燒汁焗金沙骨 + 辣炒年糕魚餅 ( 25-MAY-2024 )

( 25-MAY-2024  SAT )

尋晚去完廁所   又係好難瞓番咁   所以唔想起身番工   哈哈 ~

里奧大人鬧鐘未響都醒   咁其實我都醒醒哋   咁等佢沖埋涼洗埋頭   我鬧鐘就啱啱響喇 ~

今朝出去食早餐   不過我有啲頭暈暈咁 ~

食完去里奧大人公司坐下   見到佢枱面有包零食   佢話係榴槤比我㗎   唔怪得放喺咁當眼位置啦   哈哈 ~

榴槤買嘅零食係比較健康   但呢個好味呀

菇場唔忙   咁就上網等放工呢 ~

放工即走   因為要去一田買嘢呀   尋日已經開始 "一田春日購物賞"   如果唔係船頭買咗嘢   我以為係下星期一先開始呀 ~

購物車要排隊   所以我只係拎個購物籃   因為我已經鎖定目標   知道自己唔係買好多嘢呢

里奧大人今日準時放工   佢話開機洗衫同熨衫   咁又好呀   我做少一樣家務嘛   咁我番到屋企放低嘢再抖下 ~

挪威 Leroy 急凍三文魚柳 ($190/2 件) - 經過凍櫃   見到幾大件同幾靚咁   所以買喇

樂淇蘋果 ($108/3 件) - 上次家姐比我食   我已經諗定一田減價就一定去買   之前最平都要 $88/2 件㗎

蘇格蘭頂級牛肋條 ($89.90) - 好似幾抵   咁買啦

向日葵 EX 洗髮露-滋潤修護 ($99/2 件) - 里奧大人之前話想買呢隻洗頭水   我成日去萬寧睇都係要 $88/支   真係好在我忍手唔買咋

差唔多 3 點先出去食下午茶   其實我都有啲餓   哈哈 ~

即炸雞肶配紅豆冰 ($40)

咖哩牛腩飯配熱奶茶 ($50)

食完去屈臣氏買嘢   感恩今日有 88 折呢   買滿 $1,300 就送架車仔   咁我就周圍睇下有咩嘢買   里奧大人就同我計數   話得 $981 咋   仲要買多 3 百幾先可以有車仔   我話我唔係想要架車仔呀   我係睇有無嘢啱買咋   之後佢都話覺得好奇怪   我已經有架戰車   做咩仲要架車仔   哈哈 ~

之後我自己再去惠康買嘢   里奧大人就番屋企先   因為佢話想瞓覺 ~

我番到屋企都要抖下呀   今日好似撲咗成日咁   哈哈 ~

目清素強效版 40 粒 ($939/3 盒) - 公價但有 88 折就抵   仲要送個保溫杯

京都念慈奄積熱清 ($56.90/盒) & 白髮染泡沫 6 棕黑色 ($62)

惠康買嘅新紀元雞蛋-啡蛋 ($40/2 排) & 五香肉丁 ($50/6 罐) - 收銀姨姨話五香肉丁好抵   佢自己都買咗 12 罐

里奧大人 5 點要起身   因為今晚一齊番崇拜呢 ~

崇拜完畢就番屋企煮飯   里奧大人就要番公司做嘢 ~

里奧大人 8 點幾先番到屋企   好在我啱啱煮好個泡菜湯麵   佢番嚟就即刻有得食 ~

是日懶餐 - 燒汁焗金沙骨 + 辣炒年糕魚餅

燒汁焗金沙骨 - 完全唔記得之前醃咗金沙骨囉   好奇怪點解雪櫃有個玻璃盒   所以今晚點都要煮埋去喇 ~

辣炒年糕魚餅 - 之前喺 360 買㗎   做緊特價只係 $26   見係不倒翁牌子就試下啦   不過個汁唔辣嘅   等我仲買咗 2 包添 ~

洗埋碗就沖涼   夜食飯啲時間真係唔好用   哈哈 ~

睇下 Youtube 好快又到 10 點 45 分   係時候瞓覺喇 ~

廿一堂 @ 樂富 ( 24-MAY-2024 )

