蜜汁叉燒腸 + 煎釀三寶 (外賣) @ 屋企 ( 30-APR-2022 )

( 30-APR-2022  SAT )

今朝 7 點 40 分起身   我唔想太早番菇場呀 ~

早餐食腿蛋治   星期六多數食飽啲 ~

菇場唔忙啦   都係同阿花 Whatsapp 到放工 ~

1 點準時走   買埋外賣就番屋企喇 ~

今日里奧大人番晏   所以陪我食埋午餐先番工 ~

佢出咗門口   我都係睇下 Youtube   但就肯定唔會做家務呢 ~

4 點幾開始瞓   瞓咗半個鐘   之後都沖涼洗頭   咁樣番學會精神好多 ~

今晚終於復課   我之前同里奧大人講話抖咗 3 個月   我唔係咁想番   里奧大人個表情好驚訝   我話只係唔想出街咁意思   哈哈 ~

我多數早啲到學校   因為睇下有無嘢買   又比我買到 3 條 One Piece   真係好開心呀   里奧大人話真係要買嘢先心息   我話平先買咋 ~

同同學傾下計   問下佢地有無做功課 ?!   佢地話無   我話咁就好喇   有人陪我無做   哈哈 ~

今晚遲咗 3 分鐘先放學   真係好鍾意呢個 Miss   永遠唔會因為就落堂   就趕住走咁呢 ~

買埋晚餐就番屋企   食完抖陣都即沖涼喇 ~

11 點幾都瞓覺 lu   其實咁又好呀   話哂都係正常時間瞓嘛   因為我成日星期六都好遲瞓覺咁呢 ~

京都骨飯 + 涼瓜燜火腩飯 (外賣) ( 29-APR-2022 )

京都骨飯 - 勁好味   自己整到咁好味就好了

涼瓜燜火腩飯 - 里奧大人話呢個飯係咪叫 "男人的溫柔" ?!   我話係 "男人的浪漫"呀

( 29-APR-2022  FRI )

尋晚半夜去咗 1 次廁所   其實都預咗㗱喇   始終飲咗湯呢 ~

感恩都算瞓得唔錯   唔知係咪飲咗北芪當參呢 ?!   上次見到個咀唇又無咩血色   咁又成日飲涼嘢   所以嚇到即刻買北芪當參   飲完個人真係舒服好多咁㗎 ~

早餐食奶醬多   今次多士燶燶地都幾正 ~

菇場唔忙啦   咁家姐打嚟傾電話   之後佢無啦啦同我講話尋日係媽咪死忌   我都忍唔住喊   我話點會唔記得呀 ~

家姐話佢無發夢見過媽咪   話媽咪唔想見到佢   我話我間唔中會夢見爸爸媽咪㗎喎   之後家姐好緊張話媽咪有無話唔夠啲咩呀 ?!   我話無喎   次次見佢都係好開心 ~

我好記得媽咪走咗之後   我發咗個夢係媽咪坐旅遊巴去旅行   佢仲拎住個麵包好開心咁拜拜   好在發呢個夢係開心   始終我實在太內疚   喺佢病嘅時候無體諒佢呢 ~

Lunch Time 去買零食比里奧大人同事   依家天氣熱   行商場無咁辛苦 ~

買埋粉果炒米粉就番菇場喇   呢排好想睇 ASTRO Vlive ~

買咗啲零食比里奧大人同事   其實我次次都係買自己鍾意食嗰啲   希望佢都鍾意食啦   哈哈    

菇場仍然唔忙   依排唔駛投票   唔會投票先嚟忙呀   哈哈 ~

放工即走   感恩好快有巴士   所以好快去到里奧大人公司 ~

同里奧大人一齊買外賣   去到公司門口見到叻叻   我即刻比零食佢呀   真係約埋都無咁啱時間囉 ~

食完抖陣就搭車去 Megabox   里奧大人諗住買中袖裇衫   但得短袖   同埋今次應該係清冬季衫   咁下次再嚟啦 ~

去 Ikea 買酸青瓜同麵包   之後去 AEON 買針板   真係好邪   因為好似 $128 咋   但嘟出來係 $168   咁我以為記錯   但比完錢再望價錢   真係 $128   咁又要去退錢   呢下怪自己   應該再睇完價錢先買呢 ~

最後就去超市買嘢   今次我覺得自己好有節制   本身買咗 3 盒朱古力餅同 1 Pack 烏冬   但諗諗下都唔係咁想食   所以最後放番低   不過都買咗兩袋   好在里奧大人幫手拎咋 ~

