Foodeli @ 九龍灣 ( 7-NOV-2024 )

鹽酥雞肉燥飯配台灣奶茶 - 里奧大人一見到鹽酥雞   就笑笑口話平時係佢食嘅晚餐   哈哈

台灣士林香腸肉燥飯配芒果紅茶 - 里奧大人喉嚨有啲唔舒服   所以唔食炸嘢

蒜泥白肉 ($30) - 幾好味   但我覺得個紅油唔夠辣

( 7-NOV-2024  THU )

尋晚瞓瞓下又醒咗   感恩都好快瞓得番咋 ~

今朝里奧大人去買早餐   佢話驚唔記得叫啲咩   叫我 Whatsapp 比佢食啲咩   之後我話 Send 比你   但你唔記得帶電話咁點呢 ?!   佢笑住話咁都無計 ~

菇場唔忙   又 Skype 啦 ~

Lunch Time 出去行陣   依家轉咗個袋出街   但船頭話都係重   咁問我個袋裝啲咩   阿花就答佢個袋入面啲嘢好整齊   咁我話銀包重呀   阿花又話我銀包入面啲嘢好整齊   我覺得佢好搞笑呀   之後佢話有啲人喺銀包拎錢   一拎會會幾十張飛哂出嚟咁呀   不過我都好怕啲人個銀包係咁   齊整乾淨先舒服家嘛 ~   

感恩終於買到焗爐紙   買完就番菇場 lu ~

食埋個過期泡菜杯麵   阿齋話我成日買   買完又唔食   食嗰時又話唔想食   咁買嚟做咩   哈哈

唔忙又繼續 Skype   咁就好快過一日㗎喇 ~

放工同里奧大人去德福食晚餐   食完就行陣 ~ 

我問里奧大人我煮嘢幾多分 ?!   佢話 80   我話咁高嘅   我比自己 60 咋   之後佢話其實想比 60   但驚我唔開心   哈哈哈哈 ~

不過我其實都覺得煮來煮去都係嗰幾樣   我話等我體力完全回復   就會煮多啲新嘢   但唔好有期望   哈哈 ~      

見到個女仔好高   條腿又長喎   里奧大人話佢起碼 185cm 呀   我話搵男友真係有難度咯 ~

佢頭頂去到 LANEIGE 個字嘅頂部   我話我唔知到唔到黃金個嘅底部呢   里奧大人已經係度笑啦   之後我只係到 3X 個字嘅底部咋   即係高我個半頭咁滯呀

去淘大行下   點知搞肚痛   可能頭先又炸嘢又奶茶又辣呀 ~

買完嘢要去搞啲嘢   感恩好快走得 ~

一路行一路同家姐傾電話   佢問我做咩咁氣喘 ?!   佢好少咁講嘛   以為我唔舒服   我話中咗之後又長 M   未抖夠又咳到死   一路行一路講到嘢已經好好喇 ~

其實我覺得我自己行就真係行得快啲   但一講嘢或者拎住嘢   我就當堂無咩氣咁   又要變番慢慢行咁   所以之後都要出去做番運動練下氣   唔係唔掂呀 ~

  

番到屋企都 8 點半   要即沖涼   之後同里奧大人一齊睇沖哥 ~

我睇中醫有比山渣餅   里奧大人成日食哂㗎   不過我飲完中藥其實都唔駛食嘅   咁今日去零食店買包山渣粒比里奧大人   同佢講話你鍾意食   佢笑住話佢都無話鍾意食   咁又係   其實佢真係無講過鍾意食山渣餅   哈哈

睇多陣 Youtube   今晚 10 點 50 分先瞓覺 ~

綱記車仔麵 @ 紅磡 ( 6-NOV-2024 )

( 6-NOV-2024  WED )

