十八味私房牛肉麵 @ 紅磡 ( 23-APR-2024 )

晚市二人套餐 ($158)

轟炸鹽酥雞扒 (私房麻辣湯 - 小辣) - 一般啦

我同里奧大人都揀台灣麵

私房紅燒牛肉 (慢煮筒骨湯) - 估唔到有咁多餸   我仲以為比錯呀   因為我以為得牛肉一樣餸嘛

日式吉列虎尾蝦 (4 隻) - 好想食炸嘢   所以叫嚟食

滷肉蔥油生菜 - 份量都唔少

( 23-APR-2024  WED )

尋晚去咗次廁所   之後都好快瞓得番   感恩感恩 ~

里奧大人話晏啲番工   咁問我食咩早餐 ?!   我話焗麵包   如果我話無買麵包   佢肯定起身陪我食   可能覺得我一個人食早餐好慘咁   哈哈哈哈 ~

早餐仍然食南瓜籽雜穀包  今次加片芝士   食完都幾飽下 ~

右手食指又濕疹   好多時唔夠瞓就會咁㗎喇   唉 ~

靈修 15 分鐘就番工   家姐話黃雨警告呀   不過我話呢邊唔係咁大雨   可能地區性啦 ~

菇場唔忙   最緊要唔好諗放工先忙   哈哈 ~

我行去收遮   阿齋問我今日係咪食脆脆 ?!   因為收得遮就等如唔出街嘛   之後我話下午放假   呵呵 ~

放工即走   今日里奧大人請佢部門 4 個同事食飯呀   所以我又可以 Join 埋去呀   哈哈 ~

因為我叫里奧大人唔好講話我嚟   所以阿妹見到我好開心呀   佢仲講咗幾次   又話里奧大人又唔講我唔到   怪錯里奧大人啦   哈哈 ~

今次我等齊人先落單呀   勁哥話食麻婆豆腐   阿妹話唔好啦   一包醬都係幾蚊   自己整都得啦   之後佢話食宮保雞丁   我話唔好味㗎   佢再話食大盤花菜   我同阿妹一齊話唔抵食呀   勁哥笑哂口話叫我哋揀啦咁   哈哈 ~

川香回鍋肉

麻辣雞翼香鍋

勁哥上次話想食水煮牛肉

沙拉咕嚕雞球飯   仲有酸菜魚同 口水雞   不過唔想行去影相   哈哈

食到一半   水姑同姑奶約里奧大人食 Lunch   所以叫埋佢哋一齊食啦   咁啱我哋隔離有張 2 人枱呢 ~

阿妹佢哋要番工   所以佢哋要走先喇   我哋就可以繼續傾偈喇 ~

不過 2 點左右都要走人   因為要番屋企放低嘢就出發去油麻地呢 ~

里奧大人 Book 咗 3 點半   不過差唔多 4 點 15 分先到佢 ~

感恩一齊回復正常   再食多一星期藥就可以停喇 ~

我話搭地鐵去睇中醫   去到都 5 點 20 分了   感恩去到即刻有得睇 ~

估唔到里奧大人又陪我入去   醫師話我個脈有力咗好多   之後里奧大人問醫師點解我成日搞肚痛同暈 ?!   醫師話內分泌影響   所以要繼續調理呢 ~

我都估到里奧大人一定問呢個問題   佢真係好擔心   上次都同家姐講話我暈   佢即刻好緊張話點解又暈㗎 ?!   我話一食太辣同太油就會咁   所以佢依家有辣嘅嘢都唔會比我   哈哈 ~

今次睇得快   但等執藥就等咗 15 分鐘   因為轉咗人呀   平時好快㗎咋 ~

同里奧大人喺附近食晚餐   食完就即番屋企喇   間食店無咩冷氣   我哋又食湯麵   所以熱上加熱 ~

我之前成日用呢個 Icon 系列   每次都會比 8 卦話樣衰   哈哈

頭先喺梅窩麻糬王買㗎   我買原味 ($25/6 粒)

