菠蘿生炒骨 + 椒絲腐乳通菜炒牛肉 (外賣) @ 屋企 ( 31-AUG-2022 )

里奧大人又可以帶飯   真係唔錯   哈哈

( 31-AUG-2022  WED )

尋晚瞓得麻麻哋   個肚有啲痛   但想瞓得好啲   所以沖個熱水涼喇   真係舒服好多㗎 ~

瞓到 8 點 15 分起身   感恩個肚都 OK   不過個人都係比較攰 ~

最搞笑里奧大人開廁所門見我夾頭髮   嚇到佢叫咗出嚟呀   我都比佢嚇死   佢話見到 8 點幾   無諗過我仲喺屋企呀   哈哈 ~

差唔多 9 點 10 分先番到菇場   之後陸續有人番   其實我唔算遲   因為有同事日日都係 9 點半番到   所以我成日話拍卡無咩意思 ~

早餐都係食奶醬多   但其實好唔想食   但得呢樣多士可以留得囉 ~ 

菇場唔忙啦   11 點左右差啲瞓着   好在最後都開到眼   哈哈哈哈 ~

阿怪又發顛   大力拍枱又大力關櫃桶   全公司嘅人都聽到   因為起碼 7 次   真係有病咁   好恐怖囉   同埋真係好影響人哋呀 ~

Lunch Time 都唔出去喇   有啲攰   個個見到都話食咗2日烏冬喇喎 ~

仍然唔忙   放工準時走 ~

買埋晚餐就番屋企喇   不過我要沖埋涼先食呢 ~

8 點幾睇 "痞子殿下"   睇埋呢個星期就無得睇 lu ~

里奧大人公司同事整㗎   呢個勁好味呀   我第一次食流心月餅   因為我麻麻哋奶皇呢

今晚 10 點半再沖多次涼   等個肚暖暖地   希望瞓得好啦 ~ 

雞扎 + 燒賣 + 山竹牛肉 + 豉椒排骨飯 (外賣) @ 屋企 ( 30-AUG-2022 )

( 30-AUG-2022  TUE )

尋晚瞓到半夜   個肚又扯住痛咁   所以好難先瞓得番呀 ~

今朝 7 點 50 分先起身   個人無咁攰呢 ~

早餐都係食奶醬多   哈哈哈哈 ~

菇場唔忙啦   但無啦啦超級攰   原來每月一到   唔怪得咁攰啦 ~

Lunch Time 諗住瞓   但 12 點 15 分都瞓唔到   所以食杯裝烏冬喇   阿齋以為我今日食 Flakes   因為唔出街   哈哈 ~

仍然唔忙啦   但真係要搵人傾偈   唔係我會瞓着   所以同阿花 Whatsapp   時間就會過得好快 ~

放工即走   估唔到同里奧大人一班車   咁可以一齊買埋晚餐先番屋企 lu ~

沖埋涼先食   因為我好想暖下個肚呀 ~

食完抖陣再睇 "痞子殿下"   笑下都好嘛 ~

諗住食啲甜嘢   就食呢個迷你月餅啦   真係難食到一個點   完全無味   食緊麵粉咁   不過唔想浪費先食埋去囉

今晚 10 點半瞓覺   呢排都應該咁上下時間瞓㗎喇 ~

泡菜汁豚肉鍋 + 雞扒夜貓大碗飯 (外賣) ( 29-AUG-2022 )

以前里奧大人一定話我飲味精湯   依家佢話要留番啲湯比佢送飯呀   真係好搞笑

( 29-AUG-2022  MON )

