角瓜潮州魚丸湯 + 撈麵 + 自家制麵包 ( 31-JUL-2020 )

麵包餡有好多 Nuts

( 31-JUL-2020  FRI )

今朝里奧大人 7 點半起身   咁我都醒喇   可以一齊食早餐 ~

一起身有痰   之後里奧大人好緊張問乜色 ?!   我話無得吐喎   應該尋晚臨瞓前飲咗支益力多   所以好多痰咁呀 ~

里奧大人 8 點半左右番工   我就 9 點 15 分出門口 ~

菇場忙呀   做到無停手 ~

聽日就 8 月喇   咁就過咗大半年

真係好快到 11 點 45 分 Lunch Time   但其實食唔落   咁啱家姐打嚟傾偈   所以差唔多 12 點 45 分先食得落 Lunch ~

我同 8 卦講話依家 1 點食完 Lunch   感覺好似好耐先放工   但其實都只係早半個鐘頭開工   不過估唔到佢都話係呀 ~

3 點左右公司群組發放訊息   由下星期試行 WFH   我都係 WFH / TBA   但有 Urgent 要處理就要盡快回公司   但做完可走人   唔駛等到 4 點 ~

8 卦話係老闆主動提出員工 WFH 的   真係感謝佢對員工體諒   上班下班午飯時間   通通讓我哋盡量避開人潮   又派口罩比我哋   同埋聽日都放假   感恩感恩 ~

4 點走人   番到屋企即沖涼   之後就抖下   6 點先預備晚餐 ~

今晚里奧大人塞車   再等佢沖埋涼   所以 7 點幾先開餐呢 ~

是日懶餐 - 角瓜潮州魚丸湯 + 撈麵 + 自家制麵包  

角瓜潮州魚丸湯 - 本身當菜湯飲   但都係加包魚丸   咁可以當一個餸   哈哈 ~

撈麵 - 唔想又飲湯又湯麵   咁煮撈麵最好 ~

自家制麵包 - 里奧大人同事比架   本身得兩個   但里奧大人話做 Lunch   所以同事又再比多 1 個佢   叫佢唔好食埋我嗰份呀   哈哈 ~

洗埋碗就開機洗衫   之後沖涼 lu ~

又同里奧大人一齊靈修   之後睇埋晚間新聞   11 點半都一齊瞓喇 ~

苦瓜炒豆豉鯪魚 + 蒜蓉蒸角瓜 ( 30-JUL-2020 )

( 30-JUL-2020  THU )

今朝 8 點 20 分鬧鐘響先起身   無諗過咁好瞓   哈哈 ~   

番到菇場都 9 點 20 分   要快啲食早餐喇 ~

雪菜肉絲通粉好濃味   下次都係要火腿通粉算喇

菇場忙呀   好快又到 11 點 45 分 ~

出去行陣   之後差唔多 12 點半先食 Lunch ~

一餐二食真係好正呀   但又包又奶   好鬼肥囉

忙下停下又 4 點   今晚唔駛買餸   實在太舒服喇 ~

番到屋企即沖涼   抖到 6 點就預備晚餐 ~

是日晚餐 - 苦瓜炒豆豉鯪魚 + 蒜蓉蒸角瓜

苦瓜炒豆豉鯪魚 - 之前買咗 2 苦瓜   今晚切開嘅時候   其中 1 個嘅核係紅色   好恐怖呀   所以即掉   但兩個朋友話紅核只係代表苦瓜已經太熟   仲可以食得嘅   咁啱個苦瓜已經腍腍哋   我以為壞囉 ~   

蒜蓉蒸角瓜 - 第 1 次整呢個蒜蓉汁   都好味道呀 ~

洗埋碗就即沖涼   之後休息喇 ~

今晚同里奧大人繼續聽証道   真係獲益良多 ~

里奧大人 10 點 45 分   我 11 點 15 分先眼瞓呀 ~

魚香茄子 + 蕃茄薯仔魚湯 ( 29-JUL-2020 )

