臘潤腸雞肶 + 蠔油油麥菜 ( 31-JAN-2021 )

( 31-JAN-2021  SUN )

8 點 20 分起咗身   咁即開機洗衫   之後抹廚房同梳化   拖完地諗住再抹其他嘢   點知家姐話可以接我   真係好似整定咁   本身我校咗 9 點 15 分起身   但早起就做家務啦   點知家姐話今朝 9 點 15 分就可以接我 ~

拿拿聲沖埋涼先   再買埋早餐就等家姐接我喇 ~

好為食咁

我一拎開   佢就即走開   幾現實   哈哈

食完就諗住陪下 Berry   之後家姐話比啲嘢我睇 ~

其實工人間房仲有好多盒裝紙巾同廁紙   佢理由話係好平   同埋預埋比我   不過佢地真係用得好快就真嘅   其實仲有另一格係放咗一半係紙巾   其他就係口罩同消毒紙巾   今次到我甘拜下風了   哈哈   

抖陣就同家姐一齊入利是錢   話咁快又入咗個幾鐘 ~

家姐見到 Berry 靜靜咁坐   好認真話 Berry 正常嘅時候都好乖   笑死我呀   講到 Berry 本身係唔正常咁

成個男仔樣

佢就有本事咁樣曬法   哈哈哈哈

1 點幾出車去新都城   家姐同姐夫去食 Lunch   我就去買嘢   之後差唔多時間就再約家姐去買嘢   搞掂哂都接近 3 點   家姐就車我去巴士站   里奧大人啱啱放工 ~

我去烘焙店買嘢   叫里奧大人去米線陣攞位先 ~

又係 3 點 40 分食下午茶   真係好晏   哈哈   不過我就無所謂   始終我晏食早餐   係怕里奧大人好餓啫 ~

食完就去姑奶屋企比嘢佢   之後傾偈   傾咗個幾鐘就走人 lu ~

里奧大人話想快啲番屋企   咁打的啦 ~

沖埋涼就休息一下   今日我都有啲攰   哈哈 ~

是日懶餐 - 臘潤睇雞肶 + 蠔油油麥菜

臘潤睇雞肶 - 本身諗住煮辣雞煲   但唔想特登買配料   所以轉為蒸餸   我覺得自己好勁㗎   識得腦轉彎   始終我煮嘢唔叻   以前仲痴   我想整生炒排骨   但醃咗排骨買唔到三色椒   所以排骨都掉埋   諗起真係好折墮 ~

蠔油油麥菜 - 油麥菜都係炒豆豉鯪魚就好味   就咁食好大陣味咁 ~

洗埋碗就沖身   之後休息 ~

今晚又同里奧大人睇戲   但 11 點幾都瞓㗎喇   聽日要番工呢 ~

韓式菜乾排骨湯 + 自家制麵包 ( 30-JAN-2021 )

( 30-JAN-2021  SAT )

尋晚瞓到半夜熱醒呀   直頭條頸都有汗   可能舖咗珊瑚毯呀 ~

早餐食沙爹牛肉米   佢地記得少米但就無走包   真係每次都要錯   唉 ~

家姐今日 12 點剪髮   咁我話陪佢食 Lunch 啦   原來佢自己一個食咋 ~

放工即走   感恩好快有巴士 ~

我話差唔多到就打比佢攞位   佢又話唔駛   話喺出面等   咁我去到店舖又見唔到佢   原來佢啱啱入咗去坐   我咪話囉   頭先又話唔入去攞位   佢話因為頭先好多枱   之後幾次都見兩個人入去   所以都係攞定位喎 ~

