乾咖哩薯仔海鮮卷 + 椰菜 ( 30-JUN-2023 )

( 30-JUN-2023  FRI )

尋晚去咗 2 次廁所   之後隻腳又有啲痛   搽咗一條筋又好啲咁   又係瞓到 7 點 15 分都醒 lu ~

不過係咁發夢   諗醒嘅夢係里奧大人同家姐傾股票   之後屋企嘅燈壞咗   我又趕住同里奧大人睇醫生   因為佢 Call 咗 Uber 差唔多到   發夢都要趕過人   哈哈 ~

早餐食咖啡瑞士卷   其實無咩咖啡味   不過我都 OK 嘅   朝早填飽個肚就可以 ~

上次喺 Living Plaza 買嘅   $12/包再有 9 折   因為好似 8 送 1 定咩

我叫里奧大人幫我按下小腿   佢求其按呀   之後話呢啲要自己嚟   咁先好快好番㗎   正衰佬   不過臨走又係都要同我按   不過我話唔駛啦   搽咗一條筋   唔想佢隻手一大陣味 ~

菇場 3D   開心開心 ~

Lunch Time 出去行個大圈就要買嘢食   因為個天都開始黑哂咁 ~

香辣肉醬撈麵 & 魚肉燒賣   

我見咁多肉醬又唔錯喎   起碼可以撈哂啲麵嘛   點知樣樣都難食到呢   職員話燒賣好好食   我信佢啦   點知個口感好林   香辣肉醬係鹹到震   個麵又乾到爆   呢碗嘢我用咗 45 分鐘時間慢慢食   其實我真係好想掉咗佢囉

仍然唔忙   拚命 Load 相到 5 點 28 分呀 ~

放工番到屋企都即預備晚餐   但差唔多 7 點半先開餐呀   手腳好慢 ~

是日晚餐 - 乾咖哩薯仔海鮮卷 + 椰菜 

乾咖哩薯仔海鮮卷 - 里奧大人中午已經食   今晚再食係第 3 餐咖哩   所以我再加海鮮卷同雞蛋   咁樣好似唔係食緊一樣嘢咁   哈哈 ~

椰菜 - 真係好食㗎   但我覺得唔加豉油仲好食 ~ 

洗埋碗就開機洗衫   之後沖涼休息 ~

里奧大人話幾好味   我依家覺得細細杯仲好   始終家庭裝開咗又要記住食   唔係又結冰就煩

抖陣就同同里奧大人一齊睇 "毒舌大狀"   睇到 11 點半先瞓 ~

乾咖哩薯仔雞柳 + 香蔥手抓餅 + 椰菜 ( 29-JUN-2023 )

( 29-JUN-2023  THU )

半夜去咗次廁所   感恩好快瞓得番   今朝瞓到 7 點 15 分都起身 lu ~

早餐食甜餐包   不過我就夾芝士   我鍾意鹹鹹甜甜呢 ~

菇場 3D   得一半同事喺度咋   所以好靜 ~

Lunch Time 出去行陣   好想食豬潤呀   所以去買米線喇 ~

今次啲米線好腍   我最驚係咁   要停一停食佢先

忙咗一個鐘就可以抖下   咁就繼續 Load 相啦 ~

放工即走   今晚想整咖哩   所以喺屋企附近買手抓餅同薯仔   再買埋瑞士卷就即番屋企喇 ~

如果唔駛買嘢就慳番 20 分鐘   本來里奧大人話想做運動   但我話起碼 7 點先食得呀   所以佢都唔做運動喇 ~

是日晚餐 - 乾咖哩薯仔雞柳 + 香蔥手抓餅 + 椰菜

乾咖哩薯仔雞柳 - 上次買咗包田師傅嘅乾咖哩醬   超市阿姐話比較辣   不過我都想試下   估唔到真係好辣   但好正呀   哈哈 ~

香蔥手抓餅 - 今次買另一個牌子   估唔到有驚喜呀   口感煙煙韌韌   我最鍾意呢 ~

椰菜 - 呢期鍾意食椰菜   本身味道清甜   又加上可以保存得耐   呢下最好   咁唔駛成日去買菜嘛 ~

洗埋碗就沖涼休息   之後睇電視   呢兩晚都睇 "隱門"   都幾好睇但唔合邏輯   哈哈 ~

睇多陣 Youtube   今晚 10 點半都瞓覺先喇 ~

老干媽炒豚肉 + 福花 ( 28-JUN-2023 )

