百樂金宴國際宴會廳 @ 九龍灣 ( 27-JAN-2025 )

西蘭花炒帶子 ($158) - 芡汁好味呀   自己整到就好喇

鮮果咕嚕肉 ($108) - 今次整得好味呀   係外脆內嫩呀   之後兒甥仔個仔話想再食   所以再叫多碟   但食剩一半   咁就我要啦

冰梅欖角骨 ($108)

沙拉蝦球 ($128)

上湯瑤柱煲時菜 $98

好似係南乳齋煲

霸王雞 1 隻   要食就一定要食蒸嘅雞   其實里奧大人叫佢哋唔好食   不過佢哋話想食就算啦

瑤柱蛋白炒飯

( 27-JAN-2025  MON )

呢排半夜都比里奧大人鼻鼾聲嘈醒   所以尋晚要戴耳塞喇 ~

臨起身之前又係咁發夢   起身嗰下會記得   但之後就唔記得 lu ~

早餐食煙肉芝士迷你酥 + 金不文芝士迷你酥 + 蝦明太子麻糬波波球   個朱古力麻糬波波球就係里奧大人食嘅   其實仲焗咗 2 個迷你酥比佢   不過會叫佢食嘅時候再焗熱呢 ~

家姐話比我試下   咁我見無辣就要啦   今朝先發現原來係無辣不歡呀   哈哈

菇場忙咗一陣就做自己嘢   所以好快好快就到 11 點 45 分 ~

Lunch Time 出去買動物餅比兒甥仔個仔   之後再行多陣就番菇場開飯喇 ~

唔忙就繼續做自己嘢   又係好快到放工 ~

今晚同九龍幫姑奶們食團年飯   本來去到巴士站等 3 分鐘就有車   不過我唔想太早去到   之後打比里奧大人   原來佢都仲未上車   所以我話等埋佢班車一齊去呀 ~

我哋 6 點 15 分都到   今晚兒甥仔唔得閒嚟   所以得我哋 8 位勇士到   哈哈哈哈 ~

九龍幫姑奶們差唔多 6 點 40 分都到齊   咁可以叫餸喇 ~

兒甥仔個仔話鍾意食呢包動物餅呀   我最開心   哈哈

食下傾下   好快又 8 點幾   係時候走人喇 ~

番到屋企都已經 9 點   但都叫里奧大人幫我染髮呀 ~

里奧大人沖完涼就熨衫   之後我沖完涼見到洗衣機開咗   原來里奧大人開機洗衫   我話咁夜洗衫 ?!   佢話睇錯時間 9 點 48 分以為係 8 點 48 分呀 ~

我叫水姑幫我買嘅喉糖

仲有蜜糖

水姑買比我哋嘅煙鴨胸

同里奧大人一齊睇 "富貴千團"   估唔到幾好睇喎 ~

之後再睇陣 Youtube   今晚 11 點 15 分先瞓

椰菜炒雞絲 ( 26-JAN-2025 )

( 26-JAN-2025  SUN )

今朝 7 點起身   我出門口嘅時候同里奧大人講 Bye Bye   佢好愕然問我去邊 ?!   我話去家姐屋企呀   佢話以為我陪佢去食早餐   之後我醒起無同到佢講今朝去家姐屋企添 ~

一落車就收到家姐電話   佢叫我望對面條馬路   原來佢同工人一齊同 Berry 行街   之後家姐話今朝唔知醒   瞓到 7 點 15 分先起身呀 ~

Berry 唔知我喺佢前面   但我戴住頂帽再轉頭望佢   佢個身已經開始震哂   之後我再望   佢就衝過嚟呀 ~

家姐話頭先工人叫家姐拎住個袋   佢要準備   家姐聽到一頭霧水   原來佢知道 Berry 一見到我就即衝埋嚟呀   哈哈 ~

Berry 想跟家姐但又唔行去   咁我行前兩步佢又跟住行  之後工人話 Berry 好頭暈   因為唔知跟邊個好   我覺得工人真係好搞笑   講嘢十足似香港人咁

