紅燒雞下肶 + 蕃茄薯仔南瓜粟米湯 ( 21-APR-2024 )

( 21-APR-2024  SUN )

感恩一覺瞓天光   今朝有精神   所以同里奧大人食早餐 ~

食完就里奧大人公司去幫手   咁阿妹坐埋位   里奧大人好驚訝咁大聲講   妳哋件衫同條褲係一樣顏色呀   之後再同我哋影張相   哈哈 ~

之後勁哥問我食咗早餐未 ?!   我答佢食咗   之後阿妹又係咁同我講嘢   勁哥再問我食咗咩早餐 ?!   我話你問咗第 2 次喇喎   佢笑住口話我係問妳食咗咩 ?!   頭先係問妳食咗未 ?!   哈哈哈哈   聽完佢咁講   我都覺得自己勁樣衰   哈哈 ~

陪阿妹去 Pantry 食早餐   佢次次都係食老麥   因為夠快   不過一星期一次都 OK   日日食就好悶喇 ~

Melody 見到我同阿妹   話妳哋着制服呀 ?!   之後我同阿妹同一語氣同步講 : 係啦   里奧大人又係咁講   之後我哋 3 個一齊笑   因為無諗過連講嘅嘢都係一樣   哈哈 ~

下星期六開始有新嘅事奉崗位   其實咁都好   因為我同里奧大人都覺得逢星期六事奉   咁星期日我可以休息   同埋時間係好用好多呢 ~

10 點左右去買餸   之後去送朱古力比老闆娘個女   搞掂就番屋企喇   吽雨好鬼熱呀 ~

滾好個湯就徹底大清潔屋企喇   因為開咗冷氣   大動作做嘢都唔會出汗   哈哈 ~

之前真係做咩都有心無力   依家都仲係做下抖下   但難得今日有時間就點都想做啦 ~

差唔多 1 點鬆啲就出發去買午餐   可能落雨關係多外賣   我等咗半個鐘呀   真係人都顛 ~

焗咖哩雞扒飯   味道唔都錯呀

好想食碎蛋沙律包呀   我隻手 Fing 嚟 Fing 去   所以沙律醬都整到包面都係   好在我自己食咋

買完即去里奧大人公司喇   佢食完要去開會呢 ~

番到屋企都開機洗衫同熨衫   咁就搞掂 2 樣家務喇 ~

里奧大人 6 點番到屋企   我話咁快嘅   佢即話咩嘢快呀   但我話你講今晚起碼 6 點幾先開完會嘛   咁 6 點見到你咪覺得早囉 ~

是日晚餐 - 紅燒雞下肶 + 蕃茄薯仔南瓜粟米湯

紅燒雞下肶 - 做唔到糖色呀   所以即轉陣用其他調味料   但咁都好好味呀   里奧大人好快手就食咗 2 隻添呀   我煮 4 隻雞下肶嘅   但個煲太細   我又唔想加咁多水   但唔夠水又燜唔到   之後醒起可以將雞下肶剪開一半家嘛   不過有 1 隻剪極都剪唔到   所以整到佢甩皮甩骨咁呢 ~

蕃茄薯仔南瓜粟米湯 - 本來想買三文魚   但爭鮮都未開   所以即轉素湯喇 ~

洗埋碗就沖涼   里奧大人話想熨衫   我話我熨咗啦   佢估唔到呀   之後話辛苦我喇   日日咁感激我就好啦   哈哈 ~

里奧大人拎比我食   佢話好似旺旺仙貝嘅味道   估唔到佢都食過旺旺仙貝呢啲零食

里奧大人話去做運動   之後無啦啦揹埋背囊    佢都話自己黐線   揹背囊做乜鬼   哈哈 ~

我呢排成日睇福寶   所以里奧大人特登拎番隻熊貓出嚟   呢隻係 2014 年喺海洋公園買嘅生日禮物嚟㗎   雖然成 10 年   但我間唔中都會拎出嚟洗下   所以仍然香噴噴呢

睇下福寶又睇下其他   今晚 10 點 08 分都瞓覺喇   勁早呀 ~

客家原味粉 @ 紅磡 ( 20-APR-2024 )

