咖哩雞絲意粉 + 超甜粟米 ( 25-APR-2025 )

( 25-APR-2025  FRI )

感恩尋晚瞓得都唔錯   又係 6 點半醒醒哋咁   不過我都繼續瞓到 7 點 25 分先起身 ~

早餐食芝士條   里奧大人今日番晏   所以都係焗熱麵包就算喇   同埋知道今日會落雨   唔想出去買麵包呀 ~

菇場唔忙   咁就好喇 ~

Lunch Time 蒸好飯就出去一田超市行下   行咗 20 分鐘就番菇場開餐喇 ~

唔忙繼續做自己嘢   阿怪又發顛   小說放低啲嘢比佢   佢好大聲話咩嘢嚟㗎 ?!   小說叫佢自己睇下   之後佢又係咁大力放文具   真係有病   做得咁唔開心就遲職唔好做啦   唔好成日做埋啲嘢影響到人嘛 ~

放工買埋雞骨草比里奧大人就番屋企   今晚晚餐好簡單   所以 6 點半就可以開餐喇 ~

是日晚餐 - 咖哩雞絲意粉 + 超甜粟米

咖哩雞絲意粉 - 之前買咗好多盒咖哩醬   真係要用下喇   不過今晚無咩胃口   食剩大半碟呀   咁要留番聽日食 lu ~

超甜粟米 - 終於食哂   又要停一陣先再買嚟食呢 ~

洗埋碗抖陣就同里奧大人出去搞啲嘢   感恩好快搞掂就番屋企喇 ~

開埋機洗衫就沖涼   里奧大人就熨衫 ~

今晚仍然睇 "軍檢察官多佰曼"   終於睇到第 3 集   睇到 11 點 15 分先瞓 ~

山藥蒸排骨 + 走地雞 + 碗豆苗 ( 24-APR-2025 )

( 24-APR-2025  THU )

尋晚瞓得好差呀   可能食咗薯條熱氣   仲要係咁發夢   好在唔係惡夢咋 ~

本來今朝里奧大人早啲起身買早餐番屋企食   但我鬧鐘響咗   佢仲仍然瞓緊   之後佢起身   我話今朝出去食呀   要飲番杯提神咖啡呢 ~

食完就去里奧大人公司坐陣   估唔到見到夠妹   咁傾多陣偈先番工 ~

菇場 3D   實在難得呢 ~

Lunch Time 出去行陣再買菜   之後買埋盒兩餸飯就番菇場喇 ~

支竹蘿蔔牛腩就好味   咕嚕骨就唔掂喇   不過啲餸完全唔熱   好在要少飯咋   唔係食得仲辛苦   哈哈

唔忙繼續做自己嘢   但食完個午餐就唔係咁舒服咁   可能太滯呀 ~

放工即走   番到屋企都即刻預備晚餐 lu ~

我同里奧大人講話阿怪去比利時   里奧大人話咁奇怪 ?!   我話去比利時有幾奇怪呀 ?!   佢話聽到我話阿怪派利是呀   哈哈   咁我講得細聲   個發音又係幾似嘅   哈哈 ~

是日晚餐 - 山藥蒸排骨 + 走地雞 + 碗豆苗

山藥蒸排骨 - 加咗辣豆辣嚟蒸  咁就惹味好多喇 ~

走地雞 - 姑奶去完惠州   今日特登拎半隻雞比里奧大人   咁今晚都蒸嚟食喇   因為係喺冰格拎出嚟   我唔想又擺番入冰格呀   不過食咗好少   我就拻絲留番聽晚煮意粉呢 ~

碗豆苗 - 加幾隻即食嘅燒汁鮑魚   但啲汁係辣辣哋㗎 ~

洗埋碗就煮蕃薯糖水   搞掂就即沖涼休息喇 ~

同里奧大人睇 "軍檢察官多佰曼"   睇咗 1 集都幾好睇   睇完就睇少少 "慶餘年 2"    之後再睇陣 Youtube   睇到 11 點 10 分先瞓 ~

脆辣雞腿包套餐 (外賣) ( 23-APR-2025 )

買咗 3 條粟米   所以今晚食 1 條先

( 23-APR-2025  WED )