緊張樣

番屋企放低 Berry 就去飲茶   如果可以帶埋 Berry 去就好喇   哈哈 ~

我話想食燒腩卷呀

山竹牛肉球

鴛鴦燒賣皇

鮮蝦腐皮卷   一定要蘸喼汁先好食

姐夫食鳳爪排骨飯   其實好細碗   見佢有番胃口食嘢就好喇   因為咳真係好辛苦囉

家姐好搞笑   佢同糟糟傾緊電話   我想拎張單睇下之嘛   佢好驚我又比錢咁   係都唔比我睇   我話我都講咗請一餐黐幾餐啦   放心喎   呵呵 ~

同家姐去 360 買茶包   之後再去 A1 買麵包   買完即番屋企喇   頭先落咗場毛毛雨   即刻凍咗好多呀 ~

我頭先同家姐講話要買麵包   佢好開心話好呀   我以為又有咩比我   之後佢話有張 $5 Coupon   但要買滿 $50 先用到   咁無問題啦   我就係想買迷你酥呢 ~

$50/12 pcs 再 95 折減 $5   只係 $40 咋   平咗十蚊雞好開心呀   哈哈

家姐一入屋就拎盒米比我   搞掂又分啲新年食品比我   我話唔駛咁急喎   但佢話驚一陣唔記得 ~

Berry 撲完我就會跳上梳化   之後就會用咁嘅衰眼望我

之後就會望前面   唔會再望我

阿莊嚟家姐屋企幫手插花   我問 Berry 唔驚佢喇 ?!   家姐話一樣係咁驚呀   我同里奧大人講咗 Berry 女嚇到瀨紙   之後里奧大人話 Berry 都驚佢   但同佢玩熟咗先唔驚   所以佢成日話 Berry 係神經狗   哈哈

除咗啫喱糖   其他都係糟糟去買嘅

我要 12 粒鳥結糖   少少紅瓜子黑瓜子同埋開心果   啫喱糖就要一粒試下   我拎瓜子嘅時候   家姐以為我玩呀   因為我只拎咗廿粒左右嘛   哈哈

家姐尋朝 9 點 54 分 Whatsapp 比我睇茶包啲相   咁啱我兩分鐘後開手機   咁即打番比家姐啦   原來家姐話好緊張呀   唔知打唔打比我好   因為兩次朝旱打比我   我都無取消飛線   所以里奧大人聽電話   佢好驚嘈醒里奧大人呀   之後話諗住用 Whatsapp 打比我㗎喇   點知我就打比佢   我話估唔到妳記得我想買呢盒茶包喎   佢話記得呀   仲姐話今朝番咗 4 盒貨   所以幫我買 3 盒喇