感恩一覺瞓天光呀   但起身有啲頭暈   唔知係咪呢排成日食無花果呢 ~

早餐食奶醬多   感恩食得哂呀 ~

最緊要放張公司卡同女廁鎖匙

兩隻都唔係正貨   哈哈哈哈

菇場忙咗陣就可以抖下   個人好攰咁 ~

Lunch Time 出去行下   我想解凍呀 ~

行陣再買個吞拿魚包   今日無咩胃口 ~

唔忙就抖下   今仍然好攰咁 ~

阿齋請我食㗎   最搞笑佢襯我行開先放喺枱   但我出去之前見佢向我坐嘅方向望囉   之後佢唔認係佢   我開佢個袋   因為我知道佢頭先拎個袋去拎嘢   哈哈

仍然唔多舒服咁   好在有絲巾喺袋咋   阿齋話知我唔多舒服㗎喇   因為咁熱天時無可能用絲巾啦 ~

今晚要番學   所以里奧大人都番咗工   咁就可以去佢公司食晚餐 ~

食完再去里奧大人公司幫手做一陣嘢   之後我都要番學喇 ~

差唔多 9 點放學   感恩同里奧大人趕到班車呢 ~

番到屋企即沖涼休息   我今晚 10 點 45 分都瞓覺喇 ~

黑椒中翼 (外賣) + 白菜仔 + 自家制麵包 ( 28-AUG-2022 )

星期五食唔哂嘅炸雞

仲有肉醬意粉   同埋中午嘅腸粉

( 28-AUG-2022  SUN )

今朝 6 點幾都要起身   因為我陪里奧大人一齊番工   我話好想星期日同佢食早餐呀 ~

諗住都係坐下   估唔到有嘢做   實在太好喇 ~

我 11 點左右都走喇   直接去姑奶屋企比生日利是佢   之後傾咗半個鐘都走 lu ~

去埋街市再買午餐   番到屋企都 1 點 15 分   拿拿聲拖地再大清潔屋企   估唔到 45 分鐘搞掂 ~

里奧大人 2 點幾番到屋企   等埋佢沖涼就可以食午餐了 ~

洗埋嘢就大清潔廁所   之後沖涼休息喇真係 ~

里奧大人 4 點半瞓覺   我話睇 Youtube 唔瞓喇   睇睇下其實都好眼瞓咁   但係咁同自己講唔好瞓唔好瞓   點知一瞓就瞓到 5 點半   里奧大人就瞓到 6 點 ~

我都預備晚餐喇   差唔多 7 點就開餐呢 ~

是日懶餐 - 黑椒中翼 (外賣) + 白菜仔 + 自家制麵包

黑椒中翼 (外賣) - 喺青林買架   $18.4 有 9 折   仲估唔到有 9 隻咁多   有啲都幾大隻㗎   我真係覺得抵過我自己煮囉 ~

白菜仔 - 買咗 1 斤   今晚食半斤   蘸辣椒豉油真係好正～    

自家制麵包 - 頂爺係都要比 4 塊比我呀   好在我堅持要 2 塊咋   如果唔係肯定食唔哂 ~

整比里奧大人嘅飯盒  又係煮個日式炒麵就搞掂

開埋機洗衫就沖埋涼   之後同里奧大人一齊睇 2 集 "痞子殿下"   呢兩集好搞笑 ~

依家同 Berry 女只能每月一見

今晚我 11 點唔夠都瞓喇   里奧大人就睇下書先瞓 ~

辣椒肉碎飯 (外賣) + 麻辣粉 ( 27-AUG-2022 )

里奧大人問鳳爪駛唔駛蒸熱 ?!   嚇到我即刻打比去   因為驚佢唔係睇唔到訊息   同我拎去蒸熱呀   哈哈

上次買咗盒酸辣粉   但真係好大陣味   所以我話麻辣粉要喺屋企食囉

麻辣粉其實係粉絲   我已經無落包辣椒油   但都已經超級勁辣

( 27-AUG-2022  SAT )

