豆豉鯪魚炒油麥菜 ( 30-SEP-2022 )

( 30-SEP-2022  FRI )

感恩一覺瞓天光呀   但其實 7 點都醒醒地   不過繼續懶床到 7 點 40 分   我都應該係瞓着咗   哈哈 ~

諗住抖陣出門口   里奧大人話佢都醒咗   想陪我食早餐   咁一齊食啦 ~

菇場忙咗陣呀   之後可以抖下 ~

Lunch Time 出去萬寧買嘢   買完之後行雷   真係要加快腳步去買炒麵喇   番到菇場之後即刻落大雨呀 ~

仍然唔忙   放工可以即時走 ~

番到屋企都要預備晚餐   不過今晚嘅晚餐係超級簡單呢   哈哈 ~

是日懶餐 - 豆豉鯪魚炒油麥菜

豆豉鯪魚炒油麥菜 - 之前買咗油麥菜   又諗唔到煮咩好   所以即諗呢個餸喇 ~

洗埋碗又小清潔廚房   開機洗衫就沖涼了 ~

抖陣又食貓中王糯米糍   終於食哂月餅同糯米糍喇   但仲有件榴槤蛋糕未食   真係想快啲食埋去   唔駛成日記住 ~

里奧大人可能以為發霉   哈哈哈哈

 係好味嘅   不過食 2 粒都好飽下

睇陣 Youtube 又睇下書   今晚都係 11 點左右瞓 ~

麻婆茄子 + 桃膠糖水 ( 29-SEP-2022 )

( 29-SEP-2022  THU )

尋晚瞓得都算 OK   今朝 7 點半都起身 lu ~

早餐食腿蛋治   因為想要飽啲 ~

菇場忙咗陣呀   所以話咁快又到 Lunch Time 呢 ~

落雨就唔出去喇   咁就食 Flakes + 燕麥奶 ~

阿齋問我依家身體點 ?!  佢話見我星期一S/L   以為我每月一到   因為佢都話我呢兩個月好似以前咁辛苦   之後我話喺做婦檢   但可能要做個小手術   不過我未決定呢 ~

仍然唔忙呀   但要整其他嘢呢 ~

放工即走   番到屋企都預備晚餐 ~

等緊蒸熱茄子期間   自己忍唔住喊咗出嚟   覺得好似好麻煩咁   身體成日出現問題   里奧大人見我喊   即刻嚟安慰我   為我祈禱 ~

其實喊出嚟係舒服好多   因為我真係由 7 月驚到依家 ~

是日懶餐 - 麻婆茄子 + 桃膠糖水

麻婆茄子 - 2 條茄子 + 少少免治豬肉   感恩屋企有包麻婆豆腐醬   咁我唔駛自己調味呢 ~ 

桃膠糖水 - 里奧大人同事整架   我覺得好清甜呀 ~

洗完碗都即沖涼喇   睇陣 Youtube 再睇陣書   差唔多 11 點都瞓 lu ~

青咖哩扎肉炒米粉 + 菜心苗 ( 28-SEP-2022 )

( 28-SEP-2022  WED )

感恩真係一覺瞓天光   我起身係好精神   真係好難得好難得   因為呢排瞓得實在太差呢 ~

其實都知道尋晚會瞓得到   因為知道 Sheldon 走咗   我喺公司真係忍唔住喊咗 3 次   同事都見到   不過我無講咩事   依家 Sheldon 化身小天使再無痛楚   希望佢哋家人可以盡快回復心情   好好生活下去   求神繼續保守看顧佢哋 ~

早餐食吞拿魚治烘底   食呢個三文治要好小心   好多時一咬落去   都會 "必" 哂啲餡出嚟㗎 ~

菇場唔忙   咁我可以問保險嘅嘢   不過真係比保險 Agent 搞到我暈陀陀   我同家姐同里奧大人都話佢係咪閱讀理解能力有問題呢   係咪唔知咩叫入院呀 ?!

咁我再打去診所問番詳細情況   連姑娘都話個保險問埋啲嘢好怪   所以姑娘叫我同保險 Agent 講   醫生話佢有咩唔明就打比佢   好感激醫生咁好人呀 ~

Lunch Time 出去買菜   好似好耐無做呢個動作咁   真係差啲唔記得呀 ~

呢間嘅炒麵正呀   味道唔係蒸熱嘅味道   之後我應該會喺呢間買炒麵食㗎喇 ~

8 卦請我食燒餅

菇場唔忙   又係 Skype 到放工 ~

番到屋企都預備晚餐   好在只係焗熱同淥熟   哈哈 ~

是日懶晚餐 - 青咖哩扎肉炒米粉 + 菜心苗

青咖哩扎肉炒米粉 - 終於清哂所有扎肉   呢年應該唔會再買㗎喇   米粉過咗期   所以點都要煮   加埋蒜芹同咖哩醬一齊炒   真係好好味 ~

菜心苗 - 差啲唔記得仲有菜心苗   呢排真係無咩記性   哈哈 ~

洗埋碗就開機洗衫   之後沖涼喇 ~

睇陣 Youtube 再睇陣書   今晚 10 點 45 分都瞓覺先喇 ~

泡菜餐肉拉麵 + 菜心苗 ( 27-SEP-2022 )