( 28-JUN-2023  WED )

感恩一覺瞓天光   諗住起身   但望個鐘只係 6 點半   所以繼續瞓   不過瞓到 7 點 15 分都醒 lu ~

早餐食芝士排包   里奧大人就食甜餐包   今次試下玖拾嘅甜餐包   里奧大人話 Soft   咁下次可以再買了 ~

里奧大人話尋日蘭子見到個飯盒啲餸   話好靚呀   之後里奧大人話係呀   外賣嚟之嘛   上次又係佢帶肉醬意粉   阿妹又話好靚呀   不過都係外賣   哈哈 ~   

菇場 3D   又繼續 Load 相 ~

Lunch Time 出去行陣   之後去買普寧豬肉丸米粉   以前勁唔鍾意食豬肉丸   但依家反而想試下 ~

我加咗紅醋落湯   所以變紅湯   哈哈哈哈

其實一碗裝哂都無問題   不過好多人都怕索哂啲湯   所以分開裝   但要加多 $1   下次問下一碗裝哂得唔得先

又係忙下停下   所以好快放工 ~

去埋鴻福堂拎豬腳薑都番屋企喇   依家想快啲清哂銀包入面嘅 Coupon   襯我仲記得佢哋嘅存在 ~

番到屋企都即預備晚餐喇   呢排無咩點煮飯   要比啲時間慢慢煮呢 ~

是日晚餐 - 老干媽辣炒豚肉 + 福花

老干媽炒豚肉 - 唔想成日整燒汁   所以用老干媽香辣脆油辣椒嚟炒   再加洋蔥同少少福花   成碟餸變咗好有口感   哈哈 ~ 

福花 - 剪碎食真係唔錯   以前唔鍾意食福花   依家就鍾意食   同埋煮嘅時間唔耐先好嘛 ~

洗埋碗都即刻開機洗衫   搞掂就沖涼喇 ~

之前喺 AEON 買咗芝麻糊同紫米露   其實我鍾意熱食   但煮熱就好甜咁   凍食就無咁甜   所以凍食呢

睇陣電視同 Youtube   今晚 10 點半都瞓覺 lu ~

滷水豬手肉燥飯 & 鹽酥雞粒肉燥飯 (外賣) @ 屋企 ( 27-JUN-2023 )

滷水豬手肉燥飯 & 鹽酥雞粒肉燥飯 (追加鹽酥花枝丸) & 鳳梨綠茶 

( 27-JUN-2023  TUE )

感恩一覺瞓天光呀   不過隻腳都仲有少少痛   但唔緊要   食哂啲藥先再睇睇 ~

早餐食芝士排包   搽咗花生醬都幾好味   鹹鹹甜甜咁 ~

菇場又 3D   真係勁爽 ~

Lunch Time 出去買鯪魚球米   點知無開   所以即去另一間買手打牛丸米   估唔到又幾好味噃 ~

仍然唔忙就繼續 Load 相   所以時間好快過 ~   

放工即走   今晚唔煮飯喇   所以叫里奧大人買台灣嘢啦 ~

食完就開機洗衫   之後沖涼休息 ~

隻腳無咁痛就熨衫   叫做郁下咁啦 ~

睇多陣電視   10 點就開始靈修半個鐘   之後又睇陣 Youtube ~

唔知係咪飲咗杯綠茶   今晚唔係咁眼瞓咁   所以成 11 點半先瞓呀 ~

極品海南雞 (半隻) + 香煎手刴魚香肉餅 + 香麻辣鳳爪 + 健康翠綠時菜 + 雞油香飯 (外賣) @ 屋企 ( 26-JUN-2023 )