牛肉壽喜湯 ($88) - 有娃娃菜 + 粟米 + 金菇 + 冬菇 + 蟹捧 + 芝士竹輪 + 年糕福袋 + 日本山形米飯

今餐食得好滿足呀   開心開心

唐揚雞配日式咖哩讚岐烏冬 ($82) - 里奧大人鍾意食咖哩烏冬   我揀咗大福比佢   佢話唔好味道

唐揚雞都幾好味

( 24-MAY-2024  FRI )

尋晚半夜去完廁所   感恩好快瞓得番   今朝鬧鐘未響都醒 lu ~

今朝問里奧大人   尋晚係真係餓想食糖水   定係想買比我食 ?!   佢話係想買比我食   我都覺得係㗎喇   佢真係好少會話唔飽食糖水囉   除非講明係唔食咁飽   留肚食糖水   咁我就信佢喇   哈哈 ~

早餐食芝士沙律條   今次無咩芝士味噃 ~

菇場忙咗陣   之後又 Skype 喇 ~

Lunch Time 落大雨   不過都照出去買 Lunch   因為好想食豬軟骨酸辣米線呀 ~

食完已經 12 點 40 分   嗰下勁想瞓覺呀   味精重得滯呢   好在同船頭佢哋傾開偈   佢比咗紅茶包比我   我都即刻沖嚟飲喇 ~

唔忙就 Skype 啦   今晚放工要即走   因為同里奧大人去醫院探婆婆呀 ~

合桃扭扭 ($18/3 個) - 因為婆婆係食免治餐   我見工人拻起上嚟都好似有啲硬    所以比婆婆試咗 1 啖就算喇   最後叫工人拎番企食   其實尋晚見到婆婆食蛋撻   咁我就想買啲甜嘢   婆婆鍾意食蘋果批   不過我呢頭無 A1 囉   我話等佢出院先同佢飲茶再買蘋果批比佢食啦 

同里奧大人喺樂富地鐵站出口集合   咁啱大家同步落車   咁就好喇   我唔駛周圍搵出口   哈哈 ~

6 點 10 分到醫院   我一出 Lift 有人叫我   原來係婆婆工人   之後帶我哋去婆婆床位   感恩見到婆婆精神都好好 ~

工人話婆婆同細舅父飲茶之後話頭暈   所以即入院   之後話係貧血要住院幾日 ~

大食尋晚話婆婆入院   貧血指數係 7    即係同我以前一樣囉   但正常係 13   嗰時我就要食鐵丸就可以去到 9   不過唔知婆婆係咪咁呢   始終要醫生話事 ~

差唔多 7 點走人   里奧大人去 Counter 搵姑娘   因為想知婆婆嘅情況   但 Follow 婆婆嘅姑娘要 7 點鬆啲先番   咁我哋話等埋佢先走 ~

咁我哋再入番病房   無耐就姑娘入嚟搵我哋   咁一齊出去傾喇 ~

因為想知貧血嘅原因   要深入知道就要照胃鏡同腸鏡   但舅父阿姨佢哋反對   因為婆婆年紀好大嘛   呢樣姑娘都認同 ~

原來婆婆已經輸咗 1 包血   同埋食血壓藥令到婆婆暈   所以已經停食 ~

姑娘真係超級好人   講解得非常清楚   當中仲有講有笑 ~

聽完再睇下婆婆   因為佢頭先用張被蓋住個頭   我估可能開住燈瞓唔到   後尾姑娘又入埋嚟   仲話個孫女嚟咗   但姑娘唔知道我哋其實係要走呀   哈哈 ~

其實都好感激里奧大人咁主動話要知婆婆情況   因為佢頭先問我話見唔見姑娘 ?!   我好平淡話未必見到   同埋我覺得婆婆情況唔係咁嚴重嘛   但嗰時媽咪入院   我就一定每晚搵姑娘   始終媽媽心臟肺腎都有問題   我係擔心好多呢 ~

探完都 7 點半   咁直接去樂富廣場搵食   見到有間食壽喜鍋   我話要去食呀   因為我想打邊爐好耐啦 ~

食完都走喇   如果唔係要開機洗衫   我都想行陣商場   哈哈 ~

番到屋企即開機洗衫就即沖涼   之後熨 2 機衫   估唔到半個鐘頭搞掂 ~

睇陣福寶   再望個鐘原來已經 11 點 10 分   係時間瞓覺喇 ~

韭菜水餃餐 + 招牌鍋貼餐 (外賣) ( 23-MAY-2024 )

