蠔油燜白蘿蔔冬菇 + 手搥牛筋丸拚蟹捧拉麵 + 小旺菜 ( 31-JAN-2022 )

( 31-JAN-2022  MON )

今朝仍然好凍   好在無落雨咋 ~

早餐食芝腿治烘底   今朝又轉下飲檸茶 ~

菇場唔忙啦   10 點左右收到公司群組訊息話放 1 點   勁開心呀 ~

1 點準時放工   估唔到譚仔無開   咁買 MOS BURGER 啦 ~

睇咗半個鐘  "大力女子都奉順 "   突然好眼瞓呀   所以話唔睇住喇   里奧大人話咁樣以為套劇唔好睇   哈哈 ~

喺梳化瞓咗成個鐘呀   係咪攰得咁交關呀   要記住今日係星期一唔係放假時間喎   哈哈 ~

6 點 45 分左右開餐   今晚好凍呀   所以煮泡菜拉麵 ~

是日懶餐 - 蠔油燜白蘿蔔冬菇 + 小旺菜 + 手搥牛筋丸拚蟹捧拉麵

蠔油燜白蘿蔔冬菇 - 尋晚燜定冬菇   今晚再加白蘿蔔   我鍾意食呢個餸呀   但其實對我嚟講都幾難消化 ~

小旺菜 - 清埋最後呢份菜   始終唔想擺太耐呀 ~

手搥牛筋丸拚蟹捧拉麵 - 終於清埋 3 條蟹捧   里奧大人問做咩煮咁多   都費事講出嚟   哈哈 ~

洗埋碗就即沖涼   8 點幾開始睇 "大力女子都奉順 "   睇到 12 點先瞓呀   估唔到咁好睇 ~

辣肉腸意粉 + 粟米 ( 30-JAN-2022 )

尋日食剩嘅薯條

( 30-JAN-2022  SUN )

里奧大人今朝番工   我之後瞓到 9 點半鬧鐘響   但我居然想再瞓   所以校到 9 點 55 分再響   如果今朝無校鬧鐘   我估應該可以瞓到 10 點半   哈哈 ~

食埋早餐就抖下   沖完涼就出發   凍咗好多呀   我都要着件厚褸   我真係唔想再病呀 ~

好早去到里奧大人公司   所以同阿妹傾偈 ~

崇拜之後就等里奧大人放工   今日 1 點 45 分先放工   買埋下午茶先番屋企 ~

食完就去超市買嘢   我好想用哂啲 Cash Coupon 呀   因為 3 月尾到期   本身買咗 $117   但都係想用 3 張   之後買到 $138   我就拎 $20 以上嘅嘢   估唔到埋單係 $153   今次勁叻   哈哈 ~

沖埋涼就溫書   5 點半就燜嘢   之後預備晚餐 ~

是日懶餐 - 辣肉腸意粉 + 粟米

辣肉腸意粉 - 唔知煮咩呀   所有煮呢個   順便清埋辣肉腸同意粉 ~

粟米 - 今晚完全無意識浸菜   好在有條粟米   所以即淥嚟食呢 ~

拎起個蓋去洗啦   但奇怪仍然咁熱   原來我無熄火呀   我校到最細火   真係好危險 ~

開機洗衫就沖涼   里奧大人就幫手熨衫 ~

我問里奧大人如果連續 3 日食糕悶唔悶 ?!   佢話唔悶   之後話可以食 3 日咁多咩 ?!   我話其實可以食 5 日   佢個樣變哂   哈哈   咁家姐比 3 底糕   如果 3 日食哂就得人驚啦 ~

聽日要番工   所以睇電視睇到 11 點都瞓覺喇   同埋今日比較攰   哈哈 ~

魚香茄子 + 泡菜丸子 ( 29-JAN-2022 )

( 29-JAN-2022  SAT )

