滷水燜雞翼 + 酸齋拚齋鴨腎 (外賣) + 白菜仔 ( 8-DEC-2025 )

我覺得都好味   搵日試下自己整先

( 8-DEC-2025  MON )

今朝一起身   個鼻窿塞哂同埋喉嚨有啲痛   所以都係同西瓜請病假喇 ~

真係好邪   家姐 8 點 45 分打嚟問嘢   因為我把聲係仲未開   同埋未瞓醒反應好慢   所以又比佢知道我病了   不過普通傷風都無咩嘢嘅   只係個人比較攰囉 ~

里奧大人 10 點起身   佢約咗水姑 10 點半食早餐   食完就要番工   咁我其實都醒咗㗎喇   所以都即刻打去診所掛號 lu ~

刷埋牙即刻整早餐   食完就即搭車   啱啱好 11 點到診所 ~

呢個肉桂黑芝麻包 ($13 買三送一) 都幾好味   口感都鬆軟   下次經過會再買嚟食

等咗一陣就有得睇   都係 URTI   醫生問怕唔怕食藥眼瞓 ?!   我話唔怕   反正唔駛番工嘛 ~

個人唔太攰就行陣超市   買完嘢就番屋企 lu ~

沖埋涼就抖下先   里奧大人 1 點幾打嚟話食 Lunch   不過我未整呀   所以我去佢公司同佢一齊食就算喇 ~

本身佢 2 點開 Conf. Call Meeting   之後可以提前 1 點 45 分開會   咁等佢開完會食仲好   因為只係開 15 分鐘 ~

我食完都走喇   里奧大人仲有嘢做呀 ~

番到屋企即刻食藥   諗住起碼半個鐘後先有料到   估唔到 5 分鐘就即嚟料   一合埋眼就即刻瞓着 ~

瞓醒就見到里奧大人   好似已經 4 點幾   之後佢要做多一陣嘢就瞓晏覺 ~

水姑買比我哋食   仲有樽花生醬

感恩尋晚燜咗餸   今晚整熱就得 ~

是日晚餐 - 滷水燜雞翼 + 酸齋拚齋鴨腎 (外賣) + 白菜仔

滷水燜雞翼 - 唔記得浸冬菇就加幾隻雞蛋   咁樣好似無咁悶   不過仲剩番好多   又要留番聽晚食 lu ~

酸齋拚齋鴨腎 (外賣) - 喺 Fushion 買㗎   見 $25 都幾抵   同埋都幾好味 ~

白菜仔 - 都係喺惠康買㗎   少少哋就最好 ~

洗埋碗即沖涼   之後睇電視 ~

啲藥食到個人好散   所以今晚 10 點 10 分都瞓覺 lu ~

紅燒雞翼 (外賣) + 足料糯米雞 (外賣) + 白菜仔 ( 7-DEC-2025 )

食剩 2 隻   又要留番聽晚食

里奧大人中午食剩嘅金菇瑤柱燜伊麵

( 7-DEC-2025  SUN )

