乾炒爽肉河粉 + 迷你福建飯 (外賣) ( 6-AUG-2025 )

食唔哂呀   所以又可以帶飯喇

( 6-AUG-2025  WED )

今朝同里奧大人一齊 8 點起身   沖埋涼就去食早餐喇 ~

食完就番屋企抖陣先出發   差唔多去到巴士站   我見到要坐嘅巴士   所以即追啦   之後里奧大人睇番個 Apps   原來係之前嗰架   我仲以為早咗 5 分鐘呀   奇怪我哋明明預咗時間等家嘛 ~

無諗過 9 點幾塞車添   所以 10 點 05 分先到診所   不過醫生 10 點 45 分先番到診所呀   最搞笑里奧大人話一陣要搭的士走   我話唔駛喎   每人 15 分鐘都只係用咗 45 分鐘啫   12 點半前一定番到公司嘅 ~

一見醫生就講自己身體狀況啦   佢好搞笑   話我好細啫   我話唔細啦   之後再繼續話我好細啫   我話已經 xx 啦   佢話真係唔似喎   個樣真係似 xx   我話可能我短頭髮肥嘟嘟啩   哈哈 ~

檢查完   醫生叫我做運動   我話有呀   佢笑笑口話我乖喇   好似當我細路仔咁 ~

咁我要再做超聲波檢查   醫生一按我個肚就話好呀   因為我之前個瘤好大   醫生好多時一按就會縐哂眉頭㗎 ~

坐低再睇啲報告   依家個瘤係 6cm X 6cm   又細咗 1cm 呀   我記得食藥之前係 12cm X 8cm 㗎   所以算係細咗好多啦   同埋最緊要卵巢正常呢   感謝神 ~

睇完都 11 點半了   拎埋收據同假紙就走得 ~

同里奧大人一齊搭車番公司喇   一入到公司   個個見到我都好出奇呀   我話婦檢有一日病假嘛   同埋一陣去黐飯食   哈哈 ~

12 點半就同里奧大人 阿一 榴槤一齊出發   因為阿妹 叻叻同易姐佢哋要遲啲到   所以阿妹叫我幫佢霸位要坐我隔離   去到已經見到阿 Cool   咁我坐低無耐   頂爺佢哋都到   佢想坐我隔離呀   我話留咗比阿妹坐呀   真係唔好意思呢 ~

里奧大人同榴槤負責點菜   我哋 9 個人就點咗 9 個菜   點完菜就齊哂人   無耐啲小菜都到   好在唔係一次過出哂咋   咁我哋可以慢慢食   其實都唔趕   不過唔想啲嘢食凍哂咁啫 ~

蜜椒薯牛仔粒 ($110) - 呢個好味道   個個都鍾意食

菠蘿咕嚕肉 ($100) - 味道都 OK 呀   但個皮唔夠脆

金銀蛋浸時蔬 ($85) - 呢個都好味   自己整到咁好味就好 lu

涼瓜菜脯煎蛋角 ($85) - 無食呀

瑤柱肉碎蒸水蛋 ($85) - 我唔知里奧大人叫咗咩嘛   因為我唔係坐佢隔離   咁我一入口食到有好多肉碎覺得好有驚喜   哈哈   因為我以為係普通蒸水蛋呀

楊州炒飯 ($85) - 好食呀   同埋都好多料

豉油皇炒麵 ($85) - 夠乾身

豉汁蒸大鱔 ($158) - 啲肉好滑

招牌小炒皇 ($105) - 我鍾意食小炒皇   佢哋話呢間整得好有鑊氣呀

午市茗茶 ($8/位)

