韓式燜牛肋條 + 燒汁焗雞膇 ( 7-DEC-2024 )

早餐食剩塊豬扒   我就剪開去一條條   加個冷麵一齊炒   都幾好味㗎

( 7-DEC-2024  SAT )

今朝同里奧大人一齊 7 點半起身   同佢食完早餐   我就番屋企執嘢 ~

諗住食三文治無咁飽   點知原來係厚蛋

食剩件豬扒   留番今晚再食

之前買咗好多嘢   真係一日到未執嗰日都周身唔聚財   咁啱今日家姐約咗糟糟燒嘢食   咁我可以喺屋企執嘢   因為要換季嘛   唔着嘅衫要收埋   今日又捐咗 1 袋衫   希望下年唔會有斷捨離出現啦   哈哈 ~

執呀執   執到 12 點半就搞掂   見到衣櫃整整齊齊就最開心 ~

聽陣歌又休息下   HKTVmall 終於 12 點 45 分送貨嚟   搞掂就即沖涼喇 ~

1 點幾出發去里奧大人公司   本來唔去㗎   但阿妹話佢哋有嘢整緊   咁諗住睇下有咩要幫手囉   但去到已經搞掂哂   咁等埋里奧大人處理啲 Urgent 嘢先去食 Lunch   食完再番嚟做嘢 ~

好想食濕嘢呀   所以我話去食車仔麵 ~

里奧大人話啲雲吞未熟   我問佢點解會知 ?!   佢話咬落嘅口感係唔同喎   所以我叫佢第時食雲吞同水餃   用筷子夾開一半睇下熟唔熟先食   就算係我煮都係咁話呢

食完就要去 LA 活動喇   4 點 40 分就完畢   里奧大人就啱啱放工 ~

咁我買埋湯料同排骨就番屋企   話咁快又 5 點半   係時候預備晚餐 ~

里奧大人 6 點幾番公司處理 Urgent 嘢   所以今晚差唔多 8 點先開餐 ~

是日晚餐 - 韓式燜牛肋條 + 燒汁焗雞膇

韓式燜牛肋條 - 之前喺一田買㗎   諗住整嘅時候   里奧大人又話唔想食牛肉住   咁依家就話食少少都得   咁我就拿拿聲煮喇 ~

燒汁焗雞膇 - 尋晚本身焗 8 隻   但真係食唔落   咁留番今晚食啦 ~

洗埋碗都開機洗衫   之後即刻沖涼休息喇 ~

睇下福寶又打下機   今晚遲食飯   所以想多啲時間消化   差唔多 11 點半先瞓 ~

燒汁焗雞膇拚司華力腸 + 北京炸醬炒甜豆 ( 6-DEC-2024 )

( 6-DEC-2024  FRI )

感恩瞓得都唔錯   今朝 7 點 18 分都起身 lu ~

早餐食窩夫   喺日本買㗎   朱古力味同牛油蜜糖味   兩款都係 116 Yen 咋   超級抵爆   不過賞限日期好短   所以唔會買咁多呢 ~

我一定買朱古力味   因為里奧大人好鍾意   我就食牛油蜜糖味   我覺得烘熱仲好食

菇場唔忙   可以繼續揀相 ~

Lunch Time 蒸完飯就出去買嘢   之後再行陣就番菇場開餐喇 ~

我習慣蒸飯之前會將啲飯同餸撩鬆   咁樣快啲熱嘛   但就變咗好似打風咁囉

唔忙就繼續揀相啦   老闆今日請食下午茶   食完都 4 點幾   好似話咁快又放工咁 ~

沙律好味   但雞翼比較鹹   

iEAT 買嘅金秋柿   只係 $15 咋   希望甜啦   哈哈

番到屋企即預備晚餐   今晚唔駛咁趕   仲可以燜埋餸   因為里奧大人 7 點先番到屋企   同埋今晚煮丁麵佢食   所以點都要等埋佢先煮得囉 ~

是日晚餐 - 燒汁焗雞膇拚司華力腸 + 北京炸醬炒甜豆

燒汁焗雞膇拚司華力腸 - 唔想又係得雞膇咁悶   咁就加條司華力腸啦   其實真係搵自己笨   頭先食完下午茶都好飽   依家又要食埋半條司華力腸 ~ 

北京炸醬炒甜豆 - 尋日買咗甜豆   今晚點都要煮啦   將甜豆同洋慕切粒   咁樣易入口   里奧大人唔多鍾意食甜豆   切成咁就可以一次 "北" 好多比佢食喇   哈哈 ~  

