滷水豬手肉燥飯 & 鹽酥雞粒肉燥飯 (外賣) @ 屋企 ( 31-AUG-2023 )

將啲肉燥撈埋一齊   真係好好食㗎   但可惜里奧大人又唔記得加辣囉   唔係就更加好味道呢

( 31-AUG-2023  THU )

感恩一覺瞓天光呀   其實鬧鐘響都已經醒醒地   不過唔想起身住呢 ~

早餐食極醇湯種迷你軟包   今次搽醬占   係時候又食下甜嘢   哈哈 ~

菇場忙呀   難得難得 ~

Lunch Time 出去買麻薯同麵包   之後都番菇場喇   因為好鬼熱   快快腳番菇場食 Flakes + 乳酪 ~

忙下停下   好快放工 ~

今晚唔想煮呀   里奧大人又出咗去拎電腦   所以叫佢買台灣嘢番屋企食 ~

番到屋企即沖涼   舒舒服服咁開餐呢 ~

食完就開機洗衫   之後睇電視   里奧大人就做功課做到 9 點   話聽日應該放風假   所以陪我睇 "炸雞特工隊"   順便 Relax 下 ~

今次個 "蘇拉" 行得好慢   所以殺傷力仲大   屋企出面條走廊啲風聲好勁   好似鬼叫咁    其實連門都開唔到咁滯㗎   要好大力先開到   加埋玻璃窗又噗噗聲咁嘈   真係勁恐怖 ~

雖然都知道聽日放風假㗎喇   但今晚 10 點半都瞓 lu ~

掛爐燒鴨 & 椰菜雲耳豬肉煎餃拚韭菜豬肉煎餃 & 海鮮卷拚墨魚卷 (外賣) + 剁椒菜心 ( 30-AUG-2023 )

( 30-AUG-2023  TUE )

感恩一覺瞓天光   但臨起身前就係咁發夢 ~

我同里奧大人去韓國   佢喺酒店沖涼   我就好餓去 7-11 買嘢食   咁見到個麵包   但係賣點係有 9,000 粒芝士   麵包嘅包裝 Size 係 2 Kgs 米咁嘅   個包就係一張啤牌嘅 Size   其他全部係芝士粒   嗰下望見好震撼   之後即到另一個夢境   就係同里奧大人坐巴士   前面係阿紅兩公婆   咁我哋 4 個一齊傾公事   傾傾下就鬧鐘響了   所以我係暈住起身咁   哈哈 ~

  

早餐食四味芝士圓法包 & 極醇湯種迷你軟包   呢 Pack 軟包都抵   因為 $18 有 8 個呀 ~

菇場唔太忙   繼續做自己嘢 ~

Lunch Time 出去買菜   之後買牛腩米番菇場食   好鬼餓呀今日 ~

唔忙繼續 Skype   好快又 5 點半 lu ~

放工去買餸同餃子   之後即番屋企喇 ~

里奧大人 7 點 15 分先放工   好在今日買咗外賣   只係淥菜同煮福麵   唔駛洗咁多嘢   所以叫里奧大人沖完涼先食 ~

是日晚餐 - 掛爐燒鴨 & 椰菜雲耳豬肉煎餃拚韭菜豬肉煎餃 & 海鮮卷拚墨魚卷 (外賣) + 剁椒菜心

掛爐燒鴨 (外賣) - 好想食呀   所以見到就即買 ~

椰菜雲耳豬肉煎餃拚韭菜豬肉煎餃 (外賣) - 呢個又係好想食   不過最後都係食唔哂   但就可以留番聽晚食   嘻嘻 ~ 

海鮮卷拚墨魚卷 (外賣) - 新鮮熱辣炸起   所以放哂出嚟影啦   其實只係食咗 1 條 ~

剁椒菜心 - 諗住清哂啲菜心   但剩番 10 條真係唔想格硬食   因為留肚食生果呀 ~

洗完碗就開機洗衫   休息一陣就食生果喇 ~

呢個日本桃好甜同埋好多汁

今晚又係 10 點唔夠就眼瞓   但頂到 10 點 10 分都真係要瞓覺呀   勁早 ~

水牛城雞翼 + 自家制豬腳薑 + 韭菜豬肉蒸餃 (外賣) + 剁椒菜心 ( 29-AUG-2023 )