換完積分就搭車番屋企   沖埋涼就食生果   之後坐定定睇電視喇 ~

今晚 11 點唔夠都瞓   係咪太耐無去街   一出街就好易攰呀   哈哈 ~

水餃拚雲吞 (外賣) ( 28-APR-2022 )

( 28-APR-2022  THU )

雖然半夜去咗一次廁所   但都好快瞓得番 ~

又係鬧鐘未響都醒咗   不過我唔會起身住架  我會等里奧大人鬧鐘響先起身 ~

今朝真係想食其他嘢喇   所以去麥記買早餐   同事們見到份麥記早餐覺得好出奇   哈哈 ~

菇場唔忙啦  不過無咩心機   因為我最憎係呢一日 ~

媽咪唔經唔覺都走咗 6 年   但成日覺得走咗無耐咁   同埋我間唔中都發夢見到媽咪   所以有時起身真係諗緊   媽咪係咪真係走咗 ?!

Lunch Time 出去買菜   之後再買牛腩河番菇場慢慢食   真係要慢慢食架   依家天氣熱再食熱嘢   好容易成身汗呢 ~

仍然唔忙   呢個世界好在有 Skype 同 Whatsapp   唔係我會悶瓜咗   哈哈 ~

菇場呢兩個月開始派 KF94   其實我上年已經用緊 KF94   因為我戴風琴式口罩會爛臉   所以家姐買咗好多比我   其實幾個同事見我用   佢哋都想用   所以 Admin 都開始轉款呢

放工去超市買紙包奶茶   本來諗住飲完就算   但都係唔想日日飲咖啡   所以就買囉 ~

番到屋企就開機洗衫   之後再大清潔屋企   抖陣再飲碗湯 ~

諗住跳 2 part 舞   但里奧大人放工   所以跳 1 part 就要煮晚餐了 ~

里奧大人 9 點左右先番到屋企   要即開餐喇 ~

佢話點解我會一齊食嘅 ?!   因為佢以為我已經食咗呀   同埋可能覺得咁夜食又無發脾氣   哈哈 ~

是日懶餐 - 水餃拚雲吞 (外賣)

水餃拚雲吞 (外賣) - 之前買㗎喇   所以今晚食埋啦 ~

洗埋碗抖陣再跳 1 Part 舞   之後即沖涼喇   因為趕住要睇電視   哈哈 ~

今晚 11 點幾都自己瞓先喇   里奧大人就睇多陣書先瞓 ~

焗辣汁三文魚骨 + 黑椒豬扒炒烏冬 + 蕃茄薯仔三文魚湯 ( 27-APR-2022 )

( 27-APR-2022  WED )

尋晚半夜又熱醒   但真係好奇怪   已經開住冷氣瞓喇噃   之後又去廁所   但成個人係濛濛瀧瀧咁架   所以一上到床可以即瞓着   最鍾意咁   因為平時唔係咁快瞓得着呢 ~

早餐食奶醬多   次次都係呢句   哈哈哈哈 ~

菇場唔忙呀   但呢句唔想講太多呢   哈哈 ~

Lunch Time 要出去買烏冬   本來想食粥   但又覺得好熱咁   最後買豬軟骨酸辣米線   其實食湯粉一樣熱   所以全程開住風扇仔 ~

仍然唔忙啦   好在依家有得上網   唔係真係 R 手指等放工呢 ~

放工即走   番到屋企要預備晚餐喇 ~

是日晚餐 - 焗辣汁三文魚骨 + 黑椒豬扒炒烏冬 + 蕃茄薯仔三文魚湯

焗辣汁三文魚骨 - 我只係用黃薑粉同辣汁焗   估唔到里奧大人話好食   仲食咗好多添呀 ~

黑椒豬扒炒烏冬 - 尋晚食剩黑椒豬扒   咁今晚同嚟炒烏冬都唔錯 ~

蕃茄薯仔三文魚湯 - 6 個蕃茄 + 2 個薯仔 + 2 塊大嘅三文魚骨   一田買嘅三文魚骨唔腥喎   我應該會再買呢 ~

洗埋碗就去超市買嘢   之後都沖涼喇   今晚唔跳舞   因為好攰咁 ~

里奧大人 9 點半瞓覺   我繼續睇 "金宵大廈"   今晚故事都幾恐怖   哈哈 ~

今晚 11 點都瞓喇   可能出咗好多汗   所以比較攰 ~

黑椒豬扒 + 福花 ( 26-APR-2022 )