洗埋碗就開機洗衫   沖完涼就抖陣再熨 2 機衫   最搞笑里奧大人話幫我熨   我話一早熨哂啦   佢估唔到我咁快手 ~

睇陣 Youtube   今晚 11 點先瞓 ~

焗雞膇 + 北京炸醬蒸脆肉瓜粒 ( 5-DEC-2024 )

終於清埋最後 2 條鴨潤腸   依家間唔中都睇下雪櫃有啲咩   記得就即刻食㗎喇

( 5-DEC-2024  THU )

尋晚瞓得都唔錯   感恩感恩 ~

里奧大人仍然唔係咁舒服   所以唔同我食早餐   我沖埋涼就去買麵包   咁里奧大人起身食完就可以去睇醫生喇 ~

早餐食吞拿魚包   再買個餐蛋包比里奧大人 ~

菇場唔忙   我就 Load 相啦   家姐 Whatsapp 係咁叫我買嘢   不過我屋企真係好多存貨   想清哂先再買囉   我唔想幫人清貨而變咗我好多存貨呀 ~

里奧大人睇完醫生   醫生同佢講 "無事 唔駛擔心 返到香港安全哂"   我問里奧大人係咪睇嘅時候神情好緊張   所以醫生咁講 ?!   佢笑住話佢都唔緊張   唔明點解醫生叫佢唔好擔心   哈哈 ~

Lunch Time 出去買菜   咁阿齋幫我蒸飯   咁我比個飯盒佢   之後佢係咁趕我走 ~

我出去都只係 25-30 分鐘左右   咁就唔會蒸乾水   同埋感恩買嘢嘅地方唔遠   唔係就會好趕㗎喇 ~

雖然重   但鍾意一次過買哂   咁第日就可以唔駛買嘢   行下其他地方都得    

唔忙就 Load 完相   今日終於搞掂   但就要揀相   呢樣真係要比較花時間   始終同事經過見到   我唔係成日可以揀到相呢 ~

放工即走   番到屋企即預備晚餐喇   十幾日無煮飯   要啲時間適應下   哈哈 ~

里奧大人 6 點幾番到屋企   但仲未食得   所以叫佢沖涼先   今晚差唔多 6 點 45 分先開餐呀 ~

是日晚餐 - 焗雞膇 + 北京炸醬蒸脆肉瓜粒

焗雞膇 - 用黃豆醬醃都唔錯㗎   同埋想快啲清埋樽醬呀 ~

北京炸醬蒸脆肉瓜粒 - 帶飯就蒸瓜啦   加咗啲北京炸醬調味   但原來都幾鹹   我覺得用嚟炒麵都幾好食咁 ~   

洗埋碗就開機洗衫   之後沖涼休息 ~

喺日本買   只係 118 Yen 咋

我鍾意食呢啲花生零食   同埋最緊要細細包   分兩次食就最好

里奧大人話醫生紙寫鼻炎   食咗藥係好啲咁   所以 9 點幾都瞓喇 ~

我就睇 Youtube   不過今晚 10 點半都瞓 lu ~

涼瓜炒牛肉 + 錦滷咕嚕肉 (外賣) ( 4-DEC-2024 )

涼瓜炒牛肉 ($98) - 呢個又係好味道   所以其實外賣都係來來去去食嗰啲

錦滷咕嚕肉 ($88) - 連續食兩晚都未食厭   但就要停一停先   哈哈

( 4-DEC-2024  WED )