里奧大人飲暖豆漿   我就飲紫菜鱈魚丸湯   估唔到係熱辣辣   飲完成個身暖哂真係好舒服   

( 23-MAY-2024  WED )

感恩一覺瞓天光呀   又係鬧鐘未響都醒   不過我仍然會等到鬧鐘響先起身呢 ~

早餐食丹麥條   今次真係 1 條 Share 食就夠喇   其實次次每人食 1 條   食到太飽好辛苦囉 ~

菇場唔忙   可以做下自己嘢同 Skype ~

Lunch Time 出去行下再去食墨魚丸上海麵   食完又行下先番菇場 ~

頭先去萬寧睇 Vaseline Cream    記得家姐工人都係買呢款   所以叫工人幫我買呀   本身已經平一半   依家仲買 2 送 1   咁工人都好好   因為要買 5 支先夠 1 Kg   但我話用唔哂啦   所以佢話佢幫手要 ~

我同家姐講話如果第時工人唔做   都要同佢保持聯絡呀   因為工人係寄去佢印尼屋企再寄香港嘅印尼店嘛   之後寄完再去印尼店拎   家姐話都唔識去印尼店咁點拎呀 ?!   我哋 3 個就喺度大笑   咁我話下次跟埋工人去拎咪得囉   哈哈 ~

唔忙又繼續 Skype   始終望電腦好過望手機嘛 ~

放工即走   買埋晚餐先番屋企 ~

食完就要去搞啲嘢   之後里奧大人話頭先唔夠飽   所以買糖水番食喎 ~

沖埋涼就食糖水   真係好好味   不過食埋呢次要停一停喇 ~

地瓜綜合凍 ($33) (芋園+地瓜+仙草凍+抹茶凍+紅豆+綠豆+珍珠) - 里奧大人講咗幾次話食地瓜   所以我叫佢買呢個喇

芋圓抹茶 6 號 ($28) (+$3 粉粿) (芋園+抹茶凍+小丸子+珍珠+西米)

里奧大人記得我鍾意食粉粿   但佢又叫咗地瓜   所以係都要我加粉粿

我都係覺得蕃薯要熱食好啲   哈哈

睇陣福寶   今晚 11 點先瞓 ~

燒肉拚叉燒飯 & 煎釀三寶 (外賣) ( 22-MAY-2024 )

一盒飯可以分兩餐真係唔錯   有時諗午餐食咩都好煩㗎

買咗 8 件煎釀三寶   咁今晚可以當係餸   哈哈

( 22-MAY-2024  WED )

尋晚半夜醒咗   之後仲要好難先瞓得番添呀 ~

本來今朝焗麵包食   但最後都係決定出去食早餐   因為我要飲杯提神咖啡呢 ~

菇場忙呀   溫總無啦啦問我食早餐未 ?!   我話食咗喇   佢話我好勤力喺屋企整早餐   我話食麵包之嘛   佢以為我係整蛋治呢啲呀   我話邊會咁得閒呀   開焗爐真係已經係極限啦 ~

我成日話 Berry 背住家姐咁瞓好得意   之後家姐每次見到咁就會影張相比我睇   哈哈

Lunch Time 出去行陣   之後買埋薑比里奧大人   就再買腸粉番菇場慢慢食 ~

呢包係 1 磅嘅話梅薑

仍然忙呀   但 4 點幾可以抖下   因為要食下午茶   係阿花之前春茗仲大獎   今日難得公司齊人   所以就請啦 ~

家姐話好少會有沙律同埋薯條一齊   我話因為同同事 Share 咋   哈哈

其實本來雞翼無得配沙律   因為沙律配哂比雞肶   咁雞翼只能配薯條   不過我好好彩   我個名排好前   所以得我一份雞翼配到沙律咋   咁我同溫總 Share 啦   佢想食沙律呀 ~

