菜肉餃水餃拚蝦滑 ( 30-APR-2021 )

( 30-APR-2021  FRI )

感恩感恩   一覺瞓天光 ~

不過我記得有個夢係買榴槤食   可能現實太想食喇   其實上次買一個番嚟   食完個人好熱   以前唔會架   所以雖然想食但唔會買嚟食   除非見到好靚啦   哈哈 ~   

早餐食腿蛋治   今朝唔餓   但唔想食甜嘢 ~

菇場唔忙   咁即做 Filing   話哂有嘢做無咁悶 ~

Lunch Time 出去買艇仔粥同炸兩   唔知點解成日好想食粥   所以今日行得遠都要去買 ~

仍然忙 filing   話咁快就放工 ~

去街市買水餃同埋菜   再買多包雞扒就番屋企喇 ~

里奧大人今日開大會   接近 9 點先放工呀   等到我呢   好在唔餓咋 ~

今晚好在簡單咋  就咁淥旺菜粟米餃子就搞掂 ~

等埋里奧大人沖涼   9 點 50 分先開餐呀   食完拿拿聲洗碗同沖涼 ~

抖多陣諗住睇 Youtube   里奧大人話 "金秘書為何這樣" 好好笑   所以又睇下喇 ~

估唔到真係好好笑   睇到差唔多 12 點先瞓   哈哈 ~

蕃茄洋蔥豬扒 + 蒜蓉炒椰菜絲 ( 29-APR-2021 )

( 29-APR-2021  THU )

尋晚瞓得麻麻哋   呢排唔知做咩   成日瞓得唔係咁好咁 ~

話咁快星期四   我覺得好似過咗星期日無耐咁咋喎 ~

早餐食奶醬多   今次焗得好靚仔呀   同埋多奶醬   咁樣無咁乾爭爭 ~

菇場唔忙   雖然攰攰哋   但朝早時間過得好快   所以無咁痛苦   哈哈 ~

Lunch Time 出去行陣   之後買雲吞米番菇場食 ~

超級勁眼瞓   相信係 Lunch Time 睇 Youtube 呢   睇片真係好傷神   哈哈   但過咗 2 點半就好啲   但都好想快啲放工 ~

放工去 759 買果汁之後就番到屋企   換埋衫就要預備晚餐喇 ~

里奧大人 6 點幾番到屋企   佢見我煮餸   唔會問係煮咩   反而次次一見到電飯煲煲飯   佢就即去睇下份量幾多   之後佢無啦啦話今次份量就啱啱好   咁啱我煮緊蕃茄汁   仲以為佢又會知份量啱啱好添  原來佢講緊啲飯   哈哈 ~

7 點 20 分左右開餐   真係好邪   咁啱家姐叫我幫佢同同事開個 Whatsapp Group 名   里奧大人又叫我幫佢睇啲嘢    我話啱啱打完仗   突然要我諗嘢同睇嘢   我個腦好實呀   要抖抖先再幫佢哋 ~

是日晚餐 - 蕃茄洋蔥豬扒 + 蒜蓉炒椰菜絲

蕃茄洋蔥豬扒 - 今次個汁勁好味呀   次次求其都煮得好味   哈哈 ~

蒜蓉炒椰菜絲 - 其實今晚又係豬扒同椰菜   所以椰菜都唔就咁淥熟喇   用蒜蓉炒下好味啲   同埋無咁悶 ~

里奧大人話阿妹問我今個星期日嚟唔嚟 ?!   里奧大人話唔比我嚟   咁問阿妹有咩事 ?!   佢話想傾下偈啫   之後里奧大人話其實我當日有事奉   所以嚟唔到   唔係點敢叫佢唔好嚟呀   阿妹再話都估到喺㗎喇   睇平時都係妳太太話事㗎啦   哈哈 ~      

8 點半出發去徑步   今晚徑半個鐘先   因為其實我都有啲攰 ~

番到屋企即沖涼   之後就抖陣再睇 "梨泰院" 大結局 ~

睇完都 11 點半   係時候要瞓喇 ~

蜜糖燒汁豬扒 + 椰菜 + 自家制麵包 ( 28-APR-2021 )

( 28-APR-2021  TUE )