我話仲好飽   只食少少小食就可以 ~

川香軟骨酸辣粉 ($42) - 家姐要中辣   真係恐怖   我話上次食小辣都好辣呀   唔好預我   哈哈  

紅油豬耳 ($36) - 我都估家姐一定叫呢個   因為我成日都話食豬耳   呢個好味   豬耳夠爽   但家姐話好鹹   咁可能我無蘸汁食   哈哈   

佢個樣真係勁滿足   合埋對眼話好開心食到傷心酸辣粉   勁搞笑 ~

埋完單就走人啦   行咗一陣   家姐掩住個口話無戴口罩呀   之後即刻戴番   但佢無戴嘅時候   我又真係無咩嘢   因為見慣佢唔戴口罩嘛   但我就多數記得戴   因為我放喺手袋   咁走之前一定拎電話出嚟   一定會見到口罩 ~

同家姐行大孖   家姐話媽咪以前成日都去大孖買嘢   我真係唔知喎   正一衰女包 ~

之後去隔離間印尼店睇睇   我要買手標牌黃薑粉同辣椒膏   家姐就話買田師傅咖哩醬   我話我屋企有唔好買   之後佢買包咖啡比工人   又幫我比埋錢   今日發達   又食又拎 ~

佢話想買秘魯波子提   我好奇怪成日話要買   原來佢話好後悔無買比我   因為好好食   我話我之前成日買美國波子提㗎   同樣好大粒好爽甜喎   唔駛再特登買比我㗎喇 ~

咁買埋陳皮魚蛋就走人   佢番屋企   我就約咗里奧大人去 Megabox ~

搭 15A 去 Megabox   估唔到 3 點就到 Megabox ~

其實我好感恩   本身睇巴士 Apps 係 2 分鐘有車   咁我行去巴士站肯定都要 10 分鐘   我預咗轉車再轉車   咁我去到天橋再睇 Apps   15A 行車緩慢   仍然係 2 分鐘   我即跑去巴士站   見到 15A 開始埋站喇   所以家姐以為睇錯我話搭 15A 呀   哈哈 ~

咁我行陣先   我買咗小新利是封呀   原價 $19.9   特價 $13.9 咋   勁開心 ~

里奧大人 3 點 45 分左右到   咁睇行山鞋啦   原來我記錯公司名   哈哈   之後再睇另一間   但想買嘅係無折   咁唔買住 lu ~

行行下開始有啲餓   望下鐘已經 4 點 15 分   我話買包奶就可以   里奧大人話唔好   去麥記食 tea   佢勁搞笑啦   本身佢係食麥記 Lunch   但最後食咗炸醬麵   所以要迫我去麥記食   哈哈 ~   

~

買兩個枕頭就走喇   本身諗住打邊爐   但食完下午茶好飽   所以唔打喇 ~

里奧大人番屋企先   我就去超市買雞翼   又行咗成個鐘   怪唔得里奧大人打比我啦   以為乜事買雞翼買咁耐   哈哈 ~

番到屋企即沖涼   之後抖下 ~

今晚非常簡單   其實唔係餓   但 7 點半都開餐喇 ~

是日懶餐 - 韓式菜乾排骨湯 + 自家制麵包

韓式菜乾排骨湯 - 食食下嘅時候   里奧大人問係咪湯渣 ?!   我話係湯包嚟㗎   之後我話唔記得焗雞翼呀   怪不得覺得今次煮得特別快咁啦   哈哈   我仲特登去買雞翼   激死我 ~

自家制麵包 - 今次新口味   有芝士香草碎蛋 + 意式肉醬脆包   所以今晚我只係食呢兩個包已經夠哂飽 ~

洗埋碗就再沖多次身   之後休息喇 ~

同里奧大人睇戲   咁我話食雪糕   因為好想快啲食完   唔想見到佢   因為唔好食嘅   哈哈

差唔多 11 點都覺得攰   所以套戲未睇完都要瞓喇 ~

麻辣手撕雞 & 招牌水餃 (外賣) @ 屋企 ( 29-JAN-2021 )

( 29-JAN-2021  FRI )

