魚 + 炒雜菜 + 香草燒薯 + 芥末籽汁 ($88) - 都好味道   我最鍾意食法邊豆

我覺得煎到好靚

芒果冰茶 - 味道淡咗啲

食完就去馬莎睇衫   估唔到做特價   所以同家姐一齊試衫   一齊買咗 3 件同款   咁佢再買多 2 件衫   Cashier 話買其中 2 件係第 2 件半價   另外 3 件係 9 折   咁話買 5 件就 85 折   叫我哋買多 2 件   咁試完哂衫   家姐話如果 Cashier 話再買幾多件係 75 折   佢好堅定語氣話唔會買㗎喇   笑鬼死我 ~

最後折咗係 $941 有 10 件衫   超級勁抵   其實本身啲衫已經係特價   有件只係 $99 同 $129   其他係 $149   但原價要 $299 㗎   咁減價再有折   同埋質地好舒服   真係好難忍手唔買呢 ~

買完就同家姐去 Pie & Tart 買肉鬆酥   之後就送佢搭車   行行下有個女仔喺我哋後面伸過頭埋來   嗰下我堅驚   完全認唔到係 CC 呀   佢話聽到兩把聲咁熟   所以即追住我咃喎   戴住口罩真係講嘢都大聲過人   好在無講人壞話 ~

其實 CC 都係 8 月生日   但我話疫情過後先一齊食飯   估唔到咁都撞到佢   但其實佢同家姐先有緣   成日等車都會見到   佢會陪家姐等車添㗎   仲話見家姐多過見我   哈哈 ~

送咗家姐搭車   望下手機原來已經 5 點   我以為 3 點幾咋 ~

即去買生日蛋糕同去 Taste 買牛扒   買完再拎蛋糕番屋企喇 ~

放低哂所有嘢就即沖涼   之後真係要抖下 ~

7 點幾預備   里奧大人 8 點幾番嚟就沖涼埋   之後開餐 ~

是日晚餐 - 黑椒牛扒 + 芋頭魚 & 香煎腐皮卷 & 什錦齋 + 什果啫喱 + 榴槤蛋糕

黑椒牛扒 - 喺 Taste 買 1 份醃好嘅   但份量好多呀   要分兩餐食   咁黑椒汁就係自己調教嘅   里奧大人話好味道   可能以為唔係我整   哈哈   我好鍾意食法邊豆   里奧大人唔鍾意食豆   但佢居然話好味   口感好爽脆   咁我上網睇煮法   煮 3 分鐘就用冰水浸住   所以有爽脆口感 ~

芋頭魚 & 香煎腐皮卷 & 什錦齋 - 全部喺 Market Place 買嘅   因為真係唔想煮咁多嘢   所以買其他嘢食   無理由只得牛扒家嘛 ~

什果啫喱 - 里奧大人同事比㗎   仲特登提佢拎番屋企呢 ~

榴槤蛋糕 - 我哋飲咗啤酒呀   所以唔食得   好在我哋都好飽   根本都食唔落 ~

今晚里奧大人係咁講好驚喜   因為估唔到我煮嘢比佢食   更加估唔到我買生日蛋糕比佢   佢話今次生日好開心喎   真係呢   以往好慘咩 ~

洗埋碗都即沖涼喇   已經 10 點喇   好夜咁呀   哈哈哈哈 ~

睇多陣 Youtube   差唔多 12 點先瞓呀 ~