我哋傾煮嘢食   我話我煮啲牛仔骨韌到不能再韌   阿妹話點會㗎   我話唔信就下次煮比佢食   哈哈 ~

講起味精   呢間都無咩味精   因為榴槤話一食味精就會臉腫   我就會好眼瞓   家姐就頭痛   同埋好多人食完味精係會好口渴   我哋食完又無口渴噃 ~

之後講開龍貓   我話無睇   我再話龍貓個樣成隻老鼠咁   阿一聽唔到我話無睇   以為我唔知龍貓巴士係咩   仲比張相我睇   哈哈   榴槤話試過比兔仔咬   我話人生第一次見兔仔係喺家姐朋友屋企   隻兔仔係好大隻囉   所以嗰下覺得好恐怖呀 ~

呢間食店都好靜   但唔係無人喎   所以食飯傾偈真係唔錯   始終人多食飯真係比較少選擇呢 ~

食到差唔多 2 點就走人   榴槤話去食糖水   但其實佢哋仲要開工   無可能去食啦   同埋大家都好飽   根本都食唔落啦   哈哈 ~

里奧大人話榴槤頭先食飯一定食得好開心   因為佢上次又係話食完再去食糖水呀 ~

今次聚餐係里奧大人主動約部門同事一齊食嘅   無諗過全部人都出席呀   個個又啱傾   里奧大人喺群組話呢餐係佢請   阿妹話要秒覆多謝   真係笑死我   里奧大人約食飯嘅時候   阿妹都係咁問我嚟唔嚟   不過嗰時我仲每月一到   唔知可唔可以婦檢   真係答唔到佢住囉   所以今次可以一齊食飯真係好開心呢 ~

其實真係好感恩好感謝神   里奧大人同呢班同事都好合拍   因為大家互相配合係好重要   呢方面都好感激阿妹   好多時佢知里奧大人要陪我   佢一定比里奧大人請假先㗎 ~

本身諗住坐一陣就走   因為里奧大人要開幾個會   咁我同阿妹傾偈   點知一傾就傾咗個幾鐘   好在佢唔忙咋   唔係比里奧大人鬧死我呀 ~

傾傾下   阿妹話叻叻買比佢食   所以同我 Share 食   佢勁似家姐呀   又係傾傾下偈就會拎嘢出嚟食咁㗎   哈哈

我哋覺得幾好味喎

唔記得講開咩   我話有次食咗粒藥之後嚟經就痛到死   佢話係我去韓國嘅時候食吖嘛   我話真係唔記得呀   所以佢真係好有記性   同埋好開心佢記住我嘅嘢呀   哈哈 ~

我好想食雪糕   所以叫阿妹陪我去 Pantry 食   咁見到細細聲又一齊傾偈   之後里奧大人打比阿妹搵我呀   因為已經 5 點半喇   真係無諗過咁快又放工   哈哈 ~

咁諗住同里奧大人一齊走啦   點知 Melody 搵佢   咁我都走先喇   因為我想去 OK 買雪條呀 ~

本身特價 $10/支都平   點知依家買滿 $60 有 75 折就真係忍唔住買喇   折咗只係 $7.5/支咋   家姐都忍唔住買咗   佢仲買埋哈根嘅焦糖同士多啤梨哂雪條添呀

買完再去買麵包   之後番上屋企放低再去拎外賣喇 ~

番到屋企即沖涼啦   咁我沖完抹身   里奧大人突然好大力咁開門叫我   佢話以為我暈咗呀   因為廁所無聲   明明我話沖涼先嘛   咁我問里奧大人係咪好驚我暈 ?!   佢話梗係驚啦   親眼見過兩次點會唔驚呀 ~

所以我依家食完啲嘢會搞肚痛   我就真係唔會再食   因為命仔緊要呀 ~

我又未每   叫里奧大人沖埋涼先   之後我再開埋機洗衫先開餐呢 ~

里奧大人開完會見到有份生果喺枱面   問阿妹邊個請 ?!   阿妹話可能頂爺請食啩   咁阿妹無嘛   之後話頂爺大細超   里奧大人話下次妳請咪有囉   我會買兩份比妳都得呀   阿妹聽完笑到好大聲   哈哈

睇完培靈會再睇 "麻雀樂團"   之後再睇陣 Youtube   差唔多 11 點先瞓 ~

煙燻燒鴨 (外賣) ( 3-AUG-2025 )