 ( 29-JUL-2020 WED )

今朝 8 點左右起咗身   咁都唔瞓喇 ~

我今朝講咗早餐要外賣   收銀話今日只得外賣   唔記得今日開始禁堂食 7 日添 ~

番到菇場只係 9 點   洗埋杯抹好枱就開始食早餐   咁早番到都好   可以安安靜靜食早餐   哈哈 ~

仍然忙下停下   所以呢   好快到 11 點 45 分 ~

我唔餓呀   所以出去行買杯麵再周圍行陣   難得有陽光 ~

差唔多 12 點 15 分先食 Lunch   呢排食早餐遲咗   但午餐又早咗   所以下次買個麵包做早餐會好啲   咁樣唔駛咁飽 ~

話咁快 1 點開工    又係忙下停下   好快 4 點 ~

去 759 買魚蛋就番屋企   呢排買定呢啲丸類   諗唔到煮咩就食佢㗎喇 ~

番到屋企沖涼   之後滾湯   搞掂哂就抖陣 ~

里奧大人 7 點左右先番到屋企   等佢沖埋涼先開飯 ~

是日晚餐 - 魚香茄子 + 蕃茄薯仔魚湯 

魚香茄子 ~ 買咗 2 條茄子   屋企又有魚香茄子醬   所以就整呢個餸喇 ~

蕃茄薯仔魚湯 ~ 我特登買 2 份蕃茄薯仔魚嘅湯料   咁連續兩晚飲都唔錯   有營養又好味 ~

食完就洗碗   之後大清潔廚房   其實聽晚都開鑊炒嘢   但都係清潔下好   雖然廚房都乾淨   但硬係覺得煎完嘢   要大清潔先安心 ~

搞掂哂即開機洗衫   沖埋涼就休息食生果 ~

里奧大人 8 點開會   開到 9 點半   之後又要即安排所有嘢比同事 ~

依家多數睇 Youtube   睇下有咩餸菜係簡單易煮   咁唔駛下下自己諗嘛   哈哈 ~

我 11 點都瞓先喇   里奧大人仲搞緊公司嘢   都應該未咁快瞓得添 ~

黑椒雞翼 + 蕃茄薯仔魚湯 + 米包 ＆ 甜品 ( 28-JUL-2020 )

奶茶 & 咖啡奶凍   好味道呀

( 28-JUL-2020  TUE )

里奧大人出咗門口   我都瞓下啦   不過瞓到 8 點 15 分都醒 lu ~

8 點 45 分出門口搭車   真係無咁多人架   感覺好舒服 ~

買早餐番菇場食   幾乎每次都係同一個早餐   勁呀 ~

其實就咁腿蛋通都好夠飽

菇場忙呀   未到 10 點都要開工了 ~

搞掂哂都 11 點幾   可以抖下 ~

西瓜喺群組發放訊息   由於聽日開始禁止堂食   咁避免外賣多人   所以 Lunch Time 改為 11:45am ~ 1:00pm   其實我覺得 12 點半食飯已經早   依家 11:45 分簡直係早餐時段添呀   哈哈 ~

好快就到 11 點 45 分   我又未餓   又見咁好太陽   所以出去行下   行咗半個鐘呀   勁爽 ~

Lunch 食今朝食剩嘅多士 + 豆漿   一份早餐只係 $24   仲可以分兩次食   真係慳唔少錢呀 ~

忙下停下又 4 點   不過今日遲咗放工   要做埋啲 Urgent 嘢先走 ~

去街市買餸   裝滿兩個環保袋   呢幾晚都唔駛去買菜喇 ~

番到屋企即沖涼洗頭   之後即滾湯喇   搞掂哂就拖地  咁就已經 6 點 ~

頭先買咗 1 斤半梳羅魚 + 2 個薯仔 + 2 條粟米 + 2 個大苦瓜 + 2 個大茄子 + 3 條角瓜 + 3 包金菇 + 4 隻雞肶 + 7 隻雞翼 + 10 個蕃茄 + 10 粒紫皮蒜頭 一係唔買 一買一定要裝滿環保袋 哈哈 ~