原味豬手拚豬潤淮山麵 ($57) - 無哂粉腸呀   所以老闆叫我食豬手   咁都好呀   因為都想試下   我平時食粉麵都會落辣椒油   但喺呢間食店食麵就唔會落辣油   因為個湯底好鮮甜呢

鮮牛肉肉丸淮山麵 ($50) - 里奧大人每次食呢個麵   都會話好味道

( 20-APR-2024  SAT )

今朝 7 點起身   之後即刻沖涼洗頭   搞掂就出發去家姐屋企喇 ~

家姐話姐夫感冒   所以叫我唔好去飲茶   等佢哋食完再陪我去食早餐   咁我上家姐屋企先 lu ~

Berry 女大聲吠又尖叫   真係要搓住佢塊臉   佢先唔叫 ~

坐到好 Lady

影多兩影   就唔係咁想望住我   哈哈哈哈

坐到 9 點左右就出去喇   好耐無食泰式早餐咁   所以覺得好味呀 ~

我鍾意食吉列魚柳   但唔係間間都好食

食完就番屋企   Berry 又唔理家姐喇   咁我特登快啲坐梳化   家姐叫 Berry   我又叫 Berry   衰女包即 U-Turn 過嚟呀   幾次都係咁   所以家姐放棄叫佢   哈哈 ~

家姐喺曼谷買嘅手信   我話幫佢做個記錄呀   佢話喺 Big C 都買咗 7,000 泰銖呀   不過我話榴槤 芒果 果仁呢啲手信比較貴呢

佢買比同事   好似 500B 兩個

我無叫家姐買手信   但一睇脆豬肉乾就知係買比我啦  

冬蔭功湯包   但佢自己一包都無要   哈哈

家姐每拎一樣嘢   就話我有買埋比妳㗎

我問家姐係咪好好味 ?!   佢話無試過

冬蔭功味道嘅媽媽麵   我話里奧大人鍾意食   所以要 3 包   佢話點解唔要 4 包 ?!   仲話無人會要 3 包㗎   呢句好笑   其實佢想比多啲我囉

呢隻魷魚片係超級勁辣   所以我都唔會買比家姐食   但估唔到佢會買   仲話工人都話好辣呀

我最主要係叫家姐幫我買搽傷口藥膏同口瘡膏   反而零食呢啲就無叫佢買呢

家姐本身將呢堆手信   求其放哂喺 Big C 環保袋入面   我忍唔住幫佢拎出嚟分類再分比人

Big C 環保袋都幾 "實正"

同家姐又傾下偈啦   講開沙爹醬   我話記得整沙爹皮蛋呀   家姐問咗我皮蛋點整 ?!   佢未試過   我話 Sorry   其實我想講陳皮魚蛋   哈哈哈哈 ~

個樣好醜樣   但對手仔咁擺法就好得意

如果我識讀心術就好啦   好想知道 Berry 咁樣望我   係咪覺得我好煩   哈哈

我同家姐坐梳化   佢就好鍾意將成個身攣落我度   之後我成件衫都有狗毛

想瞓覺 

隨時瞓着   哈哈

同佢自拍   佢呢個樣真係超級醜樣

家姐食咗抗生素有啲攰   話想入房瞓陣覺   我話瞓啦   我都入去抖下 ~

其實家姐只係瞓咗 10 分鐘   之後就好精神同我傾偈 ~

家姐未瞓   佢已經先瞓   哈哈哈哈

呆呆滯滯

~

點摸都得

家姐一出去   佢就係咁望住家姐

之後又望下我咁

眼瞓樣

我 1 點左右走喇   家姐同工人帶埋 Berry 一齊送我搭車 ~

同里奧大人去麥當勞食午餐   好感恩有位呀   初初諗住多人就買番屋企食呢 ~

我食脆辣雞腿包   一啲都唔覺得辣

里奧大人食板燒雞腿包

食完都番屋企抖下   又睇下 Youtube 咁啦 ~

里奧大人見到藥膏   仲開心過見到零食   哈哈

喺 A1 買嘅南瓜籽雜穀包 ($24)   家姐話好味   所以我又買嚟食

里奧大人 5 點就要番公司做嘢   之後我都瞓咗 20 分鐘   當堂精神哂呀 ~

抖多陣就番崇拜   但崇拜未結束都要走喇 ~

經過棵樹下面   見有嘢滴落我頭頂   我勁驚以為雀屎   點知原來開始落好大滴雨喇   我要跑去地鐵站   明明覺得涼都變咗好熱   哈哈   頭先我行行都驚   因為我換咗個袋就無拎遮   點知就落雨 ~