( 3-AUG-2025  SUN )

今朝同里奧大人食早餐   食完就去佢公司幫手喇 ~

差唔多 10 點幾都要走 lu   我要番自己教會事奉 ~

之前成隻窗都濛哂㗎   當我拎手機影嘅時候就細番啲   但都算係超級大雨   哈哈

落車嘅時候落超級大雨加上又有風   所以我條裙下半身濕哂咁滯   好在薄身咋   叫做好快乾囉 ~

見到姊妹 A 又傾下偈   佢話我煮嘢食叻咗   我話我煮得就唔係叻啦   佢話妳真係煮嘢叻咗   我話好啦好啦   係都要讚我我都會收哂嘅   哈哈 ~

之後同弟兄 A 傾偈   好在我崗位都係同人傾偈咋   唔係好似唔做嘢咁   嘻嘻 ~

今次事奉好順利   比平時早半個鐘呀   所以可以去買隻燒鴨 ($130)   再買個兩餸飯 ($35) 就搭車喇   時間啱啱好 ~

坐巴士見到弟兄 MC   即同佢傾偈   因為咁啱有嘢問佢   咁我今日又早咗   佢又唔駛開會   其實有時喺屋企附近都見到   但真係 Say Hi 就走囉 ~

里奧大人仲未放工   咁我去佢公司一齊食喇   阿妹話我去完街買餸咁   我話去事奉唔係去街呀   哈哈 ~

估唔到咕嚕骨又係外皮脆卜卜   但睇過樣唔似囉   所以我無買到淨餸   激死我

諗住食完飯同里奧大人一齊番屋企   點知佢突然間有 Urgent 嘢要整   咁我都番屋企先喇   因為約咗師傅 3 點嚟整個水龍頭呀 ~

里奧大人 3 點番到屋企   無耐師傅就到   真係好喇   等佢哋搞掂就得喇   整咗差唔多半個鐘就整好   感恩感恩 ~

咁睇下 Youtube   里奧大人唔記得拎隻 USB 番嚟做嘢   話聽日番公司做   我話咁不如今日做喇   聽日可以全日休息呢 ~

我又唔攰   所以熨 2 機衫   之後里奧大人番到屋企   佢話諗住快啲做完番嚟熨衫添   話無諗過我熨得咁快 ~

差唔多 5 點左右就煮蕃薯糖水   搞掂就預備晚餐喇 ~

是日晚餐 - 煙燻燒鴨 (外賣)

煙燻燒鴨 (外賣) - 買咗 1 隻但唔斬嘅   估唔到都好重好大隻   因為我無睇到 1 隻幾大呀   所以一拎起手有啲後悔   哈哈   睇嚟都要食幾餐 lu ~

洗埋碗就啱啱好睇培靈會   之後再一路食糖水一路睇 "麻雀樂團" 同 "臥底旅行團 5.0" 喇 ~

今次好少蕃薯   所以加埋芝麻湯丸

今晚 11 點鬆啲都瞓覺喇   里奧大人話聽朝早啲起身陪我食早餐   我話買咗包呀   梗係瞓晏啲休息下好過陪我啦 ~

辣蘿蔔炒燒鴨 + 焗三文魚柳 + 節瓜元貝湯 ( 5-AUG-2025 )

幾乎無食過咁滯   所以又要留番   今次隻燒鴨真係食極唔完咁   下次真係買半隻算喇   哈哈

( 5-AUG-2025  TUE )

尋晚比雷嘈醒咗   感恩好快瞓得番咋 ~

今朝鬧鐘響   個天係黑哂同感覺係落緊雨   之後即睇手機會唔會黑雨啦   一睇就睇到家姐 朋友群組同公司群組訊息話黑雨維持到 9 點   咁我哋都可以瞓到 8 點先起身   但其實瞓唔到   哈哈 ~