里奧大人 7 點幾番到屋企   咁我要焗熱啲包   所以叫佢沖涼先 ~

今晚 7 點半先食飯   突然覺得好夜咁呀   哈哈 ~

是日晚餐 - 黑椒雞翼 + 蕃茄薯仔魚湯 + 米包 & 甜品

黑椒雞翼 - 好想食雞翼   所以買咗 7 隻醃制嘅黑椒雞翼   放入焗爐焗   最後再掃蜜糖就搞掂 ~

蕃茄薯仔魚湯 - 好似好耐無滾魚湯   難得見到梳羅魚就即買喇   依家魚湯同蕃茄湯分開煮   所以比較花時間呢 ~

米包 & 甜品 - 里奧大人同事比我㗎   咁啱今晚好想食甜嘢   實在太開心喇   哈哈 ~

洗埋碗又再沖涼洗頭   其實沖幾次涼唔係問題   但洗頭真係好煩   因為我要吹乾嘛   所以我買定幾日菜   咁我番到屋企就只係會沖涼   唔會洗頭囉 ~

抖多陣就同里奧大人靈修   今次証道又令我好有得着   我發覺做人真係要有同理心   如果唔係講乜都無用   我都要好好學習一下 ~

里奧大人 10 點半瞓   我真係唔眼瞓   所以 11 點半先瞓到   唔知係咪今日飲咗北芪呢   之前飲咗幾日   真係幾晚都唔眼瞓咁 ~

波波魚丸撈麵 + 蒜蓉蒸脆肉瓜 ( 27-JUL-2020 )

( 27-JUL-2020  MON )

今朝 8 點 15 分都起身   估唔到里奧大人已經起咗身   咁佢去買早餐   我就沖涼喇 ~

唔知係咪飲咗祛濕茶關係   我覺得個人輕咗咁呀   唔係磅數嘅輕   之前個人感覺好重咁   下星期再煲先 ~

一番到菇場就做 Report   之後一望個鐘已經 10 點 10 分   但仲未 Send Report   平時 10 點前肯定做哂家嘛   之後先醒起依家係番 10 點   真係自己嚇自己 ~

做完無耐   抖陣又到 Lunch Time 咁 ~

出去買個芝麻鹹餐包   本身諗住食 Flakes + 豆漿   但我帶一大咗冬瓜祛濕茶番嚟飲   無理由又豆漿又祛濕茶嘛 ~

忙下停下   好快又 4 點 ~

放工即走   去 759 買埋急凍魚丸就番屋企喇 ~

番到屋企都即沖涼洗頭   之後抖下先煮晚餐 ~

里奧大人今日洗咗冷氣機隔塵網同吸塵機   仲幫手洗咗兩機衫同熨兩機衫   真係減輕我好多工作量呀   哈哈 ~

是日懶餐 - 波波魚丸撈麵 + 蒜蓉蒸脆肉瓜

波波魚丸撈麵 ~ 想試下波波丸好唔好食   所以今晚煮喇   估唔到又幾好味喎   最緊要唔腥 ~

蒜蓉蒸脆肉瓜 ~ 里奧大人問啲瓜係咪未熟 ?!   係幾似嘅   哈哈 ~

洗埋碗又再沖涼洗頭   真係攰過乜 ~

抖下就同里奧大人睇 Youtube   一齊聽蘇牧師証道   我真係需要靈修下㗎喇 ~

里奧大人 10 點半左右瞓   我都 10 點 45 分瞓喇   可能出得多汗比較攰呀 ~

黑椒牛柳炒鳥冬 + 自家制特濃朱古力鬆餅 ( 26-JUL-2020 )