番到屋企即沖涼呀   沖完之後係咁話好舒服   因為頭先食到成身汗好辛苦呀   哈哈 ~

睇下 Youtube   但 9 點開始好眼瞓   其實睇睇下 Youtube 都瞓着咗   之後一開眼已經 10 點 ~

感恩仍然有睡意   所以 10 點 06 分都入房瞓覺喇 ~

茄汁洋蔥豬扒 ( 22-APR-2024 )

( 22-APR-2024  MON )

尋晚去咗次廁所   之後都好快瞓得番   感恩感恩 ~

今朝 7 點 05 醒咗   但懶床都 7 點 15 分先起身 ~

煲埋薑茶再焗麵包   沖埋涼換埋衫原來已經 7 點 50 分   不過我又真係慢動作做嘅   其實我又唔需要快囉   因為今朝早起身嘛   哈哈 ~

早餐食南瓜籽雜穀包   同里奧大人每人 3 件就最好 ~

靈修 15 分鐘就番工喇   今日架巴士遲咗 10 分鐘   所以我都遲大到呀 ~

菇場忙咗陣   西瓜話張 D/N 嘅 Attachment 無老闆簽名同埋係 Draft   所以叫我比張 Original 比佢   佢再簽   咁我講番比阿怪知啦   佢即刻比張 Original 比我   真係黐鬼線   有 Original 做咩比張 Draft 做 Attachment 呀   好在呢啲係佢急我唔急   唔係真係浪費時間 ~

今次用有機嘅薑黃   所以好辣   我覺得好正呀  哈哈

Lunch Time 出去食鯪魚球米   之後去買黑米   買完再行多陣就番菇場喇   本來想再行耐啲   但個天黑哂喇   所以唔走唔得呢 ~

唔忙又做自己嘢啦   咁樣時間好快過 ~

我沖咗 7 杯水   所以最後就咁淡色喇   但仍然好有薑味㗎

放工即走   番到屋企即預備晚餐喇   里奧大人啱啱做完運動番嚟   咁我叫佢沖埋涼先食飯 ~

里奧大人幫我再洗隻熊貓   佢話我成日攬住都係洗下好啲   咁又幾細心噃 ~

是日晚餐 - 茄汁洋蔥豬扒

茄汁洋蔥豬扒 - 2 塊新鮮豬扒 + 1 個大洋蔥   我覺得配菜多過主菜   哈哈   今次個汁整得好好味呀   開心開心 ~

洗完碗就抖下   今晚跳爆汗舞   不過只跳咗 12 分鐘咋   因為個人好攰咁   唔想跳咁耐 ~

開埋機洗衫就即沖涼   之後休息休息 ~

咁諗住食幾粒齋燒鵝   但里奧大人食咗半盒呀   佢真係好鍾意食喎   咁下次買多啲先 ~

今晚好攰呀   本來 9 點 50 分已經想瞓   但真係覺得太早   所以頂到 10 點 12 分都去瞓覺喇 ~

紅燒雞下肶 + 蕃茄薯仔南瓜粟米湯 ( 21-APR-2024 )

( 21-APR-2024  SUN )

感恩一覺瞓天光   今朝有精神   所以同里奧大人食早餐 ~

食完就里奧大人公司去幫手   咁阿妹坐埋位   里奧大人好驚訝咁大聲講   妳哋件衫同條褲係一樣顏色呀   之後再同我哋影張相   哈哈 ~

之後勁哥問我食咗早餐未 ?!   我答佢食咗   之後阿妹又係咁同我講嘢   勁哥再問我食咗咩早餐 ?!   我話你問咗第 2 次喇喎   佢笑住口話我係問妳食咗咩 ?!   頭先係問妳食咗未 ?!   哈哈哈哈   聽完佢咁講   我都覺得自己勁樣衰   哈哈 ~

陪阿妹去 Pantry 食早餐   佢次次都係食老麥   因為夠快   不過一星期一次都 OK   日日食就好悶喇 ~

Melody 見到我同阿妹   話妳哋着制服呀 ?!   之後我同阿妹同一語氣同步講 : 係啦   里奧大人又係咁講   之後我哋 3 個一齊笑   因為無諗過連講嘅嘢都係一樣   哈哈 ~