  

( 29-AUG-2023  MON )

尋晚瞓得麻麻哋   因為又腳痛呀   加上食咗抗生素   令到個胃好唔舒服咁呀 ~

早餐食四味芝士圓法包   真係好好味呀   連里奧大人都話好味   不過就唔會買太多啦   連食 4 餐都咪話唔驚   哈哈 ~

菇場忙呀   好快又到放飯時間 ~

Lunch Time 出去 759 買烏冬都番菇場喇   條街好焗熱   所以 Lunch 食 Flakes + 乳酪 ~

今餐唔夠飽   可能只係半支乳酪   所以食咗幾條百力滋   其實開完又唔想食   好在 1 包只係 10 支   比咗 5 支 8 卦食   哈哈

忙下停下又傾下   又係好快放工 ~

買埋餃子就番屋企   里奧大人 6 點幾放工   但今晚差唔多 7 點半先開餐呀 ~

是日晚餐 - 水牛城雞翼 + 自家制豬腳薑 + 韭菜豬肉蒸餃 (外賣) + 剁椒菜心  

水牛城雞翼 - 終於清哂樽水牛雞翼醬汁   最怕啲醬汁剩番少少   但用又用唔到咁多喎   成日記住用先煩嘛 ~

自家制豬腳薑 - 之前喺鴻福堂   其實過咗期   所以想快啲食埋去 ~

韭菜豬肉蒸餃 (外賣) - 好想食餃子   咁買 10 隻嚟食   可以唔駛食飯呢 ~

剁椒菜心 - 忍唔住買樽剁椒   唔辣但好鹹   依家好後悔買咗呀   哈哈 ~

快快洗埋碗就沖涼   搞掂就開機洗衫   今晚攰到唔想晾衫添呀 ~

我見呢盒珍寶藍莓都幾大粒   所以買比里奧大人食   我聽個婆婆講話前幾日買 $22 咋   依家要 $24.8   不過難得嚟到 AEON 超市就買啦

9 點半灘喺梳化睇 Youtube   終於 10 點 20 分都要上床瞓喇 ~

泡菜炒肉碎 + 肉碎菜心 ( 28-AUG-2023 )

( 28-AUG-2023  MON )

今朝瞓到 9 點半先起身   里奧大人 8 點半醒咗   但見我咁好瞓   所以會比我繼續瞓   同埋我都校咗 9 點半要起身   鬧鐘一響佢即樸埋嚟按鬧鐘   好搞笑   我話我係咪都要起身㗎喇 ~

沖埋涼就去食早餐   今朝要去補牙   但要拆咗牙套睇蛀牙嘅情況   先睇下就咁補牙定要杜牙根呢 ~

我鍾意食奄列   不過好少茶餐廳有   所以即叫啦   但唔係咁好食囉

食完番屋企抖陣就去牙醫診所   雖然約咗 11 點   但早啲去都好   個人會定啲呢 ~

拆牙套都有啲痛   我覺得最驚係聽到個儀器係咁唧唧聲囉   真係好感受到係批盪同鑽入去咁   哈哈 ~

之後鋏個牙套出來先恐怖   "霹霹啪啪" 咁聲   但感恩係唔痛嘅 ~

清理完之後就開始打麻醉針   醫生叫我吖大個口 "呀"   我係無氣呀   越"呀"越細聲   其實頭先搞隻蛀牙套都有啲痛   所以都用咗好大氣力   哈哈 ~

姑娘都話咁情況好少唔駛杜牙根   所以我話真係要感謝主 ~

咁我要等裝個牙套嘛   姑娘見到出面有個人坐喺度   佢以為係排我後面嘅人早到   但睇唔到個頭   又以為係 Walk-in 嘅人   之後我話係我老公呀   我出唔到聲嘛   只係發出 "我老公" 嘅音 ~

搞掂哂都接近 12 點半   咁里奧大人番屋企放低背囊先出發去黃埔喇 ~

今日最最最最主要係取消一田信用卡   我本身話改網上月結單   但話要一星期   因為要個唔知咩電話密碼   咁我話即時電話取消呢 ?!   佢又話要等電話密碼先得   真係超級麻鬼煩   所以直接去銀行取消   唔駛 1 分鐘就搞掂 ~