註定失敗

要影多張留念   因為唔會再整佢   哈哈哈哈

( 26-JUL-2020  SUN )

今朝里奧大人起身番工   之後我都好快瞓得着 ~

8 點 45 分已經醒咗   咁刷牙洗臉再整早餐 ~

食完就開始大清潔屋企   基本上有時間   我都會抹哂成張梳化   感覺乾淨好多 ~

又大清潔張書枱同電視機櫃   基本上係櫃都會抹   搞掂哂都 11 點半   即換衫去買冬瓜袪濕料   再去埋超市入貨就番屋企   咁又用咗一個鐘了 ~

換埋衫就即煲冬瓜袪濕茶   之後大清潔廁所就沖涼喇 ~

沖完凍水涼   坐喺梳化抖抖   居然唔駛開冷氣都覺得好舒服   個身好似冰冰涼涼咁呢 ~

咁見有時間就焗鬆餅   其實喺屋企真係好忙   咁加上我唔係日日執屋   我一執又會執哂所有嘢   所以搞到好鬼忙咁 ~

屋企細焗爐   要分 2 次焗   點知焗出來係咁嘅樣   完全唔似鬆餅   哈哈

里奧大人番到屋企都 3 點幾   可以食嘢喇 ~

食完就抖陣   里奧大人瞓晏覺   我就睇 Youtube ~

6 點開始預備晚餐   差唔多 7 點先搞掂   哈哈 ~

是日晚餐 - 黑椒牛柳炒鳥冬 + 自家制特濃朱古力鬆餅

黑椒牛柳炒鳥冬 - 尋日喺青林買咗 2 塊黑椒牛扒   所以今晚切絲炒烏冬   再加 2 條脆肉瓜同 1 隻紅椒切絲一齊炒   炒出來勁大盤呀   哈哈 ~ 

自家制特濃朱古力鬆餅 - 清埋包高粉   其實過期 1 個月   咁開包粉仲好香朱古力味   咁焗埋去啦   無菜油用牛油溶液   是但啦   但估唔到里奧大人話好味道   哈哈 ~

食食下飯   家姐打電話比我   話糟糟叫佢問我用咩粉喎   點解鬆餅會咁樣 ?!   笑死我呀 ~

洗埋碗就開機洗衫   之後沖涼休息 ~

仍然睇下 Youtube   我 11 點半瞓先   里奧大人話仲未眼瞓呀 ~

蠔油鮮竹卷 + 燒賣 + 陳皮牛肉球 + 懷舊馬拉糕 ( 25-JUL-2020 )

( 25-JUL-2020  SAT )

今朝反而要早起身呀   哈哈哈哈 ~

買完外賣都番菇場慢慢嘆   今朝要食飽啲 ~

呢份早餐只係 $30 咋   但眼闊肚窄   好在 8 卦喺度   比咗半碗上海麵佢食

菇場忙咗陣就 Hea 過   個個都無嘢做   溫總都話 99% 同事都諗住今日唔駛番工呢 ~

放工即走   約咗里奧大人一齊行去南記食 Lunch ~

我呢碗 $38

里奧大人呢 Set 係 $57

食完就搭車去姑奶屋企拎嘢   佢屋企裝修   所以順便幫下手執嘢 ~

另一個大埔姑奶執執下嘢   之後無啦啦講慘無人道   因為周圍都係陳年貓毛   真係頂得順屋企咁污糟先勁囉 ~

之後姑奶話比個吸濕包比我   話好香喎   但見住佢喺鞋櫃後面地下執比我   咁地下周圍都有垃圾   我話唔要啦   咁污糟點要呀 ~

半場休息就傾偈   姑奶同我講話 "小姐   妳都要減下喇喎"   哈哈哈哈   好搞笑呀   又叫我小姐   其實我已經好耐無食零食   唔知係咪食藥肥咗呢   咁加上又懶   其實肥都係有原因   哈哈 ~

