焗三文魚骨 + 手作和風唐揚雞 + 蕃茄薯仔三文魚湯 ( 30-APR-2023 )

尋晚無食到嘅中華沙律   咁我放喺碟   里奧大人話原來份量咁多

( 30-APR-2023  SUN )

今朝同里奧大人一齊番工   所以又一齊食早餐喇 ~

幫一陣手又要去番學 lu   崇拜完之後就去買餸   買完就番屋企先～

里奧大人要開 OT   我買埋午餐同里奧大人一齊食   之後就去買麵包同去圖書館拎書   搞掂哂都番屋企喇 ～

大清潔屋企同滾湯   原來都已經接近 6 點   里奧大人都差唔多放工了 ~

是日懶餐 - 焗三文魚骨 + 手作和風唐揚雞 + 蕃茄薯仔三文魚湯

焗三文魚骨 - 尋日喺 AEON 買咗份三文魚骨   留起 2 件焗嚟食喇 ~

手作和風唐揚雞 - 今晚點都要清埋去   唔係再焗真係變黑色都似   哈哈 ~

蕃茄薯仔三文魚湯 - 今日特登買 7 個細蕃茄 + 4 個細薯仔   咁樣食湯渣都好飽   連飯都唔駛煲呀 ~

洗埋碗就抖陣   行咗無耐搞肚痛   所以我要番屋企   之後里奧大人自己喺花店睇下   買咗 2 個小盆栽番嚟   平平哋玩下都唔錯㗎 ~

又再一齊出去萬寧幫家姐買收縮水同 Cream   因為用 Yuu Coupon 同積分兌換   我叫里奧大人跟住我一齊做   佢話完全唔知我做緊咩   笑死 ~

買完就去麥當勞食雪糕   因為我突然間好想食呀   里奧大人話買番屋企食   我話唔得喎   冰格無哂位了   所以要堂食喇 ~

士多啤梨新地 $10.5 - 太耐無食   覺得好好味呀

OREA 麥旋風 ($15.5)   我同里奧大人講話買杯雲厘拿雪糕同 OREO 餅   自己整都得㗎   將啲餅走 Cream 咪搞掂再大力壓碎咪得囉   但佢唔信我   哈哈

番到屋企即開機洗衫   沖埋涼就睇 "鬼怪" ~

估唔到又幾好睇喎   但睇到 11 點半都要瞓   一攰呢   真係睇乜都唔入腦㗎   所以寧願留番聽晚再睇呢 ~

手作和風唐揚雞 (外賣) + 味付螺肉 (外賣) + 中華沙律 (外賣) + 椰菜 ( 29-APR-2023 )

中午食剩嘅大蝦什錦天婦羅   雖然好鍾意食   但食完好滯呀   要飲青檸梳打水消滯    

( 29-APR-2023  SAT )

今朝一覺瞓到 7 點 15 分都起身喇   估唔到里奧大人都起咗身   雖然早咗 10 分鐘起身   但食早餐時間只係早過平日 4 分鐘   所以有時多咗時間   反而會做呢樣嗰樣會慢咗 ~

早餐都係食甜餐包 & 麥包   里奧大人話好食   我話麥包嚟咋喎   因為佢講到好似食新款包咁    之後佢話個包脆卜卜好味   不過今次真係焗到外脆內軟咁呢 ~

差唔多去到公司樓下又見到辣姐   同佢傾咗幾分鐘都要走喇 ~

一入菇場見到阿爽   同佢講話好少咁早喎    佢話頭先見到我係度 8 卦   哈哈   佢講得好搞笑 ~

菇場個個都唔忙啦   一係同 8 卦 Skype 一係同阿花 Whatsapp   所以時間都好快過 ~

8 卦尋日請我食南瓜籽   我覺得好食   所以叫佢幫我買二十蚊   留咗 1/3 喺屋企比里奧大人食 

放工約咗里奧大人喺地鐵車廂等   因為要去拜爸爸媽咪呢 ~

食埋午餐就去拜爸爸媽咪   今日好少人搭車   真係幾個人上去都開車走喇 ~

醬燒豬軟骨湯拉麵配熟蝦壽司 ($49) - 好味道喎   同埋又有壽司同飲品   真係好抵食呢

網燒牛扒定食配和風小食 & 麵豉湯 ($52) - 有好大碗白飯㗎   里奧大人知我失血過多   成日話自己食牛肉   但其實夾比我食多

大蝦什錦天婦羅 ($59) - 無諗過份量咁多   里奧大人就只食咗 1 塊茄子同蕃薯   我食咗 1 件蝦同青椒都好飽   之後全部要打包   留番今晚再食

好大塊蕃薯呀   里奧大人話留番比佢今晚食   因為佢鍾意食喎

3 點左右出發   真係幾年無拜爸爸媽咪   呢排又成日發夢見到佢哋   所以我點都要嚟囉 ~

今日好多煙霞

喊咗一輛之後   個人舒服好多   雖然爸爸媽咪走咗咁耐   但我都仍然好掛住佢哋   其實根本無可能唔掛啦   除非對妳唔好啫   係咪先 ?!