尋晚半夜去咗廁所   之後瞓唔番呀   勁慘 ~

好在今朝可以 8 點起身   咁都算叫做有啲精神 ~

買完早餐再買雞骨草比里奧大人   之後即番菇場喇 ~

今朝都係食奶醬多   咁一陣就會食得落 Lunch 呢 ~

菇場唔忙   西瓜又出咗去   所以係咁同阿齋傾偈 ~

阿花送咗 2 支細嘅細頭水比我   多謝佢同車銀優   哈哈哈哈

放工即走   買埋午餐就番屋企 lu ~

今次嘅濕炒海鮮河有好多料呀

食完就同里奧大人去超市買嘢   之後沖個涼就休息了 ~

里奧大人 5 點幾瞓覺   不過瞓到 6 點左右都醒   我都要出發番學喇 ~

今晚早咗少少放學   不過我就唔買晚餐喇   食埋今日食剩嘅午餐就算 ~

里奧大人負責蒸熱晚餐   我都擺好哂駕步比佢   佢就咁放餸同飯就搞掂 ~

食完抖陣就沖涼   睇多陣 Youtube   11 點幾先瞓呢 ~

環遊世界 (薄批) + 炸雞 + 招牌肉醬意粉 (外賣) @ 屋企 ( 26-AUG-2022 )

招牌肉醬意粉 - 難得家姐話試下   我話更係好啦   因為我唔想留   不過都係食剩半盒囉 

( 26-AUG-2022  FRI )

今朝里奧大人鬧鐘響咗   但佢最後都係話番晏晝   其實今日佢係放假   不過公司太多嘢要跟   所以都番工   咁我又想瞓多陣   之後將鬧鐘校到 7 點 45 分先起身 ~

早餐食腿蛋治   雖然唔係太想食鹹嘢   不過更加唔想食甜嘢囉 ~

家姐話估唔到我食腿蛋治   因為見我好少食腿蛋   咁確實又係   但突然間覺得芝腿好鹹   咁我都真係麻麻哋鍾意食腿蛋治   可能以前成日食呀   哈哈

菇場忙下停下   之後家姐 Whatsapp 問我今晚食咩 ?!  我話應該焗扎肉啦   又問係咪煮麵 ?!?!   我話米粉啩   再問今晚去唔去街 ?!   我話唔出街呀   佢話喺咪喺屋企 ?!   我話唔出街梗係喺屋企啦   唔係去邊呀請問 ?!   之後佢話咁串嘅   哈哈哈哈 ~

佢話今晚想比月餅比我喎   咁我話一定無問題啦   今晚叫 Pizza 食仲好   佢又話 7 點幾太夜到   唔好等佢食   因為佢以為我 6 點半食飯   我話有時 8 點先食啦   所以我話今晚一齊食啦   提早慶祝中秋節呀 ~

其實都知佢會嚟   因為每次都會問好多嘢   佢好搞笑架   想嚟咪嚟囉   反正我夜晚除咗番學   基本上放工都係番屋企呢 ~ 

Lunch Time 去一田行下   因為想買盒無花果比家姐   好感恩我揀嘅兩盒都靚   因為其他好多青BB 咁 ~

拎住兩盒無花果真係勁唔方便   又唔可以放入環保袋   我仲去埋大生買 Jelly 比定姐   之後再去買麵包   最慘八達通又負數   所以要比現金買麵包   之後拿拿聲去增值   感恩頭先睇到係負數咋   唔係今晚搭車先知就麻煩啦   因為無手拎散紙啊 ~

一番菇場   幾個同事見我又買無花果就喺度笑   不過我話其中一盒係家姐嘅 ~

唔係咁餓   所以食 Flakes + 乳酪   行到個人出哂汗   所以食啲凍嘢都唔錯   哈哈 ~

菇場唔忙呀   好想快啲放工   哈哈 ~

放工即番屋企   之後里奧大人都番到嚟   我叫佢沖涼先喇 ~

家姐 7 點 20 分左右嚟到   咁我喺廚房整嘢出嚟   仲話 Pizza 未到呀   因為我唔見里奧大人拎 Pizza   點知再望張餐枱   見到份 Pizza 外賣 ~

原來家姐喺門口同外賣員交收   肯定佢想比錢啦   但里奧大人話聽唔到出面有人講嘢呀 ~

里奧大人好想買對防水靴比家姐   所以家姐一入屋   即叫佢試下我對啱唔啱 Size   但家姐話細得滯   可能搵日要同佢一齊買   不過佢一定會自己比錢囉 ~