尋晚半夜又醒醒哋   感恩好快瞓番咋 ~

今朝同里奧大人出去食早餐   雖然來來去去都係食嗰啲   但我又唔悶   可能個人好 Relax   食咩都好味咁   哈哈 ~   

唔記得飛邊   唔怪得落單嘅時候   好似笑咁一樣嘢咁啦

唔想趕車   所以食完去里奧大人公司坐陣先番工 ~

菇場唔忙   咁就要 Skype 啦 ~

家姐話留番呢兩張熊貓卡比我   但我話只係鍾意包家族嘅熊貓咋喎

糟糟去完英國   買咗手信比家姐   佢話比啲我   呵呵

Berry 女都有份   所以佢真係好錫 Berry   其實真係好感激佢   Berry 細個成日要去黃竹坑睇醫生   因為家姐嗰時好難請假   係佢主動話車埋工人一齊去睇咋        

Lunch Time 諗住蒸飯   但阿齋未蒸完   咁我話我自己蒸   佢話佢幫我蒸得啦   妳唔好成日要我咁勞氣叫妳走先得㗎   好搞笑 ~

去 759 買餅乾比里奧大人同事   又買埋比自己同家姐   所以我好怕出街   成日忍唔住要買嘢   但唔帶銀包又唔得   我個樣會好驚   咁更加會比警察見到   到時要罰錢就慘   哈哈 ~

番到菇場已經 12 點 25 分   呢個時間開飯最好 ~

桃哈多薄脆餅 ($18.9/2 件) - 好抵啦   以前 1 包要 $14   所以我即買芝麻 / 牛油多士 / 蕃薯牛油味   HERSHEY'S Rasppberry & Goji 好似幾好味   定好似之前買過   折咗只係 $15   又買 2 包慢慢食

7-11 做特價 $10/3 件又係抵   不過買完又唔係咁想食

唔忙就 Skype   咁就好快放工㗎喇 ~

今晚睇中醫   佢話我啲氣好番好多   我話我都覺   頭先行得好快呀   但佢話仍然要調理   所以下星期要再去睇呢 ~

睇完就同里奧大人出去食晚餐   今晚我想食車仔麵呀 ~

里奧大人好搞笑囉   一嚟到就比我   我仲以為係比咩嘢要咁緊張添

我食完就番屋企   里奧大人就番公司做嘢 ~

沖埋涼就休息   里奧大人 8 點幾先番到屋企   本來諗住叫佢熨 2 機衫   但佢都好攰咁   所以我熨喇   同埋今晚食到好飽   當做運動都唔錯 ~

睇多陣 Youtube   諗住 10 點 40 分瞓覺   但同里奧大人傾偈   一傾傾到 11 點 15 分呀   唔怪得我把聲拆拆哋啦   原來講咗咁耐嘢  哈哈 ~

燒汁焗雞翼 + 西蘭花 ( 5-NOV-2024 )

( 5-NOV-2024  TUE )

尋晚去咗次廁所   之後都好快瞓得番   今朝又係鬧鐘未響都醒醒哋   諗住懶下床   點知鬧鐵響 lu ~

早餐食黑岩餐包 + 丹麥條   不過丹麥條食剩半條   叫里奧大人中午食埋去 ~

里奧大人問我係咪特登倒轉   我話係呀   咁啲醬就唔會瀉哂出嚟   我再講話自己幾叻呀   咁都諗到   之後佢細細聲串串只話   食咗咁多次先諗到   仲話自己幾叻   哈哈 ~

我無拎匙更仔   所以一倒就倒咗咁多粉   仲要比里奧大人見到   佢話我做咩咁懶   依家嘥哂啲嘢

菇場唔忙   但每朝最忙就係沖蜜糖   哈哈 ~   

我以前唔鍾意飲蜜糖   但前排咳起上嚟真係要飲啲滋潤嘢   依家幾乎飲哂成樽蜜糖 lu   

咁平時家姐 WFH   佢一定影佢啲麵包早餐比我睇   今朝等到 9 點 20 分都未見   所以問佢係咪番公司 ?!   佢話係   再話 11 月係邊日先 WFH   佢以為我有嘢搵佢   我話只係掛住妳啫   同埋覺得時間過得好快   咁快就過咗個 10 月囉 ~