( 26-JUN-2023  MON )

尋晚半夜隻腳又痛   之後搽一條筋先再瞓   今晚一定要睇睇醫生先 ~

早餐食十字包   終於食哂盒笑牛牌芝士   我應該唔會再買嚟食㗎喇 ~

菇場忙呀   星期一忙都好㗎   咁樣無咁悶   哈哈 ~

Lunch Time 出去買燒賣炒麵就番菇場   真係唔想行咁耐   差唔多 12 點 45 分瞓咗下   好在 12 點 55 分醒咗   唔好睇少呢 10 分鐘   因為瞓醒之後真係精神好多呀 ~

忙下停下   但隻腳痛到個人都無咩心機 ~

放工去睇醫生   我同醫生講話雙腳痺痛   隻右手都有小小痺痛   咁係咪中風呀 ?!   佢話唔駛咁驚啦   唔係咁大件事   可能風濕痛啫~

不過佢話如果再痛就睇多次   之後要去驗血   睇下係咪類風濕   真係聽見都煩   唉 ~

睇完醫生就買外賣番屋企食   其實唔駛煮飯真係好爽   哈哈 ~

食完就休息一下   之後里奧大人幫我按摩小腿   真係舒服好多   感覺小腿真係鬆咗好多咁呢 ~

沖埋涼就睇 Youtube  今晚 10 點半都瞓覺 lu ~

原隻鮑魚瑤柱豚肉裹蒸糭 + 黃豆醬燜茄子 ( 25-JUN-2023 )

( 25-JUN-2023  SUN )

今朝里奧大人話想食麥當勞   所以就買番嚟喺屋企慢慢食喇 ~

次次飲麥記即磨咖啡   之後個鼻哥窿係慶嘅   我估係阿花所講嘅飲咖啡好熱氣   就係呢啲感覺 ~

食完早餐就去里奧大人公司幫手   之後就番學   康太見我隻腳貼咗撒龍巴斯   佢話佢隻腳都扯住痛咗幾個月   可能舊患復發   我話如果西醫唔好就會去針灸   我唔想成日食止痛藥呀 ~

番完學就番崇拜   完畢都即刻番屋企喇   隻腳好鬼痛囉   嗚嗚 ~

買盒一條筋頂住先   原來都要 $78/盒   有另一個牌子要 $118 添呀   我覺得好貴   所以走人   之後佢就拎樽平嘅比我

沖涼洗頭再即搽一條筋   里奧大人 2 點幾先放工   好在我都整熱哂食物   唔係真係要 3 點先開餐呀  哈哈 ~

其實一塊十字包都好厚身   $22/個真係覺得好抵食

叫里奧大人食埋半打水餃雲吞

我就飲湯同食湯渣

我 3 點半瞓到 4 點半   瞓完精神好多呀   咁啱里奧大人都啱啱瞓醒 ~

5 點半左右已經預備晚餐   但 6 點 45 分先食得 ~

是日晚餐 - 原隻鮑魚瑤柱豚肉裹蒸糭 + 黃豆醬燜茄子

原隻鮑魚瑤柱豚肉裹蒸糭 - 家姐比嘅鴻福堂糭劵   味道真係好一般   不過我話好過無啦   哈哈 ~

黃豆醬燜茄子 - 唔想整孜然茄子   因為好攰   但就咁蒜蓉蒸又好悶   所以用黃豆醬燜喇 ~

洗埋碗就沖完   之後就睇陣電視 ~

今晚 10 點半都瞓覺   難得隻腳唔痛就拿拿聲瞓喇 ~

燒汁焗三文魚鰭 + 鳳城水餃拚雲吞 + 蕃茄薯仔粟米三文魚骨腩湯 ( 24-JUN-2023 )

 

( 24-JUN-2023  SAT )