整完早餐就沖涼洗頭   之後話黑雨維持到 11 點   咁都食早餐啦   反正整咗 ~

早餐食粟米火腿 + 茄汁薄餅   好在尋晚買咗麵包咋   雖然屋企一定有即食麵同罐頭   但唔想由朝煮到晚咁嘛 ~

今日係 CC 生日添呀   雖然多咗一日假但都唔會出去啦   我記得里奧大人有次生日又係打風放假呢 ~

里奧大人食完就再瞓番   我就同阿妹同 CC 傾偈   傾咗成個鐘呀   都開始有啲攰   不過我唔瞓啦   所以大清潔廚房喇 ~

搞掂就睇 Youtube   里奧大人都起身   原來都已經 12 點   我話做完大清潔有啲餓呀   所以要蒸飯食   不過搞得嚟都 1 點先食得呀 ~

好在屋企有隻大嘅陶瓷鍋   咁可以一次過蒸哂   唔係就要放另外嘅碗 lu

食完就睇陣 Youtube   之後差唔多 4 點都瞓咗 10 分鐘   個人無咁攰就熨衫喇 ~

4 點半開始預備晚餐   滾完個湯就可以抖下 ~

家姐之前買比我㗎   好脆好好食

今晚 6 點鬆啲都可以開餐   聽日唔帶飯   所以同里奧大人 Share 食出前一丁 ~

是日晚餐 - 辣蘿蔔炒燒鴨 + 焗三文魚柳 + 節瓜元貝湯

辣蘿蔔炒燒鴨 - 將所有嘢剪到一粒粒   再加辣蘿蔔嘅辣汁一齊煮   真係非常方便 ~

焗三文魚柳 - 終於清哂   要等特價先再買 lu ~

節瓜元貝湯 - 好想飲湯呀   難我今日有時間就滾呢個湯喇 ~

洗埋碗再沖埋涼就睇培靈會   之後再睇 "麻雀樂團" ~

今晚好攰呀   同里奧大人一齊 10 點 20 分都瞓覺 lu ~

豉汁涼瓜燜燒鴨 ( 4-AUG-2025 )

( 4-AUG-2025  MON )

感恩瞓得都唔錯   呢排覺得落雨天係瞓得好啲咁㗎喎 ~

早餐食甜餐包搽芝麻醬   依家想快啲清哂樽芝麻醬   因為差唔多到期呀 ~

無咁大雨就出啲出門口   番到菇場都只係 8 點半呢 ~

菇場忙到 10 點   之後就可以做自己嘢喇 ~

Lunch Time 出去買菜   咁我買 2 個節瓜 + 2 個大釘要 $30   我覺得貴喎   節瓜 $6/斤同大釘 $10/斤   無理由 $30 咁貴囉   之後佢話節瓜 $8/斤   我話係寫住 $6/斤呀   佢再計之後就合共 $20   好在我問下咋   下次唔會叫佢秤嘢喇   求求其其咁嘅 ~

唔係咁大雨就去惠康行陣   點知一出嚟就好大雨添   不過就無濕到身   因為無咩風 ~

見 $18 都抵   所以忍唔住買嚟試下

唔忙就上網啦   咁樣時間會過得快呢 ~

放工即走   里奧大人今日番咗工   所以我同佢差唔多時間番到屋企喇 ~

是日晚餐 - 豉汁涼瓜燜燒鴨

豉汁涼瓜燜燒鴨 - 呢個餸只係手撕鴨肉最耐   但其實都算係好簡單嘅一個餸   同埋實煮得好食呢   哈哈 ~

洗埋碗即睇培靈會   所以好快又 9 點 ~

里奧大人問有無蕃薯糖水食呀 ?!   我話無啦   問佢係咪好想食   佢話唔係   話以為我買咗好多   我話上星期食咗 3 次   我想停一停呀   哈哈 ~

開埋機洗衫就沖涼   睇多陣 Youtube 就睇 "麻雀樂團"   錄完先睇真係睇得快好多㗎 ~

個天係咁打乾雷   我望出面又無落雨   希望今晚唔好比雷嘈醒啦 ~

打多陣機   今晚又係 11 點瞓覺 ~

泰風味泰國菜館 @ 官塘 ( 2-AUG-2025 )