里奧大人真係好好   係咁度 Size   諗住買花樽仔比爸爸媽咪   其實上次都貼過㗎   但可能甩咗比職員掉咗啦   嗚嗚 ~

差唔多 3 點 40 分就走 lu   去咗大本型嘅 AEON 買晚餐   之後即搭車番屋企   一上車就落雨喇 ~

番到屋企就開機洗衫   抖下就煮晚餐 ~

是日懶餐 - 手作和風唐揚雞 (外賣) + 味付螺肉 (外賣) + 中華沙律 (外賣) + 椰菜 

手作和風唐揚雞 (外賣) - 我同里奧大人分開行   佢拎咗盒唐揚雞便當   我就拎盒唐揚雞   又會咁啱   所以我決定買唐揚雞喇   哈哈   其實有 6 粒   價錢係 $29.9 都算抵   但今晚食 3 粒算喇   我比里奧大人送福麵   我就無食喇 ~

味付螺肉 (外賣) - 里奧大人話今日想食螺肉   咁買啦   同埋 $23.10 都抵食 ~

中華沙律 (外賣) - 呢盒 $24.70   份量比想像中多呀   但今晚食唔落   哈哈 ~

椰菜 - 煮咗半個椰菜   因為好想快啲食哂去呀 ~  

洗完碗就即沖涼   咁休息一陣就睇 "鬼怪" ~

今晚睇 1 集都要瞓喇   因為已經 11 點幾呢 ~

香滷豬軟骨肉燥飯 & 滷水牛肉肉燥飯 (外賣) ( 28-APR-2023 )

套餐有杯鳳梨紅茶 & 紅葡萄柚綠茶

滷水牛肉肉燥飯 - 呢個好味呀   所以比里奧大人食啦 

香滷豬軟骨肉燥飯 - 個豬軟骨真係完全唔得喎   無味又"鞋"   好在肉燥好味咋   撈飯一流   咁里奧大人鍾意食鹽酥花枝丸   所以追加一份比佢喇 

 ( 28-APR-2023  FRI )

感恩一覺瞓天光   呢兩日開始飲番北芪當參   希望真係好瞓啲啦 ~

里奧大人今日番晏   所以今朝自己食早餐   又比我焗燶咗個甜餐包 ~

菇場唔太忙   都係同阿花 Whatsapp ~

Lunch Time 出去買薯片比阿花   佢成日請我食嘢   所以想買番啲嘢比佢   買完就買水餃米   今日勁想食水餃呀 ~

唔忙就繼續同阿花 Whatsapp   講下旅行又傾呢樣嗰樣   有時大家都講到搭錯線呀 ~

唉   隻食指原來插咗條刺仔   唔怪得搓手會痛啦   但最奇怪係依家 4 點先知 ~

我放大到 5.0x 先睇到咋

放工去里奧大人公司   佢話拔咗條刺先呀   我話好呀   因為掂到都痛囉   唉 ~

咁阿妹同小辣椒睇唔到條刺   所以叫埋大餅一齊睇   佢哋 3 個加埋里奧大人一齊烏低身   圍住睇我隻手指呀   我覺得場面好搞笑   唔知以為發生咩事 ~

之後小辣椒拎支針出嚟消毒   阿妹又幫我搽消毒紙巾幫我抹手指   我話我有眉鉗   終於大餅幫我挾咗出嚟呀   隻手真係唔痛喇   勁開心   好感恩佢喺度咋   唔係又要搵細細聲   因為佢哋話佢識處理呢啲好叻 ~

我話我頭先已經喺度諗   如果挑唔到都諗住要去醫院㗎喇   之後佢哋好大反應話唔駛㗎   咁我話好驚挑唔到出嚟嘛   嗚嗚 ~

搞掂就去買晚餐去里奧大人公司食   佢話佢哋仲笑緊我咁緊張呀   哈哈 ~

里奧大人食完就開工   我就行超市   行嚟行去行咗半個鐘   諗住唔做運動   但最後都係做咗半個鐘   今次有汗出   所以好開心 ~

沖埋涼就休息   里奧大人 9 點先番到屋企   仲諗住 8 點可以番到屋企添 ~

睇多陣 Youtube   10 點半就同里奧大人一齊睇 "LAW 霸女神"   呢個節目好睇   但原來今晚已經係最後一集   哈哈哈哈 ~

今晚 11 點幾都瞓   可能出咗一身汗   好有睡意咁呢 ~

春田冰室 @ 紅磡 ( 27-APR-2023 )