上次見家姐   佢突然間笑住話   佢同里奧大人生日   我都係病   我咪話囉   今年妳哋生日會好記得   因為我陪唔到佢哋食生日飯呀   哈哈 ~

阿齋傷風咳   佢特登過嚟話我傳染佢   我話咪亂講呀   我氣徜敏感咋   之後我又話番佢上次咳傳染我呀   我話我哋傳來傳去唔掂喎   佢話咁傳染比邊個好呀 ?!   我話妳自己揀   哈哈 ~

Lunch Time 蒸好飯就出去行下    行咗半個鐘就番菇場開飯喇 ~

忙咗陣就 Skype 啦   望屏幕都似做嘢嘛   哈哈 ~

放工去買雞骨草比里奧大人   依家做咗會員   所以記得就會買㗎喇 ~

番到屋企即預備晚餐   今晚食炒麵王   我以為過咗期   再睇原來 6/11 先到期   我同里奧大人講話好開心呀   佢問我係咪未過期食所以好開心 ?!   我話梗係啦   哈哈 ~

 

是日晚餐 - 燒汁焗雞翼 + 西蘭花

燒汁焗雞翼 - 無哂牛油紙又無噴油   所以無哂雞皮咁滯   雖然我都唔食   但賣相就好樣衰咁囉 ~

西蘭花 - 好耐無食喇   因為醫師叫我食深色菜   咁就買西蘭花喇 ~

洗埋碗就開機洗衫   之後沖涼休息 ~

榴槤送比里奧大人部門每人一條   咁佢一定比我嘅   初初睇相嘅時候   我以為係方包呀   哈哈   同埋呢隻黃雞好似點心麵嗰隻   下次去睇下先

又同里奧大人睇 "沖遊泰國"   無去幾年其實真係唔同哂   咁都好   到時大鄉里出城   感覺會覺得更加有新鮮感呢 ~

今晚 10 點已經好眼瞓   不過好怕半夜醒   所以頂到 10 點 25 分先瞓喇 ~

臘潤腸蒸排骨 + 脆肉瓜粒 ( 4-NOV-2024 )

( 4-NOV-2024  MON )

感恩一覺瞓天光呀   之後懶床   因為鬧鐘應該差唔多響   等響咗先起身呢 ~

早餐食黑岩餐包   今次調轉嚟焗   咁就唔會漏哂啲醬出嚟喇 ~

食完就靈修 10 分鐘   依家班車早咗好多   不過咁都好   唔駛遲到 ~

菇場忙咗陣就做自己嘢   唔錯唔錯 ~

咁我比西瓜簽嘢   之後同佢傾幾句   最後我話唔該哂拜拜   真係黐啦   拜乜鬼拜呀   講完覺得勁樣衰呀   哈哈 ~

Lunch Time 出去行陣就去食牛筋上海麵   食完去買菜   之後再行就番菇場 lu ~

里奧大人話真係好多蔥

唔忙就做自己嘢   有時一做就做到 5 點幾   所以好快就放工咁呢 ~

放工即走   今日里奧大人都番公司做嘢   所以我唔駛咁趕喇 ~

是日晚餐 - 臘潤腸蒸排骨 + 脆肉瓜粒

臘潤腸蒸排骨 - 懶人首選   每星期一次都得㗎   不過唔會成日加臘潤腸呢啲   因為食多一次就食哂 lu ~ 

脆肉瓜粒 - 因為帶飯   所以就蒸脆肉瓜喇 ~

睇東張西望   有個女人叫片皮鴨姐   咁我同里奧大人講話叫佢做排骨哥   之後我話人哋唔知以為你瘦到得鵬骨   佢笑住話佢都唔係鍾意食排骨   再話我應該叫做乳豬姐   因為我鍾意食乳豬   但我話我都鍾意食煙韌嘢喎   可以叫我做麻糬姐   哈哈 ~

洗埋碗就開機洗衫   之後沖涼休息   里奧大人就熨衫   佢熨得靚過我好多㗎 ~

自己焗過蕃薯之後   我真係鍾意食焗蕃薯多過蕃薯糖水

一齊睇旅遊節目   咁我再睇陣 Youtube   今晚 10 點半都瞓覺 lu ~

譚仔三哥 @ 紅磡 ( 3-NOV-2024 )

( 3-NOV-2024  SUN )