感恩一覺瞓天光呀   臨醒之前發緊夢   所以聽到鬧鐘響都諗緊係咩嘢聲音添 ~

里奧大人唔舒服   呢日要請病假休息 ~

早餐食咖央椰絲班蘭迷你吐司   無咩味道咁   成個包又好乾   完全唔好食囉 ~

菇場忙下停下   又 Load 下相再蒸埋飯   好快又到 Lunch Time 喇 ~

出去行個大圈就要番菇場食飯   因為弟兄 12 點半有嘢搵我傾   咁食完洗埋碗就啱啱好呢 ~

忙下停下又 Load 下相   話咁快放工 lu ~

今晚都係比自己抖下   所以買埋外賣先番屋企 ~

食完抖陣就沖涼   里奧大人今日開機洗衫   我熨衫就搞掂 ~

睇陣 Youtube   依家天氣涼涼哋好快眼瞓   今晚 10 點 15 分都瞓覺添呀 ~

蓮藕燜腩仔 + 錦滷咕嚕肉 (外賣) ( 3-DEC-2024 )

蓮藕燜腩仔 ($88) - 腩仔份量好少同埋好碎   但個汁就好味道

錦滷咕嚕肉 ($88) - 最鍾意食塊雲吞皮   下次仍然會叫嚟食   哈哈   同埋呢排食滯咁   想食啲酸酸咪咪嘅嘢

( 3-DEC-2024  TUE )

感恩瞓得都唔錯   如果無去到廁所就更加好呢 ~

我見里奧大人未起身   以為佢唔舒服   所以沖哂涼先叫醒佢   原來佢話鬧鐵太細聲聽唔到   仲以為我做咩咁早起身   哈哈 ~

早餐食甜餐包   里奧大人就食咖央椰絲班蘭迷你吐司   佢好驚訝咁話妳做咩食呢個包 ?!   我話尋日剩 1 個嘛   咪食埋去囉 ~

咖央椰絲班蘭迷你吐司 ($38) - 依家食包真係唔平   好在唔係一餐食得哂   哈哈

菇場唔忙就繼續 Load 相   啲相太大   所以要 Load 好耐 ~

Lunch Time 去食水餃河   之後行一陣就去買生果再去拎褲   咁就已經 12 點 40 分了   要番菇場啦 ~

咁小說唔舒服   原來係咳   但溫總同小 A 話佢唔算嚴重   話我上次咳咗好耐同好辛苦   依家我係佢哋嘅辛苦指標   哈哈 ~

唔忙繼續 Load 相   希望快啲 Load 完啦 ~

放工即走   番到屋企即開機洗衫   之後沖埋涼等食飯 ~

咁我喺廁所洗嘢嘅時候   突然聽到細路叫聲   奇怪新聞播咩新聞呢 ?!   原來係手機響 ~

里奧大人 6 點 40 分放工   叫佢買埋外賣番屋企呢 ~

食完又執下嘢   里奧大人就熨衫 ~

睇多陣 Youtube   今晚 10 點 20 分都瞓覺 lu ~

銘興山西刀削麵 @ 紅磡 ( 2-DEC-2024 )

麻辣冷拌豬軟骨刀削麵 ($55) - 麵條好煙韌呀   食過幾間刀削麵店   呢間係最好味呀

麻辣豬扒刀削麵 (酸辣湯底) ($50) - 刀削麵份量都好多   同埋仲有杯飲品   唔係職員問都唔知有飲品添呀

酸蘿蔔係自取嘅   我夾咗少少試下   之後話好好味   因為夠酸同夠爽   咁我影相嘅時候   里奧大人行咗出去   原來係再夾碟比我食呀   都幾感動㗎   諗住佢會話鍾意食就食完自己再去夾嘛   哈哈

( 2-DEC-2024  MON )

感恩瞓得唔錯   雖然去咗次廁所 ~

早餐食甜餐包搽花生醬   呢個甜餐包好實淨㗎   唔似食風   所以食完都好飽呢 ~

食完就將杯碟放喺鋅盤   去完廁所先發現無洗   我好少會咁㗎   可能呢星期習慣咗食完唔駛洗   哈哈 ~

家姐 Whatsapp 話返工啦   我話放心喎   我最鍾意番工   唔係點有錢去旅行呀   哈哈 ~

菇場忙呀   我仲黐線   Load 咗少少相先醒起要做 Report   好在咁啱 System 用唔到咋   不過無耐之後又用到   要拿拿聲做番哂呀 ~

12 月喇   呢年又係過得好快

搞掂哂都已經 11 點 35 分   蒸埋飯就可以抖下 ~

Lunch Time 出去幫里奧大人改褲   喺商場行咗幾個圈都唔見間舖頭   唔知係未開定摺埋   最後停低打比里奧大人   問佢聽日改定轉另一間改   但突然比我見到老闆娘喺我前面間舖頭   咁即搵番佢改啦   感恩感恩 ~

