蔥花蒸鯇魚 + 蒜蓉油麥菜 + 清補涼豬展湯 ( JUL-2008 )

尋日啲雨未停過   真係有啲煩   但其實又好似影響唔到我㗎喎 ~

星期日食 Tea 時間   度度都好多人   所以都係去大家樂就算喇 ~

今次我食油雞翼 + 春卷配熱奶茶    里奧大人食豬扒包配可樂   其實就唔係好飽   不過又唔想食咁多嘢 ~

食完就去百佳買餸   買咗鯇魚 + 油墨菜 + 鹵水汁 + 指天椒就走喇 ~

 
番到屋企就開機洗衫   熨衫   熨到腰骨痛   好在里奧大人幫手熨   唔係真係要分兩日呀~

尋日突然覺得自己真係要收歛下啲脾氣   事緣係咁   里奧大人知我貧血又欠鐵質   所以特登煲黑木耳加紅棗比我飲   我飲咗一啖就話唔甜嘅   里奧大人就話我上次話唔落紅糖都 OK   所以無落度   咁我話算啦   都 OK 啦   然後我就入書房整嘢   出嚟嘅時候   見到里奧大人幫我加紅糖再煲過   嗰刻好感動   同埋覺得自己好衰   煲埋比妳飲仲嘈嘈閉   好在里奧大人都頂得我住   唔係就慘喇 ~

是日晚餐 - 蔥花蒸鯇魚 + 蒜蓉油麥菜 + 清補涼豬展湯

蔥花蒸鯇魚 - 好耐無蒸魚   所以蒸完先知唔記得加大量薑絲   好在唔腥咋   其實我好鍾意食魚   但次次整親魚   包括急涷都覺得好腥   好唔想食   食完硬係覺得周身唔舒服咁   所以下次都係叫里奧大人幫手整嚟食算喇 ~

蒜蓉油麥菜 - 又係好耐無食過   求其放蒜蓉就算   因為我想用埋淥菜啲水嚟蒸魚   唔駛煩嘛 ~

清補涼豬展湯 - 里奧大人話熱氣   所以煲清補涼湯   又方便呢   唔駛洗洗切切 ~

食完沖涼   又到睇獎門人喇 ~

~~~~

今朝又落雨   再加上係星期一   咩 Mood 都無哂 lu ~

早餐食芝蛋治烘底 + 涷咖啡 ($17)   食得超趕 ~

晏晝同里奧大人去茶餐廳食 Lunch   食炒麵 + 京都排骨飯 + 涷檸茶 ($45)   食完行番公司   有適當嘅運動量   唔錯唔錯 ~

住家飯 @ 媽咪屋企 + 朱朱出院 ( JUL-2008 )

尋日放工就同里奧大人各自去銅鑼灣   因為里奧大人放 12 點   咁可以早啲去交功課嘛 ~

之後再一齊去南記食米線   我食豬腩肉小窩米線 (辣) + 兩條春卷   里奧大人食春卷魚片頭米線   再加一杯涷奶茶 ~

幾年前嘅南記真係好好味   但每食一次  水準都下降一次咁   我食呢個米線唔酸唔辣   好失望囉   但春卷就好好味喇   里奧大人就話啲米線太腍   好似淥咗好耐咁喎   以前喺糖街好好味㗎   雖然地方勁窄   食得好辛苦   但都值得   但依家地方大咗   質素差咗   可惜可惜 ~

食完之後就行 Sogo   多人到呢   好似全香港得一個 Shopping Mall 咁 ~

人真係好奇怪   越想買嘢呢   就永遠買唔到   唔想買嘅呢   就會執到筍嘢   點解咁講呢   因為無意中發現 Boss 做 Sale   里奧大人就買咗套西裝 Suit 同皮帶喇   半價喎   所以真係好抵   就係因為咁抵   所以吸引好多自由行買嘢呀   我發覺啲自由行好得意   因為個個男嘅都係買 Polo Tee   仲要係好大件喎   根本就係衣不稱身   都唔明點解要咁大件呢 ~

又試又等   用咗成個鐘頭喺 Boss 度   但又趕住出旺角接朱朱出院喎   所以要摩打腳行 Supermarket   買咗啲零食就走人喇 ~

突然好肚餓   所以買咗個 Chocolate Puff ($13)   都好好味   但我都係鍾意食 Cookie Puff 多啲 ~

之後即搭地鐵去旺角接朱朱喇   一心諗住朱朱會好高興 Fing 手 Fing 腳撲我   點知唔多彩我呀   肯定嬲我送佢去診所啦 ~

醫生話朱朱肝臟同胰臟酵素正常喇 (1,2xx)   但個肝唔好   所以貧血要食維他命丸呀   陰公 ~ 

今次埋單 4 千幾   我覺得好貴   但最緊要係朱朱無事 ~

之後打的去媽咪屋企   媽咪見到朱朱開心到震呀   之後就食飯   6 點幾咋   所以仲未肚餓   食少少算喇 ~

食完飯坐陣就走喇   因為都好攰下   番到屋企就整個撈麵比里奧大人   自己就食少少零食同埋生果 ~