今朝勁喇   里奧大人番工之後   我都瞓唔到   所以 8 點唔夠就起身   又抹下嘢   拖埋地   做到 9 點幾就搞掂 ~

開始有啲餓   所以即沖涼休息下 ~

家姐 10 點左右嚟接我   去到家姐屋企樓下   咁啱 Berry 去街街   佢見到我即係咁樸我   之後仲想跟我番屋企添呀   勁搞笑 ~

之後佢一番到屋企   佢腳仔都未抹又嚟樸我   係咪咁掛住我呀 ~

不過我都超級勁掛住個衰女包   成個月無見佢咁滯喇   好在佢都仲記得我   哈哈 ~

家姐工人同我哋 Share 沙爹牛肉米   實在太好啦   其實我都食唔落一半   家姐工人好食得㗎   佢已經食咗早餐   不過我覺得佢鍾意食嘢都好   起碼開心先食得落嘢嘛 ~

家姐超勁鍾意食鮮油多㗎   所以特登買比佢食   佢見到勁開心呀   我話頭先都好驚牛油會溶   但又唔想比妳知係鮮油多   哈哈

食完早餐就同 Berry 影下相   又狂攬下佢   之後工人又食香蕉片   我都忍唔住話妳又食 ?!?!   佢都喺度笑   我自問都係大食   但都食唔落香蕉片 ~

最鍾意睇全盒

里奧大人同事嘅老婆畫㗎   其實仲有其他小動物   但里奧大人見到八哥就即刻拎   話老婆家姐好鍾意八哥   呢下超級讚   哈哈

家姐都好鍾意車銀優㗎   係佢介紹我睇女神降臨同埋聽 ONE    哈哈

前面牛耳係厚身嘅   我覺得似牛脷蘇味道   甜甜地咁呢   家姐話覺得好好食   今朝特登再去街市買比我   但居然無哂   佢話簡直晴天霹靂   好唔開心呀   笑死啦   我話無咪無囉   我一個人都食唔到咁多啦   之後佢買咗角仔同薄身牛耳   我話要 6 隻角仔同小小牛耳夠喇   如果唔要呢   佢又唔開心   以為唔鍾意食   因為佢特登買嚟同我 Share 呢

上星期六買比家姐嘅香蕉   到依家都仲係咁鬼樣色   不過我同家姐講話應該食得㗎喇   因為我屋企嗰啲都係咁   哈哈

估唔到咁高血壓   我之前上壓係 12X 咋喎   但心跳就不嬲都係 76-80   個個中醫西醫見到我心跳數字就好驚㗎   哈哈   呢個血壓計係家姐同事送嘅   但唔知呢個牌子準唔準呢 ?!

家姐比咗 3 底糕比我   我仲喺佢屋企拎咗把新刀同兩隻碟呀   真係慳番買刀錢   哈哈 ~

咁樣食零食   懶到咁

無啦啦又咬玩具   以為自己仲好細咩

話佢嘅時候   佢眼定定咁

唔想聽我講嘢呀 ?!   哈哈哈哈

里奧大人今朝去 Check 牙   咁 20 分鐘就搞掂   所以佢 12 點半都番到屋企   但我話 1 點左右先走呢 ~

買埋 Lunch 就即番屋企   無諗過 3 底糕咁重   哈哈 ~

比錯咗雞堡   怪唔得阿花問係咪食菠蘿嗰款啦

個杯好靚

八珍嘅蘿蔔糕 & 芋頭糕   仲有 1 底係榮華嘅臘味蘿蔔糕

Berry 今日要食杜虫藥   所以家姐番到屋企即刻餵佢食   之後就出街   再番到屋企嘅時候   家姐比零食比 Berry   但佢擰轉面唔彩家姐呀   但姐夫同工人餵佢食   佢又食呀   笑鬼死   所以家姐都話自己好慘   對佢好之嘛   咁都嬲佢   我話等如當年我帶豬豬洗牙   之後即去旅行啦   5 日之後   我番到屋企   佢唔彩我呀   我仲諗住 5 日咁耐   咩都唔記得啦   哈哈 ~