原來家姐又買咗清熱酷比我呀   真係激鬼死   但佢先搞笑   叫我比番兩張 $5 Coupon 佢   咁佢聽日再買   我話用哂啦   我話妳自己都要買   咁妳做咩買比我呀 ?!?!   我已經買咗啦   但佢係都話要比我   下次我真係唔好話想買 ~

真係好耐無同家姐食晚餐喇   今晚真係勁開心呀 ~

家姐差唔多 9 點走人   咁我都即開機洗衫同沖涼喇 ~

真係笑死我   家姐叫同事淘比我㗎   話佢阿妹鍾意蠟筆小新   里奧大人勁驚以為係正貨呀   因為正貨起碼要 $80   之後話淘寶平平哋都可以   不過我同家姐講   叫佢唔好再買蠟筆小新比我   我下年應該會轉其他公仔   哈哈哈哈  

家姐喺和記隆買比我㗎   其實我話要一個   佢又買咗 2 個   有排我食   因為里奧大人唔係咁鍾意食呢啲月餅呢

家姐叫我送比管理處嘅職員   大家開心   哈哈

同里奧大人睇 1 集 "痞子殿下"   睇完都 10 點幾   再睇多陣 Youtube   今晚 11 點都瞓覺 lu ~

香煎腐皮卷 + 田園蔬菜餃 + 甜酸齋拚齋叉鴨腎 + 砵仔糕 (外賣) ( 25-AUG-2022 )

( 25-AUG-2022  THU )

今朝 6 點半醒咗即開電視睇   9 點-11點內會改發 3 號風球   咁即係要番工   不過就可以瞓到 9 點先起身喇 ~

雖然比平時瞓多個半鐘   但其實係瞓得唔好   因為未知道確實落波時間   如果知就會瞓得好啲咁   因為已經確實咗呢 ~

其實 9 點唔夠都醒咗   煮埋早餐都已經 9 點半   里奧大人話已經改發 3 號風球 lu ~

食完抖陣都即沖涼   西瓜話 11 點半會番到菇場   但佢喺 10 點 15 分都已經番到菇場   咁我都出門口喇   感恩趕到班車呢 ~

我 11 點唔夠都番到菇場   上下網又到 11 點 45 分食 Lunch 喇 ~

其實無可能食得落   所以都係去一田買晚餐   雖然落好大雨   但真係想行下 ~

買完吞拿魚包   再去 OK 買 6 支青檸味清熱酷   本身 $7.5 但我有 $5 消息劵 Coupon   咁買 3 支再減 $5   每支只係 $5.8咋   家姐話抵呀   所以我即去買囉 ~

番到菇場其實都仲未餓   所以都無食個包   只飲咗包燕麥奶   飲完成個身凍哂呀   我已經唔係一次過飲喇喎 ~

菇場忙咗陣又可以 hea 下   差唔多 2 點半先食個包   感覺好似食緊下午茶咁   哈哈 ~

里奧大人同事請我食架   實在太客氣

放工去買方包比里奧大人   之後就即番屋企喇 ~

里奧大人早番過我   所以佢就要等開餐呢 ~

是日懶餐 - 香煎腐皮卷 + 田園蔬菜餃 + 甜酸齋拚齋叉鴨腎 + 砵仔糕 (外賣) 

香煎腐皮卷 - 本身買 2 件   之後職員話 $20/3 件   咁買 3 件啦 ~

田園蔬菜餃 - 我好鍾意食   但里奧大人話啲皮好滯   我又唔覺喎   如果係潮州粉果嘅皮就滯囉 ~

甜酸齋拚齋叉鴨腎 - 都係呢兩樣   但今朝酸齋無咩味道 ~

砵仔糕 (外賣) - $20/3個都抵   但味道一般 ~

洗埋碗都即沖涼喇   之後家姐 Whatsapp 話買咗 6 支清熱酷   佢覺得好抵就會即買   如果唔係就會等星期六放假先買   所以清熱酷真係好抵   哈哈哈哈 ~

同里奧大人睇 2 集 "痞子殿下"   今晚 11 點都自己瞓先喇 ~