美心 Food 2 @ 九龍灣 ( 31-JAN-2019 )

咖哩雞配絲苗白飯

蜜桃鮮茄焗豬扒飯 

好大塊豬扒

( 31-JAN-2019  THU )

話咁快就過咗 1 個月   我覺得自己好似去完短宣無耐咋喎 ~

今朝轉場食早餐   難得 8 卦又早咗   次次我話轉場   但次次又無轉   佢就次次問係咪轉場 ?!   所以今朝一定要轉場食啦   哈哈 ~

菇場超級忙呀   樣樣係超級 Urgent   臨放假一定忙 ~

Lunch Time 出去買車仔麵   因為勁想食滷水雞翼   番到菇場已經 1 點喇   原來都排咗好耐隊 ~

食車仔麵同酸辣米線一定要扣底   唔係又會浪費哂架喇

仍然忙啦   好在 4 點幾搞掂哂   可以抖下 ~

放工即走   番屋企開咗抽濕機先   之後再去九龍灣食嘢 ~

今晚喺 MCL 睇 7 點 20 分嘅異能仨 (Glass)   我覺得 James McAvoy 好靚仔   又識做戲喎   之前睇思裂已經覺得佢好掂 ~

雖然片長 1 小時 53 分   但我覺得無悶場喎 ~

睇完都即番屋企喇   沖埋涼就開機洗衫   之後睇多陣行程   又 12 點先瞓 ~

板長壽司 @ 馬鞍山 ( 30-JAN-2019 )

天婦羅盛 ($53) - 好味呀   不過食完都幾滯   哈哈

油甘魚壽司 (柚子醬 X 2)  / 赤蝦壽司 X 2 / 油甘魚腩壽司 X 2

飛魚子軍艦 X 2 / 蟹膏蟹肉軍艦 X 1

劍魚腩壽司 X 1 - 有筋嘅

赤蝦壽司 X 2 / 梅真鯛壽司 X 2 / 油甘魚壽司 (柚子醬 X 2) - 好奇怪囉   第 2 轉嘅壽司飯份量係多咗好多   再睇赤蝦壽司就知道了 

芥辣墨魚軍艦 X 2

( 30-JAN-2019  WED )

尋晚瞓到半夜又熱哂   但只係雙手出哂汗   第一次係咁咋 ~

今朝好似無咁凍   但一出門口又覺得凍   所以都係着番件厚褸算喇 ~

早餐食奶醬多   無咩胃口 ~

      
菇場忙呀   無諗過新年前都咁忙 ~

好快又 Lunch Time   覺得口淡淡   所以買酸辣米線番菇場食呢 ~

今次終於有扣底喇   咁我就可以食得哂

仍然忙呀   但放工要好準時走   因為約咗家姐去馬鞍山食飯同買花 ~

里奧大人本來去公司同事搞嘅飯局   不過佢飲完奶就搞肚痛   所以無去   但去咗姑奶們喺九龍灣嘅飯局   奇奇怪怪 ~

咁我 6 點幾都到咗馬鞍山   所以行陣先   等家姐差唔多到   我就去板長拎位喇 ~

家姐 7 點幾到   佢頭先話好餓   所以我等佢黎之前就 Order 咗啲壽司   咁佢黎到就可以即食   哈哈 ~

食下傾下又 8 點幾   係時候要走喇   唔想肥仔等我地太耐 ~

今餐家姐係都要請我   仲要話多謝我陪佢食晚餐 ~

食完就去 Paper Stone 買麵包同肉卷   之後就去搵肥仔買花   佢留咗盤花比家姐   又話送盤細嘅比家姐   不過家姐唔要啦   始終人哋要做生意嘛 ~

原來呢個肥仔   就係點都要家姐陪佢入院個肥仔   家姐話佢屋企人當正佢係救命恩人   好搞笑   我話睇妳地對話啲態度   真係唔似識咗 1 年左右   以為識咗好耐 ~

我都好羨慕家姐㗎   佢同啲同事關係好好   就算佢地已經唔喺同一間公司做嘢   但都會約埋一齊食 Lunch   真係做到好朋友嗰隻喎   佢有幾個好朋友   都係第 1 份工識添㗎 ~