原來家姐鍾意食 NEWYORK PERFECT CHEESE 脆餅   不過我叫一次食一條好喇   因為食一條都好滯下

恆生嘅利是封好得意呀   咁我拎 1 張滙豐嘅出嚟影啦   之後家姐係兩封咁擺㗎   哈哈

家姐喺糟糟屋企抽到嘅聖誕禮物   包糖好得意呀

終於可以坐定定傾下偈   但越坐越凍   好在有 Berry 女可以攬下   不過攬多兩攬就會逃跑囉 ~

Berry 坐我哋中間   咁就夠哂暖啦

家姐之後去拎嘢   佢都繼續陪我   咁就乖喇

我成日話呢張枱好好用   哈哈哈哈

見佢唔郁   所以用自拍影佢   原來佢好眼瞓   哈哈

傾呢樣傾嗰樣   眨下眼又12 點幾   我要走喇   所以家姐同 Berry 送我去搭車 ~

買埋午餐就去里奧大人公司   食完就要番屋企   因為約咗小羊搞啲嘢   不過今次好快手   差唔多 20 分鐘就搞掂 ~

京都骨飯   酸酸咪咪勁好味

諗住好攰要瞓晏覺   但估唔到又唔駛喎   所以就開機洗衫同熨衫喇 ~

里奧大人 4 點先正式開會   感恩今晚 5 點 50 分番到屋企   真係無咩幾何咁早呢   好在我 5 點左右開始預備晚餐呢 ~

是日晚餐 - 椰菜炒雞絲

椰菜炒雞絲 - 1 個椰菜 + 大半隻雞   我加咗薑蓉同蝦米一齊炒   里奧大人話好味道呀 ~

洗埋碗就即沖涼   之後同里奧大人一齊睇 "中年好聲音" ~

里奧大人話試下蝴蝶酥

叫佢試埋杏仁條   我完全唔記得比佢食呀   哈哈

里奧大人飲咗啤酒 10 點瞓   我都 10 點 23 分瞓覺 lu ~

招牌豉油雞 (外賣) + 超甜粟米 ( 25-JAN-2025 )

( 25-JAN-2025  SAT )

今朝 9 點半要起身喇   里奧大人食完早餐要番公司處理 Urgent 嘢   本來佢番晏畫呢   不過我早起都無問題   因為我都想大清潔屋企呀 ~

我一起身已經放哂衫入洗衣機   臨走之前仲話開咗機洗衫   所以食完要番屋企晾衫再拎戰車   點知原來我無開機   真係論鬼盡   不過咁都好   一陣直接拎戰車去買嘢算 lu ~

我哋想坐卡位   咁啱有個女人已經拎錢出嚟埋單   但仲未飲完杯飲品   之後我都過去坐低先啦   估唔到後面張枱個女人係咁叫我坐埋去   話佢走㗎喇 ~

落完單見到里奧大人同人打招呼   我以為同事   但原來係佢個客   佢入嚟問里奧大人方唔方便傾兩句 ?!   其實本來諗住我出去等下   始終 Confidential 嘛   之後咁里奧大人話出去傾吖 ~

我已經慢慢食   佢哋傾到我食到 2/3 先番入嚟呀   無諗過傾咁耐囉 ~

食完就跟里奧大人番公司坐陣   之後拎架戰車   再同阿妹傾陣偈都走 lu ~

去 360 買咗 12 支檸檬汁   買完再去成興隆買凍肉   最後買埋豉油雞同粟米就即番屋企 ~

又無豚肉   所以求其買牛梅花用算喇

我鍾意將啲凍肉分類   因為冰咗好難解體

特登買 1 隻㗎   咁可以留番聽晚再食

放好哂啲嘢就大清潔屋企   其實未搞掂   但見已經 2 點半   所以即刻沖涼再買午餐比里奧大人喇 ~

食完又已經 4 點   拿拿聲拎埋啲衫去捐   搞掂就即刻番屋企繼續大清潔 ~

好在有戰車   咁我就唔駛行兩轉

清潔完就開機洗衫同埋熨衫   搞掂就同去里奧大人坐陣   估唔到見到榴槤   又可以同佢傾下偈 ~

榴槤又請我食零食   仲叫我補補身   好搞笑

我又買番包零食比佢先   因為見到明太子味道係期間限定呀

今晚同里奧大人一齊番崇拜   崇拜完畢就番屋企預備晚餐 ~

今晚里奧大人 8 點半先番到屋企   好在今晚只係淥米粉比佢咋 ~

是日晚餐 - 招牌豉油雞 (外賣) + 超甜粟米

招牌豉油雞 (外賣) - 我自己剪開一件件先再蒸熱   但雞肶太厚肉就唔剪 lu ~

超甜粟米 - 好在買咗粟米   話哂唔駛浸嘛   慳番好多時間㗎 ~

洗埋碗就沖涼休息   今晚睇 Youtube 睇到 11 點 15 分先瞓   因為想比多啲時間消化呀   哈哈 ~