和牛芝心漢堡扒蝴蝶粉 + 臘肉糯米飯 + 菜心苗 ( 31-DEC-2023 )

( 31-DEC-2023  SUN )

今朝 7 點起身   同里奧大人食埋早餐就要番去公司幫手喇 ~

不過頭先茶記好焗   我覺得好攰   感覺缺氧咁 ~

里奧大人仲係有嘔心感覺   所以我又叫佢請假去睇醫生   我依家都係咁   一有唔舒服都睇咗醫生先   唔想好辛苦先睇呀 ~

9 點即打去預約   要 10 點 15 分先有得睇   其實都算快㗎喇 ~

里奧大人同醫生講話有嘔心感覺   醫生即刻幫里奧大人驗咗血壓同糖尿   結果又好正常喎   之後我問係咪因為戴眼鏡唔合適 ?!   佢話咩都有可能 ~

不過依家就咁睇就唔知咩原因會咁   但如!持續係咁就要去身體檢查   照下腸胃同個腦   依家比啲腸胃藥食下先   話最緊要係無頭痛   嘔心感覺都可能係緊張   瞓得唔好咁   又講笑問有無同老婆鬧交唔比佢瞓   哈哈 ~

拎埋藥就搭車番屋企   咁之前有教友住屋企附近   我哋經過就去望下   望完就番屋企啦   行到半路見到有人同我哋揮手   原來係大胃王 ~

本身大胃王約咗里奧大人開會   但里奧大人睇錯以為下星期   不過就算今日都開唔到會   身體狀態唔係咁好 ~

同大胃王傾開話作嘔作悶   佢話里奧大人似乎胃寒   因為里奧大人成日焗胎菊   佢話好涼㗎   又話佢以前成日生暗瘡就係咁食西瓜同綠豆沙   所以搞到胃寒   辛苦咗幾年先叫做好番咋   所以佢教里奧大人應該飲啲咩食啲咩   感恩見到佢咋   咁我唔駛咁擔心嘛 ~

見到大胃王   真係感覺到係神嘅安排   因為平時唔會行嗰段路㗎   感恩感恩 ~

番到屋企要抖陣   差唔多 3 點先去食下午茶 ~

之前比嘅隻炸肶   啲皮係無哂   咁叫佢換啦   再嚟呢隻都係衰㗎喇   完全唔係炸   不過我都唔換啦   食滷水肶無咁熱氣嘛   咁諗係咪當堂開心哂呢   哈哈

食完行陣就番屋企   里奧大人瞓覺   我睇睇下 Youtube 都瞓埋 ~

5 點左右都醒喇   里奧大人話熨衫當做運動   咁又好呀   哈哈 ~

是日晚餐 - 和牛芝心漢堡扒蝴蝶粉 + 臘肉糯米飯 + 菜心苗

和牛芝心漢堡扒蝴蝶粉 - 今晚好有心機整㗎   整咁細碟嘢都用咗我 40 分鐘   好在里奧大人都話好味道   可惜佢唔係咁好胃口   食咗 1/3 咋 ~

臘肉糯米飯 - 係時候清咁啲糯米   但我都食剩 2/3   始終下午茶都好飽   糯米飯就更加唔駛講啦   哈哈 ~ 

菜心苗 - 呢度係半斤   今日聽完大胃王話里奧大人可能胃寒   我依家煮菜都加薑   真係我胃寒都唔會咁緊張自己呀   哈哈 ~

洗埋碗抖就同里奧大人去做運動   今晚只做 20 分鐘   因為趕住睇電視呀 ~

沖埋涼就開機洗衫   之後同里奧大人睇 "思家大戰" ~

好多年都無倒數   依家年紀大仲更加唔會啦   今晚 10 點 50 分都瞓覺   最搞笑里奧大人話做咩唔睇哂先瞓   一陣搵唔番咁點 ?!   我話咪唔睇囉   又唔係啲緊要嘢   哈哈 ~

豉汁蒸鯧魚 + 菜心苗 ( 30-DEC-2023 )

( 30-DEC-2023  SAT )

感恩一覺瞓天光   話哂今日要番工   點都想精神啲嘛 ~

真係話咁快就放咗一星期假   初初諗住一個星期唔煮   比自己抖下㗎   但里奧大人唔舒服   我就唔想成日出街食啦   同埋又擔心佢喎   所以搞到我都無咩心機呀   哈哈 ~