4 點幾走人   今晚唔想煮   所以去唐記買晚餐   再去街市買生果同去青林入貨   搞掂哂就番屋企喇 ~

番到屋企放低所有嘢就即沖涼   之後開機洗衫 ~

差唔多 7 點開餐   今晚只係蒸熱就搞掂   勁方便呀 ~

洗埋碗就休息   估唔到無汗   所以唔沖涼喇 ~

睇陣電視   諗諗下都係想沖涼   始終唔慣洗完碗唔沖涼呢   哈哈 ~

差唔多 9 點同家姐 Video Call   呢排見唔到 Berry   所以家姐就打來   全程影住 Berry   咁又傾咗半個鐘 ~

仍然睇下 Youtube   里奧大人 11 點都瞓   我就 11 點幾先瞓 ~

蠔油燜節瓜冬菇 + 潤腸 + 紅油手拍青瓜 ( 24-JUL-2020 )

( 24-JUL-2020  FRI )

尋晚瞓到半夜熱醒呀   成條頸都係汗   所以即去抹乾淨條頸   感恩之後可以即刻瞓番咋 ~

8 點半起身   里奧大人去買早餐   但差唔多 8 點 55 分先開始食早餐   我覺得有啲趕   下次都係 8 點 20 分起身好啲 ~

番到菇場係 9 點 55 分   真係好在無遲到咋 ~

菇場忙下停下   好快 Lunch Time ~

Lunch 食 Flakes + 豆漿   今日只係食咗 2 匙更 Flakes   因為早餐實在太飽   但又驚一陣餓唔方便食嘢   如果唔係真係想就咁飲豆漿呢 ~

今日無咁忙   所以可以準時 4 點放工 ~

番到屋企即預備晚餐   搞掂就抖下   差唔多 6 點 15 分就可以開餐 ~

是日晚餐 - 蠔油燜節瓜冬菇 + 潤腸 + 紅油手拍青瓜

蠔油燜節瓜冬菇 - 諗唔到煮咩餸   又整燜節瓜喇   今晚無肉   所以加 3 隻雞蛋呢 ~

潤腸 - 以為清哂啦   點知原來仲有 1 包 ~

紅油手拍青瓜 - 終於清哂啲青瓜   食到夠哂皮喇   短期內唔想再食   哈哈 ~

洗埋碗就開機洗衫   之後沖涼休息 ~

早食飯嘅好處係夜晚多咗時間用   但唔係成日可以咁早食飯呢   哈哈 ~

今晚 11 點幾都瞓先   聽日要番工呀   如果唔駛番就更好 lu ~

Mozzarella Cheese 焗薯仔 + 泰式雜錦海鮮丸米粉 + 腐乳唐生菜 ( 23-JUL-2020 )

( 23-JUL-2020  THU )