尋晚發得超級多夢   估唔到今朝起身仲記得   即刻同里奧大人講哂啲夢   佢都話咁多夢仲記到先好嘢   哈哈 ~

佢話呢兩晚瞓得好差   我話可能捱咗一晚夜睇大結局呀   之後佢笑住話唔好同人講 11 點半係捱夜呀   哈哈   咁我覺得真係算夜嘛 ~

同里奧大人食早餐   食完抖陣又番工喇 ~

菇場超級忙   一做就做到 11 點 15 分 ~

Lunch Time 出去行陣   再買紅腸酸辣米線番菇場慢慢食 ~

放工即走   買埋外賣就番屋企喇 ~

真係激死我   今次蒸餃子   之前買咗蒸籠布   點知今晚蒸完係痴底嘅   好在唔係小籠包咋   不過蒸出嚟嘅餃子皮又好煙韌   但下次都係淥算喇

里奧大人話又洗衫 ?!   我話點解你連續兩晚講同一說話嘅 ?!   我話啱啱夠大半機咪洗囉   之後佢再強調話只喺想妳抖下   唔好成日番到屋企係咁做 ~

咁其實都開心嘅   起碼佢知我成日做家務   又驚我攰驚我暈   佢都好㗎喇   會主動熨衫   咁樣真係幫輕我好多   因為有時企得太耐條腰會痛 ~

8 點半開始睇聖經   睇咗一個鐘   之後就睇 Youtube ~

里奧大人10 點就瞓  我睇到 10 點 45 分都瞓   呢排真係 10 點幾就眼瞓 ~

雜丸蘭州拉麵 + 腐乳唐生菜 ( 28-JAN-2021 )

( 28-JAN-2021  THU )

尋晚瞓瞓下好熱   但起身又好凍喎 ~

咁今日里奧大人 WFH   所以佢去買早餐   我之前同佢講話每朝要錫我一啖 (整鬼佢)   今朝佢起身先   之後我一起身就話早餐要食芝蛋治   佢笑住話唔係每朝鍚一啖先咩 ?!   食對妳嚟講真係好緊要   哈哈 ~

佢今朝神神地經   勁多無聊嘢講呀   好似好開心咁 ~

菇場唔太忙   又做下 Email Filing ~

Lunch time 出去行陣   今日行咗半個鐘   行到覺得熱先番菇場 ~

今日唔餓呀   所以食 Flakes + 乳酪 ~

無啦啦超級勁忙   仲要係煩嘢   又搞咗個幾鐘 ~

今日咩事呀   全部同事問我嘢   但比嘅資料全部係錯嘅   最搞笑連我自己都搭錯線   哈哈 ~

放工即走   番到屋企都即刻預備晚餐喇 ~

估唔到就咁淥嘢都要 6 點 45 分先開餐   里奧大人話妳番到嚟都 6 點啦 ~

是日懶餐 - 雜丸蘭州拉麵 + 腐乳唐生菜

雜丸蘭州拉麵 - 今次一定要食淥嘅丸   因為我要蘸辣椒豉油呀 ~

腐乳唐生菜 - 好想食腐乳   所以買唐生菜 ~

今晚食埋兩塊自家制麵包   我食咗一塊都飽   里奧大人直頭話唔食喇   之後我話好味呀   叫佢食一塊   佢都忍唔住笑   最後都食咗半塊 ~

我沖涼之後就開機洗衫   里奧大人話又洗 ?!   妳可唔可以停一停唔好成日做嘢 ?!   咁有時我坐喺梳化食零食   佢又會問可唔可以唔好成日食嘢   乜都會講 "可唔可以" 好搞笑 ~

抖陣就玩 21 點   之後玩記憶牌   已經只係 20 隻 (A-10)   但第一舖居然係開哂 A-10   真係無隻相同架喎   大佬   年紀大真係無咩記性   哈哈 ~