同里奧大人一齊食早餐   食完就去佢公司坐陣   之後先搭車番工 ~

菇場忙咗個幾鐘就可以做自己嘢   今朝好少人番工呀   因為好多人都請假呢 ~   

2023 年完美結束

放工即走   約咗里奧大人去九龍灣   我叫佢去眼鏡舖   睇下點解戴完眼鏡咁唔舒服呀 ~

職員話可能眼鏡框位置唔啱   因為有高低耳   同埋托眼鏡嘅時候又可以整歪咗少少   之後再係唔舒服呢   就要減散光度數喇   所以要睇多兩個星期點先   雖然會有嘔心感覺   但里奧大人反應比較大   始終太耐無戴眼鏡   要時間適應呢 ~

食埋下午茶就番屋企   想比里奧大人休息多啲 ~

堅信號生煎包 (4 隻) ($34) - 仍然覺得好味道

上海粗炒 ($46) - 好似得 3-4 條肉絲咋   同齋麵無咩分別   哈哈

番到屋企抖陣就去街市買餸   買完就番屋企沖涼喇   今日有少少熱咁 ~

抖陣就做小清潔   依家做家務都有點力不從心   以前一做就一次做哂㗎   依家係一日做啲咁囉 ~

搞掂哂都預備晚餐   今晚 7 點幾先開飯呀 ~

是日晚餐 - 豉汁蒸鯧魚 + 菜心苗

豉汁蒸鯧魚 - 呢條只係 $35   同埋唔腥   最開心係里奧大人食咗好多   因為代表佢有胃口啦   哈哈 ~

菜心苗 - 又買咗 1 斤   因為諗唔到食咩菜呀 ~   

食完抖陣就洗碗   之後同里奧大人去做運動 ~

沖埋涼即刻開機洗衫   冬天衫太厚   好似洗極都唔完咁 ~

睇下 Youtube 又打下機   今晚 11 點 40 分先瞓覺 ~

茄汁蝦 + 鮑魚油麥菜苗 ( 29-DEC-2023 )

( 29-DEC-2023  FRI )

今朝 8 點 10 分起咗身   又可以靈修一個鐘   之後里奧大人就起身喇 ~

9 點 20 分出去食早餐   食完去買菜   叫里奧大人番屋企先 ~

今朝要食得輕盈啲   唔想食完早餐要好晏食午餐   打亂哂啲時間呀

碎蛋沙律三文治 ($22) - 我好鍾意食碎蛋沙律   但唔係間間餐廳都有呢

煙三文魚三文治 ($28) - 里奧大人無咩胃口   我叫佢食呢款三文治   家姐話每日新底價   哈哈   因為佢呢幾朝都有問我食咩早餐呀

番到屋企趕得切睇 "餐餐有宋家"   估唔到又真係幾搞笑   哈哈 ~

睇完就熨衫   之後又抖下咁 ~

1 點幾喺屋企食午餐   食番尋日嘅茄汁魚柳飯呢 ~

食完又抖下   之後又係咁睇 "臥底旅行團" ~

諗住今日都會喺屋企   點知差唔多 4 點左右   里奧大人話出去碼頭行下   最搞笑佢成日話唔好意思   呢幾日唔舒服陪唔到我去街   我話唔舒服就梗係留喺屋企休息啦   唔駛成日話陪唔到我喎 ~

行完就去 AEON 買 2 盒藍莓   買完都番屋企 lu ~

里奧大人無咩胃口   我又唔餓   所以差唔多 7 點半先開餐 ~

是日晚餐 - 茄汁蝦 + 鮑魚油麥菜苗

茄汁蝦 - 因為里奧大人無胃口   咁我要諗諗辦法   但又唔想出街食   比我諗到整茄汁蝦   酸酸甜甜好開胃嘛   感恩里奧大人都食咗一大半   呢度好似得 8 隻㗎咋   本來諗住整 16 隻   不過里奧大人無胃口就唔整咁多 lu ~

鮑魚油麥菜苗 - 前晚食剩 3 隻飽魚   今晚要食埋去㗎喇 ~

洗埋碗就沖涼   之後就睇 Youtube 同打機 ~

呢幾晚都係 11 點先瞓   但聽朝要番工   有啲唔慣添   哈哈哈哈 ~   

壽司郎 @ 紅磡 ( 28-DEC-2023 )