尋晚食剩嘅豬扒通粉   我今晚焗熱食

( 26-APR-2022  TUE )

感恩一覺瞓天光呀   所以鬧鐘未響都醒 lu ~

今朝望出街都好猛太陽   但估唔到落到街又有啲涼風 ~

早餐食奶醬多啦   基本上唔會特登諗想食啲咩   嘻嘻 ~

菇場唔忙呀   可以 Hea 過 ~

阿花代購薯片   佢又比咗 2 筒我呀   之前佢已經送咗豉油 + 護眼 Jelly + 洗面乳 + 燒酒原子筆 + 洗頭水比我㗎喇   所以我成日話佢次次買嘢都有嘢益我   哈哈

Lunch Time 去一田行下   又見到船頭同阿花   依家天氣熱   行下超市最好   之後我買埋澳洲洋蔥同三文魚骨就走喇 ~

再周圍行陣就買燒賣+炒麵   好在可以買 5 粒燒賣   因為 10 粒真係太多   但又好想食燒賣喎 ~

仍然唔忙啦   同阿花 Whatsapp 咗兩個幾鐘   估唔到我哋睇同事嘅睇法係一樣   咁就好啦   即係我無睇錯人   雖然我顛顛得得   但自問睇人都幾準   所以家姐同里奧大人都話估我唔到㗎 ~

放工即走   番到屋企又係即刻預備晚餐了 ~

諗住開餐   點知里奧大人電話響   由 7 點傾到 8 點鬆啲   好在我自己食咗先   同埋洗好哂嘢 ~

是日晚餐 - 黑椒豬扒 + 福花

黑椒豬扒 - 唔知煮咩醬汁   咁就黑椒啦   不過我無食呀   因為食埋碗通粉已經飽   但里奧大人掛住公司嘢   呢碟豬扒幾乎無食咁滯   咁聽晚再食啦唯有 ~

福花 - 我覺得兩日食一款菜都 OK   始終我只係就咁淥   食起嚟好悶咁   但我又唔會加肉落去炒   我成日覺得食菜係要清清地   我連油都唔落㗎   如果菜炒肉應該好味好多嘅   哈哈 ~

里奧大人食剩 1/3 碗米粉   佢係咁話食唔哂   我一手拎起碗米粉倒咗去   之後話唔好嘥時間 ~

因為我知佢傾完電話之後   肯定滿腦子都諗緊解決方案   就算眼睛望住電視   根本唔係睇   食得又慢仲更加知佢不斷諗緊點鮮決   所以我頭先見佢拎手機   我叫佢 Send 完就快啲食   唔好阻我洗碗   雖然佢話佢洗   但我話我執你手尾仲煩   寧願你快啲食完好過呢 ~

洗完碗就開機洗衫   之後都即刻跳舞喇   抖多陣就沖涼 lu ~

里奧大人同事請佢食   佢話覺得好味   所以留比我食   睇完個蘋果   又嬲佢唔落   哈哈哈哈

睇電視睇到 11 點   居然覺得眼瞓   實在太好了   好想 11 點就會突然眼瞓   快快瞓覺呀   哈哈 ~

蒜蓉豬扒通粉 + 福花 + 蕃薯糖水 ( 25-APR-2022 )

呢碟係星期六食剩嘅炸雞 & 兩個細嘅提子包 + 今朝里奧大人食剩嘅油多 

( 25-APR-2022  MON )

尋晚半夜又搞肚痛   之後又瞓得唔好   今日仲星期一添   希望飲完咖啡好啲   哈哈哈哈 ~

早餐食奶醬多   尋晚睇肉肉嘅片   真係越睇越餓   之後我同里奧大人話聽朝要食腿蛋治   里奧大人話唔係食麵餐咩 ?!   我話麵餐又太飽啦   食完中午真係唔駛食了 ~

菇場唔太忙   可以靜靜地過   哈哈 ~

里奧大人都估唔到我鍾意 Iron Spider   我話呢個頭大大幾得意吖   當初諗住去旅行拎佢出來影相   但次次影完一次就無再影   所以我拎番菇場擺好過

里奧大人今朝居然 Whatsapp 話好掛住我   真係好少有   佢話好多時佢起身   我都會喺佢隔離   因為我未起身住   今朝佢起身   我唔喺隔離話唔慣喎 ~   