呢幾日條腰好痛   叫里奧大人幫我按腰   人手按腰真係舒服好多㗎 ~     

一凍就好想快啲瞓   所以今晚 10 點半都瞓 lu ~

韓式辣醬焗雞肶 + 蠔油燜冬菇生菜 + 蔥阿伯豬肉餡餅 + 自家制麵包 ( 27-JAN-2021 )

尋晚食剩香酥軟骨   今晚焗熱仍然好味道呀

( 27-JAN-2021  WED )

感恩一覺瞓天光   不過半夜好似覺得凍凍哋咁呀 ~

我同里奧大人講話今朝凍咗咁喎   佢話差唔多   我話我都覺凍喎   之後佢話咁又係   哈哈 ~

好餓呀   所以早餐要食腿蛋治 ~

諗住 Hea   點知無啦啦勁忙 ~

咁樣影到好肥呀

Lunch Time 都唔行喇   買完腸粉燒賣就番菇場   因為隻耳仔痛痛哋咁   想休息下 ~

仍然忙下停下   好快就放工 ~

里奧大人 7 點幾番到屋企   叫佢沖埋涼   都仲要等陣先可以開餐 ~

我話有套猜下猜下嘅卡通片啱你睇   佢話咩叫猜下猜下 ?!   我話即係估下邊個奸定唔奸嗰啲呀   佢話係咪懸疑片呀 ?!?!   我話係呀   佢話得佢知我講咩   哈哈哈哈 ~

我話趕住煮飯嘛   講咗個概念比你先   咁一陣可以再提我咩卡通片嘛 ~

里奧大人 Lunch 食剩嘅福建炒飯   本身諗住焗   因為炒飯底   但真係唔想再等   所以轉為蒸   之後諗諗下荷葉飯都係蒸啦   最緊要熱咪得囉   哈哈 ~   

是日懶餐 - 韓式辣醬焗雞肶 + 蠔油燜冬菇生菜 + 蔥阿伯豬肉餡餅 + 自家制麵包

韓式辣醬焗雞肶 - 雞肶居然焗咗 20 分鐘都唔熟   切開見到骨仲係紅色   所以要再焗 8 分鐘   我同里奧大人講話唔好以為老婆煮嘅一定熟   食之前都要睇清楚呢 ~

蠔油燜冬菇生菜 - 之前燜定多啲冬菇   咁今日買生菜就搞掂 ~

蔥阿伯豬肉餡餅 - 個皮焗極都唔脆   下次試下煎先 ~

自家制麵包 - 食唔哂呀   要留番聽晚再食 ~  

頭先焗熱雞肶嘅時候   就快快手煮定個蕃薯糖水   咁沖完涼就可以食喇 ~

洗埋碗就煮沖涼   抖陣可以食糖水   正呀 ~

捱咗一晚夜追劇   今晚勁攰   10 點半即瞓喇 ~

傷心酸辣粉 (外賣) @ 屋企 ( 26-JAN-2021 )

皇牌二人套餐

原價 $138 (外賣 8 折 $115) 

傷心酸辣粉 x 2   里奧大人轉米線

酸辣土豆絲 - 爽爽地口感   但好鬼辣 

香酥軟骨 - 呢個超級好味道   我叫嘅時候以為係豬軟骨呀   如果知道係雞軟骨   我唔會叫喇   里奧大人唔鍾意食呢

夫妻肺片 - 里奧大人成日話要夫妻肺片   佢之前都叫夫妻的世界做夫妻肺片㗎   痴鬼線   最搞笑係佢根本唔知夫妻肺片係乜來   我話係牛肚囉   之得嚇佢話係牛脷牛耳啦   哈哈

炸墨魚餅 (2塊) - OK 啦   終於有樣唔辣   我其實樣樣都要少辣   但樣樣都好鬼辣   真係食到好傷心流淚呀   哈哈

( 26-JAN-2021  TUE )