今朝瞓到 8 點半都自然醒   之後里奧大人話有啲 Urgent 嘢要搞   食完早餐要番公司處理呢 ~

早餐食十字包   都係整芝士同搽醬占   但食剩幾件   要留番今晚再食 ~

喺 MUJI 買嘅十字包   咁大個都只係 $22   仲要係好食喎   最搞笑本身我係買嘅   但最後又放低咗   因為我唔想整早餐   之後問家姐有無嘢想買 ?!   家姐問番我有無買十字包 ?!   佢話佢同同事都覺得食食   咁我就買啦   不過之前食過 MUJI 嘅麵包都係好食嘅 

食完就去買餸   里奧大人就番公司做嘢喇 ~

真係出一出去   成個背脊係濕哂   要拿拿聲沖涼洗頭 ~

今日要去整嘢   所以我話想去南記食嘢 ~

咁我抖到 12 點都出發   我落車嘅時候同同里奧大人講話好餓   但平時番工都係食麵包早餐啫   之後佢話依家已經 1 點   平時妳點會咁晏食呀   咁又係喎 ~

招牌滋選小窩套餐 ($62) - 里奧大人話想飲嘢   所以我食呢個餐   因為我食小窩米線 + 飲品仲貴過 $62   但依家平咗   仲多兩樣餸添喎

辣豬肉小窩米線 - 好味係好味   但次次食完一個鐘左右就好口渴

食完去仁御堂買嘢    買完就要去整嘢 lu   一搞就搞咗 2 個鐘   之後都番屋企喇 ~

沖埋涼就抖陣   5 點左右就滾湯 ~

今晚 7 點開餐   始終食米線真係好飽肚呢 ~

是日晚餐 - 燒汁焗三文魚鰭 + 鳳城水餃拚雲吞 + 蕃茄薯仔粟米三文魚骨腩湯

燒汁焗三文魚鰭 - 喺 AEON 買份三文魚   我叫里奧大人揀要邊份   佢揀咗有 3 件魚鰭嘅   因為呢份擺得最靚同好新鮮   之後佢話叫個唔識食嘅人揀   哈哈 ~

鳳城水餃拚雲吞 - 煮半打比里奧大人食   我要留肚食湯渣 ~

蕃茄薯仔粟米三文魚骨腩湯 - 8 個細蕃茄 + 1 個大薯仔 + 1 條超甜粟 + 1 個韓國洋蔥   真係好好好味   下次去 AEON 可以買定 2 份三文魚   咁隨時滾湯都可以呢 ~   

洗埋碗就沖涼   之後休息休息 ~

今晚睇陣 Youtube   差唔多 10 點半都瞓覺了 ~ 

上海姥姥 @ 九龍灣 ( 23-JUN-2023 )

宮保雞丁 ($82) - 好多腰果呀   我最鍾意

姥姥家鄉粗炒 ($82) - 今次有驚喜啦   好多材料   可能喺尖沙咀食嗰間   真係好似就咁食上海麵咁呢

招牌小籠包 ($43) - 喺台北食過鼎泰豐嘅小籠包   真係到目前為止   無一間可以超越到佢

 ( 23-JUN-2023  FRI )

尋晚臨瞓前我唱韓文歌詞   里奧大人話我唱咗句 "一見發財"   我話咁唔好咩 ?!?!   佢話妳真係唔知咩嚟呀 ?!   我話打牌呀嘛   見到發財食糊囉   但佢係都唔講係咩   話我會驚喎 ~

其實尋晚都瞓得唔好   可能朝早瞓夠又夜晚飲盒檸檬茶   所以好難先瞓得着   不過今朝鬧鐵未響都醒   真係好在我有校鬧鐵   因為里奧大人話佢無校到鬧鐘呀 ~