Lunch Time 出去買菜同蕃茄薯仔   再買無味粉拉麵同 2 包豬肉乾就番菇場 ~

今日食杯麵   唔知點解突然好想食   其實咁都好   唔係一陣又擺到過期 ~

仍然唔忙啦   所以放工即刻走人 ~

番到屋企都即刻預備晚餐   好在今晚都係煮簡單嘢 ~

是日晚餐 - 蒜蓉豬扒通粉 + 福花 + 蕃薯糖水

蒜蓉豬扒通粉 - 突然好想食蒜蓉汁   咁本身諗住煮米粉   但又唔想嘥咗啲汁   所以煮通粉   食剩半碟   聽晚再食 ~

福花 - 買咗一大個   又可以分兩餐食   唔錯唔錯 ~

蕃薯糖水 - 食埋聽晚就食完   感覺係咪好抵呢 ?!   哈哈哈哈 ~

洗埋碗抖陣就諗住跳舞   點知又嚟搞肚痛   之後成個人都無哂力啦   真係暈咁滯   呢三日啲腸胃真係麻麻哋 ~

沖埋涼就即刻休息   感恩里奧大人終於好番啦   之前肚屙又發冷   勁擔心啦   搞到我無哂心機 ~

今晚好攰呀   11 點鬆啲都即瞓覺 lu ~

福建炒飯 (外賣) @ 屋企 ( 24-APR-2022 )

一開個盒   啲餸幾乎瀉哂出來

呢個糖水   又可以食三晚喇

( 24-APR-2022  SUN )

今朝里奧大人出咗門口   我瞓到 10 點 20 分呀   里奧大人知道我瞓到咁晏就最開心   因為佢之前唔舒服   我勁擔心   真係佢去廁所   我等埋佢出嚟先再瞓   一晚幾次呀   所以瞓得唔好呢 ~

梳洗完就即刻整早餐喇   第一次焗提子包   估唔到咁易燶   我要刮哂啲燶先可以食 ~

家姐問我食咩 ?!   我話食我哋最鍾意嘅提子包   家姐話點解買 ?!   我話里奧大人之前唔舒服要食餐包   但食唔哂就我食囉 ~

我同家姐都最憎食提子包   以前我買麥包   我拻哂啲提子出嚟㗎   但好多時拻埋好多麵包出嚟   真係拻咗 1/3 都有   但呢啲麥包甜甜又好味   可惜硬係要有提子   哈哈 ~

食完即沖涼   之後出發喇 ~

今朝明明沖完涼都唔覺熱   但個人一心急   就即刻流汗   激死我 ~

本身諗住去里奧大人公司幫手   但瞓到咁晏   佢以為我今日唔出街   阿妹好開心同里奧大人講話 "佢嚟咗"   里奧大人話以為邊鬼個嚟咗   哈哈哈哈 ~

同阿妹傾偈   傾到里奧大人放工   之後我同里奧大人去買午餐番公司食   食完就要幫里奧大人執嘢了 ~

超級勁好味   但真係好辣   哈哈

2 點開始執嘢   一執就執到 5 點   仲有少少就要等里奧大人自己搞掂   我同佢講   如果搵唔到就打比我就可以   因為家姐都係咁   之前幫佢執屋   佢搵唔到都即刻打比我 ~

好感恩今日都有精神有力氣   可以幫里奧大人執嘢   佢都話如果我唔幫手   佢唔知點執好   好在我勁鍾意執嘢   見到整整齊齊就最開心   始終喺公司時間耐過喺屋企   工作環境都好影響情緒   我見好多同事張枱都好亂   幾十年嘅文件都可以唔掉   真係唔怕比虱咬 ~

里奧大人去買外賣   我就番屋企沖涼再開機洗衫 ~

食完又出咗汗   咁整埋蕃薯糖水喇   之前買咗 6 隻蕃薯   好想快啲食埋去囉 ~

問里奧大人食幾多嚿蕃薯 ?!   之後佢笑住話幾大粒先 ?!   我話大粒湯丸 Size 咁上下啦 ~

食完抖半個鐘就自己跳舞   雖然今日流好多汗都幾攰   但都好想跳舞 ~

沖埋涼就睇 Youtube    11 點 45 分左右瞓住瞓   點知搞肚痛   即刻諗起應該中午食車仔麵太辣 ~  

鹹魚肉餅飯 + 雞扎 (外賣) @ 屋企 ( 23-APR-2022 )

( 23-APR-2022  SAT )

