麻辣手撕雞 (外賣) + 蠔油芥蘭苗 ( 29-FEB-2024 )

( 29-FEB-2024  THU )

尋晚其實瞓得都唔錯   但半夜就比里奧大人獅子叫嘈醒   當瞓得着嘅時候又要起身   所以我話今朝唔整早餐喇   因為一定要飲杯好濃嘅咖啡提提神 ~

唔記得飛邊

我叫咗少通   不過應該無少到呢

真係唔好講笑   飲完杯咖啡真係精神好多   同自己沖嘅真係有好大分別   哈哈 ~

食完就去里奧大人公司坐陣   估唔到會見到阿妹   不過傾咗陣偈   我都要走喇 ~

菇場唔忙呀   今日係 2 月 29 日   每 4 年先有一次   所以今日生日嘅人真係要瘋狂慶祝   哈哈 ~

Berry 咁樣望住工人   個樣好乖咁喎

Lunch Time 出去行咗半個分鐘   之後都買燒賣炒麵番菇場食喇 ~

阿齋食咗成個月瓜子   我就算得閒都唔會食瓜子囉   始終都嘈嘛   嗰時司機又係日日食   係由朝食到放工咁滯   仲食咗年幾添呀   所以 8 卦都成日話好嘈   依家都我受哂啦 ~

放工即走   同溫總一架 Lift   不過佢趕班車   咁啱部 Lift 又層層停   所以佢更心急   佢話有次星期六送車尾   之後得一個人喺巴士站等車好慘   個個都唔駛番工   得佢一個要番工   我覺得佢咁形容好搞笑   哈哈 ~

里奧大人話晏啲放工   咁無問題啦   今晚只係淥菜 ~

差唔多煮好   里奧大人就番到嚟   佢買咗件蛋糕番嚟   係咁叫我估下咩原因   之後我話唔係因為 2 月 29 日呀嘛   佢話係呀   話 4 年一次要食蛋糕慶祝呀 ~

是日懶餐 - 麻辣手撕雞 (外賣) + 蠔油芥蘭苗 

麻辣手撕雞 (外賣) - 諗唔到煮咩   但又想快啲開飯   所以買手撕雞喇 ~

蠔油芥蘭苗 - 好耐無蠔油蘸菜食喇   因為有一排係好唔鍾意食蠔油呢   真係買 1 支番嚟係擺到過期咁 ~

食完飯就問里奧大人食唔食蕃薯糖水 ?!   佢好興奮咁話食   咁煮啦   反正買咗 5 隻蕃薯   又可以煮埋兩餐食 ~

洗埋碗就食蕃薯糖水喇   食完就開機洗衫同做小清潔   之後就沖涼喇 ~

七里香蕃薯無咩味   下次唔買 lu

今晚熨 2 機衫真係極限   因為熨完條腰又好痛呢 ~

等埋里奧大人沖涼就食蛋糕   今晚食咗好多甜品   哈哈 ~

我一食入口   覺得一陣薄荷味   之後里奧大人話係薄荷朱古力蛋糕呀   佢知我鍾意食薄荷朱古力   但我哋覺得呢個蛋糕真係太重薄荷味   唔係咁鍾意   哈哈

睇下電視   今晚 10 點半瞓覺 ~

孜然醬焗雞翼 + 辣肉腸 + 炸雲吞 (外賣) + 菜心苗 ( 28-FEB-2024 )

( 28-FEB-2024  WED )