差唔多 8 點 45 分就搭的士番家姐屋企   家姐問我   係咪 Berry 姐喺度先陪佢番屋企   我話係   嘩哈哈哈 ~

家姐話比 Berry 張相比朋友阿莊睇   佢勁鍾意 Berry 呀   所以話新年同家姐拜年   估唔到大食又係咁樣   問 Berry 依家點 ?!?!   話搵日去妳屋企食飯   之後家姐話如果無 Berry 就無人會去佢屋企探佢   哈哈哈哈 ~

因為搭的士   所以叫工人幫手拎   咁家姐 Whatsapp 工人   叫佢 "開車篷   一陣要送太太番屋企   之後妳再出嚟   喺糟糟姐姐接 Berry 睇醫生嗰度等"   工人好緊張以為 Berry 要去睇醫生   所以叫姐夫聽多次   真係笑死我   呢幾句加加埋埋又幾似真係出車去睇醫生嘅   哈哈 ~

9 點 15 分去到家姐屋企   Berry 姐終於無呢埋喇   呵呵 ~

好大盤花同桔

家姐最鍾意紫色

家姐話想沖涼先   我話沖啦   反正我都係想同 Berry 玩   哈哈 ~

嘩   家姐去沖個涼啫   Berry 姐完全係失控咁款   咬唔到我隻手就咬我大脾   又跳高咬我手踭   又咬我對襪   係咪黐咗線呀佢 ~

衰女包係咁咬我呀   係扯住來咬   所以真係好鬼痛架   佢仲咬瘀咗我隻腳   又咬到我隻手流血喎   之後我 2 隻手掌比佢咬到赤赤痛   完全抱唔到佢囉   所以家姐沖涼咁耐   我抖足咁耐 ~

比佢咬到我死死下   唔比佢咬就吠我添呀   工人又碌大對眼望住我   可能覺得奇怪點解 Berry 成日吠我   哈哈 ~

之後家姐話咬妳等如鍾意妳呀   我即刻好開心話真係㗎 ?!   佢話唔係   咁講等我開心啲喎 ~

Berry 姐慢慢行過嚟咬我呀

扮乖

張床仔就黎唔夠佢瞓 lu

等食

細細條尾仔   好得意

個身長哂喇

終於一次過食哂   之前成日食一半就去玩   玩完又食   細路仔咁

幾咁心野   食食下又望過來   唔係諗住又咬我呀嘛

咬到我隻手花哂   不過家姐花得仲勁  

咬到我虎口位流血呀   之前都比佢咬損   依家結焦咋

好想抱   但真係咬到我好痛   唔敢抱佢啦   由佢自己咬狗骨算喇

又想跳出來咬我

牙仔又尖   手指甲又尖   好在無整花我塊臉咋   哈哈

條狗骨比佢咬剩少少

啤到我實一實

大隻咗   連對眼睛都細埋

佢好搞笑   成日咬家姐拖鞋   家姐着住實比佢咬甩   有次仲比佢咬到流血呀   咁佢咬完 Fing 兩 Fing   又咬埋家姐另一隻腳着住嘅拖鞋   又係咬完 Fing 兩 Fing 放低喺度    之後家姐着番   佢又咬   但佢唔會咬工人同姐夫嗰對㗎噃 ~

等埋 Berry 姐 10 點食嘢   咁抖多 15 分鐘就走人喇   因為我想抱住 Berry 遊車河 ~

我同家姐講   第時工人夜晚見到我都驚   因為要跟住我哋出車   哈哈 ~

Berry 坐車都 OK 喎   但鍾意喺窗口度周圍望   咁工人捉住 Berry 隻手仔同我拜拜   當佢人仔咁   哈哈 ~

番到屋企即沖涼喇   沖涼嗰陣   對手 "乸" 住痛呀   真係第一次沖涼沖到 "hehe 鞋鞋"   咁家姐成日比佢咬到手同腳損哂   沖涼應該超級痛呢 ~

里奧大人 10 點半已經瞓覺   我就 11 點 15 分都瞓喇   難得有睡意 ~

大家樂 @ 官塘 ( 29-JAN-2019 )

紐西蘭西冷牛扒 (車打芝士腸 / 炸蕃薯條配蒜蓉包) ($60)

( 29-JAN-2019  TUE )

今朝起身又涼涼地咁   但又有少少似回南天   好在唔眼瞓咋 ~

早餐食芝腿治烘底   雖然食到悶   但懶得轉場囉   因為喺呢間茶記食嘢實在太方便了 ~

菇場忙呀   仲諗住新年前唔忙添 ~

Lunch Time 出去買墨魚丸米   呢排個胃唔係咁好   真係要慢慢慢慢咁食呢 ~

仍然忙呀   但仲未做完   好在可以慢慢做 ~

里奧大人話 Lunch 飲完茶   4 點幾又有散水餅   所以今晚唔好預佢晚餐   咁就好喇   我正想唔煮   菇場啲人係咁咳   搞到我都唔太舒服   頭有啲痛囉   唉 ~

