辣鹹酸菜炒豚肉 + 黃芽白 ( 31-OCT-2019 )

( 31-OCT-2019  THU )

感恩一覺瞓天光   實在難得呢 ~

同里奧大人一齊食早餐   搭 9 點巴士番工   點知落遲咗 1 個站落車   行餐死呀   我直頭頭段要跑添呀   所以 9 點半先番到菇場呀   遲哂大到 ~

菇場唔太忙   可以抖下 ~

Berry 咁樣瞓好得意呀   個樣好似 BB 嗰陣咁呢   個鼻仔無咁長

Lunch Time 出去行陣   再買炒果 + 炒麵番菇場食 ~

忙下停下好快放工   即番屋企喇 ~

里奧大人 5 點半放工   我番到屋企預備無耐   佢都番到嚟   我話未咁快有得食   哈哈 ~

煮埋個超力米   7 點左右開餐喇 ~

是日懶餐 - 辣鹹酸菜炒豚肉 + 黃芽白  

辣鹹酸菜炒豚肉 - 過哂期好耐嘅辣鹹酸菜   試咗唔臭就煮啦   唔好嘥嘢   食完又無事   哈哈 ~

黃芽白 - 前晚買㗎   今晚要食埋喇 ~

大清潔完就開機洗衫   個人好攰   都係唔徑步 lu ~

睇下電視   睇到 10 點 45 分都要瞓喇 ~  

海皇粥店 @ 美孚 ( 30-OCT-2019 )

皮蛋艇仔粥 ($27) - 里奧大人就咁艇仔粥   佢唔鍾意食皮蛋

炸腸 ($19) - 油炸鬼好脆呀   好難得

( 30-OCT-2019  WED )

尋晚都瞓得 OK   感恩感恩 ~

早餐食芝腿治烘底   呢期好想食芝士 ~

菇場忙呀   咁樣個人無咁攰   哈哈 ~

Lunch Time 又行一陣   買牛什河番菇場食   想食濃味嘢 ~

同 BG 去倉睇嘢   點知傾咗 1 個鐘 ~

放工即走   今晚要番學呀 ~

行到 7 點就去海皇   坐低無耐   里奧大人都到埋喇 ~

今晚係補課   即係最後一堂   令我對聖經歷史都有啲認識   始終我無睇哂聖經   里奧大人就熟好多啦   可以答 Miss 問題   所以我都真係要盡快睇哂聖經呢 ~

今晚搭小巴番屋企   番到屋企都 10 點幾   即沖涼喇 ~

睇多陣電視   12 點先瞓 ~

招牌水餃 (外賣) + 黃芽白 ( 29-OCT-2019 )

( 29-OCT-2019  TUE )

呢兩晚都係半夜去廁所   所以瞓得唔係咁好   又係時候睇中醫 lu ~

天氣涼咗好多呀   勁舒服 ~

早餐食奶醬多   想食下甜嘢 ~

菇場唔忙   所以覺得好靜   哈哈 ~

Lunch Time 行陣再去買紅腸酸辣米線   食完超級飽㗎   已經扣底   所以我覺得食米線係好飽肚呢 ~

   
2 點半開始忙   忙到 5 點   可以準時放工 ~

放工去街市買水餃   不過無開   咁買菜同提子啦   唔想兩手空空 ~

去埋八方雲集買餃子就番屋企   里奧大人去 Trade-in 手機   咁我有時間就拖地喇 ~

7 點幾開餐   今晚唔太餓   不過都唔想咁夜食 ~   

是日懶餐 - 招牌水餃 (外賣) + 黃芽白

招牌水餃 (外賣) - 食開人手包制嘅餃子   依家覺得八方雲集啲餃子皮好厚   同埋成隻水餃係無味咁囉 ~

黃芽白 - 估唔到好清甜呀 ~

洗埋碗就開機洗衫   沖埋涼就休息喇   呢兩晚好鬼攰 ~

睇多陣電視   11 點都瞓 ~

榮基打冷小菜 @ 官塘 ( 28-OCT-2019 )

招牌牛腩米粉 ($32) - 我覺得自己好勁 (悶)   幾乎一至五都食呢啲粉麵   哈哈

手打牛丸+黃金片頭粗麵 ($39)

腐乳通菜 ($18)

( 28-OCT-2019  MON )