行陣 DAISO   買咗 2 個膠兜就走   諗住買鞋   但最後都係食完午餐先買   咁樣可以消化下呢   同埋已經 2 點   都係時候食嘢喇 ~

飯團套餐 ($33) - 我要紫蘇昆布 & 海草明太子飯團 & 牛蒡天婦羅   呢個餐勁喇   樣樣都係凍冰冰   不過我話唔緊要   因為我麻醉藥未過一定唔可以食熱嘢   咁樣諗好啲   哈哈

炸雞咖哩飯 ($58) - 里奧大人食剩飯   我話我做咩唔 Share 食呢   做咩要叫兩個餐喎   加上我其實又唔餓   唉

食完去買鞋   食完就去買鞋   折咗 $442   買完咁諗住走啦   但我話附近有 Starbucks   我想清埋張 Coupon 呀 ~

感恩好快搵到   因為條街超級焗熱   真係唔想周圍行呢 ~

碎朱古力咖啡 (Java Chip) (特大 $51) - 終於清哂家姐之前比嘅 $50 Cash Coupon   因為 12 月到期   難得附近有 Starbucks   所以即去飲喇   呢杯都好味道㗎   但一定要加 Cream   哈哈

 

最後再去番 AEON 買芝士同麵包   但里奧大人話買芝士麵包   我話係兩樣唔同嘢來㗎 ~

里奧大人要番公司放低嘢先   搞掂就番屋企 lu ~

番到屋企真係要即刻沖涼   我覺得自己個頭同身係濕哂 ~

里奧大人瞓陣   我就唔喇   驚今晚瞓唔着 ~

四味芝士園法包 ($23) - 喺 Cantevole 買㗎   如果屋企或者菇場附近有就好啦

今日好開心   可能好耐無同里奧大人去街   同埋今日佢唔駛做公司嘢   可以專心一意陪我   哈哈 ~

抖到 6 點都預備晚餐喇   聽日要番工嘛   所以都唔想太夜食飯呢 ~

是日晚餐 - 泡菜炒肉碎 + 肉碎菜心

泡菜炒肉碎 - 攰呀   所以又泡菜炒肉碎   同埋屋企有 3 罐泡菜   好想快啲食哂去呀 ~ 

肉碎菜心 - 本身想落鑊再加蒜蓉炒   但真係唔想洗鑊   所以放喺菜心上面算喇 ~ 

洗完碗即沖涼   抖陣之後就熨衫 ~

睇多陣 Youtube   今晚 10 點 45 分都瞓覺 ~

節瓜粉絲 + 腐乳肉碎炒飯 ( 27-AUG-2023 )

有個鬼樣呀

( 27-AUG-2023  SUN )

今朝同里奧大人食早餐   之後去佢公司 ~

試下勁量三文治   我叫咗鹹牛肉雞蛋   食完飽到震   下次咪搞   哈哈

諗住坐陣就走   最後忍唔住幫里奧大人執枱   執咗成個鐘頭呀   終於又再次整整齊齊   我真係好鍾意執嘢   我覺得執完之後乾淨企理   係好有成功感同滿足感㗎   哈哈 ~

榴槤又送嘢比我喇   我當面叫佢唔好再買嘢比我呀

應該係白朱古力

番到崇拜就去買餸   買完就番屋企   好鬼熱呀 ~

沖埋涼就等里奧大人放工   今日整蛋餅佢食

芝士肉鬆蛋餅 & 炸雞肉手抓餅   里奧大人話我成日話佢食咁多肉鬆   但呢排又成日整肉鬆佢食   我反駁唔到   哈哈   炸雞真係食唔完咁   如果一次食哂只係熱氣一次   但食四餐要熱氣四次呀   今次嘅炸雞真係好辣呀

比里奧大人食   佢一拎就拎咗塊魷魚餅   家姐頭先話得一塊   所以留比我食   估唔到里奧大人一拎就拎到   哈哈

食完就陣就整沙律   之後真係要抖下喇 ~

3 個富士蘋果 + 1 罐紅腰豆 + 1 罐椰果 + 1 罐粟米   我鍾意臨食之前再唧沙律醬   頭先喺惠康睇沙律醬啦   卡夫奇妙醬 30oz  特價 $80.5   我以為自己睇錯呀   正價係 $95   沙律醬接近 $100 ?!?!?!   太離譜啦   所以我即轉頂好牌唧唧裝沙律   特價 $17 咋