蔥油雞扒丼 ($46) - 呢個幾好味   雞扒都好大件

鳳梨咕嚕雞球 ($78) - 今次賣相好似兩餸飯咁樣 "北"出嚟咁   同埋完全無炸過嘅感覺

花生醬西多士 ($36) - 好耐無食   我鍾意點糖漿食㗎 

例湯好飲   因為夠熱   哈哈

( 27-APR-2023  THU )

又係一覺瞓到 7 點唔夠就醒   不過咁都好   話哂一覺瞓到天光嘛   哈哈 ~

早餐仍然食香濃黑芝麻瑞士卷   一盒食兩日真係唔錯 ~

菇場唔忙   都係同阿花 Whatsapp   佢話我哋 Whatsapp 有 3,xxx 張相   佢係勁鍾意銀優   我又勁鍾意 ASTRO   所以令到佢都鍾意 ASTRO   哈哈 ~

咁瞓真係好得意   瞓到成個人仔咁

11 點又開始忙   真係做到 Lunch Time 先停 ~

同阿花 船頭一齊行行萬寧   佢哋買完就走   我就仍然睇多陣先   之後我行一田又見到   咁又一齊行   講開食白飯   船頭話佢屋企 3 個人食 6 碗飯   所以啲米好快食哂   我話我 5 Kgs 真係食成年咁滯   以前唔識煮飯   直頭每年都要倒米   因為吽哂好多穀牛呀 ~

之後我話一陣食燒賣粉果  船頭話唔夠飽   我話燒賣其實好滯   唔好睇佢細細粒 ~

   

阿花話佢有次蒸咗廿幾三十粒燒賣   因為佢話驚十粒唔夠   所以倒哂出嚟蒸   之後滯到以後唔想食燒賣   哈哈 ~

咁大家分開買嘢食   但原來都已經 12 點 15 分   要快啲去買 Lunch 喇 ~

午餐係 1 份燒賣 + 2 個粉果   其實 3 個粉果平啲   但格硬食真係好辛苦   下次買半份燒賣先食 3 個粉果啦 ~

忙到 2 點幾就搞掂   又可以抖下 ~

今晚里奧大人約咗水姑食飯   所以我放工都要即刻走呢 ~   

我食完就番屋企   佢哋就番公司有嘢傾喇 ~

今晚里奧大人要番學   咁我都自己做運動先 lu   唔覺唔覺又做咗半個鐘   實在太好了 ~

沖埋涼就開機洗衫   之後睇 Youtube   其實我鍾意睇 B 站   不過唔想用平板睇 ~

里奧大人差唔多 10 點先番到屋企   等佢沖埋涼就一齊睇電視喇 ~

今晚 11 點半先瞓   里奧大人都話做咩咁夜瞓   不過今晚真係唔係咁眼瞓咁   所以先咁夜瞓囉 ~

蒜味香腸拚蟹鉗 + 紅燒鮑汁唐心鮑拚旺菜 ( 26-APR-2023 )

食剩幾棵   今晚食埋去喇   反正今晚食唔落飯   食菜都好   哈哈

里奧大人同事煲咗蓮藕章魚湯   好耐無飲呢啲湯喇   真材實料好味道

( 26-APR-2023  WED )

好多時一覺瞓天光   就會 7 點唔夠就起身   定係年紀大真係瞓得越來越少呀   哈哈哈哈 ~

早餐食香濃黑芝麻瑞士卷   懶係健康嘢咁 ~

家姐今朝話凍咗   但其實有啲啲陽光㗎   我仲諗住會熱   但出街真係凍過落雨嘅時候呢 ~

菇場忙咗陣又 Hea 過   好在時間都過得好快   哈哈 ~

Lunch Time 周圍行下   之後再買雞翼酸辣米線番菇場佞 ~ 

我要酸辣   但一食落口係麻辣   好在我都 OK   唔係就慘了

唔忙喇   又做下自己嘢啦 ~

放工即走   今晚只係焗嘢同淥菜   所以好簡單 ~

是日晚餐 - 蒜味香腸拚蟹鉗 + 紅燒鮑汁唐心鮑拚旺菜

蒜味香腸拚蟹鉗 - 真係諗唔到煮咩   但又唔想食手撕雞   所以就清埋呢兩樣嘢喇 ~

紅燒鮑汁唐心鮑拚旺菜 - 我鍾意啲鮑汁   加埋菜一齊食真係好正㗎 ~

洗埋碗就抖下   之後同里奧大人做運動   今晚又做咗半個鐘   對一個懶人講真係算唔錯㗎喇 ~

里奧大人早番所以已經開機洗衫   我又做少一樣嘢   實在太好 ~

沖埋涼就休息   依家會睇 ASTRO   我想睇佢哋開心嘅一面   仍都要知道要接受現實   用另一個方法紀念 Binnie ~

今晚又係 11 點前瞓   但又睇到新資訊   所以同阿花又傾到 11 點幾先瞓 ~

黑椒牛柳炒烏冬 + 學斗 ( 25-APR-2023 )

