藍山咖啡專門店 @ 大埔 ( 30-apr-2010 )

肉眼扒意粉 ( 黑椒汁 )
獅子頭意粉

( 30-apr-2010 fri )

Happy Friday 喇   加上聽日又係放假   所以心情特別好呢 ~ 
今朝食燒賣粉果 + 奶茶   但食完就好滯咁囉 ~
番到菇場忙到震   差唔多做到 lunch time 先做完呀   今日無帶 lunch box   所以出去食麵   食完又行陣就番去 lu ~

里奧大人公司附近開咗間 Jusco $10 店   買完順便接佢放工   其實本來今晚係去教會聽嘢架   但里奧大人太遲放工   保守估計至小開場遲半個鐘先到   咁樣好似好唔尊重人咁   所以最後決定唔去 lu ~ 

諗住去元綠   但又要等位唔去喇   里奧大人肚餓嘛   所以去咗藍山咖啡專門店   去到得番最後一張枱無人坐咋   感恩呢 ~ 
覺得晚餐無蔬菜好似好唔健康   番到屋企就食蘋果沙律呢 ~  

越棧 @ 大埔 ( 29-apr-2010 )

( 29-apr-2010 thu )

呢朝又食芝腿治   其實呢間餐廳嘅奶茶唔太好飲   不過勝在近菇場   卡位坐得幾舒服   我鍾意坐卡位架   可以擺袋   唔駛攬住咁辛苦呢 ~


噢   番到菇場好忙呀   不過時間過得好快呢   唔錯架   好過吽下吽下咁過 ~ 
本來 lunch 出去食   點知個天黑哂   大風又大雨   我都唔想出 lu   食埋最後嘅即食粉絲   加埋里奧大人食唔哂嘅芝士糙米包   夠哂飽啦 ~ 
放工超大風呀   簡直係有凍嘅感覺   落車又超大雨   其實已經諗好煮乜   但去到街市無心機買餸   即打比里奧大人話唔煮飯   無 mood 煮呀 ~
里奧大人上咗大陸   所以要 8 點幾先番到香港   我就可以好輕鬆咁熨兩機衫   再洗一機衫   等里奧大人知道我唔煮飯   都一樣好忙架 ~
本來想同去元氣食壽司   但 8 點幾都要等位   所以唔等   即去隔離嘅越棧食算 lu ~  

住家飯 @ 媽咪屋企 ( 28-apr-2010 )

煎鯧魚蒸石蚌  豉椒炒蜆  黑椒牛扒  炒菜心  乳鴿 & 豬肚 ( 外賣 )  雪耳粟米瑤柱清補涼豬展湯

( 28-apr-2010 wed )
今朝食扒芝腿治   麵包煙煙韌韌   好好味呀   次次食完都覺得好開心架 ~


番多兩日就放假   真係諗起都開心呀   勁有 holiday mood 呢 ~
晏晝有 lunch box   天氣唔錯   所以食完出去行下 ~ 
里奧大人上咗大陸   所以今晚去媽咪屋企食飯   懶得煮呀   叫里奧大人自己出去食算喇 ~ 

酸梅麵豉蒸排骨 + 蒜蓉炒脆肉瓜 + 蘋果沙律 ( 27-apr-2010 ) + 跑步

( 27-apr-2010 tue )

早餐食咗奶醬多 ( 多醬 )   呢間茶餐廳都唔錯   因為真係好多醬呢   依家我飲燕麥糠   感覺好似健康好多咁呀 ~

晏晝有 lunch box   尋晚無乜點食到 d 魚餅   今日食好似有食新餸嘅感覺呀 ~  

放工等車   等咗 3 架都 full   終於等到 6 點先上車   好在有位坐咋   因為我好想瞓覺呢 ~   
是日懶餐 - 酸梅麵豉蒸排骨 + 蒜蓉炒脆肉瓜 + 蘋果沙律
酸梅麵豉蒸排骨 - 唔知整乜就會出現呢碟排骨架喇   今次里奧大人無啦啦撈勻 d 汁   再 "北" 落自己碗飯度   又唔睇嘢   佢一 "北" 就 "北" 埋 d 指天椒   我睇到嘅時候已經太遲   因為佢已經食咗小小   係咁話辣   我即刻話妳睇清楚先 "北" 就無問題啦   嘈嘈閉 ~