雖然尋晚去咗次廁所   但感恩瞓得都唔錯呢 ~

7 點 18 分都起身   咁早啲煲薑茶同焗麵包喇 ~

早餐食十字包搽醬占   好耐無食醬占   間唔中甜甜哋都唔錯㗎 ~

菇場唔忙   咁做自己嘢啦 ~

Lunch Time 出去行下先   之後先去食雲吞米   食完就去萬寧買嘢   最後就買話梅薑   再行到 12 點 40 分都番菇場喇 ~

仍然唔忙   傾下偈又做下自己嘢咁啦 ~

呢副防藍光眼鏡又 OK 喎   成日望住電腦   對眼無咁攰

放工即走   一入大堂就見到里奧大人   原來佢頭先打比我   之後望下前面嗰個人就係我   所以即收線   怪唔得我聽唔到手機響啦 ~

是日晚餐 - 孜然醬焗雞翼 + 辣肉腸 + 炸雲吞 (外賣) + 菜心苗

孜然醬焗雞翼 - 里奧大人話碟雞翼好靚呀   我話梗係   用現成醬醃之嘛   唔係出自我手筆梗係靚啦   哈哈 ~

辣肉腸 - 好似過咗期   所以拿拿聲食埋去喇   但仲剩 3 條   下次用嚟炒意粉 ~

炸雲吞 (外賣) - 突然間好想食呀   買嘅時候係暖㗎   所以番到屋企食仍然係脆卜卜   里奧大人見到就好開心話有炸雲吞食   佢今晚對枱面嘅食物好有興趣咁喎   哈哈 ~

菜心苗 - 呢碟係大半斤   因為我今晚唔食飯   食多啲菜就會飽啲 ~

洗埋碗就開機洗衫   之後做小清潔   搞掂就沖涼喇 ~

里奧大人去做運動   我就抖埋今晚先   呢期失血過多   嚴重無血氣呀 ~

睇陣 Youtube   今晚 10 點 20 分瞓覺 ~

臘潤腸 + 菜心苗 + 海帶牛肉湯 ( 27-FEB-2024 )

尋晚食剩嘅炸雞   連埋佢哋嘅牛油紙一齊放入焗爐焗熱   勁方便

個湯唔 "北" 走啲泡   其實係幾核突   哈哈哈哈

( 27-FEB-2024  TUE )

尋晚瞓到 12 點左右就起身去廁所   之後好難好難先瞓得着呀 ~

唔知係咪之前瞓夠   所以唔眼瞓   定係食咗炸雞熱氣瞓得唔好呢 ?!

4 點幾去完廁所就校番鬧鐘 7 點 25 分響   因為我唔做運動喇 ~

7 點 15 分都醒咗   咁起身整早餐 lu ~

我同里奧大人講話瞓得好差呀   佢好緊張話係咪佢嘈醒我   哈哈 ~

早餐食芝士包   真係好好味 ~

我覺得算多芝士粒㗎喇

菇場唔忙呀   可以抖下 ~

Lunch Time 出去行陣再食牛筋河   食完去買菜同埋買話梅薑比里奧大人   搞掂已經 12 點 45 分   要即番菇場喇 ~

唔忙就抖啦   好攰呀 ~

無啦啦超勁眼瞓呀   我托住塊臉中眼瞓   我估應該都瞓着咗   因為感覺有斷片嘅感覺   哈哈 ~

放工即走   今日真係超級攰呀   所以搭貴車番屋企   連幾分鐘都唔想等呀 ~

番到屋企即預備   里奧大人見到炸雞又臘腸配搭   覺得我好有創意   哈哈 ~

是日晚餐 - 臘潤腸 + 菜心苗 + 海帶牛肉湯

臘潤腸 - 唔記得上星期三剩咗白飯   所以今晚點都要蒸埋去啦   咁里奧大人又要帶飯   所以蒸迷你臘潤腸 lu ~

菜心苗 - 呢排菜心苗都腍甜   如果諗唔到想食咩菜   又會連續食佢㗎喇   哈哈 ~

海帶牛肉湯 - 過咗期成個月   好在無壞無臭無變色咋   下次都唔會再買呢啲湯包   成日記住要飲真係好麻煩   呵呵 ~

洗埋碗就即沖涼   叫里奧大人熨 2 機衫   因為我真係無力再做家務 ~

里奧大人叫我買話梅薑   我買夠 1 磅比佢慢慢食

真係好攰   但無可能 9 點瞓   因為肯定半夜實醒 ~

不過我應該睇睇下 Youtube   由 9 點 15 分瞓到 9 點半   因為嗰段時間家姐 Whatsapp 我   但我無覆到   哈哈 ~

之後再睇多陣 Youtube   真係 10 點 10 分都要瞓覺喇   今日真係攰得好緊要呢 ~

Foodeli (ChiMac) @ 九龍灣 ( 26-FEB-2024 )