今朝鬧鐘響要懶床先起身呀   本來想再瞓但又瞓唔到   所以同里奧大人去食早餐 lu ~

今次多咗蛋   但其實以前仲多

食完去里奧大人公司坐陣   之後都要番自己教會事奉了 ~

崇拜完畢就同事奉團隊飲茶   真係好難得有咁嘅機會   可惜阿 Jack 嚟唔到 ~

12 人一定係去飲茶   仲要一定要圓枱   咁樣先可以傾到偈

食下又傾下事奉啲搞笑嘢   我哋係一到教會就要做嘢   所以好少可以傾到偈   因為個個都喺唔同位置   好難見到呢 ~

差唔多 3 點   組長話時間差唔多走喇   大家唔好浪費食物   一齊食哂先走   我望到好似剩番 5 樣點心   但每樣好似剩 1 件   哈哈 ~

里奧大人啱啱番到屋企食午餐   咁我就買埋麵包同晚餐   再去埋超市買嘢先番屋企 ~

番到屋企就做小清潔同燜餸   里奧大人就沖涼瞓晏覺 ~

睇 Youtube 又打機   但唔在狀態   感覺有啲唔係咁舒服添   不過又瞓唔到先慘喎 ~

6 點鬆啲先預備晚餐   但手腳好慢   差唔多 7 點 15 分先食晚餐呀 ~

是日晚餐 - 紅燒雞翼 (外賣) + 足料糯米雞 (外賣) + 白菜仔

紅燒雞翼 (外賣) - 好少見到呢啲雞翼   里奧大人好鍾意食㗎   所以即買喇   我覺得 $35 都抵食 ~

足料糯米雞 (外賣) - 買咗 2 隻   留番 1 隻半做聽日嘅 Lunch Box ~

白菜仔 - 好耐無食菜咁   所以喺惠康買包菜   只係 $5 咋   最緊要份量唔好太多   因為想食但唔想食咁多呀   哈哈 ~

洗埋碗就開機洗衫同沖涼   里奧大人就熨衫   之後一齊睇 "中年好聲音 4" ~

睇完再睇陣 Youtube   但個人好凍呀   頭先食嘢又無咩味道   好似作病咁   所以 10 點都瞓覺喇 ~

Hungry Korean @ 九龍灣 ( 6-DEC-2025 )

豆腐湯 ($54) - 仍然係咁好味道

雞肉鐵板燒 ($64) - 今次辣咗啲   我覺得咁樣仲正

( 6-DEC-2025  SAT )

感恩一覺瞓天光呀   臨醒之前發個夢   但最衰起身之後唔記得啦   但記得係開心嘢嚟嘅 ~

今朝同里奧大人出去食早餐   之後去佢公司   咁我可以寫 Blog 等佢   因為 11 點幾要出發去大酒店   我唔想滕嚟滕去 ~

放工即搭地士去大酒店   去到啱啱好 12 點 15 分   一到埗就即刻同小組+獻詩小組一齊練詩喇 ~

儀式係 1 點開始   整個過程係傷感但平安   不過我都喊到對眼腫哂   我哋小組全部人都好唔捨得 Ivy   咁我同里奧大人無番小組嘅時候   Ivy 都會搵我哋傾偈食飯   因為佢好想我哋再番小組呢 ~

上完山就去美孚食纓紅宴   我哋教會小組一圍枱   其他 3 圍就係親朋好友 ~

好耐無同班弟兄姊妹一齊食飯   佢哋講開榴槤   姊妹 IT 問其他人食唔食 ?!   我都未答   佢話好肯定我食   因為我對眼已經發哂光   哈哈 ~

咁我哋又同牧師傾偈   真係成日見但就無點樣傾   佢喺教會咁忙   根本無時間坐定定咁傾囉   所以今次傾到偈真係好開心呢 ~

食完就跟牧師佢哋坐的士番教會   咁啱今晚我有事奉 ~

崇拜完畢要整啲嘢   里奧大人就去幫其他弟兄姊妹   差唔多 7 點 45 分先走 ~

我話今晚要食濕嘢   所以里奧大人話食韓國嘢   因為有豆腐湯呢 ~

食完去仁御堂買嘢   之後再行陣就番屋企   里奧大人多數上車前去洗手間   我就周圍行下   咁我唔記得同佢講向前行下   當佢出嚟嘅時候兩頭望   咁我揚手啦   佢即刻見到我   佢仲用好感激嘅語氣同我講   話我 Size 唔可以太瘦   唔係就睇唔到   哈哈   真係勁衰呀 ~

里奧大人話我今日同姊妹 L 一齊坐好好傾   又話食飯傾偈好主動   我話個個都識咗咁耐   又試過一齊去旅行   唔會話 "生外" 囉   我話依家都要主動搵朋友喇   要好好珍惜見面嘅機會呢 ~

番到屋企即開機洗衫   搞掂就沖涼休息 ~

里奧大人話點解啲衫洗極唔完咁   我話因為之前買咗新嘅冬天衫囉   厚衫真係一機最多 5 件   咁所以啲衫好似有排先洗完咁囉 ~

睇多陣 Youtube  今晚 11 點 15 分先瞓覺 ~

口水雞喇沙招牌手工麵 + 海南雞喇沙招牌手工麵 (外賣) ( 5-DEC-2025 )

口水雞喇沙招牌手工麵 ($45) - 我一定食呢個

海南雞喇沙招牌手工麵 ($45) - 里奧大人要食清啲   所以就食海南雞喇

今次喇沙湯底有少少辣

( 5-DEC-2025  FRI )