~~~~

今朝 10 點起身喇   同里奧大人打的番教會附近食早餐   落雨濕濕   真係好麻煩 ~

崇拜完就去 Jusco 買黑豆漿 + Dryers + 豬𦟌   買完就走 lu ~

越棧 ( JUL-2008 )

尋日勁開心勁嘆   因為晏晝覆診   所以約媽咪 里奧大人去美心皇宮飲茶   里奧大人要上大陸   所以飲到 1 點就要走喇   而我同媽咪就飲到 2 點幾 ~

去到醫院 3 點 45 分   遲咗 15 分鐘   好在都係一個鐘頭內搞掂   感謝神   我甲狀腺正常   但仲係貧血囉 ~

臨番屋企前去街市買 3 磅龍眼 ($20) + 1 磅荔枝 ($13)   其實呢兩樣生果都無益   但好想食呀 ~

難得 5 點幾可以坐喺屋企   所以拿拿聲開機洗衫   難得呢幾日咁好太陽嘛 ~

尋晚又唔駛煮飯住   所以同里奧大人去新開嘅越棧試下   叫咗雜錦拚盆 + 牛腩片湯金邊粉   埋單 $97 唔駛加一又幾抵喎   但唔係咁好食囉   同埋無咩選擇 ~

番到屋企沖完涼再食埋里奧大人買嘅砵仔糕   又多豆又煙煙韌韌   好好味呀 ~

之後再一路食荔枝一路睇電視   勁正 ~

~~~~

尋晚瞓得好差   真係年紀大喇   食幾粒荔枝啫   燥到瞓唔着呀   所以今朝早咗少少起身   可以食炒米粉 + 咖啡   星期六真係食咩都好味過人呀 ~

老細放大假   番到菇場個個同事都吹水   當然我都唔例外啦   同一間公司出品嘛   之後 1 點準時放工 ~

車仔麵 ( JUL-2008 )

尋晚打比診所問朱朱情況...話朱朱好精神   依家吊緊鹽水同聞緊氧氣 ~

都仲係超級攰   所以都係等里奧大人放工之後買車仔麵番嚟食算喇 ~

其實想探朱朱㗎   不過護士話唔抱得朱朱   因為聞緊氧氣唔係咁好喎   所以無去囉   希望朱朱快啲出院啦 ~

前一晚瞓我勁差   所以 10 點就已經去瞓覺 lu ~

~~~~

今朝 Friday 好胃口   所以食芝蛋治烘底 + 奶茶 ($15) ~

番到菇場扮下做嘢   晏晝同媽咪飲茶   之後去覆診喇 ~

唔去唔得嘅元綠壽司 ( JUL-2008 )

尋日朱朱無啦啦唔舒服   搞到我哋一家人勁擔心 ~

都唔記得講   朱朱病都病得惡過人   點解咁講呢   因為個護士想抱起朱朱 Check 心跳時   朱朱一嘢咬個男護士   嚇到佢即刻縮手   我又尷尬   真係唔知好嬲定好笑 ~