蒜蓉炒脆肉瓜 - 尋晚煮剩一條   清清地用蒜蓉炒算喇   費事用特辣 XO 醬黎炒   一陣又話辣唔食呀 ~
蘋果沙律 - 間唔中就好想食沙律   因為我鍾意食紅腰豆   粟米同椰果   配埋蘋果真係 very good 呢 ~ 
同里奧大人去跑步再拎中藥   依排開始跑步   所以 d 時間真係要好好運用   同里奧大人講覺得放工買餸   煮飯   食飯   洗碗 d 時間好緊迫咁   好似有壓力咁   佢即話幫我洗碗   但我覺得佢洗完要我執手尾我仲火滾   即時拒絕咗佢   佢都好無奈但帶點興奮 ( 話哂唔駛佢做嘛 )   真係要諗諗點安排先 ~       

泰式魚餅 + 金銀蒜脆肉瓜 + 豉油王炒飯 ( 26-apr-2010 ) + 跑步

( 26-apr-2010 mon )
哎呀   第朝要番工嘅話   都係唔好煲粥食   食完成晚去廁所   瞓得好差呀   加上星期一添    好在唔係潮濕天氣   唔係仲慘 ~

真係攰到上網都無乜心機    走肉行屍咁 諗住食完 lunch 就瞓陣    點知又瞓唔到喎    幾咁辛苦先等到放工 上車無耐就瞓着喇   chok 下 chok 下真係好易瞓呢 
一早諗好哂要買嘅餸   所以好快搞掂就再去睇中醫喇 ~ 
是日晚餐 - 泰式魚餅 + 金銀蒜脆肉瓜 + 豉油王炒飯
泰式魚餅 - $15 鯪魚肉 + 4 條青豆 + 6 塊檸檬葉 + 1 湯匙紅咖哩醬   第 1 次整   但無乜心機整喎   如果薄小小會好 d   同埋覺得唔夠色呀   下次再努力過 ~   
金銀蒜脆肉瓜 - 今次切片再加蒜蓉蒸   最後淋豉油熟油 + 炸蒜蓉   第 1 次咁整又唔錯喎 ~  
豉油王炒飯 - 本來想就咁蒸番熱   但切咗蔥粒   所以炒飯算喇 ~ 
今晚又同里奧大人跑步再拎中藥   我飲中藥係唔駛飲完食山楂餅   因為更苦嘅中藥都飲過   黃蓮又飲過   所以唔怕苦   但里奧大人就好怕苦   一定要食山楂餅   仲越食越好味咁款   噢 ~ 

叉燒炒麵 + 雙蛋粥 + 菜心 ( 25-apr-2010 )

( 25-apr-2010 sun )
呢朝里奧大人 9 點起咗身   我都差唔多醒   但又唔想起身住喎   喺張床碌黎碌去都瞓唔着   碌到 10 點起身梳洗去食早餐   之後番教會喇 ~

同里奧大人去街市買餸   第 1 次買麵餅   問佢買幾多   佢話我煮得好食咪食得多囉   哎呀   買麵餅個男仔喺度笑呀   之後去買鹹蛋皮蛋   $5 有 3 隻   我買 3 隻皮蛋   之後想買鹹蛋   問鹹蛋佬 d 鹹蛋可以擺幾耐   佢話最多一個星期   不過我照買 3 隻 ( 驚最小買 3 隻嘛 )   但里奧大人話唔駛買咁多   點知個鹹蛋佬話買 2 隻皮蛋 1 隻鹹蛋咪得囉   仲笑哂口話 一睇就知妳係無飯煮婦啦   噢   我真係估唔到可以 $5 買兩樣蛋架   因為好多街市人都會叫妳買多 d 家嘛    呢間嘢都幾好   又 nice   如果我屋企附近嘅街市   d 人係咁好就好啦   買都買得開心 d 呀 ~

同里奧大人 3 點先去食 tea   買埋生果就番屋企 lu   因為我有 3 機衫要熨呢 ~

是日晚餐 - 叉燒炒麵 + 雙蛋粥 + 菜心

叉燒炒麵 - $20 叉燒 + 3 個麵餅 + 1扎 韭菜 + 1 扎韭黃   第 1 次整咋   覺得唔錯呀   里奧大人夾咗幾次呀   佢食得好滿足咁呀   非常開心呢 ~
雙蛋粥 - 我好怕煲粥架   之前兩次煲到好杰   本來想用電飯煲煲粥功能   但要 3 個鐘   所以再膽粗粗煲多次   預咗食唔到架   不過點都想試下囉   今次 ok 呀   好綿喎   不過如果再多小小水就更好啦   無咁飽肚嘛 ~
菜心 - $10 斤   但都唔係好甜咋 ~
之前買咗乳酪   今晚終於開黎食喇   酸酸咪咪好正呀 ~