尋晚瞓到半夜有啲熱   不過里奧大人話熄細啲風   咁當然就佢   唔係一陣又話冷親仲煩 ~

臨醒之前我同人打緊牌   舖牌好靚㗎   我仲話唔好鬧鐘響   講完就鬧鐘響了 ~

早餐食甜餐包搽花生醬   覺得清清哋唔錯   哈哈 ~

一落樓覺得凍   原來唔記得着外套   所以即刻上番樓拎啦   感恩趕得切班車呢 ~

菇場忙呀   放咗 9 日假都唔忙就慘喇   哈哈 ~

時間過得好快   又已經 12 月   2025 年好快就成為過去了

Lunch Time 差啲唔記得蒸飯   好在番埋位放低杯記得咋 ~

出去行下又買咗 2 斤本地薑同 2 包紅蔥頭   買完就番菇場開餐 lu ~

仍然忙呀   所以有啲攰添 ~

里奧大人今晚 7 點半要開會   所以我放工買埋晚餐去里奧大人公司   坐緊車嘅時候   里奧大人問我喺邊 ?!   佢話阿妹要等埋我先走喎 ~

一去到里奧大人公司    阿妹話我個樣好開心   我話放完假實開心啦   哈哈 ~

之後傾多陣偈就食嘢   差唔多食完見到 Melody   佢又入嚟傾   傾咗 15 分鐘   好在真係差唔多食完咋 ~

我問叻叻屋企多唔多用薑 ?!   佢話用好多薑㗎   之後我話比一半比佢   佢問我做咩買咁多 ?!   我話唔知原來 2 斤咁多呀 ~

我 7 點左右都番屋企喇   開埋機洗衫就即沖涼   抖陣就做小清潔同熨衫喇 ~

里奧大人 10 點 20 分番到嚟   叫佢快啲沖涼休息 ~

我無開冷氣   里奧大人話我都怕凍 ?!

估唔到里奧大人睇 "中年好聲音 4"   咁我都一齊啦   睇到 11 點都瞓覺 lu ~

佳餚坊 @ 紅磡 ( 4-DEC-2025 )

迷你福建飯

豉油王肉絲炒麵

乾炒叉燒意粉

( 4-DEC-2025  THU )

今朝 8 點 20 分醒咗   不過就想繼續瞓   之後 Y 姑打嚟   原來已經 11 點 05 分   好在佢打嚟   唔係就可能瞓到 1 點呀 ~

不過尋晚發咗好多夢   有個夢係同里奧大人去酒店食自助餐   但個場境係以前見過   酒店喺 1 樓   但 1 樓就入唔到去酒店   而係要由 2 樓行番落嚟先去到酒店大堂 ~

咁我唔知要整緊啲咩   里奧大人居然喺櫃枱隔離食碗芒果布甸   我話無比錢唔食得㗎   之後佢仲餵埋比個女職員食添呀   我覺得呢個夢好搞笑 ~

諗住拿拿聲刷牙沖涼   之後里奧大人話驚無早餐食   所以我刷牙就算喇 ~

去到餐廳   里奧大人問阿姐仲有無早餐食 ?!   阿姐話做埋我哋   之後我哋叫完   3 分鐘之後有人問有無早餐 ?!   阿姐都話無早餐喇   所以好感恩   仍都好感激阿姐呢 ~

食完番屋企開機洗衫同執嘢   今次唔係買太多手信   所以執咗 2 個鐘就搞掂 ~

呢 2 個証件套用咗好耐好耐   其實都有啲爛爛哋㗎喇   但間格好用又未買到新就繼續用啦   不過依家買咗個新嘅   佢可以功成身退了

搞掂就熨 3 機衫   話咁快又 4 點幾   我同里奧大人都有啲餓但唔想出去食   所以叫佢食件蛋糕   我食幾粒朱古力就可以 ~

我差唔多 5 點半先話去食下午茶   但里奧大人話食開嗰幾間只係到 5 點半咋   咁我話去佳餚坊食啦   叫 3 個餐同埋又可以帶埋飯都唔錯   哈哈 ~

食完就番屋企   要再執下嘢先沖涼休息呢 ~

睇下 Youtube   差唔多 11 點瞓覺 ~

客家原味粉 @ 紅磡 ( 25-NOV-2025 )