今朝好似涼涼地   但就潮濕囉 ~

早餐食奶醬多   真係食到悶 ~

菇場唔忙呀   可以抖抖 ~

Lunch Time 同 8 卦一齊去萬寧買嘢   之後買埋 Lunch 就番菇場 lu ~

之前兌換利是錢   估唔到今日就有   咁啱今晚去剪髮   我又唔想將啲錢放喺菇場   咁家姐話髮型屋有 Locker   我都照去剪髮喇 ~

5 點 20 分就有利是錢   我走嘅時候   我直接放包銀紙入袋   BG 之後走來比個茶莊環保袋比我   話用個家常啲嘅環保袋安全啲   仲叫我小心啲呀   嗰一刻真係好感動呀 ~

遲咗少少走   感恩去到巴士站即有車 ~

今次剪得非常滿意   佢係最大膽嘅一個髮型師   因為好多都唔敢將我前面頭髮剪到好短呢 ~

剪完就拿拿聲去買傷心酸辣粉   我好想快啲番屋企呀   咁樣先覺得安全 ~

食完抖陣就沖涼   里奧大人 8 點半開會   9 點 40 分先開完   要即睇 "驚奇的傳聞" 喇 ~

睇大結局喊到我死呀   今晚又 11 點半先瞓 ~

蠔油燜冬菇支竹鴨掌 + 翡翠苗 ( 25-JAN-2021 )

( 25-JAN-2021  MON )

估唔到今朝里奧大人又陪我食早餐   佢話因為 11 點半都去剪頭髮   所以陪我食早餐喎 ~

食完就開機洗衫   感覺好似唔駛番工咁   哈哈 ~

菇場唔太忙   做完 Report 就可以抖下 ~

Lunch Time 行一田   隔兩行都聽見爽把聲   真係慘過見鬼   最怕啲人講嘢咁大聲 ~

我見到小寧波湯丸開箱   問職員拎兩盒黑芝麻湯丸就走人   但睇包裝係寫麻蓉湯丸   咁我再行去凍櫃睇睇   咁啱見到船頭同阿花   我話要黑芝麻味道   佢比咗麻蓉味   我哋認知嘅麻蓉係淺啡色嘛   之後再睇價錢牌係寫住麻蓉 (黑芝麻)   但包裝盒面只寫麻蓉   咁真係好易令人誤會噃   因為我喺百佳見到麻蓉有好多盒   但又寫住黑芝麻味道係無貨   咁即係其實大把貨啦 ~

其實一田貴百佳幾蚊   但我話難得開箱   所以先買咋   哈哈 ~

買完都唔係咁餓   所以番菇場食 Flakes + 乳酪算喇 ~

仍然唔忙   又係 Skype 到放工   其實我以前唔識速成   仍都好驚打中文   依家真係打得好快   里奧大人同家姐仲成日問我啲字點打添呀   好有成功感㗎   哈哈 ~

放工即走   沖埋涼就預備晚餐 ~

諗住就咁蒸熱啲餸   但都要差唔多 7 點先開餐 ~

是日懶餐 - 蠔油燜冬菇支竹鴨掌 + 翡翠苗

蠔油燜冬菇支竹鴨掌 - 呢個餸尋晚燜定   今晚食真係非常入味   我用家姐比我嘅日本冬菇   真係好正   又大又厚肉   鴨掌就買六隻只係 $8   我同家姐講話買咗鴨掌   佢即刻話叫佢整咪得囉   不過我話我都想試下整   但一定唔買超大嗰啲   因為真係好恐怕   成隻手咁   哈哈 ~

翡翠苗 - 終於清哂   呢幾盒好多渣   之前買嘅唔係咁架   激死我   真係唔好貪平咯 ~

洗埋碗就拖地   之後再沖沖身 ~

食埋蘋果都差唔多 8 點 15 分   即刻睇驚奇的傳聞喇 ~

其實 9 點半想瞓   但無啦啦劇情又好緊張   最後睇到 10 點半都停   因為我好眼瞓   哈哈 ~

蜜糖燒汁焗雙丸 + 酸辣無骨鳳爪 (外賣) + 翡翠苗 ( 24-JAN-2021 )