BBQ @ 姑奶屋企 ( 24-apr-2010 ) + 跑步

( 雜丸 )( 蝦 )( 芝士腸 / 香腸 )( 多春魚 )( 墨魚卷 )( 爐嘅 1/ 3 放咗塊網 - 放咗蒜蓉包  魚柳  大眼雞  豬扒  雞翼  乳鴿  魷魚  腎  樣樣小小咁   好快有得食   個火好靚嘅話 )  
( 姑奶煲嘅粉葛湯 - 我初初以為係紅豆沙黎架   因為好小 BBQ 會飲湯呢 )

( 24-apr-2010 sat )
今朝食咗好好味嘅扒芝腿治   好滿足呀   所以雖然要番工   但都覺得好開心呢 ~
其實星期六番工真係無乜嘢做   就算有嘢都唔願做囉   唔想破壞 holiday mood 呀 ~ 
晏晝同里奧大人  媽咪  婆婆同工人一齊去鴻星飲茶   不過里奧大人要考試   所以 3 點走先    我地就坐到 3 點半就走   再行陣就各自番屋企 lu ~ 
炸雲吞 - 熱辣辣脆卜卜   好味呀鹹水角 - 又係熱辣辣   同埋無肥豬肉   正呀海蜇拚烤麩 - 好耐無食海蜇   所以又係覺得好好味點心拚盤 - 蝦餃 / 燒賣 / 素粉果 / 竹笙餃 - 懶得諗食乜點心   食拚盤最好  古法馬拉糕 - 一般啫 斑腩炒麵 - 個麵唔掂呀   底部份好似生咁嘅 甜薄撐 - 係花生椰絲芝麻餡   麻麻地   d 皮都唔煙韌嘅
芒果糯米糍 - 好心啦   一係比 4 個   一係用另外嘅碟裝啦   我覺得好核突囉   好似比人偷食咁   最慘又唔好味喎   d 皮唔煙韌   又無芒果味   超級極度失望呀 ~

呢日十分之充實   番到屋企即睇中醫   再番屋企換衫去跑步   出一身汗好舒服呀 ~

之後同里奧大人一齊去姑奶屋企 BBQ   之前好想 BBQ 架   估唔到隔幾日就可以 BBQ   好感恩呢 ~  

粟米雞柳 + 焗雞翼 + 焗薯條 + 阿婆馬蹄糕 ( 23-apr-2010 ) + 跑步

( 23-apr-2010 fri )
今日天氣非常之好呀   有太陽又有風又爽   個人都開心好多呀   如果日日咁好天氣就好喇 ~
我覺得呢間餐廳嘅麵真係好大個   次次食完都好飽咁   但係其他餐廳又唔會有呢 d 感覺架喎   定係食麵所以好脹胃呢 ~

喺菇場 hea 下 hea   下又到 lunch time   今日好天氣   所以出去食同行下   不過行到有 d 熱 ~
好耐無煮飯啦   所以係時候要煮飯 lu   鍾意食乜就煮乜 ~

是日懶餐 - 粟米雞柳 + 焗雞翼 + 焗薯條 + 阿婆馬蹄糕
粟米雞柳 - 無菜就整粟米蓉啦   諗住 1 罐粟米蓉 + 1 罐粟米粒   點知記錯自己之前買嘅係粟米蓉   自己又無睇清楚就開黎用   點知諗住隔水嘅時候先知係粟米蓉   本來想整粟米湯   但又驚飲完食唔落飯   所以最後兩罐一齊做汁   用汁撈飯都飽咯 ~
焗雞翼 - 醃咗兩晚架喇   焗雞翼個賣相真係好靚仔   肉眼睇好靚架   睇相硬係爭 d   應該係我影相技術有問題 ~ 

焗薯條 - 反正開咗焗爐   又反正好想食薯條   所以一齊焗   不過唔多夠脆   因為時間唔夠呀   但我又唔想再等   照食可也   下次整瘋薯先 ~

阿婆馬蹄糕 - 隔離阿婆知我鍾意食馬蹄糕   所以佢有親戚比佢馬蹄糕   佢就會比我架喇   好多馬蹄粒   同埋好煙韌   自家制嘅真係好味好多呢 ~

食完飯抖一個鐘就同里奧大人去跑步   再去飲中藥   番到屋企沖涼抖陣就瞓覺   話咁快就過咗一日   夜晚 d 時間真係過得好快呢   噢 ~