每次落單   最多 4 碟

鮮蝦天婦羅壽司 x 2 ($12/碟) - 好抵呀   同埋係新鮮炸起

吞拿魚壽司 ($12) - 里奧大人多數食吞拿魚   但吞拿魚包又唔食㗎喎   哈哈

拖羅池魚壽司 - 都 OK 喎

日本產原隻帆立貝壽司 ($22) - 里奧大人鍾意食帆立貝

里奧大人再食多碟吞拿魚壽司

蝦三味壽司 ($17) - 呢個好抵食   赤蝦都幾大隻

油甘魚壽司 ($17) - 都新鮮呀

日本產帆立貝壽司 (迷你壽司飯) ($17) - 里奧大人話咁樣細細件仲啱佢食

芥辣八爪魚軍艦 ($12) - 呢個無咩味道

里奧大人話拎個平板電腦出嚟睇   我話拎唔到㗎   最後其實係拎到   哈哈

我哋問職員點埋單 ?!   佢話有無張單定咩   我話咩都無比我哋喎  之後就比咗呢塊 Payment Card 去埋單喇 

( 28-DEC-2023  THU )

尋晚半夜發惡夢大叫呀   我瞓喺媽咪隔離   但見到好多鬼   所以用媽咪隻手遮住啲鬼   但啲鬼都係咁樸埋嚟咁呀   所以大叫   之後里奧大人拍拍我塊臉   我又繼續再瞓了 ~

今朝 8 點 15 分起身   之後就靈修到 8 點 45 分   之後里奧大人叫聲我   睇下我係咪喺屋企 ?!   咁我又入房瞓到 9 點 15 分了 ~

梳洗完就去食早餐   仍然去番尋日嗰間   因為我覺得咖啡好飲呀 ~ 

牛角酥早餐 (碎蛋沙律+茄汁焗豆+牛角酥) ($35) - 今朝唔敢再食咁豐富喇   哈哈

炒滑蛋早餐 (炒滑蛋+茄汁焗豆+多士) ($28) - 里奧大人話鍾意食多士

1 點鬆啲就去行牛棚   估唔到里奧大人記得我講過話要去   不過見佢話唔舒服   所以我都唔提   因為唔係必須要去嘛   但佢話今日都 OK   所以陪我行喇 ~

今日好熱呀   真係好少呢個時間出去行呢   哈哈 ~

魚肉燒賣只係 $5/4 粒   味道同口感都唔錯   下次會買番啲喺屋企做儲備

食完燒賣再去買涼茶   之後再行去牛棚   好在今日無着外套   唔係熱暈都似 ~

到牛棚喇

入去睇下先

就係咁的

對面好似係十三街

好有特色嘅小盆栽

藝術文化區

出番去喇

好好天

行完就去哥登堡餐廳食午餐   食完要即番屋企喇 ~

羅宋湯 - 夠熱夠酸又多料   連里奧大人都話好味道呀

黑椒牛柳粒炒麵 ($60) - 好味呀   同埋牛柳粒份量都好多   我哋食完都已經飽哂

鮮茄石班飯 ($60) - 無食到呀   所以打包番屋企做聽日午餐

我覺得午餐份量其實都算好巨

我飲涼粉雜果冰

里奧大人飲花旗參蜜

沖埋涼要開陣冷氣先舒服   無諗過今日咁熱添 ~

同里奧大人一齊睇 "臥底旅行團"   睇睇下都瞓咗 20 分鐘   之後又繼續睇   又再瞓咗 20 分鐘   哈哈 ~

今晚 7 點前要去睇中醫   所以 5 點幾都出發去食晚餐喇 ~

感恩里奧大人有胃口啦   今日佢都無咩點食個午餐呢 ~

食完就去睇中醫   我叫里奧大人都睇埋啦   因為成日嘔心都唔好嘛   醫師話佢可能緊張   同埋瞓得唔好   所以開啲舒緩緊張嘅中藥比佢 ~

我就胃熱   我都唔敢講頭先食咗炸嘢呀   之後再我條氣仍然唔好   要繼續調理喇 ~

番到屋企就開機洗衫   沖完涼抖陣就熨衫 ~

睇下 Youtube   又 11 點先瞓覺 ~