同家姐交收之後又傾咗陣   咁我走嘅時候停咗雨啦   但行到一半又落好大粒雨呀   咁里奧大人又未走得   所以去佢公司等佢放工喇 ~

7 點半終於放工   今晚突然好想食濕嘢呀   唔知係咪頭先比雨淋親   想食熱嘢   哈哈 ~

食完即番屋企   之後係咁行雷   好在番得屋企快咋 ~

2 包半磅齋燒鵝同半磅果汁豬肉乾

里奧大人多謝家姐買豬肉乾比佢   家姐話做咩咁客氣呀   之後里奧大人話妳識做啦   家姐覆佢食完話我知   再買比你   里奧大人話係比個減肥套餐比佢呀   咁食法好易肥喎   哈哈

里奧大人都忍唔住食咗幾粒   佢都鍾意食呢間嘅齋燒鵝

沖埋涼就休息   睇下電視同福寶   今晚 11 點都瞓覺 lu ~

麻辣手撕雞 (外賣) + 芥蘭苗 ( 19-APR-2024 )

( 19-APR-2024  FRI )

今朝又比里奧大人鼻鼾嘈醒   雖然個天光咗   但唔知幾點同埋想繼續瞓   哈哈 ~

早餐都係食芝士條   里奧大人食得好快㗎   咁應該鍾意食 ~

菇場唔忙   阿怪叫我 Print 張 D/N 比佢   佢就自己 Chop 公司印   我話西瓜未比我一定有佢原因  同埋銀碼係幾百萬呀   真係要睇清楚先得囉   之後我話妳自己都可以 Print 㗎喎   佢就話唔駛   我再話妳咁急   妳自己搵西瓜啦   我一定唔會 Print 比妳㗎   之後佢話唔想入西瓜房   我話入房搵佢怕咩呀 ?!   真係黐黐哋 ~

Lunch Time 出去行陣再食鯪魚球河   今日突然間好肚餓咁呀 ~ 

食完再去買菜   行到好熱   所以去萬寧過冷河   咁睇下眼藥水啦   之後見到職員拎住 "今日有 9 折" 個牌   即問佢點樣先有 9 折   唔係拎完去比錢先知無就慘   哈哈 ~

原來買滿 $188 有 9 折   咁就啱哂啦   見到適然眼藥水 ($220/2 盒)   咁價錢已經抵   依家 9 折更抵   即問家姐同里奧大人要唔要買呀   里奧大人話買 4 盒   家姐就話叫我比啲佢就得 ~

真係好感恩   因為平時唔會行呢間萬寧㗎 ~   

買完就即番菇場喇   因為已經 12 點 45 分呢 ~

唔忙就做自己嘢啦   之後又整呢樣嗰樣   所以好快放工 lu ~

放工即走   買埋手撕雞就番屋企喇 ~

是日晚餐 - 麻辣手撕雞 (外賣) + 芥蘭苗

麻辣手撕雞 (外賣) - 懶呀   又唔想買現成雞翼焗喎   所以買手撕雞喇 ~

芥蘭苗 - 買 1 Pack 最好   因為唔知呢兩晚煮唔煮飯呢 ~

洗埋碗就抖下   家姐話買咗陳皮魚蛋小食   之後又傾一大輪   我話用利川沙爹醬整都好味道㗎   家姐話如果做特價就幫佢買   因為都唔急住整 ~

咁我咁啱聽日見到佢   所以都即去惠康幫買利川沙爹醬喇   因為佢好少話想要呢 ~

里奧大人做運動   我滕頭哥仍然仲有少少痛   所以我要休息呀 ~

開埋機洗衫就沖涼   之後睇福寶   差唔多 10 點 45 分瞓覺 lu ~