終於一覺瞓天光   仲要係熟睡添呀   感恩感恩 ~

今日搭早一班車   可以快啲番菇場睇 ASTRO   我同里奧大人講話當佢哋係公司同事   一番到公司就見到佢地就勁開心   哈哈 ~

早餐又食芝腿治烘底   真係好好味 ~

Lunch Time 出去行陣   買咗豬腰芒同蕃茄仔   之後去買紅腸酸辣米線   番到菇場都 12 點 20 分   無諗過要等咁耐添 ~

阿花勁鍾意車銀優   我話如果呢層有個咁靚仔就好   佢話會去幾百次廁所   我話我唔會請假   佢問駛唔駛玩到咁大   哈哈 ~

放工即走   番到屋企抖陣就預備晚餐 ~

里奧大人 7 點左右放工   所以今晚今晚接近 8 點左右開餐 ~

里奧大人話頂爺同阿妹叫我下星期放假一齊去食嘢   但無預里奧大人   我話係咪咁搞笑呀 ?!   唔知以為我先係佢哋同事   哈哈 ~

是日晚餐 - 蜜糖燒汁豬扒 + 椰菜 + 自家制麵包

蜜糖燒汁豬扒 - 完全唔記得買咗急凍豬扒   所以都要煮埋佢喇   今次燒汁再加蜜糖   味道都唔錯 ~

椰菜 - 我都幾鐘意食椰菜   因為口感爽爽脆脆   用炒麵加椰菜都好正   搵晚又整先 ~

自家制麵包 - 今次食芝士包   好好味呀 ~

洗埋碗就開機洗衫   之後沖涼喇   最期待呢一刻   哈哈 ~

8 點幾睇 "梨泰院 "  仲有 1 集就大結局   聽晚先睇 ~

今晚 11 點幾瞓   其實唔想瞓   不過個人又好攰咁囉 ~

肉醬意粉 + 炸雞 + 粟米 ( 27-APR-2021 )

( 27-APR-2021  TUE )

尋晚瞓得麻麻哋   呢排做咩鬼   睡眠質素唔多好喎 ~

早餐食芝腿治烘底   又係好想食鹹嘢 ~

菇場唔太忙   但個人不在狀態 ~

Lunch Time 出去買牛筋丸河   咁啱見到肥仔豪   佢食牛筋魚蛋麵+芥蘭   我以為醫生叫佢每日要食菜   原來佢話一碗麵唔夠飽   但兩碗又飽得滯   所以食菜 ~

我少河都覺得好飽   佢居然話一碗麵唔夠   睇嚟佢都幾食得下   哈哈 ~

里奧大人今日食咖哩杯麵   原來今日到期   我話 2 月尾先買咋   不過日本製造嘅賞味時間比較短   但就唔係過期   只係無咁好味   頂爺見到就笑住話因為咁樣   里奧大人先有 Quota 食杯麵   哈哈 ~

仍然唔忙   但有啲攰 ~

放工即走   買埋粟米就番屋企   拖埋地就預備整晚餐 ~

里奧大人 7 點幾番到屋企   等佢沖埋涼就開餐 ~

今晚好簡單   只係蒸焗炒   呢排攰   所以真係想盡量簡單 ~

咁睇電視講話有人將啲三文魚拎出去賣   又無冰又點點點   其實我食緊飯唔鍾意睇呢啲   之後里奧大人話唔睇呀   好核突呀   我即話睇 ASTRO   佢好愕然話真係㗎 ?!?!   我話係呀   有咩問題 ?!   哈哈 ~

我話 ASTRO 走陽光路線比較親民   其他男團就比較 Cool   里奧大人話好笑喎   妳都只係睇咗 ASTRO 之嘛   妳有睇其他咩 ?!?!   呵呵   佢又講得好啱喎 ~

洗埋碗就沖涼   順便開一機洗枱布   雖然唔會有餸汁   但洗完香噴噴真係好開心呢 ~

里奧大人 9 點開會   半個鐘就開完   估唔到里奧大人整埋啲嘢就睇 "梨泰院" ~

今晚 11 點瞓   感恩有睡意呀 ~

CHUBBY'S PIZZA (外賣) @ 屋企 ( 26-APR-2021 )

