刕舙馫麵館 @ 紅磡 ( 30-SEP-2023 )

香燜豬軟骨刀削麵 ($48) 

牛筋腩刀削麵 ($49) 

( 30-SEP-2023  SAT )

感恩一覺瞓天光   瞓到 8 點 20 分都自然醒   所以起身食早餐 lu ~

食完早餐就抖陣   之後里奧大人做功課   我就要去整嘢 ~

12 點左右番到屋企   抖陣又繼續執屋   希望呢幾日假期可以完成 ~

家姐買比我嘅豬肉乾   糟糟比佢嘅林志源豬肉乾   佢又比埋我   因為屋企得佢一個食   食唔到咁多喎  

2 點半出去食下午茶   之後再去埋超市買嘢就番屋企喇 ~

吉列魚柳配薯條 ($36) - 樣樣都新鮮炸起   雖然好味但好熱氣   哈哈

上海粗炒 ($42) - 里奧大人真係好鍾意食上海粗炒    

有氣有力又再執文件   終於真係執好哂 ~

今晚想早啲食   所以 6 點半出去食晚餐 lu ~

諗住食車仔麵   點知無開   咁食刀削麵喇 ~

食完就番屋企喇   開完機洗衫就沖涼   今日執咗成日嘢好攰呀 ~

和風黑糖黃豆粉雪糕

都好多黃豆粉

睇下 Youtube 又打下機   今晚 11 點都瞓喇 ~

住家飯 @ 家姐屋企 ( 29-SEP-2023 )

我今晚只食餸   同埋叫家姐唔好煲湯   唔係到佢哋飲幾日㗎喇

茄汁蝦碌 - 今次啲蝦都大隻   同埋蝦頭好多膏呀   勁正

東風螺 - 好耐無食喇   我食咗好多呀

白切雞 - 姐夫話呢隻清遠雞   我話乜雞都食啦   之後家姐話本來想買乳豬   不過我唔記得點解最後無買添

呢個蘸汁真係好正   下次叫工人整一碗比我帶番屋企先

鮑魚生菜 - 家姐開咗罐阿一鮑魚   好似 $498   我話平時我係買超級袖珍嘅鮑魚咋   不過我今晚都無食鮑魚   唔知係咪食得太多東風螺   好似有啲滯咁

菜心炒牛肉 - 我鍾意食炒菜   所以呢碟我包底   呵呵

( 29-SEP-2023  THU )

尋晚瞓得唔係咁好   所以今朝要里奧大人買早餐番屋企食喇 ~

唔係餐蛋治就係腿蛋治   不過早餐真係無咩所謂   最緊要有杯咖啡就可以

唉   個肚仲係扯住痛   咁要睇醫生啦   因為聽日連放 3 日紅假無得睇呀～

Book 咗 9 點半   但 10 點先有得睇 ~

我同醫生講完個肚扯住痛   佢就摸下我個肚   話可能個瘤影響   之後問我有無占寒占凍 ?!   咁我又無喎   可能佢摸完我個肚   覺得我個人好慶   哈哈 ~

再叫姑娘同我探熱   佢個樣好似好驚咁   話我 37.4 度   我問醫生係咪即係發燒 ?!   佢話係擲界   但我話平時都係咁上下囉   同埋姑娘頭先同我探熱係無燒㗎噃   好鬼驚佢以為我呃佢話無燒呀 ~

拎埋藥就即走   感恩好快有巴士   10 點半就番到菇場   好在無 Urgent 嘢搞咋 ~

Lunch Time 出去萬寧買嘢   買完就去買燒賣炒麵番菇場食   突然間好肚餓呀   頭先仲諗住就咁食燒賣添 ~

買 6 個麻糬比家姐   就嚟無得買 lu

今日放 4 點   里奧大人放 3 點就最正   因為家姐都只係放 3 點半咋   哈哈 ~

同里奧大人坐同一班巴士去家姐屋企   但去到我個站   連埋我有 5 個人上車   之後架車都 full 哂   感恩上到車咋 ~

去完訂生日蛋糕就行陣商場   之後里奧大人話好餓   話去麥當勞食嘢   我叫佢唔好食包呀   因為已經 6 點 ~

里奧大人話呢啲形狀代表咩 ?!   我睇完就話係 BigMac 囉   圓形係麵包   四方形係芝士   綠色係生菜   啡色係漢堡扒   里奧大人碌大對眼話我好勁呀   咁都諗到   真係關於食嘅嘢係難唔到我喎   哈哈   之後比家姐睇   佢都話係 BigMac 呀

食完再去拎蛋糕就上家姐屋企   Berry 居然無撲我呀   因為里奧大人入屋先   佢撲咗里奧大人一下   就即刻呢入去梳化底 lu   真係乜都驚一餐 ~

Berry 個飯兜係成日移動   因為佢一食呢   就會放喺佢前面

里奧大人好有心機餵佢   初初只食三文魚   後尾都好比面食埋粒狗糧

家姐 7 點左右番到屋企   今次 Berry 就樸家姐喇   不過仲未食得   所以就一齊傾下偈喇 ~

今晚嘅中秋節晚餐   係里奧大人喺群組約家姐㗎   家姐以為自己睇錯   哈哈   所以好感激里奧大人咁錫家姐呢 ~

我同里奧大人每人比封生日利是比家姐   其實家姐 10 月中生日   但我想早啲比佢囉   里奧大人又話要用靚利是封   我就醒咗個紫色蠟筆小新比佢喇   哈哈

今晚喺家姐屋企食飯   係呢一年食飯食得最舒服嘅一日   哈哈哈哈   因為唔駛幫手煮又唔駛幫手洗   只係幫手食就得喇   所以今晚我食得好慢   要好好享受呢一餐呀 ~