( 25-APR-2023  TUE )

尋晚瞓到半夜好似醒醒地咁   我最怕係咁囉   因為好難先瞓得番呢 ~

早餐仍然食餐包仔   好味道 ~

菇場忙咗陣   之後就同阿花 Whatsapp   呢幾日大家都好難過   所以傾咗好多嘢 ~

阿花去咗澳門百老滙   見到張小卡真係好心痛

Lunch Time 唔出去啦   因為壞 Lift   好在我有杯麵咋   雖然行落去都唔係問題   但今日好鬼餓呀   唔知係咪頭先同花傾偈又喊   所以好餓呢 ~

因為所有 Lift 壞哂   所以好多同事諗緊點落去 ?!   阿齋就大大聲話我有杯麵   咁我都比咗個小 A   溫總就唔食得辣   其他同事就照落去食飯   其實壞 Lift 啫   但溫總講到世界未日咁恐怖咁   真心覺得好煩   行樓梯咋嘛   唔駛講到要妳條命咁呀嘛   連阿花都話行樓梯啫   又唔係喺妳銀包搶妳錢   駛咩講到要生要死咁呀 ?!?!

仍然唔忙   可以繼續同阿花 Whatsapp 到放工 ~

今晚去街市買餸   買埋大半個旺菜同 2 個椰菜   行嘅時候真係覺得好重喇   可能呢排比每月一到搞到身體虛哂   真係無咩力咁囉   諗起疫情嘅時候   每次去街市都拎1x磅嘢番屋企   依家應該無呢支歌仔唱了 ~

番到屋企都預備晚餐   但都係慢慢煮囉 ~

是日晚餐 - 黑椒牛柳炒烏冬 + 學斗

黑椒牛柳炒烏冬 - 買 2 塊黑椒牛扒同 1 磅手打烏冬   炒埋又一大碟   咁里奧大人依家帶飯就最好   有時覺得煮 3 人餐易過煮 2 人餐咁囉 ~ 

學斗 - 好耐無食   係時候要食下   哈哈 ~

洗埋碗就沖涼休息   又睇陣電視同 Youtube 咁啦 ~ 

11 點想瞓   但里奧大人話 Youtube 有個人唱歌好好聽   咁我又聽下啦   真係好好聽喎   所以聽咗 20 分鐘先瞓呀 ~

魚香茄子 ( 24-APR-2023 )

( 24-APR-2023  MON )

感恩一覺瞓天光呀   今朝 7 點 20 分都醒咗   咁早啲食早餐 ~

早餐食甜餐包仔   真係好鍾意食   不過唔係成日買到囉 ~

菇場勁忙   希望快啲適應個新 System 啦   咁樣做嘢會快好多呢 ~

Lunch Time 出去行陣先   之後再買鯪魚球米番菇場食喇 ~

仍然唔忙   放工即走   個天黑哂咁   好想快啲番到屋企呀   哈哈 ~

今晚差唔多 7 點幾先開餐   我覺得次次煮茄子都係好耐咁呢 ~

是日晚餐 - 魚香茄子

魚香茄子 - 買咗 2 隻大茄子   再加埋豬肉碎   調味料就求求其其落   但最緊要係有辣豆板醬   其實怕里奧大人話辣   唔係可以落多啲呢 ~

洗埋碗就抖下   今晚自己做運動先   因為要拿拿聲睇討論區嘅嘢話比阿花知呀    ~

今晚做咗半個鐘運動   但其實都好攰   不過又想做囉   唔好咁多藉口嘛   嘻嘻 ~

沖埋涼即睇討論區   又要投票   雖然 ASTRO 嘅人係唔完整   但我會繼續支持佢哋㗎   因為真係好欣賞佢哋嘅團魂   仲有嗰份堅持   公司發生巨大變動都可以撐住   講緊仲要係當時20歲唔夠嘅年青人喎   所以佢嘅經歷真係多過我好多呢 ~

睇呀睇   睇文字確實好攰   所以 11 點唔夠都要瞓 lu ~