放工即走   番到屋企又 OK 喎   所以就抹哂所有柜   又執埋啲柜桶   唔要嘅嘢就即掉   依家都唔諗咁多   諗得多就會留番佢架 ~

里奧大人買完戲飛   番到黎都 7 點半   咁我話去大家樂食嘢啦 ~

食完去買嘢   之後番屋企喇   再抹下嘢   原來都 9 點了 ~

沖埋涼就熨衫   執埋行李   再繼續睇行程 ~

睇呀睇   睇到 12 點半先瞓呀   但呢排唔知做乜鬼   唔係咁眼瞓咁囉   唔知係咪 4 點幾仲飲茶呢 ~

蟹捧廣島蠔麵 + 蕃茄薯仔排骨湯 ( 28-JAN-2019 )

( 28-JAN-2019  MON )

今朝好似又涼番少少咁   呢兩日成日打噴嚏   好鬼驚感冒呀 ~

早餐食奶醬多   如果有半份就好   平啲又唔駛咁飽 ~

菇場忙呀   仲諗住有啲時間睇行程   真係唔好咁開心住   哈哈 ~

Lunch Time 出去買牛腩河   一路食一路睇行程   爭取時間呀 ~

仍然忙到顛   好在 5 點左右搞掂   可以抖下 lu ~

放工去買餸   之後即番屋企預備喇 ~

里奧大人 5 點幾喺公司附近見客   所以今晚佢 7 點都番到屋企 lu ~

是日晚餐 - 蟹捧廣島蠔麵 + 蕃茄薯仔排骨湯

蟹捧廣島蠔麵 - 好想清哂冰格啲嘢   但成日食極唔完咁 ~

蕃茄薯仔排骨湯 - 頭先豬肉佬話無排骨同腩排   叫我買攪碎嘅瘦肉   但我話瘦肉咁鞋食唔到㗎喎   之後我走啦   佢叫我買豬尾骨   幫我斬細嚿啲喎   咁好啦   因為我成日覺得滾湯只係用排骨或者腩排   完全唔知豬尾骨可以滾湯呢 ~

洗埋碗就拖地   之後開機洗衫   再大清潔廁所   沖埋涼就執行李喇 ~

差唔多 10 點好鬼餓呀   餓到有啲胃痛   所以食個杯麵   但要同里奧大人 Share 食   我食唔哂一個呀 ~

里奧大人 11 點幾瞓   我成 12 點幾先瞓呀 ~

住家飯 @ 家姐屋企 ( 27-JAN-2019 )

生菜鮑魚 - 呢個罐頭鮑魚幾好味喎

茄汁蝦碌 - 今次係急凍虎蝦   不過唔爽口   呢度 8 隻要 2 百幾   下次都係買新鮮好啲呢

南乳蓮藕燜豬手 - 我鍾意食蓮藕

白切雞 - 今次隻雞好滑呀

沙薑乾蔥蓉

西洋菜豬骨湯 - 工人無落鹹鴨腎   佢成日都係咁   有次腐乳炒通菜   居然無落腐乳   之後問家姐點呀 ?!   家姐話咁咪炒通菜囉   唔係點喎

( 27-JAN-2019  SUN )

今朝 8 點 45 分起身喇   沖埋涼就去食早餐  ~

10 點左右都番到教會 lu   因為我 10 點 15 分約咗友伴 Group   咁里奧大人想陪我食早餐   所以佢食完都一齊番教會   佢就喺教會睇聖經   我就同 2 個姊妹傾偈 ~

本身係一個鐘   但其實真係唔夠時間傾   哈哈   期望每個月都有一次相交嘅時間   依家我好鍾意番教會   同弟兄姊妹一齊真係好開心呢 ~

今日小組嘅弟兄姊妹幾乎齊哂人   坐埋一齊真係勁開心呀   感覺好似上次一齊去旅行咁 ~

我同里奧大人都好明顯覺得   經過上次 3 日 2 夜嘅相處   依家感覺真係 Close 咗好多   同埋我哋又有個 Group   有咩筍嘢又一齊分享   勁開心呀 ~