里奧大人今朝搞肚痛   又話占寒占凍   好在今日放假   可以全日休息 ~

我又早咗搞掂可以出門口   佢問屋企有無寶礦力 ?!   我話無呀   咁之後我都即幫佢買麵包同寶礦力啦   等佢唔駛出去食嘢   感恩都趕得切班車呢 ~

早餐食芝腿治烘底   好味道 ~

菇場忙呀   話咁快又 Lunch Time ~

無啦啦落雨   所以無得行 lu   即刻去買燒賣粉果腸粉番菇場呢   好餓呀 ~

終於忙完   可以抖下 ~

放工即走   去埋超市買急凍豬扒同寶礦力就番屋企喇 ~

放低哂嘢就同里奧大人出去食嘢   佢食完就番屋企   我就去徑步   點知徑咗 1 個圈又搞肚痛   要即番屋企   里奧大人問做咩咁快   哈哈 ~

唉   唔徑喇   沖埋涼就開機洗衫   熨 2 機衫當做運動算喇 ~

今晚都幾攰   里奧大人 10 點瞓   我 10 點 20 分都瞓 lu   哈哈 ~

米線陣 @ 官塘 ( 27-OCT-2019 )

 香辣皮蛋伴青瓜 ($17) - 唔想食米線   所以叫咗個小食

大汗豬扒擔擔米線 ($47) - 我食咗少少米線   因為唔係太餓

( 27-OCT-2019  SUN )

今朝 8 點 45 分起身   沖埋涼就去食早餐 lu ~

食完就番主日學   之後就同里奧大人一齊崇拜喇 ~

2 點左右食下午茶   帶里奧大人食韓國嘢   因為我覺得好味道呀   哈哈 ~

部隊鍋+白飯 ($75) - 原來仲有半個麵   所以食到好飽

好多料   最緊要有里奧大人最鍾意嘅午餐肉

餃子年糕粒麵 ($50) - 年糕好煙韌   但食完之後   個胃即刻頂住好辛苦

鮮蘆薈樂 / 番石榴樂

食完行陣就番屋企   里奧大人由 4 點半瞓到 6 點半   我又無瞓呀   雖然攰   但又瞓唔到喎 ~

7 點幾去 APM 買手機   今次買華為 P30 Pro   如果好用就到我都換埋喇 ~

買完去食嘢   之後再去麥當勞食雪糕 ~

Oreo 麥旋風 ($13)   我同里奧大人講話其實即係雲厘拿雪糕 + Oreo 餅之嘛   我話下次我買呢 2 樣番屋企咪可以做 Oreo 麥旋風呢   佢個樣好驚訝話 Oreo 餅乾點整到咁 ?!   我話大哥   壓碎咪得囉

食完即番屋企喇   都已經 9 點幾 ~

沖埋涼就睇電視   里奧大人就過手機資料 ~

我 11 點半都瞓喇   里奧大人就唔知佢幾點先可以瞓   呵呵 ~

HANG A RI 韓國餐廳 @ 紅磡 ( 26-OCT-2019 )

石鍋牛肉拌飯 + 鮮蘆薈樂 ($70) - 熱辣辣 

一定要落辣椒醬   係成個飯嘅靈魂呀   哈哈

撈埋一齊食真係勁好味   好鍾意爽爽脆脆嘅感覺

( 26-OCT-2019  SAT )

今朝瞓到 11 點 20 分先醒呀   沖埋涼就去食早餐喇 ~

食完去超市買嘢   之後番屋企 lu ~

咁就過咗半日   所以瞓得晏其實真係無咩時間用咁   哈哈 ~

抖陣就開機洗衫同熨衫   搞掂哂就休息 ~

里奧大人 2 點幾出門口   我就繼續睇 Youtube ~

呢排成日睇韓國人嘅吃播 Youtube   成日睇到好餓   哈哈 ~

不過今日都唔駛食 Lunch 㗎喇   食啲零食就搞掂   因為唔想咁飽 ~

6 點幾出發   食埋晚餐就同里奧大人聽講座 ~

10 點左右散會   即番屋企喇 ~

沖埋涼   抖多陣都 11 點   里奧大人 11 點幾就瞓   我差唔多 12 點先瞓 ~

泰亞萊泰式美食 @ 紅磡 ( 25-OCT-2019 )

泰式細拚盤 (蝦餅 / 雞座 / 雞翼 / 春卷) ($88) - 里奧大人話熱氣    加咗杯涼粉冰 ($14)

蝦醬炒飯 ($48) - 炒飯好味道

( 25-OCT-2019  FRI )