全隻燒魷魚 ($128) - 同上次一樣咁好味

泰式鳳爪沙律 ($70) - 兔兔話一定叫嚟食   不過都係得我同佢食咋   因為里奧大人唔食呢啲   CC 就唔食得辣

拚盤 ($152) - 有春卷 / 炸蝦餅 / 炸魚餅 / 豬頸肉   我就最鍾意食蝦片   哈哈

蝦醬炒飯 ($70) - 里奧大人就話叫呢個飯食喇

芒果糯米飯 ($60) - 里奧大人話叫甜品   本來再叫多一份   不過 CC 話飽唔好叫呀

CHANG X 2 ($33/支) - 咁熱都會叫啤酒飲㗎喇

芒果沙冰 X 2 ($35/杯) - 我就叫沙冰呢

( 2-AUG-2025  SAT )

尋晚瞓得麻麻哋   半夜去完廁所又好難瞓得番   之後又比下聲嘈醒   不過都知道差唔多起身㗎喇   但點都等到鬧鐘響先起身囉 ~

同里奧大人出去食早餐   食完就去佢公司坐陣先番工 ~

感恩落車好細雨   唔係成身濕哂真係好麻煩呀 ~

菇場唔忙啦   BG 話 9 點 45 分黑雨   阿花話落金雨都唔關佢事   佢講嘢好似啲婆仔語氣好搞笑 ~

唔忙就做自己嘢又上網   其實啲時間都好快過嘅 ~

放工即走   同里奧大人食車仔麵   食完就番屋企休息下喇 ~

抖到 4 點 15 分出發去睇鞋   咁尋日里奧大人話唔係咁想特登去德福   我仲以為唔去   仲話 APM 好近街市   之後佢話係去德福呀   真係好在問一問同埋早咗出門口咋 ~

第一時間去 MIRABELL 睇鞋   里奧大人一入到去就睇中咗對鞋   本身 $1,299 有折再減 $200 生日 Coupon   咁職員話買兩對可以平啲   但兩對加埋好似 $1,8xx   職員話買滿 $2,000 又唔知點減   所以我買咗個黑色袋 ($399)   總知 3 樣加埋就 $2,177 減 $300   只係 $1,877 就搞掂 ~

我哋覺得 CATERPILLAR 都好好着   同埋越出越輕   不過唔再出女裝囉   真係太可惜喇   我仲諗住買番對替換添   依家唔駛諗 lu

咁去到牛頭角地鐵站就睇佢哋喺邊   原來兔兔同我哋一班車   所以我話等埋一齊行去接 CC 呀 ~

今晚請 CC 食生日飯   我話去番泰風味呀   好在大家都鍾意食泰國菜咋 ~

叫完嘢食就即刻傾偈   佢哋 10 月又去東京   佢真係好鍾意日本   我話本來想去曼谷按摩   不過又驚驚哋唔敢去囉 ~

兔兔話佢朋友喺深圳按摩好平   佢哋 4 個人去入會就平囉   因為一次過用哂嘛   如果間唔中一次就唔平   上次家姐去深圳做泰式 SPA 兩個鐘要 RMB499   我真係覺得好貴呀   去大陸玩係想平家嘛   哈哈 ~

之後兔兔又話佢啲朋友去深圳打邊爐食牛肉好抵又平   喺香港食唔到咁嘅價錢   咁事實上係嘅   唔係點會咁多人上去食嘢喎   不過 CC 話唔會就咁特登上去食嘢囉   里奧大人又係咁講   始終都頻樸   轉車又過關   反正都上開去   都唔爭在住一晚   但如果喺上水住同埋兩蚊雞車費就唔同呢 ~