食完又大清潔廚房   又認真睇下屋企有幾多罐頭   我唔想又重覆買呀 ~

搞掂哂就抖下   不過今晚唔駛番學   所以想煮飯 ~

今晚煮得好耐咁   要 7 點先開餐呀 ~

是日懶餐 - 魚香茄子 + 泡菜丸子

魚香茄子 - 買咗 3 份幼茄子   其實份量都多   不過唔想再留啦 ~

泡菜丸子 - 1 條茄子 + 上次整咗嘅丸子   加埋泡菜就搞掂 ~

洗埋碗即開機洗衫   再大清潔廁所   之後沖涼休息喇 ~

今晚睇 Youtube   又 11 點半先瞓 ~

西洋菜餃 (外賣) @ 屋企 ( 28-JAN-2022 )

仲有尋晚食剩嘅雲吞

( 28-JAN-2022  FRI )

感恩一覺瞓天光   但起身有難度   呢啲天氣好想繼續瞓呀   哈哈 ~

第一時間將啲免治豬肉分開一袋袋   之後再放番入冰格   襯仲未完全解凍哂 ~    

買埋雞骨草就番工   今朝早餐係奶醬多 ~

家姐問咖啡定奶茶   我打 "啡少她"  之後再打 "奶"   其實我係想打 "啡少奶"   家姐話以為我鬧人   少字真係要好小心打   哈哈哈哈   佢自己都話一路打一路笑

我依家戴 KF94 口罩   溫總話佢戴咗之後仆落樓梯   西瓜話阿虫大肚行樓梯都唔會咁啦   肥仔豪即刻話大肚就唔行樓梯啦 ?!?!   呢下好笑   反應好快呀下 ~

菇場唔忙啦   又 Hea 住過 ~

Lunch Time 行咗一陣咋   因為我無帶遮   所以買完墨丸米都即番菇場喇 ~

忙咗陣又 Hea 過   尋晚浪費哂啲免治豬肉   所以放工要再去買過 ~

放工又要去街市買 1 斤免治豬肉   順便買埋金沙骨   上次無貨   感恩今晚買到 ~

最後買多 3 個紅火龍果同西洋菜餃就番屋企喇    好鬼重 ~

番到屋企都預備晚餐   今晚 7 點幾開餐   因為里奧大人晏咗放工   咁我都唔駛咁趕 ~

是日懶餐 - 西洋菜餃

西洋菜餃 - 又食餃子喇   所以問里奧大人食唔食先 ?!   佢食先買   呢間嘅餃子就大隻啲   同埋貴好多呢 ~

洗埋碗就沖涼休息   里奧大人 10 點開會   開到 11 點半   真係好夜囉 ~

再整埋其他嘢   我同佢 12 點先瞓呀 ~

菜肉餃雲吞拚蝦滑 ( 27-JAN-2022 )

( 27-JAN-2022  THU )

感恩一覺瞓天光   但鬧鐘響咗都唔係咁想起身   哈哈哈哈 ~

早餐食芝腿治烘底   其實好鬼飽   不過好想食鹹嘢 ~

菇場一般忙   可以做下自己嘢 ~

Lunch Time 去買朱古力比 BG 個仔   尋日買比佢食   佢走過嚟同我講話食咗一粒   好鍾意食   所以我話再買比佢   佢係咁講多謝   好有禮貌呢 ~

買呀買   買到 12 點半呀   所以要即番菇場喇 ~

好想食 Flakes + 乳醋   本身咁遲番到   其實買嘢食仲方便   哈哈 ~

唔忙就傾偈等放工啦   基本上都就嚟農曆新年   應該只得船務部最忙呢 ~

放工去街市買餸   買埋幾晚嘅菜同急凍丸   好耐無試過拎咁重   哈哈 ~

番到屋企都即預備湯底   里奧大人今晚 7 點幾先番到屋企   叫佢沖埋涼先食   反正我仲未淥水餃   哈哈 ~

是日懶餐 - 菜肉餃雲吞拚蝦滑

菜肉餃雲吞拚蝦滑 - 今晚個湯底係小旺菜 + 白蘿蔔 + 超甜粟 + 鮮冬菇   就咁飲都好甜呀   我見好耐無買蝦滑   所以買 $20 比里奧大人食  佢都話做咩買蝦滑嘅   哈哈 ~