尋晚瞓得唔係咁好   唔知係咪夜飲中藥   個人好熱咁 ~

同里奧大人出去食早餐   咁因為今日好早食午餐   我叫吞拿魚治   老闆娘問吞拿魚定芝士吞拿魚 ?!   估唔到佢咁好記性   之前有時同里奧大人食麵餐   我哋講一次叫啲咩   佢就即去落單   係每次都無錯   真係好好記性呢 ~

食完即去里奧大人公司幫手   搞掂就陪阿妹食早餐   好似好耐無陪佢咁   哈哈 ~

今朝番崇拜   完畢就去買嘢 ~

買完就去里奧大人公司坐陣   之後就出發食午餐喇 ~

健脾山楂串串 ($13) 都幾好味   所以比一半比里奧大人   等佢請同事食

今日終於真正有胃口喇   所以好想食豬手飯 ~

有 7-8 隻鳳爪   估唔到份量咁多   所以食得好滿足呀

我以前唔鍾意食豬手飯呢啲   但成日睇 Youtuber 食豬手食得好好味咁   所以依家都唔抗拒了

食完又要去里奧大人公司幫手   不過今日主力唔係我   所以可以同阿妹傾偈   唔錯唔錯   因為好似好耐無見佢咁喇 ~

芝麻山楂好味呀   出面層冰糖芝麻好甜   但山楂就好酸   所以里奧大人問究竟係甜定酸呀   哈哈

呢兩個星期家姐幫糟糟整嘢   所以都唔得閒   咁啱我又病咗要喺屋企休息   真係好耐無見 Berry 女咁   好在家姐間唔中就會影相比我睇咋

搞掂就去聽佈導會   之後再去里奧大人公司幫手   差唔多 8 點鬆啲先走 ~

阿妹見 Pantry 有手信   所以叫埋我一齊拆   雖然好味道   但我話呢塊好似 M 巾   哈哈哈哈

我又好想食米線呀   所以去譚仔三哥呢 ~

食完就即番屋企   沖埋涼就睇 Youtube ~

我拎咗 2 件唔同嘅味道

芥辣蠶豆 ($29) / 原味甘薯捧 ($6)

今晚里奧大人都唔做公司嘢   所以陪我睇 Youtube 旅遊節目 ~

同里奧大人一齊 10 點半瞓覺   咁我話睇多陣福寶   但只係睇咗 10 秒左右就熄機   之後里奧大人話又話睇一陣福寶 ?!   我話一陣好快之嘛   同埋我其實都好眼瞓   哈哈 ~

豬扒粒炒飯 + 油麥菜 ( 2-NOV-2024 )

豬扒本身好夠味   所以唔駛加豉油調味都好好味呢   

尋晚食剩嘅西檸雞

仍都係尋晚食剩嘅黑椒牛仔骨

( 2-NOV-2024  SAT )

今朝同里奧大人 9 點自然醒   咁沖埋涼就去食早餐 lu ~

我食唔哂 1/3 個麵   咁里奧大人幫手食   丹麥多士同炒蛋同半杯凍咖啡就要打包喇

食完早餐就番屋企   難得有啲力氣   所以又執下櫃桶   估唔到一執又個幾鐘 ~

里奧大人1 點鬆啲就番工   頭先佢買咗個芝麻包   我諗住整豬扒包佢食   不過佢話太飽   所以叫我幫佢搽花生醬就得   一陣番公司先食 ~

咁我睇下 Youtube   差唔多 2 點幾再食埋午餐   食完抖陣就去里奧大人公司坐下 ~

今日有 LA 活動   見番佢哋真係好開心   里奧大人話我病咗差唔多 3 個星期   不過我其實仲未完全復原   但都 OK 嘅   最緊要唔好係咁咳呢 ~

事奉完畢就去里奧大人公司坐   差唔多 5 點就番屋企 lu ~

番到屋企整呢樣嗰樣   又睇下 Youtube   差唔多 6 點幾就預備晚餐 ~

里奧大人 8 點幾先番到屋企   叫佢食埋先沖涼 ~

是日晚餐 - 豬扒粒炒飯 + 油麥菜

豬扒粒炒飯 - 今朝食剩豬扒同炒蛋   加埋尋晚個白飯   所以整炒飯啦   里奧大人好驚訝話啲豬扒切到一粒粒   話我好辛苦   我話係㗎   所以要食哂碟飯呀   哈哈 ~