下星期六開始有新嘅事奉崗位   其實咁都好   因為我同里奧大人都覺得逢星期六事奉   咁星期日我可以休息   同埋時間係好用好多呢 ~

10 點左右去買餸   之後去送朱古力比老闆娘個女   搞掂就番屋企喇   吽雨好鬼熱呀 ~

滾好個湯就徹底大清潔屋企喇   因為開咗冷氣   大動作做嘢都唔會出汗   哈哈 ~

之前真係做咩都有心無力   依家都仲係做下抖下   但難得今日有時間就點都想做啦 ~

差唔多 1 點鬆啲就出發去買午餐   可能落雨關係多外賣   我等咗半個鐘呀   真係人都顛 ~

焗咖哩雞扒飯   味道唔都錯呀

好想食碎蛋沙律包呀   我隻手 Fing 嚟 Fing 去   所以沙律醬都整到包面都係   好在我自己食咋

買完即去里奧大人公司喇   佢食完要去開會呢 ~

番到屋企都開機洗衫同熨衫   咁就搞掂 2 樣家務喇 ~

里奧大人 6 點番到屋企   我話咁快嘅   佢即話咩嘢快呀   但我話你講今晚起碼 6 點幾先開完會嘛   咁 6 點見到你咪覺得早囉 ~

是日晚餐 - 紅燒雞下肶 + 蕃茄薯仔南瓜粟米湯

紅燒雞下肶 - 做唔到糖色呀   所以即轉陣用其他調味料   但咁都好好味呀   里奧大人好快手就食咗 2 隻添呀   我煮 4 隻雞下肶嘅   但個煲太細   我又唔想加咁多水   但唔夠水又燜唔到   之後醒起可以將雞下肶剪開一半家嘛   不過有 1 隻剪極都剪唔到   所以整到佢甩皮甩骨咁呢 ~

蕃茄薯仔南瓜粟米湯 - 本來想買三文魚   但爭鮮都未開   所以即轉素湯喇 ~

洗埋碗就沖涼   里奧大人話想熨衫   我話我熨咗啦   佢估唔到呀   之後話辛苦我喇   日日咁感激我就好啦   哈哈 ~

里奧大人拎比我食   佢話好似旺旺仙貝嘅味道   估唔到佢都食過旺旺仙貝呢啲零食

里奧大人話去做運動   之後無啦啦揹埋背囊    佢都話自己黐線   揹背囊做乜鬼   哈哈 ~

我呢排成日睇福寶   所以里奧大人特登拎番隻熊貓出嚟   呢隻係 2014 年喺海洋公園買嘅生日禮物嚟㗎   雖然成 10 年   但我間唔中都會拎出嚟洗下   所以仍然香噴噴呢

睇下福寶又睇下其他   今晚 10 點 08 分都瞓覺喇   勁早呀 ~

客家原味粉 @ 紅磡 ( 20-APR-2024 )

原味豬手拚豬潤淮山麵 ($57) - 無哂粉腸呀   所以老闆叫我食豬手   咁都好呀   因為都想試下   我平時食粉麵都會落辣椒油   但喺呢間食店食麵就唔會落辣油   因為個湯底好鮮甜呢

鮮牛肉肉丸淮山麵 ($50) - 里奧大人每次食呢個麵   都會話好味道

( 20-APR-2024  SAT )

今朝 7 點起身   之後即刻沖涼洗頭   搞掂就出發去家姐屋企喇 ~

家姐話姐夫感冒   所以叫我唔好去飲茶   等佢哋食完再陪我去食早餐   咁我上家姐屋企先 lu ~

Berry 女大聲吠又尖叫   真係要搓住佢塊臉   佢先唔叫 ~

坐到好 Lady

影多兩影   就唔係咁想望住我   哈哈哈哈

坐到 9 點左右就出去喇   好耐無食泰式早餐咁   所以覺得好味呀 ~

我鍾意食吉列魚柳   但唔係間間都好食

食完就番屋企   Berry 又唔理家姐喇   咁我特登快啲坐梳化   家姐叫 Berry   我又叫 Berry   衰女包即 U-Turn 過嚟呀   幾次都係咁   所以家姐放棄叫佢   哈哈 ~