@ ChiMac

套餐包括炸雞 & 紫菜飯 (細) & 酸蘿蔔 & 炸薯條 (細) & 韓國檸七 - 我唔知個餐原來包埋咁多嘢   所以真係好驚喜   哈哈

招牌辣味炸雞套餐 (炸雞腿肉 5 件) ($58) - 我覺得係芝士味喎   不過我都唔換喇   唔食辣都好

經典甜辣炸雞套餐 (炸雞腿肉 5 件) ($58) - 呢個好味呀   但唔想兩款都係同一樣味道呢

我無食飯呀   所以打包

我同里奧大人講   韓國人係搓到啲飯一粒粒咁食㗎   不過最後佢都食唔哂啲飯要打包   之得唔搓咁多粒啦   哈哈

( 26-FEB-2024  MON )

感恩一覺瞓到 8 點半   但見里奧大人未起身   我都繼續瞓   一瞓就瞓到 10 點半喇 ~

臨醒個夢係見到媽咪食緊飯   我仲好開心添   之後就諗第時要陪媽咪多啲   但突然好清醒   知道媽咪其實已經走咗   個心當堂實哂   唔通媽咪想我唔好成日諗番轉頭 ?!

今日同媽咪同一日生日   所以開心又帶些傷感呢 ~

因為 10 點半先起身   所以拿拿聲去梳洗啦   同里奧大人諗住試新嘢   但又無開   另外兩間嘅早餐只係到 10 點半喎   咁我同里奧大人講話   我哋唔好再搵喇   搵得嚟到 11 點就要食午餐㗎喇   哈哈 ~

真係第一次覺得沙爹牛肉米咁好食   最難得係喺肚餓嘅時候食添   雖然星期日都會食   但太早起身   真係胃都未開   哈哈

食完就番屋企抖下   我同里奧大人講話點解無生日利是嘅 ?!   之後話唔知利是封放喺邊   咁我即刻拎個麥當勞利是封比佢   因為屋企真係無咩大利是封   哈哈 ~

比完佢   佢真係即刻拎哂銀包啲錢出嚟   不過我無睇幾錢呀   因為我都係用嚟儲呢 ~

我話個利是封會放到夜晚黑   可以無限添加   哈哈

 

因為我仲係每月一到   所以里奧大人話諗去邊度諗到頭痛   我話駛咩咁緊張呀 ~

初初里奧大人諗好去行山   但每月一到就無可能啦 ~

之後就話一係就去旺角行街買衫   一係去荃灣行商場   佢話去商場最好   因為有洗手間   行到攰又可以坐低食嘢   又諗得好細心喎 ~

不過我話唔係咁想買衫   去荃灣又遠   我話近近哋行黃埔都無所謂   之後佢話行 APM   咁我話好吖   難得你話行   佢仲話 1 年無行   之後我話搭咩車都得啦   佢話搭 107   我話係去 Megabox 喎   佢話佢其實想去 Megabox   哈哈   我都奇怪   佢好少話會行 APM   除非鎖定目標有嘢買先會去囉 ~

感恩好快有車   其實 Megabox 都幾好行   因為最緊要無咩人呀 ~

喺 Aeon 買咗 2 件 Tee   因為想同家姐姊妹裝   之後我見到另一款男裝有類似圖案   我話同里奧大人可以情侶裝   里奧大人話如果家姐一齊着埋   就係家庭裝   哈哈 ~

行呀行   原來已經 2 點半喇   咁係時候要食嘢   因為我唔想晚餐又夜食呢 ~

之前食開間拉麵店又無咗   里奧大人想去太興   但我話唔想食中式呀   咁我話想去 Ikea Cafe 吖   頭先我見有人買熱狗入去 Cafe 食  我哋又可以買熱狗再叫其他嘢食啦   咁去到另一層買熱狗嘅時候   見到其他嘢仲啱食   同埋最緊要份量少呀 ~