油麥菜 - 今晚點都要食   因為聽晚又唔煮呢 ~

洗埋碗就開機洗衫   之後沖涼就休息休息 ~

睇下 Youtube   今晚 11 點幾先瞓 ~

西檸雞拚生炒骨飯 + 豉汁涼瓜拚黑椒牛仔骨飯 (外賣) ( 1-NOV-2024 )

西檸雞拚生炒骨飯 - 食剩呢盒飯同埋幾件西檸雞   咁聽晚要再食

豉汁涼瓜拚黑椒牛仔骨飯 - 里奧大人熱氣   所以買涼瓜   係咁叫佢食哂去呀

好想食煙韌嘢   同埋想比里奧大人食涼粉清清熱   咁就買埋甜品   不過呢間真係最後一次   哈哈

( 1-NOV-2024  FRI )

尋晚瞓瞓下又咳   真係好怕唔斷尾嘅感覺 ~

今朝叫里奧大人買早餐   佢好鬼搞笑   次次佢去買早餐   我鬧鐘響佢就彈起身   同埋叫我瞓多陣   之後拿拿聲剃鬚沖涼洗頭   搞掂就即去買早餐   我話唔駛咁趕啦   仲有好多時間呢 ~

鴛鴦無少奶   里奧大人話成日記住唔可以買凍飲   因為我咳   佢講到咁樣   我都唔好意思話佢啦   哈哈

里奧大人送我搭車   咁啱見到阿妹   傾咗陣佢要去食早餐   依家里奧大人會望我坐邊個位置再揮手拜拜   以前佢唔會㗎   可能見到我同家姐成日係咁   久而久之就跟埋   哈哈   我哋好細個就習慣同屋企人線前會講小心啲   佢識我之後都跟埋我咁講   嗰時家姐話啲同事聽佢講小心啲   話好似啲黑社會咁叫人小心啲咁呀   好搞笑 ~

每次見有筍嘢就會同家姐講   今日麥記免費送蘋果批   我同佢講話麥當勞 50 歲呀   之後佢話係 Hello Kitty 50 歲囉   好在佢無同同事講咋   唔係就鬧鬼死我都似   哈哈 ~

菇場忙咗陣   又做自己嘢 lu ~

幾快又到 11 月呀

家姐都會寫低重要事情喺日曆度   所以我一早就影咗先

今日出位價 $99/2 盒就即話比阿花知   咁今日西瓜又唔喺度   佢 10 點就飛出去買呀   佢買 6 盒   我買 4 盒   阿齋買 2 盒   真係好在佢去買咋   晏晝應該比人賣哂 lu

Lunch Time 蒸好飯就出去屈臣氏買 4 支舒適達牙膏   因為我想要個養生壺呀   淘寶都要百幾㗎   依家買牙膏就送   仲送埋 1 Pack 茶 + 2 支豉油 + 1 包洗衣珠 + 1 Pack 牙線   本來仲有洗潔精但無哂   不過我唔要都無所謂   因為屋企有好多呀 ~

買完即番菇場食飯   時間啱啱好 ~

唔忙就做自己嘢   所以好快放工 ~

今晚睇中醫   醫師話我仍然好虛   所以要食阿膠   同埋下星期一定要再去睇 ~

里奧大人要開夜呀   所以我睇完就買飯去里奧大人公司喇 ~ 

食完都番屋企   開機洗衫就沖涼   抖多陣就熨衫 ~

7-11 做特價 ($25/2 件) HERSHEY'S 特濃朱古力流心甜筒 + 特濃朱古力杏仁雪糕批   其實之前 Circle K 就 $24/件買一送一   不過我真係覺得幾好食   所以忍唔住買每樣 2 件囉

睇下 Youtube   里奧大人 10 點幾先番到屋企   真係辛苦佢喇 ~

同里奧大人一齊睇旅遊節目   不過我 10 點 45 分都瞓覺先 lu ~