家姐喺曼谷買嘅手信   我話幫佢做個記錄呀   佢話喺 Big C 都買咗 7,000 泰銖呀   不過我話榴槤 芒果 果仁呢啲手信比較貴呢

佢買比同事   好似 500B 兩個

我無叫家姐買手信   但一睇脆豬肉乾就知係買比我啦  

冬蔭功湯包   但佢自己一包都無要   哈哈

家姐每拎一樣嘢   就話我有買埋比妳㗎

我問家姐係咪好好味 ?!   佢話無試過

冬蔭功味道嘅媽媽麵   我話里奧大人鍾意食   所以要 3 包   佢話點解唔要 4 包 ?!   仲話無人會要 3 包㗎   呢句好笑   其實佢想比多啲我囉

呢隻魷魚片係超級勁辣   所以我都唔會買比家姐食   但估唔到佢會買   仲話工人都話好辣呀

我最主要係叫家姐幫我買搽傷口藥膏同口瘡膏   反而零食呢啲就無叫佢買呢

家姐本身將呢堆手信   求其放哂喺 Big C 環保袋入面   我忍唔住幫佢拎出嚟分類再分比人

Big C 環保袋都幾 "實正"

同家姐又傾下偈啦   講開沙爹醬   我話記得整沙爹皮蛋呀   家姐問咗我皮蛋點整 ?!   佢未試過   我話 Sorry   其實我想講陳皮魚蛋   哈哈哈哈 ~

個樣好醜樣   但對手仔咁擺法就好得意

如果我識讀心術就好啦   好想知道 Berry 咁樣望我   係咪覺得我好煩   哈哈

我同家姐坐梳化   佢就好鍾意將成個身攣落我度   之後我成件衫都有狗毛

想瞓覺 

隨時瞓着   哈哈

同佢自拍   佢呢個樣真係超級醜樣

家姐食咗抗生素有啲攰   話想入房瞓陣覺   我話瞓啦   我都入去抖下 ~

其實家姐只係瞓咗 10 分鐘   之後就好精神同我傾偈 ~

家姐未瞓   佢已經先瞓   哈哈哈哈

呆呆滯滯

~

點摸都得

家姐一出去   佢就係咁望住家姐

之後又望下我咁

眼瞓樣

我 1 點左右走喇   家姐同工人帶埋 Berry 一齊送我搭車 ~

同里奧大人去麥當勞食午餐   好感恩有位呀   初初諗住多人就買番屋企食呢 ~

我食脆辣雞腿包   一啲都唔覺得辣

里奧大人食板燒雞腿包

食完都番屋企抖下   又睇下 Youtube 咁啦 ~

里奧大人見到藥膏   仲開心過見到零食   哈哈

喺 A1 買嘅南瓜籽雜穀包 ($24)   家姐話好味   所以我又買嚟食

里奧大人 5 點就要番公司做嘢   之後我都瞓咗 20 分鐘   當堂精神哂呀 ~

抖多陣就番崇拜   但崇拜未結束都要走喇 ~

經過棵樹下面   見有嘢滴落我頭頂   我勁驚以為雀屎   點知原來開始落好大滴雨喇   我要跑去地鐵站   明明覺得涼都變咗好熱   哈哈   頭先我行行都驚   因為我換咗個袋就無拎遮   點知就落雨 ~

同家姐交收之後又傾咗陣   咁我走嘅時候停咗雨啦   但行到一半又落好大粒雨呀   咁里奧大人又未走得   所以去佢公司等佢放工喇 ~

7 點半終於放工   今晚突然好想食濕嘢呀   唔知係咪頭先比雨淋親   想食熱嘢   哈哈 ~

食完即番屋企   之後係咁行雷   好在番得屋企快咋 ~

2 包半磅齋燒鵝同半磅果汁豬肉乾

里奧大人多謝家姐買豬肉乾比佢   家姐話做咩咁客氣呀   之後里奧大人話妳識做啦   家姐覆佢食完話我知   再買比你   里奧大人話係比個減肥套餐比佢呀   咁食法好易肥喎   哈哈

里奧大人都忍唔住食咗幾粒   佢都鍾意食呢間嘅齋燒鵝

沖埋涼就休息   睇下電視同福寶   今晚 11 點都瞓覺 lu ~