熱狗配汽水 ($15) & 瑞典肉丸忌廉汁 ($13/5粒) & 一口台式腸 ($16/6件) - 我樣樣都鍾意食

檸檬鴨屎香烏龍茶雪葩筒 ($6) - 味道好淡   但六蚊雞無要求啦

本來想食爆谷   但唔係粒粒都有焦糖   所以唔食 lu

頭先見到 Chopper   但就諗住食完飯先去影   所以一食完   里奧大人就急急腳同我去影   真係好似去旅行咁   我話要去嘅地方   佢會記住   哈哈 ~

我公司都放咗隻迷你 Chopper

Anya 都鍾意

周圍再行下   之後一齊買咗副防藍光眼鏡   我副只係 $100 咋   里奧大人嗰副就 $200   平平哋買嚟戴下 ~

去到 Aeon 嗰層   里奧大人話去睇地櫃   我話分頭行事   我去超市睇   佢話佢好快睇完㗎喇   幾分鐘就搞掂   我話你慢慢啦   睇 10 分鐘都無問題㗎   點知我睇咗唔夠一陣就見到里奧大人喺我面前   我話你咁快睇完㗎   哈哈 ~

儲埋積分就坐 Shuttle Bus 去德福   我唔知講開咩話有時想買衫   但話好多衫都太 Casual   里奧大人笑住話妳平時要着得好 Formal 咩 ?!   呢句好笑呀   哈哈   我都唔知點解會咁講囉 ~

去到 MUJI 見到件長袖裇衫   里奧大人話個色好睇   係都要我買   到我試咗出嚟   佢話我着到好似殯儀館職員啲衫咁   我忍唔住大笑咗出嚟呀   哈哈哈哈 ~

買埋麵包諗住行完馬莎先食嘢   但我想喺 Foodeli 食炸雞   所以去睇下有無得食先   咁難得又有卡位   我同里奧大人講話不如食咗先行 ~

里奧大人去完洗手間又唔打比我   好在比我見到佢嘅背影   因為佢睇緊小新   肯定係想買比我啦   我拿拿聲飛過去叫佢唔好買   佢話隻隻都得意   抽 1 盒都無問題   我話唔要呀   一陣唔鍾意又要掉   好浪費囉 ~

里奧大人話呢 Set 個個都得意   但我覺得自己會抽中小新細妹   哈哈

呢 Set 又係得意

行埋馬莎   喺 Starbucks 拎埋 2 件蛋糕就搭車番屋企喇 ~

最鍾意坐電動巴士   因為夠新淨   哈哈

今日出咗半日街   但好有旅行 Feel 呀   全日食下行下買下   真係好開心 ~

里奧大人當然會問我開唔開心   我叫佢估下我點答 ?!   佢話有佢陪就好開心   我話下次唔駛問喇   哈哈 ~

番到屋企即開機洗衫   搞掂就沖涼   之後一齊食蛋糕 ~

用 MUJI 裝麵包嘅紙袋做生日紙牌   里奧大人話咁皺好肉酸呀   我話求其啦   用得唔好嘥嘛   哈哈

朱古力蛋糕 ($39) & 藍莓芝士蛋糕 ($37) - 兩款都好味道

之後再將 MUJI 紙袋剪開當碟咁用   食完即掉   乾手淨腳   哈哈哈哈

食完甜要食士多啤梨消滯

$22 好抵   呢期又鍾意食番薄荷糖

MUJI 買嘅十字包同芝士包

睇下電視又打下機   今晚 10 點半都瞓覺 lu ~  

燻蹄 (外賣) ( 25-FEB-2024 )

( 25-FEB-2024  SUN )

感恩瞓得都唔錯   話哂起身都精神嘛   哈哈 ~

同里奧大人去食早餐   老闆娘話我着短袖咁勁   佢話佢做嘢就要着短袖啫   我話可能沖咗熱水涼   所以真係唔覺凍囉 ~

雞扒好入味呀

食完去里奧大人公司坐陣   勁哥見我着短袖又碌大眼望住我   之後我都未出聲   里奧大人就同勁哥講話我離鬼譜   咁凍着短袖   你已經係第 3 個人咁話佢喇 ~