今晚差唔多 7 點先開餐   不過都無咩所謂   唔好遲過 8 點就可以   哈哈 ~

是日晚餐 - 節瓜粉絲 + 腐乳肉碎炒飯

節瓜粉絲 - 呢排幾鍾意食呢個餸   不過唔會成日整   粉絲好難消化   我唔可以食咁多 ~

腐乳肉碎炒飯 - 我用兩磚腐乳炒飯   因為驚好鹹   但原來無咩味   激死我 ~   

洗埋碗就睇 Youtube   今晚 11 點半先瞓覺 ~

炸雞拚炸魚塊 + 燒雞芝士闊條麵 ( 26-AUG-2023 )

之前食剩嘅肉醬意粉   今晚點都要食埋去

( 26-AUG-2023  SAT )

7 點半起身   陪里奧大人食完早餐   之後就出發去家姐屋企喇   咁樣嘅行程就最開心   兩個都可以陪   哈哈 ~

依家里奧大人去邊間茶餐廳都係央走

今朝都係同家姐食泰式早餐   食下傾下都已經 10 點半   要快啲番屋企喇 ~

呢個扎肉絲湯檬粉嘅賣相白雪雪   但其實幾好味㗎

一入屋   Berry 真係撲我好耐   但完全唔撲家姐   係避開家姐咁㗎   之後家姐叫佢   佢明明行緊家姐嗰邊   家姐差啲掂到佢㗎喇   但我一叫佢   佢即 U-turn 跑嚟我度   笑到工人顛咗   咁由入屋到 Berry 比家姐摸   真係足足起碼有 5 分鐘   真係蝦家姐蝦到咁 ~

細細隻好得意

第一件事係交收   哈哈

日本桃 $900/12 個   家姐比 2 個比我

我送比家姐嘅 2024 年月曆

再送埋比家姐同事

天空之鏡   哈哈哈哈

傾下呢樣傾下嗰樣   又當堂精神哂 ~

佢咁嘅樣   好難令我唔眼瞓   哈哈

成床都係佢啲玩具   佢佢自己擔上嚟㗎

1 點幾走喇   家姐同 Berry 陪我等車 ~

試手機影相   真係見到就按制   影出嚟無濛㗎

番到屋企放低嘢要即去食午餐喇   今日突然超級餓呀 ~

水煮魚配飯 ($58) - 幾好味喎   里奧大人都鍾意食

我鍾意食芽菜   因為我自己唔會買

正宗口水雞飯 ($52) - 呢個味道都 OK 呀   我鍾意食青瓜同花生   其實我係鍾意食配菜多過食主菜嘅人   哈哈   

珍寶菜蜜 (跟餐 +$8)

食完去買生果   之後番屋企沖涼休息 ~

家姐買咗蜜汁豬肉乾   但突然又唔想食   所以比我   其實諗諗下都唔知係咪

買咗半磅龍珠果

里奧大人瞓覺   我就執屋   執咗接近兩個鐘呀   勁開心   其實只係再擺番整齊   始終有時急起嚟用   真係只會放好   但就唔會係擺番整齊咁囉 ~

諗住 6 點半開餐   但搞搞下要 7 點半先開餐呀 ~ 

是日懶餐 - 炸雞拚炸魚塊 + 燒雞芝士闊條麵

炸雞拚炸魚塊 - 星期四同星期五食剩嘅晚餐   依家真係食唔哂會留   以前係即掉   諗起都折墮 ~

燒雞芝士闊條麵 - 籮籮尋日喺 The Cheesecake Factory 買比家姐   但家姐話太濃芝士味   所以唔想食   不過我唔要佢都會食嘅   因為唔浪費嘛   咁我話比我啦   反正今晚都係食廚餘   哈哈 ~

洗埋碗就沖涼   之後休息休息   呢排其實個人都攰攰地   唔知係咪食咗消炎藥關係呢 ~

依家鍾意喺睇 Youtube 睇記錄片   特別係行懸崖嗰啲   因為自己永遠都唔會行到   哈哈 ~

今晚 11 點先瞓呀   其實又唔係好夜瞓   分分鐘啲人覺得早瞓   但對我嚟講真係算夜瞓㗎喇 ~