豬潤粉腸淮山麵 ($52) - 好耐無食喇   仍然咁好味道

魚球牛肉淮山麵 ($52) - 真係食餸都食飽

( 25-NOV-2025  TUE )

今朝瞓到 6 點 50 分都醒醒哋   但我都係瞓到鬧鐘響先起身呢 ~

早餐食栗子千層包   里奧大人今日放假   不過要同 Y 姑整啲嘢   所以就同我食早餐喇   之後又話同我一齊搭車   但我話佢唔駛咁早出門口啦 ~

菇場忙呀   忙到 10 點半就搞掂 ~

Lunch Time 蒸完飯就出去一田最後衝刺   好感恩買到牛肋條   其實搵咗幾次都唔見   但原來係擺咗喺另一個位   買完再行多陣就番菇場開餐 lu ~

蘇格蘭頂級牛肋條 2 磅裝 ($98)

唔忙繼續做自己嘢   難得今日 3D ~

放工即走   今晚同里奧大人出去食晚餐 ~

食完就番到屋企染髮   之後開機洗衫   里奧大人已經熨咗衫   咁我可能休息下 ~

睇下 Youtube 又打機   今晚 11 點 15 分都瞓覺 lu ~

臘潤腸 + 滷水燜雞下肶 + 寧夏菜心苗 ( 24-NOV-2025 )

( 24-NOV-2025  MON )

感恩一覺瞓到鬧鐘響呀   天氣涼涼哋真係會瞓得好啲 ~

早餐食栗子千層包   我真係覺得好好食 ~

菇場雖然 3D   但就忙下停下咁呢 ~

Lunch Time 蒸完飯就去 DAISO 買把梳   之後見到阿花同船頭   諗住同佢哋講話仲有無嘢買 ?!   無就我走先   估唔到阿花有嘢買   咁就一齊比埋錢啦 ~

買完再去一田   我想買餅   所以同佢哋分頭行事   行行又見到   我話我買完番公司   船頭就買咗牙膏同牙線   咁我幫佢拎埋番公司   佢哋可以去食 Lunch 呢 ~

三祖紫菜 (無味精) ($35) / 三矢日版甘大滋家庭裝 ($34/2 件)

森永碎朱古力曲奇餅 & 森永碎杏仁曲奇餅 ($23.9/2 件) X 2

諗住 Hea 過   點知又忙咗成個鐘   咁都好嘅   好快又放工 ~

放工即走   番到屋企即煮晚餐喇 ~

里奧大人開咗機洗衫又熨埋  2 機衫   佢放假多數幫手做呢啲   如果佢可以幫手煮飯就好啦   咁起碼我唔舒服   佢自己都食到餐住家飯嘛 ~

是日晚餐 - 臘潤腸 + 滷水燜雞下肶 + 寧夏菜心苗

臘潤腸 - 唔想特登再買多樣餸   所以就蒸臘潤腸喇 ~

滷水燜雞下肶 - 尋晚食剩   今晚食埋去啦 ~

寧夏菜心苗 - 今次啲菜都好甜   我覺得寧夏啲菜係好食啲咁   因為有啲淨係寫住菜心苗㗎咋 ~

洗埋碗就執嘢   一執就執到 9 點   所以唔做機喇   想快啲沖涼休息 ~

睇下 Youtube   今晚 10 點 45 分都瞓覺 lu ~

滷水燜雞下肶 + 寧夏菜心苗 ( 23-NOV-2025 )

( 23-NOV-2025  SUN )

今朝同里奧大人一齊食早餐   我食完就去家姐屋企喇 ~

車程暢順   所以早咗半個鐘就到家姐屋企   我一開門嘅時候   U 姐以為我係家姐   哈哈 ~

Berry 女喊住叫我咁   真係好鬼得意   但其實係咪真係咁開心呀 ~

U 姐同家姐一樣咁肉緊叫 Berry 又係錫佢   但 Berry 都無抗拒   反而我抱佢   佢壓實個身唔郁   我點都抱唔到佢呀 ~

又周身抓   不過無之前抓得咁犀利喇

今個星期諗住沖涼   點知佢食完魚油魚屙呀   加上天氣又凍咗   都唔敢同佢沖涼   但佢啲毛都好光滑   我仲以為佢沖咗涼添

老人家樣   哈哈

家姐同姐夫番到屋企   Berry 好靜咁行去佢哋身邊   係咪主人同外人嘅分別呀   哈哈   家姐話姐夫朋友喺屋企面拖佢出街   佢唔郁㗎   點都唔出去   其實我拖都應該係咁 ~