今朝早咗搞掂哂   所以我話同里奧大人一齊食早餐 ~

呢幾日成日一齊食早餐   好似一齊番工咁   哈哈 ~

菇場忙呀   時間過得勁快 ~

呢張好似細個嘅樣   好得意呀



Lunch Time 又出去行陣   再買牛筋丸河番菇場慢慢食 ~

唔忙呀   西瓜 4 點走人   所以勁 Free ~

放工即走   去接里奧大人放工   食埋晚餐就番小組 ~

今晚 10 點左右散會   都即番屋企喇 ~

沖埋涼就睇下 Youtube   不過今日都幾攰   11 點幾都要瞓 lu ~

龍城冰室 @ 九龍灣 ( 24-OCT-2019 )

瑞士雞翼撈公仔麵配 3.6 牛乳炒蛋+牛油脆豬 ($48)

( 24-OCT-2019  THU )

今朝發夢   個夢好長呀   每個場景都連貫住   勁真實囉   但起身只記得糟糟見鬼   哈哈 ~   

本來話今朝陪里奧大人食早餐㗎   但諗起佢話要用多咗錢   所以我尋晚都諗住唔同佢食㗎喇 ~

咁我起咗身   之後佢話同我食早餐   我話唔喇   唔想你用咁多錢   佢話佢特登早啲起身同我食早餐添   我話係咩 ?!   佢話係呀   咁我話陪佢食啦   怪不得今朝鬧鐘響 2 次啦   原來真係記得我講話今朝同佢食早餐呢 ~

等早餐期間   里奧大人笑住話我咁小氣   我話真係唔鍾意咁話我囉   好似成日用佢啲錢咁   咁我出錢都唔會咁話佢家嘛   雖然我好少機會出 ~

尋日個早餐實在太飽   所以今朝都係食三文治算喇   哈哈 ~

菇場忙呀   好在夠精神 ~

瞓到咁樣   好嘆呀   諗起佢細細個嘅時候   成日走去有陽光嘅地方瞓㗎

Lunch Time 出去行陣再買牛腩河番菇場食   一路食一路上網   真係好快又到 1 點半 ~

仍然忙呀   好快放工 ~

放工去九龍灣行陣   再去 Taste 買 Milo 餅乾比里奧大人   之後佢話差唔多到九龍灣   咁等埋佢啦 ~

佢約咗組員食飯   咁我就約姊妹 SF 食飯   但係同一間餐廳   哈哈 ~

我同里奧大人一齊行入餐廳   佢組員覺得好搞笑   因為我分開坐   叫我不如坐埋去啦   因為佢唔知我都約咗人   哈哈 ~

等埋姊妹 SF 先叫嘢食   好似好耐無見   好多嘢傾   不過 7 點 45 分都要去聽 "生命之道" 喇 ~

姊妹 SF 去沖繩旅行   買咗盒朱古力比我同姊妹 TT

聽到 9 點就散會   番到屋企即開機洗衫   沖埋涼就休息 lu ~

今晚 11 點幾都瞓   天氣涼咗   個人特別快眼瞓咁呢 ~

韭菜餃 (外賣) + 炸魚皮 (外賣) + 粟米 ( 23-OCT-2019 )

( 23-OCT-2019  WED )

今朝早咗起身   所以陪里奧大人食早餐 ~

佢話今朝食飽啲   因為好開心我陪佢喎   好少聽見佢咁講呀   哈哈 ~

菇場忙呀   話咁快又到 Lunch Time ~

行咗 10 分鐘就番菇場   阿齋問我買咗咩 ?!   我話只係出去行陣咋 ~

早餐未落格   1 點先食 Flakes + 乳酪 ~

菇場仍然忙   但開始有啲攰   哈哈 ~

放工即走   去街市買餸就番屋企 lu ~

番到屋企都要即煲水   咁里奧大人 7 點左右番到屋企   可以即刻開餐 ~

是日懶餐 - 韭菜餃 (外賣) + 炸魚皮 (外賣) + 粟米

韭菜餃 (外賣) + 炸魚皮 (外賣) - 天氣涼就想食呢啲濕嘢   其實勁想打邊爐呀   以前後生有食力   間唔中都會喺屋企打邊爐   依家唔會喇   多數去阿 mi 屋企或者家姐屋企先打   多人食開心啲又可以食得多啲嘢 ~

粟米 - 好想食呀   甜甜哋好味道 ~

里奧大人 7 點半開始瞓   瞓到差唔多 8 點   之後話唔徑步   我咪話佢囉   要我等咁耐   之前問又話一定去徑步 ~

徑咗 1 個圈   無啦啦搞肚痛   要即番屋企喇 ~

我話聽朝同佢食早餐吖 ?!   佢話唔開心   因為佢用多咗錢   佢係講笑   但成日咁講就令到我唔開心囉 ~

11 點瞓喇   天氣涼涼哋真係好想瞓覺   哈哈 ~