本來約咗 1 點修眉   但我想完哂整個崇拜先去囉   所以即打去話遲 10 分鐘   感恩可以改到時間呢 ~

1 點 11 分去到   可以開始喇   修雜毛真係痛到嗌救命   一開眼真係 Feel 到自己眼有淚光㗎 ~

我覺得修咗好耐   起碼 40 分鐘   因為我腰骨痛喇   又唔可以郁下喎 ~

好想買嘢呀   所以又去 TONYMOLY 睇下   買咗指甲油 ($38) 同 Shiny Face Peeling Gel ($68)   估唔到送 1 張 Vital Vita 12 Moisture Essence Mask   我見張單 list 係 $29 㗎 ~

最後去埋 Simply Life 買酥皮方包比家姐就走人喇   原來都 2 點半   係時候番屋企喇 ~

番到屋企 3 點左右   我又抖下   里奧大人 4 點就起身   話餓喎   所以去食下午茶 ~

我話一個下午茶 Share 食   里奧大人話驚我唔夠飽   我話夠啦   我又唔係咁餓   同埋一陣 6 點半食飯呀 ~

食完番上屋企執下嘢   咁家姐一陣嚟車我   我驚佢攰   問佢駛唔駛瞓覺 ?!   咁我 Whatsapp 完就即放低電話   之後再睇   佢話醒覺咩 ?!?!   笑到我死呀   我都唔知係講咗醒覺   哈哈哈哈 ~

眨下眼又 5 點   家姐就車我地去佢屋企喇 ~

里奧大人一見到 Berry 姐就話大隻咗好多   但佢接受到 Berry 驚佢   哈哈哈哈   不過都比里奧大人抱囉   之後佢地話我抱得佢唔舒服   但我已經瞓喺度   等佢成個身仔灘喺我度喇喎 ~

尋日又係咁縮埋喺梳化底

等佢慢慢爬出來   哈哈哈哈

佢幾嗲里奧大人呀   但做咩唔跟我㗎   我話依家唔鍾意 Berry 喇   佢哋喺度笑   哈哈

係咪唔鍾意我同妳影太多相呀 ?!   講個原因出嚟好喎   唔好啤啤共 

好多隻手   哈哈哈哈

里奧大人話隻手輕輕掂住佢個頭仔   佢自然就會好乖唔郁

家姐抱佢又係咁嗲     

咁家姐今朝同糟糟一齊帶 Berry 打第 1 支針   醫生話佢好乖   依家差唔多 9 磅添呀 ~

Berry 會暈車浪㗎   我話係衰糟首車唔好囉   肯定見車過車   哈哈   家姐揸車呢   Berry 無嘔㗎 ~

打完針就去糟糟屋企   放低 Berry 再去多多拎曲奇餅   家姐話 Berry 都跟糟媽㗎   咁做咩唔跟我㗎   嗚嗚嗚嗚 ~

家姐同糟媽講話我好唔開心   Berry 姐唔比我抱   之後糟媽話駛咩唔開心啫   哈哈 ~

7 點半左右開餐   今餐前工人就煮得好味道喇 ~

食完就拿拿聲抱 Berry 喇   因為佢個樣開始眼瞓   呵呵 ~

喺我身度瞓覺呀   家姐同里奧大人見咁情況   即狂影   最搞笑我唔郁   佢哋又唔出聲   好驚一郁一嘈   Berry 姐就醒呀 ~

工人問家姐嘢   家姐咁啱錄影 Berry 瞓覺   所以家姐無答到工人   笑死我 ~

眼瞓喇   係咁舐手

咁咪乖囉

係咁錫我   係咪好鍾意我呀 ?!

終於喺我個身度瞓覺喇   仲有少少鼻寒聲添呀   勁得意

瞓咗都有幾分鐘   之後醒哂喇

想走 ?!   絕對唔可以   哈哈哈哈

家姐一抱呢   又即刻瞓番   衰女包

  
里奧大人用支付寶比錢家姐   等家姐無得塞番比我哋 ~

之後我家姐講話過年後同妳食飯吖   家姐話妳想見 Berry 姐就見 Berry 姐啦   又話同我食   哈哈   里奧大人都咁話我呀   但我認   哈哈哈哈 ~

家姐車我地番屋企   原來都 9 點   我就即沖涼啦   里奧大人要即做公司嘢   感恩好快搞掂 ~

睇多陣電視   11 點幾都瞓喇 ~