工人先搞笑   話夾起咗啲餸喺廚房   我以為佢夾起啲唔靚嘅出嚟   原來佢話佢喺廚房食呀   我即刻話唔可以啦   我話難得我喺屋企食飯呀   梗要一齊食啦 ~

Berry 女係咁黐埋嚟

我唔會比佢食人嘢的

唔知咩梨   但好多水份

好痴里奧大人咁喎

8 點半開始鬼鬼祟祟整生日蛋糕   本來想晏啲先食㗎   但咁啱家姐同人傾電話   里奧大人話依家拎蛋糕啦 ~

家姐傾完電話   里奧大人就負責同家姐傾計   等佢唔好入廚房   之後我扮嘢   叫里奧大人試下手機錄影得唔得 (因為想錄起家姐嘅表情) ~

我一早諗好個生日牌寫 "絕世好家姐"   但原來只得 4 個字   咁寫番 "靚靚家姐" 啦   佢上次寫 "靚靚妹妹" 比我嘛   哈哈

家姐呢件八哥衫   多數係糟糟或者同事送比佢   總之送嘢比佢   一係八哥一係紫色   佢就會好開心㗎喇

工人帶 Berry 落街   咁戴完狗帶就比里奧大人拖啦   但 Berry 點都唔出門口呀   笑死   之後要家姐送 Berry 出門口   佢先出去咋 ~

9 點左右又食糖水喇   Berry 無啦啦狂吠里奧大人呀   可能嬲佢頭先想拖佢出街呀   哈哈 ~

腐竹雞蛋糖水   家姐尋晚問要唔要雞蛋 ?!   我話要 1 隻   但今晚真係好飽   我唔食個蛋黃呀

佢好乖咁坐喺里奧大人隔離

呢張搞笑呀   哈哈哈哈

依家 37 磅   咁樣睇好肥美   哈哈

個樣突然間咁慘嘅   哈哈

食咗藥  個人好攰   所以 9 點半都走人喇 ~

家姐同 Berry 送我哋搭車   Berry 女居然比里奧大人拖住呀   家姐都話好出奇   不過里奧大人話 Berry 知道家姐喺後面   所以唔驚就真   同埋 Berry 行兩行又會向後望住家姐嘅   所以就好安心跟住里奧大人一齊行囉 ~

月黑風高

同 Berry 出街   好似同佢鬥力咁

兩個人都唔夠 Berry 大力

番到屋企即沖涼喇   睇多陣電視   10 點 45 分即瞓覺 ~

炸雞翼 (外賣) + 蠔油燜豆片飯 + 昆明生菜 ( 28-SEP-2023 )

( 28-SEP-2023  THU )

尋晚 3 點幾去完廁所   都好快瞓得番   今朝起身都精神   感覺開始瞓得比較好咁   唔通臨瞓前里奧大人幫我按腰嘅關係 ?!   今晚再試下先 ~

早餐食糙米芝士包   買咗個新夾諗住唔用筷子   點知自己又唔夠力   整到啲芝士跌咗落焗盤   芝士又薄切切   剷番上嚟其實所剩無幾了 ~

今朝去埋入錢先番菇場   感恩附近有入錢機   始終唔想成日記住要入錢嘛 ~

菇場忙下停下   話咁快又 11 點 45 分 ~   

Lunch Time 去銀行入票   再去超市買嘢   最後買埋皮蛋艇仔弼就番菇場 lu ~

2 點幾菇場請食下午茶   8 卦話因為公司停咗幾年春茗   剩番啲娛樂費   所以間唔中都請食下午茶 ~

放工即走   番到屋企即預備晚餐 ~

是日懶餐 - 炸雞翼 (外賣) + 蠔油燜豆片飯 + 昆明生菜

炸雞翼 (外賣) - 頭先嘅下午茶嚟㗎   番到屋企再焗熱   其實如果今晚唔係要食飯   我係會食埋囉   但食咗雞翼就食唔落飯   所以留比里奧大人食喇   因為今日煮麵佢食   無理由無餸嘛   哈哈 ~   

蠔油燜豆片飯 - 食咗幾晚呢個蠔汁嘅餸   真係夠皮喇 ~

昆明生菜 - 其實煮生菜真係好方便   不過放喺雪櫃就好 "牙炸"   菜心苗就好啲   我會一條條咁擺好再入袋   咁樣慳位好多呢 ~

之前買咗 6 個㗎喇   折咗係 $15.3/個   點知今日見到係 $39.9/3 個呀   所以忍唔住買 3 個   想撈勻番個價呀

洗埋碗就去剪髮   呢個髮型師都好有心機   幫我剪咗 40 分鐘呀   平時嗰啲 25 分鐘左右就搞掂呢 ~

番到屋企即開機洗衫   之後沖涼休息 ~

里奧大人 9 點鬆啲就落堂   佢話今日買椰撻嘅時候   見到啲燒餅幾煙韌咁   所以買番嚟比我食   但佢自己就食咗 1 個先   話要試下好唔好味喎   不過呢個燒賣真係算煙韌   同埋個餡唔甜呢 ~

睇陣 Youtube 又打陣機   但今日個肚成日扯住痛   所以今晚 10 點唔夠都瞓喇 ~