( 27-SEP-2022  TUE )

今朝里奧大人起身   之後我話晏啲先起身   佢以為我唔舒服呀   我話唔想咁早番菇場   一陣西瓜未番要等佢開門   我唔想囉 ~

早餐食醬占多   肥仔豪話做咩唔係膠盒嘅 ?!   我話 Cheap 嘢咪用膠袋囉   三文治就用膠盒呢 ~

菇場忙咗陣呀   咁都好   時間過得快啲 ~

Lunch Time 出去行陣   買埋炒麵就番菇場了 ~

唔忙就等放工   今日心情好低落   好想快啲番屋企 ~

放工即走喇   感恩趕到巴士 ~

番到屋企都預備晚餐   里奧大人接近 7 點先番到嚟   好在今晚簡單嘢   即係唔需要洗咁多嘢   咁可以晏啲食都無問題呢   哈哈 ~

是日懶餐 - 泡菜餐肉拉麵 + 菜心苗

泡菜餐肉拉麵 - 之前喺一田買咗包部隊鍋醬   原來已經過咗期 10 日   所以今晚點都食埋去啦 ~

菜心苗 - 星期日買咗 1 斤   今晚食半斤先   因為食拉麵好飽   真係食唔落咁多菜 ~

洗埋碗就沖涼   之後就食榴槤冰皮月餅   終於食完最後呢兩個   其實接近 $50 一個真係貴   下次叫家姐唔好送比我喇 ~

睇陣 Youtube   今晚 10 點都瞓覺喇 ~

上海排骨酸辣麵 + 粢飯 (外賣) @ 屋企 ( 26-SEP-2022 )

上海排骨酸辣麵 - 都好味道呀   但如果分開上就更加好呢

粢飯 - 里奧大人好鍾意食   所以佢點都要買嚟食

( 26-SEP-2022  MON )

尋晚瞓到 5 點幾熱醒呀   成條頸濕哂   所以要起身沖涼 ~

9 點要起身啦   感恩都精神呢   梳洗完就即刻食早餐喇 ~

10 點半左右就出發去覆診喇   今次準時見醫生呀   但係唔好消息啦   希望快啲到 11 月搞掂哂去 ~

醫生話我又開始貧血   其實我都知㗎喇   之前間唔中都暈呢   依家咀唇又開始白   係時候要食多啲牛肉呢啲補血嘢喇 ~

今日上下壓係 158/78   心跳 100   其實都預咗咁高   我每次去覆診都係咁呢 ~

之後到里奧大人開始勁擔心   不過我話唔駛驚呢   神與我們同在嘛 ~

搭小巴去 Megabox 行下   行到 2 點左右   里奧大人問我餓唔餓 ?!?!   我話唔餓喎   佢話真係無諗過我會唔餓   我話之前每月一到   咁整完牙又痛   所以唔係話成日想食嘢咁囉 ~

差唔多 3 點就開始有啲餓喇   所以去食嘢   今次我話去銀咖哩啦   里奧大人想食好耐   感恩有下午茶餐呀   始終富士山飯份量太多呢   食唔哂又唔想打包喎 ~

吉列豬扒 & 迷你咖哩飯 (+$6) - 豬扒就麻麻哋   但薯角就好味   哈哈

漢堡扒+芝士 & 迷你咖哩飯 (+$6) - 漢堡扒都 Juicy   好過我塊豬扒

食完就去 Ikea   因為要幫家姐買手巾仔   本身家姐係買 3 Pack 兩種色   之後再行又見到另外兩隻色   諗住走啦   又再見到另外一隻色   做咩唔一次放哂所有顏色呀   哈哈   因為我每次都 Send 比家姐睇嘛   佢都話又會有咁多色嘅 ~

最後買咗 6 Pack 手巾仔   埋單先知道有 Discount   所以勁開心呀   哈哈哈哈 ~

行到 5 點幾就坐 Shuttle Bus 走啦   但唔記得 Chop 印花   所以又要去番 Megabox 呀 ~

換咗 2 張 Ikea $50 Cash Coupon   咁又唔餓   所以行多轉 Ikea 喇 ~

里奧大人話買 Cushion   我又覺得好似格硬買咁   同埋買兩個要 $140   我話再睇下其他實用嘢先 ~

之後我話睇下啲浴巾啦   再突然間睇到個牌   原來毛巾類係買 3 Pack 就 85 折   真係好在頭先買咗 6 pack 咋   因為本身家姐只買 5 pack   我話我又買   如果我唔買就會其中兩 Pack 要原價    貴六蚊雞呀 ~