今朝可以同家姐坐定定傾偈喇   真開心   雖然佢可以邊做邊傾   但始終都做緊嘢   都唔係點想阻住佢嘛 ~

我要攬佢呀

食零食開開胃

家姐尋日同糟糟入元朗買齋雞粒同蜜汁豬肉乾   順便搵阿莊食糖水   好似探街坊咁   哈哈

大媽問家姐呢排點呀 ?!   其實佢哋上個月先食完飯   唔知以為好耐無見咁   哈哈   家姐話大媽都係好人   我話梗係好人啦   次次食飯都問要唔要幫我買藥   咁我覺得家姐啲同事都好好   唔係都唔會成日幾個一齊食早餐午餐啦   生日又會一齊慶祝   記得妳生日就當妳係朋友啦   我話我只係問阿花幾時生日咋 ~

不過我其實都感恩同每個同事都傾到偈嘅   所以上次同里奧大人講話我鍾意番工   同埋番工都開心嘅   佢即刻話因為我啲同事簡單   咁又係嘅   之前做過一間公司   我同事真係笑騎騎放毒蛇㗎   好在我走得快   唔駛對住呢啲人 ~

講開飲茶   上次家姐同糟糟 糟媽 表姐一齊飲壽眉   咁食完之後去糟糟屋企   家姐坐車嘅時候話好想嘔   糟媽即刻問有無膠袋 ?!   之後糟糟揸得勁快就番到屋企   我覺得成個過程都好搞笑   因為糟糟一定好緊張   佢緊張個樣係超級搞笑呢   因為我以前成日整鬼佢就會見到個緊張樣   哈哈 ~

家姐一出房門就望住門口方向   我話唔係驚我驚得咁緊要呀嘛

我同家姐傾偈   佢就咪實對眼瞓   仲瞓到有鼻鼾聲   話時話   好似家姐喺度先瞓得咁林   如果得我一個   佢應該唔會咁

又咁望住門口喇   如果家姐好耐未入嚟呢   佢會走出去等家姐㗎

舖張絨毛毯   等佢無咁凍

元朗真香蛋卷   家姐話好難拎出嚟   同埋一定係斷

家姐要去何文田   所以 11 點半左右走喇   同家姐一齊去搭地鐵   傾開糟糟朋友視角   真係笑死 ~

去 AEON 超市睇下   之後去惠康買麵包買菜   之後買埋午餐就番企放低嘢   再去里奧大人公司喇 ~

栗子千層包 ($23)

去到里奧大人仲要等   因為佢同阿妹仲要出去做啲嘢   我見到阿妹講住電話入嚟又行開咗   之後我聽到佢講咗等多我哋一陣 3 次   我以為同電話中人講   點知原來係同我講呀   咁我睇緊電話   同埋話頭先見妳講電話   唔知妳收咗線   真係唔好意思 ~

同里奧大人 1 點幾食午餐   食完就同阿妹傾偈   偈完諗住走啦   點知 Melody 嚟傾   傾到 2 點幾先走呀 ~

今次生炒骨又係脆卜卜

番到屋企又執嘢   差唔多 4 點先搞掂 ~

5 點鬆啲預備晚餐   里奧大人話想早啲食完去做機再陪我睇中四   我話無問題啦   都係蒸熱啲餸之嘛 ~

是日晚餐 - 滷水燜雞下肶 + 寧夏菜心苗

滷水燜雞下肶 - 尋日燜㗎   一定入哂味   雖然就咁雞下肶好單調   但我好懶唔想加多樣嘢呀 ~

寧夏菜心苗 - 我半身諗住買半斤   但原來好少   好在最後買 1 斤咋   無買生果就想食多啲菜呢 ~

洗埋碗抖陣就去做機   今晚攰但都想郁下   所以都係做 25 分鐘 ~

開埋機洗衫就即沖涼   之後見到里奧大人   佢話要快啲沖涼陪我睇 "中年好聲音 4"   我之前話做中四喇   佢即刻幫我錄起哂   因為我好少咁鍾意睇一個節目呢 ~

睇完再玩 "上海麻雀"   但玩到 10 點 45 分都瞓覺 lu ~