一覺瞓到天光但又其實可以再瞓   之後望下個鐘只係 6 點半   咁就更加要瞓啦 ~

今朝去買麵包   其實之前買有餡包再焗熱   咁依家覺得不如直接去買好過   來回只係 5 分鐘   最正係要唔駛洗烤盤嘛   哈哈 ~

早餐食吞拿魚包 + 茄汁薄餅   啱啱新鮮出爐㗎 ~

我同里奧大人講話運動員個名係咪叫大坂直美女呀 ?!   之後再睇多轉   里奧大人話係大阪直美 女單網球賽呀   哈哈   無計啦   朝早個腦都未清醒嘛

菇場唔忙   又做下自己嘢先 ~

Lunch Time 出去行陣再去食水餃河   好耐無食喇   覺得好好味道   哈哈 ~

食完再去買菜   之後再行一陣就番菇場 lu   今日都好熱下   嚟緊都應該行商場算喇 ~

好似幾好味咁   同埋見到只係 $20   所以買嚟同船頭 Share 食

唔忙就做自己嘢啦   咁啲時間就會過得好快㗎喇 ~

放工即走   今晚要清埋麥當勞 Coupon   所以我番到屋企可以開機洗衫   之後等里奧大人買外賣番嚟食喇 ~

依家想朝早買麵包番屋企食   咁里奧大人問聽朝想食咩 ?!   我話晏啲同佢傾   佢笑住話咁認真要開會傾食咩   哈哈 ~

食完抖陣就去行公園   里奧大人就熨衫 ~

沖埋涼再睇陣 Youtube   今晚 10 點 45 分瞓覺 lu ~

梅菜蒸排骨 + 菜心苗 ( 22-APR-2025 )

( 22-APR-2025  TUE )

尋晚瞓到半夜發惡夢呀   有個細路女成日喺度笑呀   嚇到我叫媽咪救我   同埋捲實張被   但當然又係點大叫都出唔到聲啦   我係叫咗好耐好耐呀   之後感覺到自己醒咗   我見到里奧大人隻手喺我前面揚一揚   咁應該係大叫嘈醒咗佢   我繼續瞓番但佢唔想再整醒我 ~

感恩起身都精神呀   里奧大人話我尋晚嗚嗚聲大叫呀   佢拍咗我幾下都無反應   之後話我好多時睇完啲血腥片同埋緊張嘅片就係咁   好在睇埋今晚就睇完   哈哈 ~

早餐食菠蘿豆沙包 + 菠蘿椰絲包   今朝就唔食啲豆沙喇   始終咁早食太甜唔係咁好呢 ~

菇場忙下停下   咁就最開心啦 ~

Lunch Time 蒸完飯就出去行下   買咗超甜粟米同辣菜脯   之後又買乾蔥同蒜頭   加加埋埋好鬼重呀   所以買完即番菇場開餐喇 ~

唔忙又做自己嘢   唔覺唔覺就放工 lu ~

今晚搭快車   車程只係用咗 5 分鐘   真係第一次咁快咋   咁可以慢慢煮嘢喇 ~

是日晚餐 - 梅菜蒸排骨 + 菜心苗

梅菜蒸排骨 - 今次真係整得好好味呀   同埋見到里奧大人食飯食得好快   就知道好味道㗎喇   無咩幾何咁樣嘛   哈哈 ~

菜心苗 - 終於食哂   我覺得呢排又開始唔係咁鍾意食菜咁 ~

洗埋碗就煮蕃薯糖水   搞掂就沖涼喇 ~

里奧大人笑笑口問今晚係咪食蕃薯糖水 ?!   我話唔係喎   之後再問佢係咪想食 ?!   佢話係呀   咁我煮啦   難得話想食

今晚睇埋 "來自地獄的法官" 最後 2 集喇   10 點唔夠都睇完   但今晚好攰咁   所以 10 點 25 分都瞓覺 lu ~

黑椒牛扒 (外賣) + 烤汁雞翼 (外賣) + 菜心苗 ( 21-APR-2025 )

( 21-APR-2025  MON )