星期一套餐 ($165)

環球世界薄批 (普通批) - 呢個今晚可以食得哂 

炸雞 4 件無食過

肉醬意粉仍都無食過   哈哈

( 26-APR-2021  MON )

感恩一覺瞓天光呀   終於有精神了 ~

早餐食奶醬多   好悶呀   哈哈 ~

一食完藥就勁反胃   即刻上網睇 Comments   原來真係會反胃   有啲直情會嘔   因為啲藥係勁削胃   不過我都要食哂成個療程囉 ~

Lunch Time 落去行一陣   條街好凍   快快行完就買炒麵番菇場食   其實無咩胃口   但唔想食燒賣咁囉   所以今日差唔多 12 點半先開餐 ~

忙下停下   4 點食藥又係勁反胃   所以今晚應該唔煮喇 ~

放工即走   里奧大人話叫 pizza 外賣   咁番到屋企即沖涼   舒舒服服咁食呢 ~

食完就開機洗衫   差唔多 8 點就睇 "梨泰院"  ~

我同里奧大人講話   無哂疫情之後首站去韓國   我要追星呀   里奧大人話我痴孖根   哈哈哈哈 ~

估唔到呢套都好好睇呀   今晚睇到 12 點   其實我仲未眼瞓   不過唔想里奧大人陪我夜瞓嘛 ~

魚香茄子 ( 25-APR-2021 )

( 25-APR-2021  SUN )

尋晚瞓得唔係咁好   感恩 6 點 15 分起身都精神呢 ~

本身里奧大人係諗住沖埋涼再叫我起身   所以我起身嘅時候   佢都好愕然   哈哈 ~

今朝好多時間慢慢嘆早餐   開心開心   好難得喺出面食早餐嘛   咁早無咩人就最好 ~

去到里奧大人公司   見到阿妹就即傾偈   之後里奧大人搵阿妹   勁哥話佢唔得閒傾緊偈   里奧大人話佢 Team 人明明做嘢效率係 100 分   因為我成日同佢地傾偈   減咗個零得 10 分   哈哈 ~

佢依家要重新介紹我比同事識   因為我尋日同佢講話我個名叫 ASTRO   今日佢真係介紹我呀   話今天的我係 ASTRO   但記住只係兩個月貨仔   之後可以叫番真名 ~

我話我呢幾個月應該叫 ASTRO   佢另一個前同事話記得我係乜太   我話我應該呢世都係叫乜太   阿妹好大反應話咩應該呀 ?!   我話肯定係囉   哈哈 ~

我係咁同阿妹佢哋講話好愛 ASTRO   佢哋好靚仔   之後將手機啲相比佢哋睇   之後聽到里奧大人把聲   原來佢喺度我都唔知   實在傾到太忘形喇 ~

阿妹個女都話一齊食飯傾偈   但我要做嘢走唔開呢 ~

今個 4 月真係忙到顛咗   好似無休息過咁   哈哈 ~

接近 2 點先走   咁食埋午餐先番屋企 lu ~

跌咗 1 隻鳳爪出來   嗚嗚   全碗得 3 隻咋 

沖埋涼抖陣就大清潔屋企   不過其實有啲攰   但好想大清潔   唯有慢慢做 ~

里奧大人 5 點左右瞓   差唔多 6 點起身   咁我都預備一下晚餐 lu ~

是日晚餐 - 魚香茄子

魚香茄子 - 今晚點都要清埋啲茄子同豚肉   之前又買定魚香茄子醬   其實煮呢個餸都好方便   哈哈 ~

洗埋碗就開機洗衫   之後大清潔廁所再沖涼   其實好鬼攰   但知道自己實會心掛掛   所以都係做埋大清潔喇 ~

今晚 11 點左右都瞓   希望瞓得好啦 ~

蠔仔肉碎湯飯 & 涼瓜火腩飯 (外賣) ( 24-APR-2021 )

蠔仔肉碎湯飯 ($50) - 本身想買生滾艇仔粥   但都要 $38  

涼瓜火腩飯 ($48) - 里奧大人話好味   同埋估唔到好多餸   呢間外賣係第一次買咋   感恩好味道

里奧大人同事整嘅沙律蛋   里奧大人特登留比我食   我話好味呀   女人先鍾意食   佢話未聽過有人咁講   哈哈   其他生果就特登留比里奧大人食   因為無啦啦要夜放工   佢啲同事真係好細心