早餐食甜餐包 & 麥包   好想快啲食哂啲笑牛牌芝士呀 ~

菇場唔忙啦   今日都係 3D 嘛   所以啲同事 9 點半先番到嚟 ~

Lunch Time 落雨呀   近近哋去買牛肉米線   今次食煳辣湯底   不過我只要 2 小辣   唔覺好辣   但都好味 ~

仍然唔忙啦   繼續 load 相同傾偈 ~

放工即走   今日要去拎手機嘅專業影像套裝配件   所以同里奧大人喺德福等   叫佢幫我拎咗先   因為張單喺佢度呢 ~

拎完就諗去食晚餐   但突然想食小籠包呀   所以去上海姥姥喇 ~

食完再行陣 MUJI   買完個麵包同點心麵就去馬莎買薯片   之後番屋企 lu ~

開完機洗衫就即沖涼   依家隻腳仲係痛   所以都坐喺梳化灘抖   好在依家里奧大人負責熨衫   唔係企喺度熨衫都好攰呀 ~

   

咁睇電視啦   奇怪個個廣告個背景音樂都相同   之後發覺原來係我手機 Reminder 鈴聲呀   里奧大人都話奇怪   首歌聽咗好耐都唔停咁   哈哈 ~

原價 $29/包   特價 $50/2 包   里奧大人唔鍾意食 SEA SALT & VINEGAR 味道嘅薯片   我又覺得 OK 喎   仲越食越開胃添   哈哈

喺 AEON 買嘅   

超級勁難食   個皮硬崩崩嘅   我摸嘅時候係有種煙韌嘅感覺   所以我先買嘛   嗚嗚   定係我雪柜太凍   所以雪到硬哂呢 ?!

今晚同里奧大人睇 "金錢之味"   睇到 11 點幾就完   啱啱好瞓覺時間 ~

握壽司特級拚盤 + 中華沙律 + 味付螺肉 (外賣) @ 屋企 ( 22-JUN-2023 )

握壽司特級拚盤 ($109) - 我問里奧大人點解會食壽司 ?!   佢話因為我鍾意食   呢兩日做咩咁就我嘅   唔通知我腳痛好辛苦   哈哈

中華沙律 ($22.40) & 味付螺肉 ($25.10) - 里奧大人自己揀㗎   所以肯定佢鍾意食

( 22-JUN-2023  THU )

今朝同里奧大人瞓到 9 點半   其實我 7 點都想醒咁   但好在都瞓得番咋 ~

難得假期   所以同里奧大人出去食早餐 ~

食完早餐就番屋企   沖完涼就休息下   本身諗住去牛棚   不過突然間落雨   所以唔去 lu ~

睇下 Youtube   之後靈修一個鐘   差唔多 2 點就搭小巴去 AEON ~

里奧大人想食 COCO 咖哩   我見到有小食就入去食啦   因為我話食唔落一碟飯   但無理由叫一碟飯咁肉酸嘛   哈哈 ~

海鮮庵列咖哩飯 ($84) - 里奧大人要小辣   COCO 咖哩係好味嘅   間唔中食一次都唔錯   因為我都覺得貴呀   嘻嘻

酥炸籃 ($49) - 真係即叫即炸   所以好食但非常熱氣

魷魚好味呀   因為好耐無食過   哈哈

食完就去 AEON 行下   我去 DAISO 睇下嘢   里奧大人就行咗去睇褲   但唔見想買嘅款   本來我係搵佢   不過最後我係原地踏步   所以叫佢超市等算喇 ~

買埋晚餐再去韓印紅買醬料   我買 4 樽   里奧大人以為我買比家姐   我話細細樽好快用完啦 ~

番到屋企都接近 5 點   所以沖埋涼都可以抖下 ~

7 點鬆啲開餐   食完就睇 "社內相親"   終於睇哂啦   又唔覺係爛尾喎   但劇情比我估到哂   所以其實韓劇內容都係來來去去嗰啲   但勝在有靚衫靚仔靚女睇下咁囉   呵呵 ~

今晚 11 點 40 分都要瞓   但其實仲未眼瞓   可能頭先食飯飲咗盒檸檬茶呀 ~