最後買咗 3 條浴巾   原價 $119.7   85 折就 $101.7   我只係比 $1.7 咋   真係開心  哈哈 ~      

坐 Shuttle Bus 去德福買 2023年月曆   咁順便買比家姐 & 佢同事   買完再去位元堂買 3 樽胎菊就買晚餐   之後番屋企喇 ~

沖埋涼先晚餐   都已經 7 點半了   今日真係行咗一日咁滯   好感恩今日行咁耐又唔係好攰喎 ~

仍然係 $75/3 樽

睇陣電視又睇下書   差唔多 11 點左右都瞓 lu ~     

西洋菜餃 (外賣) ( 25-SEP-2022 )

( 25-SEP-2022  SUN )

感恩一覺瞓天光   但 7 點幾其實醒咗   不過都懶下床先   差唔多 8 點半先起身 ~

抹咗一陣嘢先食早餐   今朝唔想做任何家務呀   因為早起身   如果做家務要好大勞動力   我唔想一陣眼瞓呀 ~

早咗出門口   所以去里奧大人公司同阿妹傾偈   但我話今日開始要早啲番崇拜安靜心靈   佢問我點解 ?!   我話上次聽道好有沖擊囉   番崇拜目的唔係因為傾偈食飯嘛   同埋我都好想裝備一下自己呢 ~

崇拜完畢就去等里奧大人   之後我買埋午餐就去佢公司食   佢食完都要開會喇 ~

今次又錯喇   真係幾乎每次都錯   我要辣汁但無加

反而里奧大人嗰碗就加咗辣汁

見咁啱有巴士去家姐屋企   所以我就突擊去探家姐喇 ~

我喺門口叫 Berry   佢聽到我叫佢之後就對住門狂吠   家姐以為咩事   所以佢見到我係好愕然呢   哈哈哈哈 ~

抖陣就同 Berry 一齊去街   等佢放低幾兩就番屋企喇 ~

一影佢就扮哂嘢 

比零食佢咋   都咁樣望住我 

成日唔用手仔拎住   太懶了 

佢記得比 Hand Hand   咁就乖喇

對眼咁樣好得意   但唔係成日影到㗎

哈哈哈哈哈哈 

家姐 3 點鬆啲就要出去整嘢   我就坐多陣先走 ~

想瞓覺 lu 

對眼大過我   哈哈哈哈 

真係瞓着咗  

之後又醒咗   佢隻手仔好似抓住地下咁 

又瞓番喇 

個口好似想講嘢咁   哈哈

咁樣令到我都好眼瞓噃   

打喊露 

呢個 Post   平時家姐影得多   依家我親自影   哈哈 

同姐夫傾下偈   又同工人傾下偈   好快又 4 點 ~       

本來諗住走   見到 Berry 難得瞓喺梳化想瞓咁   所以我即刻烏低身攬住佢啦   比佢個頭瞓喺我隻前手臂   估唔到佢真係瞓喎   所以我比佢壓咗 25 分鐘   之後佢都醒喇   咁我都走喇 ~

我頭先挨住佢上身   再攬住佢個頭仔   佢就係咁樣瞓着喇   到我無攬住佢   佢就係咁中   好得意呀   哈哈    

之後就咁樣瞓

我走嘅時候   工人叫我 "第二個媽咪小心啲"   因為我哋習慣走嘅時候   會叫對方小心啲   以前里奧大人覺得我好怪㗎   後尾佢都跟我講小心啲啦   哈哈 ~

之後我同家姐講話工人叫我做第二個媽咪   家姐話教佢講係新媽咪咋   無教佢叫妳做第二個媽咪喎   哈哈哈哈 ~

去埋街市買餸就番屋企喇   番到屋企就做小清潔   之後拖地就搞掂   呢排真係力不從心   所以大清潔要下星期做呢 ~

里奧大人 6 點開完會   我都要預備晚餐了 ~

是日懶餐 - 西洋菜餃 (外賣)

西洋菜餃 (外賣) - 之前買咗 2 條角瓜   諗住整魚蛋湯   但今晚食餃子   咁用嚟做湯底仲正   哈哈 ~

食完就大清潔廁所   之後沖涼休息喇 ~

里奧大人同事結婚   依家啲喜餅咁靚嘅   餡料係綠茶紅豆蓉   都幾好味

睇陣 Youtube   差唔多 11 點幾都要瞓 lu ~