今朝去家姐屋企   9 點鬆啲就到喇   咁家姐姐夫又未番到嚟   所以要 Berry 陪我喇   哈哈 ~

影下啲蘭花先   新年嘅時候唔記得影呀   依家過哂年先影   哈哈哈哈

跳上梳化熱烈歡迎我呀

我同家姐都覺得佢咁樣好似 BB 嗰陣時

之後係咁周圍望   但就唔望我

無啦啦又挨落我度

好醜樣   哈哈

佢都攰攰哋咁

啡色眼珠好靚呀

好少見佢屈住隻手仔

家姐姐夫 9 點半先番到嚟   家姐以為我無着外套   我話又無咁勇   不過就唔係覺得咁凍囉 ~

呢條 Legging 好似起哂毛頭咁   但其實係 Pattern 嚟㗎   好記得有次去旅行   里奧大人見到我着呢條褲   好激動話做咩唔掉咗佢呀 ?!   有次我着對 Boot   CC 話做咩着對發霉鞋 ?!   真係笑死我   咁我之前鍾意買啲衫係穿窿同好霉嘅 Pattern   里奧大人都話我痴痴哋㗎   哈哈

Berry 個頭就黐住家姐   個 Pat Pat 就黐住我

工人嘅早餐   佢一定要飲朱古力奶

好似係鹿肉乾   1 條接近 $10   我同家姐講話比咗 Berry 食咗 8 條呀   哈哈   唔駛自己比錢係特別豪嘅

依家連狗狗都要紓壓   不過 Berry 好驚行雷   佢真係驚到成身震哂同埋流口水㗎

家姐遲啲去旅行   所以比出門利是比佢   呢個利是封真係入得唔多錢   因為我想再入多啲嘅時候   就見到個封口位想爆開咁呀

傾下食下   工人拎部機出嚟榨汁   我話我都要飲呀 ~

我嘅神石榴+蘋果汁嚟㗎   影得好樣衰   但好味道㗎   哈哈  

家姐就係神石榴+蘋果汁+西芹汁   

12 點半左右走喇   咁可以同埋家姐同工人帶埋 Berry 行街   不過行咗個大圈   我就要去等車喇   Berry 女都會陪我等車   點拉佢都唔走㗎   好搞笑 ~

兩粒花好似對眼   成個人樣咁   哈哈

家姐一番屋企   就影相話 Berry 好攰 😅   哈哈哈哈   梗係攰啦   陪咗我成朝嘛   哈哈

買完午餐就去里奧大人公司喇   真係諗唔到食咩   所以今次到我話麥當勞喇   同埋真係最緊要夠快   因為我趕住走呀 ~

生日優惠送 1 包中薯條   所以買一個套餐就夠了

2 點幾都仲繼續瞓 

食完要番教會開會   由 2 點半開到 3 點 45分   之後買埋晚餐都番屋企 lu ~

番到屋企都抖下喇   里奧大人話今日 3 點放工   所以佢話攰到番到屋企即瞓 ~

我其實都攰   到 5 點半直頭想瞓   不過唔會瞓喇   寧願今晚早啲瞓呢 ~

家姐又比黑瓜子比我   叫我幫手食   佢就食紅瓜子   所以我新年唔會買任何瓜子糖果   其一無人嚟拜年   其二最後要自己食番哂   咁樣先痛苦   哈哈

6 點左右預備晚餐   雖然只係淥麵   但都要啲時間嘛   哈哈 ~

是日懶餐 - 燻蹄 (外賣)

燻蹄 (外賣) - 買咗半斤 ($60)   再煮個炸醬撈麵比自己   里奧大人就食泡菜湯麵   今日出咗成日街好攰   所以真係超級求其食就算喇 ~

洗埋碗就開機洗衫   之後沖涼休息 ~

睇陣 Youtube   今晚 10 點 20 分都瞓覺 lu ~