今朝瞓到 9 點 45 分自然醒   咁沖埋涼就去食早餐 lu ~

估唔到豬扒咁大塊

尋日着完短袖   今朝着長袖有啲熱   咁又難得假期   係時候換季喇 ~

以前鍾意叫里奧大人買格仔同直間條嘅裇衫   呢件 PRL 格仔裇衫買咗好耐好耐但着嘅次數唔多   見仲係咁新淨就 Keep 住啦   不過之前都捐哂好多格仔衫㗎喇   因為見好多阿伯都係着格仔咁嘅   好在無比里奧大人話我咋   咁我一拎呢件衫出嚟   里奧大人即刻話捐呀

之前啲衫如果兩年唔着嘅就捐㗎喇   但我依家話一年唔着都捐喇   所以今次又執咗 2 袋衫出嚟   突然覺得衣櫃好多位咁呀   哈哈 ~

搞掂就洗窗簾   之後再開機洗衫   里奧大人就熨衫 ~

抖陣就食下午茶   尋日買咗 4 個菠蘿包   所以就可以做今日嘅下午茶同埋聽朝嘅早餐喇 ~

菠蘿紅豆包 + 菠蘿椰絲包喇   再加無糖豆漿同黑芝麻豆漿

一路食一路睇 "臥底旅行團 4.0" 同 "中年好聲音 3"   里奧大人 4 點 45 分晏覺   我就睇 Youtube 喇 ~

差唔多 5 點 15 分就預備晚餐   里奧大人瞓到 6 點先起身   不過都要 6 點半先開得飯呢 ~

是日晚餐 - 黑椒牛扒 (外賣) + 烤汁雞翼 (外賣) + 菜心苗

黑椒牛扒 (外賣) - 2 塊只係 $39.8   所以買嚟補補血喇 ~

烤汁雞翼 (外賣) - 見 $24 就買啦   但份量少咗呀   我記得好似起碼有 10 隻㗎 ~

菜心苗 - 我覺得自己好勁呀   將啲豬頭肉同鴨腎切條再炒菜心苗   感覺無食菜心苗咁悶   但其實豬頭肉好多肥膏   根本食唔到   哈哈 ~

洗埋碗就沖涼   之後同里奧大人睇 "來自地獄的法官"   今晚睇到好緊張   我郁埋隻手指講話呢個唔係兇手   里奧大人係度笑呀   話我真係好似同緊法官講嘢咁   哈哈 ~

兒甥仔 9 點 15 分打嚟話買糖水比我哋食   真係好乖仔 ~

同里奧大人 Share 食一碗   我主要係食啲芋圓

今晚睇到第 12 集   但聽日番工   所以 10 點 50 分都瞓覺 lu ~

滷水拚盤 (外賣) + 滷水豬手 (外賣) + 角瓜蝦乾湯 ( 20-APR-2025 )

豬耳 + 腎 + 豬頭肉 + 豬脷 + 鵝腸 + 紅腸   呢啲真係食一次就夠了

( 20-APR-2025  SUN )

今朝同里奧大人一齊起身   食埋早餐就去佢公司幫手喇 ~

搞掂就番崇拜   差唔多 11 點鬆啲都要走   因為自己教會有活動   想食埋午餐先呀 ~

本來諗住同里奧大人 12 點食午餐㗎   但佢要開會就行唔開 lu ~

去到九龍灣都只係 11 點幾   真係未餓呀   所以行陣 DONKI 先   行到 12 點 20 分就去南記食午餐   食完就番教會喇 ~

今日參加咗復活節社區分享行動   同弟兄 KL 姊妹 MY 一齊出隊   九龍灣行到牛頭角   分享過程都好順利   行咗 2 個鐘就完成行動呢    感恩感恩 ~

我同 MY 一齊行去牛頭角地鐵站   之後佢搭地鐵番屋企   我就去官塘官塘青林買餸   又順便買啲豆裝同角瓜   買完就即搭車番屋企喇 ~

落樓梯對腳突然無力呀   好在我習慣扶實手柄咋 ~

番到屋企抖 10 分鐘又出去買菜   經過滷水店又買埋晚餐   再去買埋砵仔糕   最後先去 DONKI 買意粉   因為意粉好重   唔想由頭拎到尾呀   哈哈 ~