洗埋碗就喺冰格拎一大嚿免治豬肉出嚟   點知劈到刀都劈崩埋   咁全部豬肉唔要得了   嗚嗚 ~

做埋小清潔屋企就開機洗衫   之後沖涼喇休息喇 ~

今晚睇 Youtube 睇到 11 點左右都瞓   呢啲天氣真係瞓極唔夠咁 ~ 

蝦餃 + 雞扎 + 鳳爪排骨飯 (外賣) @ 屋企 ( 26-JAN-2022 )

( 26-JAN-2022  WED )

尋晚臨瞓前食咗個甜筒   又係半夜熱到流汗   上次食完綠茶雪糕又係咁   我諗住會凍點知反而流汗   我會再試多次先   哈哈 ~

早餐食奶醬多   仍然覺得好味   哈哈 ~

菇場忙呀   所以時間過得好快 ~

船頭話我今日做咩花木蘭咁   我話去大酒店呀 ~

Lunch Time 同小說小 A 一齊搭 Lift   小說又話我後生咗   咁我話要 Keep 住呢個髮型了   哈哈 ~

行咗一大個圈   再買紅腸酸辣米線番菇場慢慢食 ~

仍然唔忙啦   放工就去里奧大人公司   等埋佢一齊去大酒店 ~

6 點幾去到   諗住坐半個鐘就走   之後同兒生仔女傾偈   傾到 7 點幾先走 ~

同姑奶搭的士   順便兜埋佢番屋企   之後買晚餐番屋企食   我唔係咁餓   但里奧大人就好餓喇 ~

抖陣就沖涼   之後叫里奧大人一齊睇 ASTRO 日本訪問   我話喺公司睇咗一半覺得好笑   所以想一齊睇   哈哈 ~

成班顛仔好搞笑   里奧大人都笑到咔咔聲   睇完都 10 點半   之後又同阿花傾偈   傾到大家都想嘔   因為我哋傾見過最嘔心嘅嘢   佢話有次麵包店買嘢   佢聽到廚房有人好大聲打乞痴   佢話唔敢望入去   但之後無再喺呢間麵包店買嘢   又話食話梅肉食到個頭頭 ~

我好細個嘅時候食干蒸牛肉   我咬開一半先嘅   奇怪點解會 "索" 一聲   原來我咬緊隻小強   自此之後好耐無食   同埋食點心要整開一半先放入口食   不過依家都無咁做喇   哈哈 ~

不過有樣嘢無變   就係我飲熱飲   永遠一定唔會飲到落底   凍飲就無問題   因為多數透明杯   會睇到有無啲咩   哈哈哈哈 ~

傾到 11 點半呀   我話好嘔心唔傾喇   同埋我都要瞓覺   佢知我好早瞓   所以 11 點半算好夜   哈哈 ~

洋蔥臘腸炒雞粒 + 紅燒元貝鮑魚豆苗 ( 25-JAN-2022 )

( 25-JAN-2022  WED )

感恩一覺瞓天光   即係里奧大人喉嚨好番哂   嘻嘻 ~

早餐食豬柳漢堡餐   好想食鹹嘢呀 ~

菇場忙呀   咁都好 ~

Lunch Time 行到老遠買富士蘋果   之後再買牛什米番菇場食 ~

忙咗陣又同 8 卦傾偈   講開積分   佢話 $5 得 1 積分   佢買咗 $100   我話好囉   有 50 積分   之後佢話乜呀   100/5 得 20 積分咋   哈哈哈哈   我簡直係數學天才 ~