今朝要番工啦   但真心好唔想番工   哈哈 ~

其實我可以瞓到 8 點先起身   不過食完早餐就要即開工   我都係唔想咁趕   所以同平時一樣時間起身呢 ~

我一入門口   見到西瓜喺 Pantry 出來   原來佢早我一步 lift 嚟咋   依家睇嚟我都唔好咁早番喇   我唔想企喺度等開門呢   哈哈 ~

早餐食芝腿治烘底   星期六要食飽啲 ~

同阿爽隔住條河傾偈   之後阿齋話點解見到我 ?!   比佢咁講   以為我番錯工   但我都見到阿花啦   所以肯定無番錯 ~

我話其實番錯無問題啦   我好鍾意星期六番工   唔番真係唔慣   之後佢哋又笑又嘈嘈閉   阿花直頭話好唔鍾意喺公司見到自己   呢句好笑   哈哈哈哈 ~

今日全程同阿花 Whatsapp   無諗過傾咗咁耐   唔怪我我眼濛濛咁啦   所以你話星期六係咪唔駛番工最好   因為全場得西瓜一個人做嘢之嘛 ~

放工即走   買埋午餐就番屋企 ~

我買脆辣雞腿包   但比咗呢 2 件雞   我本身諗住去換番個包   但里奧大人話食唔哂通粉   叫我幫手食   所以唔去換喇   但最後我都無食呢 2 件雞   只係食哂薯條 ~

家姐問我呢 2 件雞幾錢 ?!  我話咩名堂都唔知   所以唔知幾錢喎   哈哈哈哈 ~

咁我飲可樂   但我一定唔會少冰   因為咁樣會好甜   同埋我又飲好耐   無汽再加勁甜   我其實唔會飲   但無少冰就會飲到   里奧大人幫手飲咗半杯   佢話飲完好似好啲   可能佢個人缺少糖份呀 ~

因為屋企無哂汽水   我問里奧大人要唔要買啲 ?!   佢居然話要   我其實之前買咗 2 Pack 汽水   佢一見到就話唔好飲咁多   其實我都唔係飲好多   因為最後有幾罐都擺到過期呢 ~

里奧大人食完嘢再食藥   之後都瞓覺   如果起身覺得身體 OK 就會番工 ~

我就大清潔屋企同熨 2 機衫   里奧大人 3 點幾起身   話可以番工   咁我就繼續拖地再大清潔廁所   沖埋涼就休息休息 ~

原來已經 5 點幾   我以為自己睇錯   啲時間係咪過得咁快呀 ?!

里奧大人 7 點幾番到屋企   今晚我唔煮喇   叫里奧大人買外賣算喇 ~

我今晚唔跳舞呀   頭先無啦啦搞肚痛 3 次   唔知係咪食咗杯乳酪   里奧大人即刻問係咪過期 ?!   哈哈哈哈   我話 5 月先到期呀 ~

沖埋涼就睇 Youtube    又睇到 11 點幾都瞓   不過聽日可以瞓到自然醒 ~

墨魚丸米 + 鮮蝦雲吞粗麵 + 煎韭菜鮮肉餃 + 油菜 (外賣) @ 屋企 ( 22-APR-2022 )

( 22-APR-2022  FRI )

尋晚開冷氣瞓   我估都係時候要開冷氣了   但半夜凍醒呀   真係十分少有   哈哈 ~

早餐食奶醬多   好佩服自己又連續食 4 日   其實今朝想食麥芝蛋包   不過手痛牙肉又痛   唔想行咁遠   所以食奶醬多呢 ~

菇場唔忙   可以做自己嘢 ~

里奧大人今朝睇完醫生都番工   佢真係腸胃炎   同埋要食抗身素   希望佢快啲好番啦 ~

Lunch Time 未餓   又出去行大運   同船頭阿花一齊搭 Lift   佢哋見到我貼撒隆巴斯   我話網球手呀   又話手背做咩一撻紅色 ?!   我話熨衫 "辣" 到呀   佢哋都話搞乜鬼咁呀妳   哈哈 ~

喺條街行咗十幾分鐘   又見到船頭同阿花   大家都話唔知食咩好   所以又各自繼續行   之後我買完午餐   去到等過馬路又見到佢哋   真係約埋都無咁啱 ~

菇場唔忙呀   無無聊聊又同阿花 Whatsapp   原來一傾就傾到 3 點半   咁又好   時間過得勁快   哈哈哈哈 ~

里奧大人 4 點幾放工   所以我放工都準時走 lu ~

買埋晚餐就即番屋企喇   感恩里奧大人都有胃口食嘢 ~

抖陣就就自己跳舞   之後即沖涼同開機洗衫 ~

最鍾意瞓梳化底

睇電視又睇 Youtube   今晚接近 12 點先瞓 ~