家姐又買咗米餅同乳酪比我   之後係都要比埋個名月蘋果   話唔係成日有貨喎

好味   但好硬   哈哈哈哈

( 24-JAN-2021  SUN )

今朝 9 點左右都自然醒   咁都起身沖涼 ~

等埋家姐電話就出發買早餐   之後去家姐屋企喇 ~

依家如果星期六探唔到 Berry   我都盡量星期日探   但之後番實體崇拜就探唔到㗎喇   不過到時又應該可以星期六探了   哈哈 ~

衰女唔比我抱喇   依家肯定鍾意工人姐姐啦   嗚嗚嗚嗚 ~

不過我唔會理佢   我仍然會痴住佢呢   呵呵 ~

一見到件雞肉   就即刻流咗大大滴口水

個頭好似淩空咁

佢應該係眼瞓嘅

對眼都無哂神

我係咁搓佢個身 

阿呆姐   哈哈哈哈

我影緊佢   佢個鼻哥掂到個 Mon   所以影咗呢張相出來   都幾恐怖   哈哈哈哈

好搞笑   我明明幫家姐整嘢   之後佢入房   咁我難得見到 Berry 喺梳化瞓覺   我即過去攬住佢   家姐出嚟話奇怪唔見我又靜哂   仲話明明整緊嘢都可以走開嘅 ~

佢其實已經瞓咗   見我行埋去又醒一醒

 

見佢咁   之後我比隻手佢 "long" 住下巴等佢瞓

瞓咗一陣間就周圍走 lu

同家姐講開巨強   佢話佢朋友喺廁所牆貼咗隻假巨強   家姐一入去就嚇到死死下   話佢真係黐黐哋線   哈哈 ~

真係女仔人家好少鍾意呢啲囉   家姐話有人買先出奇   呢句好好笑 ~

我好記得好耐之前同家姐探佢   佢話養咗隻免仔   上天台一見到隻免   嚇到我同家姐以後覺得免仔好恐怖呀   我哋心目中係細細隻嘛   點知隻兔仔好似細狗仔咁大   真係掂都唔敢掂呀 ~

12 點幾跟車去新都城   居然又見到船頭   真係邪囉   尋日佢問我係咪去探家姐 ?!   我話唔係呀   所以唔會撞到佢   點知今日撞到   我真係第一次呢個時間去新都城   係咪咁有緣呀 ~

家姐同姐夫食嘢   我就周圍行   到時睇下會唔會一齊走 ~

里奧大人 2 點半放工   咁啱家姐食完番屋企   所以家姐車到我去巴士站   感恩好快有巴士   好快去到 APM 了 ~

同里奧大人食完嘢就行 APM   最後去埋一田買酸辣無骨鳳爪就番屋企喇   咁就已經 5 點 ~

番到屋企沖埋涼就燜冬菇   6 點幾開始預備晚餐 ~

今晚煮個辛辣麵比里奧大人食   佢完全唔知㗎   一見到個麵不知幾開心呢 ~

是日懶餐 - 蜜糖燒汁焗雙丸 + 酸辣無骨鳳爪 (外賣) + 翡翠苗

蜜糖燒汁焗雙丸 - 焗丸焗咗半個鐘   估唔到咁耐   我問里奧大人想淥定 BBQ 味道   佢話無所謂   問多次就話 BBQ 味道   哈哈 ~

酸辣無骨鳳爪 (外賣) - 之前同家姐喺一田買滿 $1,000 有張 $50 Coupon   所以就用嚟買鳳爪喇 ~   

翡翠苗 - 本身買咗三盒   但唔想連食三晚   所以就每次食盒半   唔駛咁辛苦   哈哈哈哈 ~

洗埋碗就沖涼   之後休息喇 ~

仍然睇 "驚奇的傳聞"   但睇到 11 點唔夠就瞓覺 ~