放工即走   咁我唔駛食晚餐嘛   但要買埋晚餐比里奧大人先番屋企呢 ~

食完抖陣就番教會   今晚完畢又有小食會   開心開心 ~

Brownie - 呢個超級好味呀

紅豆糕 - 唔甜㗎   我鍾意食甜甜哋多啲

餐蛋蟹柳三文治 - 我話係爆餡三文治   真係食一件都夠哂飽

番到屋企都 9 點幾   要即沖涼喇 ~

睇陣 Youtube   今晚 11 點幾先有睡意呀   可能頭先飲咗幾啖茶呢 ~

沙爹皇 XO 醬炒蝦卷 + 蠔油菜心苗 ( 21-MAY-2024 )

( 21-MAY-2024  TUE )

感恩又一覺瞓天光呀   醒咗無耐   鬧鐘就響 ~

早餐仍然食提子吐司   我都係鍾意 MAMA 口感多啲 ~

菇場忙下停下   好快又 11 點 45 分喇 ~

家姐無啦啦  Ｗhatsapp 問我呢對龍鳳鈪係咪我 ?!   因為佢本身係無嘅   咁可能我之前擺咗喺佢度啦   不過我話唔要比埋佢喇

Lunch Time 出去食墨魚丸米線   因為好想食啲酸酸辣辣嘢呀   食完都 12 點 20 分   行咗陣一田再買麵包   之後都番菇場 lu ~

又突然忙呀   好在個幾鐘搞掂 ~

放工即走   番到屋企就預備晚餐 ~

是日晚餐 - 沙爹皇 XO 醬炒蝦卷 + 蠔油菜心苗

沙爹皇 XO 醬炒蝦卷 - 里奧大人話好香呀   好在呢個餸超級易整   間唔中整比佢食都得   哈哈 ~

蠔油菜心苗 - 終於清埋半斤菜   依家真係醒喇   唔會為平兩蚊雞買 2 斤菜   真係唔想一星期食 4 餐同樣嘅菜呀 ~

洗埋碗就開機洗衫   之後沖涼休息 ~

睇完電視再睇 Youtube   今晚 10 點半都瞓覺 lu ~

燒汁焗雞膇拚蜜糖腸 + 蠔油菜心苗 ( 20-MAY-2024 )

 

( 20-MAY-2024  MON )

感恩一覺瞓天光呀   瞓到 7 點 26 分起身   好奇怪點解鬧鐘唔響   後尾先醒起星期一係 7 點 40 分起身添 ~

早餐食提子吐司   但好奇怪有提子乾囉   因為我本身買原味吐司   但家姐叫我買豆吐司家嘛 ~

家姐今朝食乳酪乾果麥皮吐司盒   佢買嚟同同事一齊 Share 食   仲話 $27 兩個人食好抵食添   不過佢同事又係超級鍾意食麵包   咁就啱哂啦

菇場超級勁忙呀   直頭做到腦閉塞   咁明明做開嘅嘢居然唔記得   咁問阿虫啦   佢話星期一係咁   哈哈 ~

Lunch Time 落雨呀   但都要出去抖抖氣   行陣就去食鯪魚球上海麵   食完去買菜同去萬寧買剃鬚刀片   咁之後再行多陣先番菇場   溫總見我咁耐先番上嚟覺得好愕然   因為諗住我落雨唔會行咁耐呢   哈哈 ~

仍然忙呀   差唔多 3 點就搞掂   可以 Skype 到放工喇 ~

番到屋企都即預備晚餐

是日晚餐 - 燒汁焗雞膇拚蜜糖腸 + 蠔油菜心苗

燒汁焗雞膇拚蜜糖腸- 之前買咗 8 樽燒汁   估唔到咁快食完   不過呢啲燒汁真係買多啲都無妨   因為諗唔到煮咩   就會燒汁焗乜乜   燒汁焗物物   哈哈 ~

蠔油菜心苗 - 加咗蠔油   里奧大人真係食多咗菜 ~

洗埋碗就沖涼   里奧大人就熨衫   唔知係咪尋日拎咗重嘢   今日手臂好痛呀 ~

原價 $439.9 有 85 折再 94 折   即係 $351   里奧大人話算抵㗎喇

睇 "家族榮耀之繼承者" 再睇陣福寶   今晚 10 點 10 分都瞓覺喇   本來 9 點 50 分已經想瞓   但又好似太早咁 ~