咁尋晚打去問朱朱情況   醫生話心臟同哮喘無問題㗎喇   但肝臟同胰臟嘅酵素好高 (正常 1,000   但朱朱 3,000)   所以要留兩晚醫院落藥同吊鹽水呀 ~

家姐尋晚探朱朱   家姐問抱唔抱得朱朱   護士話唔得住   要聽埋佢講朱朱情況先可以抱   但朱朱係咁抓門   所以護士好無奈咁叫家姐抱好朱朱再聽啦   家姐話朱朱超嗲   個頭仔挨哂落家姐隻手度瞓覺呀   家姐走嗰陣時   朱朱由左邊行到右邊係咁望住家姐   好可憐呀 ~

尋日里奧大人上大陸   諗住無咁快番到屋企   所以買隻茶葉蛋醫肚   食到一半里奧大人話 20 分鐘可以番到屋企   無啦啦咁快嘅 ~

本來想食車仔麵   但里奧大人落車嘅巴士站正正係元綠門口   咁吸引   唔入唔得啦 ~

由於我食咗隻茶葉蛋有啲滯   所以只係食熟帶子壽司 / 素魚翅海蜇壽司 / 天婦羅蟹柳壽司 / 韓式螺肉壽司 / 巴黎汁焗餃子 / 辣味日式炸雞拉麵 / 芒橙樂 / 巨峰葡萄蘆薈   埋單 $148   我覺得係有史以嚟最飽係呢次 ~

食完番屋企   里奧大人就自己去做機   我就沖涼休息喇  ~

~~~~

今朝天氣非常好   但勁熱 ~

無咩胃口   所以去 KFC 食焗鬆餅 + 奶茶 ($11)   但唔好食呀 ~

尋晚瞓得唔好   番到菇場都好似夢遊咁~

晏晝同里奧大人去麥記食咗黑椒漢堡餐 (加大) + 1 個黑椒漢堡   今次黑椒汁唔夠多   薯條又唔熱   最慘係好嘈   嘈到頭痛呀 ~

叉燒燒鴨飯 @ 大家樂 + 朱朱入院 ( JUL-2008 )

尋晚我都仲係無胃口   所以里奧大人去大家樂買叉燒燒鴨飯算喇 ~

食完一陣   沖涼就瞓 lu ~

~~~~

今朝里奧大人無帶公司 Pass   好在同佢同一區   又好在我今朝遲出門口   唔係又要等同事去洗手間   佢先可以去洗手間喇 ~

好在今朝無咩胃口   買咗燒賣 + 奶茶 ($11) 番公司食   如果唔係會無時間食早餐㗎 ~

媽咪 10 點幾打嚟   話朱朱咳咗一聲之後硬哂   一抱起個身就軟 Lai Lai 唔郁   嚇到媽咪即刻打比我   我就即打的番屋企接朱朱再去寵物醫院   初步檢驗應該係心臟病發   所以要留院聞氧氣   好在無事咋   朱朱都十幾歲喇   真係好擔心㗎 ~

條街熱到呢   熱到胃口都無呀   所以晏晝唔食嘢喇   瞓覺休息 ~ 

住家飯 @ 奶奶屋企 ( JUL-2008 )

里奧大人做功課做到 7788   所以可以去奶奶屋企食飯喇 ~

今晚食炸豬扒 + 蒸魚 + 腐乳通菜 + 菜心   食完番屋企 lu   因為想睇錄咗嘅歐洲國家杯呀 ~

番到屋企即沖涼   之後就可以一路嘆龍眼一路睇波喇 ~

其實一早已經知賽果   所以都唔係用好開心嘅心情好睇   西班牙對德國 1:0   點解呀 ~

~~~~

今日 1 / 7 放假呀   同里奧大人去太興食早餐   食花生醬厚多士 + 火腿通粉餐   超飽   之後我番屋企休息喇   因為每月一到呀 ~

3 點幾里奧大人出去買 Tea   我食粟米磨菇粥   里奧大人食酸辣雲吞米線   我食完又繼續瞓喇   好在假期   瞓幾耐都得 ~