改完就番菇場開餐   原來都已經 12 點 10 分 lu ~

唔忙就 Load 相   之後改衣店打嚟問我今日拎唔拎條褲 ?!   原來佢話其中 1 條褲本身已經改咗尺寸   所以諗住退番錢比我   佢哋都好老實   因為其實佢唔講我都唔會知囉 ~

仍然 Load 相   不過 Load 到 5 點都要停   因為對眼好攰呀 ~

放工同里奧大人去黃埔   我話想食麵呀   所以揀咗刀削麵喇 ~

食完去 Beans 買麵包   我叫里奧大人幫我喺背囊拎個環保袋出嚟   佢以為我兩邊側袋放哂環保袋呀   我話唔駛帶咁多環保袋呀嘛   同埋其中一邊一定係放紙巾囉   方便拎嘛 ~

諗住去 AEON 買底衫   不過里奧大人話好似唔係呢啲質地   所以都係唔買   無謂浪費 ~

行多個圈就番屋企   我今晚沖完涼再執一陣嘢就可以休息   因為里奧大人今日開咗 2 機洗褸同衫   再洗埋窗簾   之後又熨埋 2 機衫   幫輕我唔少呢 ~

抖陣就食綠豆沙   里奧大人以為食剩比佢   我話係每人一碗㗎   佢話無諗過我買咁多   咁出開去就買囉   又唔係成日食 ~

睇多陣 Youtube   今晚 10 點 40 分都 lu ~

譚仔三哥 @ 紅磡 ( 1-DEC-2024 )

過橋米線 (煳辣 3 小辣)

鹹檸梳打

( 1-DEC-2024  SUN )

今朝 8 點 40 分起咗身   里奧大人仲有啲唔舒服   所以我開埋機洗衫就沖涼   再去食早餐喇 ~

咁我好少一個人去食早餐嘛   老闆娘話好少聽里奧大人唔舒服   我唔舒服就聽得多   仲話我上次失埋聲   估唔到佢仲記得   哈哈 ~

食完早餐再買個餐蛋包比里奧大人   番到屋企晾哂衫又執下嘢 ~

之前咳到無哂胃口   本身瘦咗 5 磅   再加上旅行有 2 日唔舒服無咩胃口  又瘦多 2 磅   所以今次好開心真係瘦咗番嚟呀   但其實仲係肥囉   呵呵 ~

里奧大人 10 點 15 分起身   佢話要開 2 機洗窗簾   我話無問題啦   一陣我出去就可以洗了~

坐車同家姐 Whatsapp   我話買咗朱古力比佢   但 10 月 22 日到期   佢話唔緊要㗎   佢過期都會食   但好奇怪點解機場會賣過期嘢   之後我睇番原來係我打錯咗日子呀   真係笑鬼死   好在佢無同人講咋   唔係怪錯人哋買過期嘢啦   哈哈 ~

今日事奉到 1 點 45 分   買埋綠豆沙就搭車喇 ~

差唔多 2 點半先去食午餐   食完行陣就番屋企 ~

雲耳好味又有益   所以都幾鍾意食   但唔可以食得多

百香果梳打依家要 +$10   上個月係加 $8 咋

雞翼麻辣香鍋

有 6 件單骨雞翼

其實里奧大人係咪都會叫酸菜魚   因為想我食多啲魚   始終曾經甲狀腺問題   就算自己唔煮   都會出去食魚呢

呢兩日我主力執嘢   里奧大人就主力開機洗新買嘅褸 ~

執嘢又同家姐 Whatsapp   咁我朝早話瘦咗番嚟   之後佢話唔記得問點解瘦咗 ?!   又話點解唔錄音只係打字   係咪唔舒服 ?!   我話之前咪錄咗 APT 囉   同埋如果唔舒服   我唔會傾咁耐啦    真係呢 ~

條腰開始痛喇   原來已經 7 點   咁係時候停啦   所以出去食晚餐 ~

番到屋企沖埋涼再執一陣嘢   之後同里奧大人一路食綠豆沙   一路睇 "中年好聲音"   再睇陣 Bao Family   今晚 11 點先瞓 ~