( 24-APR-2021  SAT )

尋晚預咗自己瞓得唔好   因為知道會成日好急咁   但無咁痛已經好好了 ~

終於 1 點 2 點 3 點都要起身去廁所   之後沖個熱水涼   不過 5 點都要去多次廁所呢 ~

8 點 15 分起身   感恩又唔係好攰喎   沖埋涼就預備去睇醫生 ~

我係第 2 個睇   睇完都已經 9 點 35 分   要快快食埋早餐就番菇場喇 ~

今朝勁喇   7 分鐘食哂個早餐   不過我唔食麵包皮   所以就快好多   唔駛咬嘛 ~

10 點番到菇場   做埋少少嘢就等放工 ~

食咗啲藥勁想嘔   要係咁搽薄荷膏先得 ~

好在同 8 卦 Skype   可以分散下   哈哈 ~

放工即走   唔塞車但接近 50 分鐘先到新都城   真係好慢囉 ~

白菌汁牛扒 ($67)

是日歐陸濃湯 & 牛油法包 

牛扒

唐揚炸雞扒飯配燒汁 ($45)

食完就去廣良興買嘢   之後即番屋企   因為已經 3 點幾喇 ~

坐咗一陣   家姐要去糟糟屋企拎嘢   所以 4 點又出車   今次帶埋 Berry 一齊去 ~

上到車   家姐唔記得拎手機   咁要番屋企拎啦   Berry 怪叫同埋吠呀   人哋唔知以為我偷狗   哈哈 ~

以前佢坐車係暈車浪架   仲會嘔添   依家全程企喺度望風景 ~

咁睇背影   仲要扣孖帶   唔知以為好大隻

伸哂脷

唔駛驚喎

之後全程企喺度   雖然鎖咗門   但我仍然捉實條狗帶

係咪好開心呀 ?!   哈哈

差唔多 4 點半去到糟糟屋企   估唔到又比 2 盒紫色口罩比我 ~

糟糟媽叫糟糟帶 Berry 行下   Berry 勁鍾意草地㗎   個樣勁開心   糟糟拖 Berry 行   但平時就係 Berry 拖住家姐同工人行   哈哈 ~

自由奔放

屙金金   好在影唔到   哈哈

次次見兩條狗帶就覺得誇張   哈哈

你有你行   佢有佢行   不過糟糟同家姐都唔會大力扯佢番嚟呢

係咁索

回程喇   終於坐低抖下

好攰 ?!

Yoda Berry

5 點半番到家姐屋企   人同狗都好攰呀   哈哈哈哈 ~

蕃薯零食   依家啲狗零食真係超級貴   細細包已經 $7x   但又好想買比佢地食   最緊要係天然嘅   咁樣穩陣啲   

佢應該好眼瞓   哈哈   要拻埋比佢先食

我同家姐坐梳化睇 ASTRO   之後 Berry 跳上梳化   坐喺我哋中間   我係咁摸佢頭仔   原來佢已經瞓緊覺   今日肯定攰啦   坐車令佢精神緊張嘛   哈哈 ~晚餐都唔食住呀~

點摸都無問題   佢攰到完全無力反抗   呵呵

今晚 7 點前都要走喇   因為里奧大人話要 7 點半去到   咁我買埋外賣就去里奧大人公司一齊食 ~

里奧大人同我講   頭先頂爺同叻叻傾計   問里奧大嫂幾時到 ?!   叻叻話無咁快   里奧大人聽到   話妳地又知佢會嚟 ?!   叻叻話里奧大人 OT    你太太就一定陪你食飯   哈哈   果然好了解我   哈哈 ~

今日食完藥諗住休息   點知仲忙過平時   真係好邪   無啦啦要去糟糟屋企   里奧大人又突然放 10 點 ~

今晚差唔多 10 點都走人喇   感恩好快有巴士 ~

沖埋涼再睇埋新聞   今晚 11 點半都要瞓   因為聽朝好早起身 ~