今朝 8 點 10 分起身   里奧大人今日 WFH   所以佢話佢買早餐番屋企一齊食 ~

其實我本身話我買早餐番屋企   咁里奧大人就唔駛出街   但佢話我沖涼佢去買早餐   咁時間好用啲 ~

我沖埋涼就食早餐   食完可以抖下先番工   真係幾爽   哈哈 ~

一落車行幾行   已經流汗   但我都唔係急步   可能真係帶戴住口罩零舍熱咁呢 ~

買埋豆漿就番菇場   只係 9 點 45 分   呢個時間番到最好   Pantry 無咁多人洗杯呢 ~

阿齋又係用消毒清潔用品抹枱   之後佢同我講: 小姐   妳睇下我依家都要抹   因為佢知我成日會抹枱   以前坐佢斜對面   佢聽到我抹枱聲~

Lunch time 出去打簿   順便去買瓜同菜   咁放工可以直接番企呢 ~

買個雞尾包做 lunch   依家番 10 點   所以遲咗食早餐   中午真係要輕食 lu ~

菇場飭咁忙喇   可以 4 點準時走 ~

里奧大人今日 Home Office   咁佢中午又係輕食   所以會特別餓   咁今晚 6 點都開餐喇 ~

是日懶餐 - Mozzarella Cheese 焗薯仔 + 泰式雜錦海鮮丸米粉 + 腐乳唐生菜

Mozzarella Cheese 焗薯仔 - 用芝士焗   咁就可以扮新菜式   哈哈 ~

泰式雜錦海鮮丸米粉 - 諗唔到煮咩就食丸類 + 米粉   呢樣肯定里奧大人鍾意食呢 ~

腐乳唐生菜 - 好想食腐乳   所以買 1 斤唐生菜 ~

洗埋碗就沖涼   今晚 7 點半就可以坐定定睇電視   勁爽呀 ~

我今晚 11 點唔夠都瞓   其實咁都唔錯   瞓得多係養血   身體都好啲呢 ~

沙甸魚焗薯仔 + 豬肉丸炒米粉 + 紅油手拍青瓜 + 焗蕃薯條 ( 22-JUL-2020 )

終於食哂包蕃薯條   開心開心

( 22-JUL-2020  WED )

感恩一覺瞓天光呀   其實瞓到 7 點半都醒醒地   但繼續瞓   不過 8 點都真係瞓唔到   所以起身喇 ~

早咗出門   可以去萬寧買嘢   勁爽呀 ~

買完就去買早餐   之後即番菇場食   因為已經 9 點半喇 ~

10 點準時開工   今朝忙 Filing   一望個鐘已經 12 點 05 分 ~

抖陣就到 Lunch Time   不過我差唔多 1 點先食個杯麵呢 ~

隻烚蛋係今朝嘅早餐   咁食唔落就留番 Lunch 食   但食完就肚屙呀   可能唔可以留咁耐呀

仍然忙 filing   話咁快又 4 點   準時走人 ~

番到屋企即沖涼   抖陣就預備晚餐 ~

今朝喺萬寧買嘅嘢   里奧大人問兩隻 Cream 有咩分別 ?!   我即睇   原來係無分別   只係價錢唔同   咁當然孖裝平啲   但就送旅行裝 DOVE 沐浴液   買 2 個獨立包裝就送 1 支保濕咁囉   其實我以為係唔同 Cream 來㗎   哈哈哈哈

買三件滿 $188 就送 1 支豉油

里奧大人 6 點唔夠都番到屋企   依家都會叫佢沖涼先   反正佢食完又唔駛洗碗   唔會出汗囉 ~

6 點 15 分開餐   勁早呀   哈哈哈哈 ~

是日晚餐 - 沙甸魚焗薯仔+ 豬肉丸炒米粉 + 焗蕃薯條 + 紅油手拍青瓜

沙甸魚焗薯仔 - 焗完薯仔先覺得好多咁   最衰之前手快開咗罐沙甸魚   咁點都要食埋去囉   但薯仔就剩一大半   唯有留番聽晚食 ~

豬肉丸炒米粉 - 1 餅米粉 + 3 隻雞蛋 + 3 粒豬肉丸   咁樣好似無咁單調   但我將米粉切咗 3 下   炒埋之後碎濕濕咁   要用匙更食呀 ~

紅油手拍青瓜 - 好想清埋幾條小青瓜   所以就整呢個涼拌   之前又埋咗紅油   係時候要開來食喇   咁再加埋蒜蓉   真係食得好滿足   出街食又貴又少   自己整又方便   最緊要唔駛煮   就咁拍幾拍就搞掂 ~

焗蕃薯條 - 終於清哂喇   以後唔會再買呢包嘢   哈哈 ~

洗埋碗就開機洗衫   之後就沖涼喇 ~

里奧大人 8 點開會   9 點就開完   估唔到咁快 ~

今晚唔係咁眼瞓咁   里奧大人仍然 10 點半瞓   我差唔多 11 點先眼瞓呀 ~