準時放工   不過依家等好耐車呢 ~

番到屋企即刻預備晚餐   里奧大人 7 點番到屋企   不過要等多陣先食得呀 ~

是日晚餐 - 洋蔥臘腸炒雞粒 + 紅燒元貝鮑魚豆苗

洋蔥臘腸炒雞粒 - 前日食剩嘅臘腸加尋晚剩咗嘅薑蓉   見阿 mi 用薑蓉炒餸   我又跟下   估唔到好味呀   第時食唔哂薑蓉都唔駛掉   哈哈 ~

紅燒元貝鮑魚豆苗 - 里奧大人話做咩食鮑魚嘅   我話依家開罐 Cheap Cheap 鮑魚仔夠方便   我其實真係鍾意佢啲汁   但我買過鮑魚汁又覺得無咩味咁 ~

洗埋碗就開機洗衫   之後沖涼休息喇 ~

晴晴 9 點打嚟   我話好開心會搵我呀   佢話: 妳係我舅母呀   聽到呢句好感動   同埋感覺自己輩份好高咁   哈哈哈哈

佢話訂細盤菜比我同父父   我叫佢慳番啲錢啦   佢話因為新年一年一次   不過最後都訂唔到   我話唔緊要   其實想話仲好啦   真係食唔哂呢   哈哈 ~

我開 Speaker 傾偈嘛   因為佢喺群組打嚟   咁都想比父父知道傾啲咩   我哋都傾咗個幾鐘   因為佢嗰邊已經 12 點幾   我叫佢快啲瞓喇 ~

咁收線之後   里奧大人話居然無搵佢   我話開 Speaker 都知你喺度啦   晴晴講佢做嘢都好搞笑   依家考試讀書考試讀書   我叫佢一定要有時間休息啦   唔好要我擔心啦 ~

今晚又 11 點半先瞓   呢排好夜瞓   嚟緊真係要 11 點好瞓 ~

滑蛋粟米魚塊 + 菠蘿咕嚕肉 + 叉燒拚燒鴨 (外賣) @ 屋企 ( 24-JAN-2022 )

里奧大人話要食粟米魚塊   真係好少何   哈哈

加咗無餡湯丸   當堂飽到上心口   哈哈哈哈

( 24-JAN-2022  MON )

天陰陰加上落毛毛雨   呢啲天氣真係勁唔鍾意呢 ~

早餐唔駛諗咁多   仍然奶醬多   哈哈哈哈 ~

菇場忙呀   但個人真係比較攰 ~

Lunch Time 出去幫里奧大人公司拎嘢   之後再買牛腩河番菇場食 ~

買比阿齋㗎   佢開心到痴咗線   哈哈

船頭特登過嚟話我剪完頭髮後生咗   真心覺得髮型真係好重要   哈哈 ~

仍然忙呀   但長命功夫長命做   所以都係放工即走 ~

里奧大人話今晚咁早番到屋企   唔好煮喎 ~

咁我買埋外賣就番屋企   可以即開餐其實係開心嘅   哈哈 ~

食完抖陣就整無餡湯丸   因為包糯米粉已經過期一星期   見無唔妥就整埋去啦   不過聽晚先再整   之後放入冰格可以慢慢食 ~

我好肯定買嘅時候係成年先到期   估唔到一年係咁快過   哈哈哈哈 ~

沖埋涼就睇 youtube   今晚到里奧大人喺電腦睇 ASTRO   仲聽歌聽到入哂神   之後叫我睇埋添呀   今晚佢睇得多過我   哈哈 ~

我話如果 ASTRO 有機會嚟香港開演唱會   我一定買貴飛同家姐一齊睇   之後會請假同 AROHA 一齊練習應援   里奧大人聽到都呆咗   哈哈 ~

今晚又 11 點幾先瞓   唔通真係要 11 點幾先有睡意 ~