講開公司冷氣超級凍   佢哋都難以想像會凍成咁   我話以前有個同事話冷氣吹到入骨   夜晚番屋企啲骨好痛   不過之前個舊地址又係超級凍   我已經坐緊窗門   但我都要着埋冷衫同毛毛鞋先夠暖   可能嗰時無咁忙成日坐呀   哈哈 ~

CC 話下次再 Plan 冬天去旅行   我話冬天要帶厚衫好煩   買得唔多嘢呀   之後佢笑住同里奧大人講話買咗羽絨唔好嘥咗去嘛   哈哈 ~

食到 8 點幾   職員話有人訂咗枱   咁我哋都走喇 ~

本來諗住順便探菜仔   不過佢唔喺度   咁我哋都番屋企 lu ~

我又有日本同潮州手信呀   真開心

沖埋涼抖陣就睇培靈會錄影再睇陣 Youtube   今晚 11 點都瞓喇 ~

雜丸辛辣麵 + 小旺菜 ( 1-AUG-2025 )

( 1-AUG-2025  FRI )

今朝瞓到差唔多天光就醒   但好難瞓番同埋可能其實當時係 6 點幾   不過我無起身望個鐘   總之點都會等到鬧鐘響先起身囉 ~

呢排都係有時瞓得好好   有時瞓得麻麻哋咁   但最緊要起身都精神   唔係就比較慘   哈哈 ~

里奧大人話發夢去旅行   但所有費用都係佢比嘅   咁我哋坐泥猛的   佢唔見咗個銀包   問我頭先係咪比錢   咁如果無比即係佢比咗   咁個銀包可能跌咗喺的士   但我話唔知有無比   佢話有無比錢點會唔知㗎 ?!   之後鬧鐘醒咗   我話發夢都係講我衰嘢   好在鬧鐘響   唔係比你講得更多   哈哈 ~

但真係好邪囉   尋晚放工先同阿花 船頭講緊無拎銀包啲嘢 ~

同里奧大人出去食早餐   食下傾下   我同里奧大人講話我其實都算鍾意番工   之後佢話因為妳啲同事簡單先鍾意番工咋   咁又係   就算連我老闆都好好人   所以我好感恩呢 ~

里奧大人話要對好忿怒嘅眼睛

呢把風扇開到 2 級都唔嘈   真係無買錯呀   哈哈

菇場忙呀   差唔多 11 點先做完 ~

8 月喇   時間過得超級快

家姐打嚟話檸檬汁好抵   我叫佢幫我買 24 支   佢自己又買 12 支   真係笑死   明明成日話唔好買咁多嘢但又忍唔住囉 ~

Lunch Time 出去買百香果比 CC   諗住好快買完   但估唔到可以揀   之後我又忍唔住買比自己   用咗好多時間呀   買完再幫家姐買 2 Pack 超力米粉   去 OK 買 HERSHEY'S 朱古力雪條比船頭佢哋   但無 Chocolate Almond 囉   激死我呀 ~

流咗成身汗呀   真係抖 10 分鐘先食   差唔多 1 點先去洗嘢 ~

$20/3 磅真係超級抵

忙下停下   好快放工 ~

今晚有培靈會   本來里奧大人話買外賣   但我話買咗菜   同埋今晚煮麵好簡單   所以想煮呢 ~

淥菜嘅時候再煮埋蕃薯糖水   所以差唔多 6 點 35 分先開餐呀 ~

是日晚餐 - 雜丸辛辣麵 + 小旺菜

雜丸辛辣麵 - 我今日食完牛仔骨覺得好滯   所以只係煮麵比里奧大人食就算喇 ~

小旺菜 - 加埋幾隻杏鮑菇   不過都食剩少少   無計啦   我真係好滯咁呀   唔係一定食哂佢呢 ~

洗埋碗就即睇培靈會   之後就食埋蕃薯糖水 ~

睇完就即沖涼   之後用 MH40 聽歌   真係好正   所以聽到11 點 20 分先瞓   其實唔係咁眼瞓㗎   不過點都要瞓啦   因為聽朝要番工呢 ~