薯片好平呀   因為 8 月到期

番到屋企都 5 點幾   抖陣就預備滾湯喇 ~

呢個牌子嘅意粉好食呀   咁啱特價 $19.9   所以即買 3 包

呢盒雜菜炸魚餅只係 $20   買嚟做儲備都唔錯

里奧大人 6 點幾番到屋企   不過仲未食得   所以叫佢沖涼先呢 ~

是日晚餐 - 滷水拚盤 (外賣) + 滷水豬手 (外賣) + 角瓜蝦乾湯

滷水拚盤 (外賣) - 里奧大人只係食咗 2 片紅腸同 1 條鵝腸咋   之後我叫佢食其他啦   佢個樣好慘咁話妳都知我唔食呢啲㗎啦   其實想話豬頭肉係五花腩   咁佢就一定食   不過好似好衰咁   所以都由佢唔食喇 ~

滷水豬手 (外賣) - 好想食呀   所以即買 ~

角瓜蝦乾湯 - 今日出咗好多汗   要飲個湯嚟補充水份   哈哈 ~

洗埋碗就即沖涼   抖陣就同里奧大人睇 "來自地獄的法官" ~

細細個嘅紅豆砵仔糕   都有好多豆㗎

今晚睇到第 10 集   但今日出咗成身汗好攰   所以 10 點 20 分要瞓覺喇 ~

上海飽餃店 @ 紅磡 ( 19-APR-2025 )

生煎餃 ($42) - 個皮夠薄   同埋都有肉汁

生煎包 (牛肉) ($42) - 口感似食麵包   我其實麻麻哋   我以為係好似堅信號嗰啲口感添

小籠包 ($32) - 完全唔得啦   無肉汁嘅

豆漿 ($12) - 叫比里奧大人飲咋

( 19-APR-2025  SAT )

今朝瞓到 9 點半自然醒   臨醒之前個夢係要做問卷   係關於屋企嘅嘢   之後問到執屋情況   我好大隻字寫住強頊   呢下幾搞笑 ~

沖埋涼就去食早餐喇   連放 4 日假期   好多人都出去玩   所以餐廳都唔多人呢 ~

食完都番屋企 lu   之前成日將啲衫褲無分類就咁放入袋   今日就的起心肝分哂類   因為我唔想成日記住要執呀   今次一次過搞掂哂   實在太開心喇 ~

里奧大人有 50 對新襪   所以我即刻 Send 比群組   CC 話好恐怖呀   哈哈   其實我新舊加埋都有接近 80 對襪   不過我好少長襪   所以唔覺咁多囉   呵呵

執到整整齊齊

用咗個幾鐘就搞掂哂   所以就開機洗衫   再熨 2 機衫喇 ~

差唔多 2 點 45 分先食 Tea   食完都番屋企休息下先 ~

好想食西多士

里奧大人就試下焗豬扒飯

又睇下 Youtube 啦   見到 ASTRO 有新片就即睇   雖然標題 Moon : Commentary   但我都想睇   最後真係忍唔住喊   里奧大人以為咩事呀   之後我比埋阿花睇   佢話坐緊巴士   所以睇咗少少就唔睇   驚忍住喊咗出嚟呀   大家都覺得 Bin 咁後生就走咗   真係好可惜 ~

差唔多 6 點半就出發去食晚餐喇   我哋一入食店都未坐低   職員就話 2 個人就餃子轉 6 隻啦   我話好吖   之後佢再話生煎包都轉 6 隻啦   我都話無問題吖   但佢再話要唔要咩咩咩   里奧大人話要等陣先   因為要等米飯班主話事   其實我唔係咁鍾意咁 Chur 囉 ~

食完再去買糖水   今晚又係好焗熱   番到屋企都成身汗呀 ~

沖埋涼就休息   同里奧大人睇 "來自地獄的法官"   睇到第 7-9 集   仍然覺得好睇呀 ~

今晚碗糖水無咁靚仔

本來想再睇多陣   但原來已經 11 點   所以我話要瞓覺喇 ~