雪菜火鴨絲燜米 + 油麥菜苗 ( 7-MAY-2024 )

水姑尋晚比嘅蓮藕餅   所以今晚一定要食哂   就係因為咁   我食唔落雪菜米   哈哈 

( 7-MAY-2024  TUE )

呢排雖然瞓得唔錯   但好多時都比里奧大人鼻鼾聲嘈醒   感恩係醒一醒之後就好快瞓得番呢 ~

今朝同里奧大人出去食早餐   最搞笑里奧大人話差啲去錯另一間   好在未入去坐低   唔係就真係好尷尬喇 ~

今次無叫少通粉呀   因為我食少少通粉   咁應該可以頂到 2 點半

菇場唔忙呀    咁就好喇 ~

放工即走   今日陪家姐去拎報告   所以我去 APM 行陣   去到只係 12 點 15 分   可以慢慢行 ~

行到 1 點就搵地方坐下   家姐放工嘅時候   Whatsapp 叫我行陣等佢   我話已經行咗好耐喇喎   之後佢話係喎   妳放 11 點 45 分   哈哈哈哈 ~

坐陣又行下 MUJI 啦   諗住買收縮水先走   但家姐話到咗地鐵站   咁我都即走喇 ~

因為上次家姐等好耐先到佢   所以佢喺公司食定兩片麵包打底   之後問我頭先食咗咩 ?!   我話無食呀   佢碌大對眼話做咩唔食呀 ?!   話之得頭先留 1 塊麵包比我食啦   我話我都唔餓    今朝食得好飽呀 ~

約咗 1 點 45 分到診所拎報告   但我哋 1 點半都直接去診所等喇 ~

2 點有得拎報告   我陪家姐入去見醫生嘛   但醫生講嘢真係模稜兩可   話自己只係 xx 專科   唔係 xx 專科   叫我哋自己約 xx 專科   好在我親自聽到   唔係以為家姐聽錯   哈哈 ~

搞掂都 2 點半左右喇   咁我頭先都睇定啲餐廳   咁唔駛到時再搵嘥時間嘛 ~

餐廳店員話 Lunch 係限時一個鐘   咁無問題啦 ~

甜品 & 水果 & 沙律 & 拌菜 (免費)

 

套餐包括湯 & 汽水   另外添加白飯都係免費

見到蟹柳即拎比家姐

菠蘿好甜呀

黃豆粉蕨餅最好味   其他就麻麻哋

估唔到家姐話要食泡菜   但呢間嘅泡菜都好味

上級牛肋肉燒肉定食 ($149)

油花都靚呀

牛三品盛燒肉定食 ($129)

呢間食店嘅燒肉品質真係唔錯

3 款醬汁都好味

家姐負責燒   話無糟糟燒得咁靚   之後我同佢一齊話糟糟喺度就好啦   咁啱佢打嚟   不過佢唔得閒嚟囉   

家姐話燒到咁乾   估唔到肉質都好腍   所以係咁叫我快啲食

咁我問家姐燒緊啲咩 ?!   佢話應該牛三品啩   我話妳又知嘅 ?!   佢話個樣都唔同咪知囉   等我仲以為佢識得分咁叻添

我話好靚呀   其實講緊七味粉有香草   之後咁啱家姐放塊牛肉比我   佢仲好開心話我都覺得好靚呀   我忍唔住笑話其實我係講緊七味粉好靚   但唔估到妳同步比牛肉我囉

好難飲

我對住個美食自助吧   拎嘢真係好方便呢   同埋佢哋會不斷 Refill   唔錯唔錯

@ 本陣

咁我一早講明呢餐係我請   係母親節禮物   咁我拎生果番嚟一坐低   侍應拎張單話要埋單先   點知家姐想比   不過我大力按住佢隻手   再右手開銀包比錢   好在我個背囊喺我隔離咋   呵呵 ~

食埋啲生果就走人啦   原來啱啱好一個鐘 ~

同家姐一齊去搭巴士   咁我睇 Apps 嘛   佢話個站係定富街   咁明明係 4 分鐘後有車   突然一望就見到有車   原來下個站先係定富街呀   我話等我仲信妳係定富街   差啲走咗班車呀   哈哈 ~

去埋街市買菜就番屋企   原來已經 5 點半了 ~

里奧大人 6 點幾番到屋企

是日晚餐 - 雪菜火鴨絲燜米 + 油麥菜苗

雪菜火鴨絲燜米 - 里奧大人只係食咗一碗仔   所以幾乎成碟原封不動咁   又要留番聽晚食喇 ~

油麥菜苗 - 淥咗 10 棵左右都夠喇   始終都仲係好飽   哈哈 ~   

洗埋碗就沖涼休息   里奧大人就去做機 ~

睇下 Youtube   今晚 10 點半都瞓覺喇 ~

煙燻燒鴨 (外賣) + 粟米湯 ( 6-MAY-2024 )

( 6-MAY-2024  MON )

今朝瞓到 7 點 40 分起身   焗完麵包就煲薑茶   之後即沖涼喇 ~

早餐食芝士夾牛油排包   因為 8 點 13 分先開餐有啲趕   所以完全唔記得影相呢回事   哈哈 ~

菇場忙咗成個鐘   搞掂就同阿花 Whatsapp 個幾鐘   突然覺得啲時間就過得好快 ~

西瓜 11 點半先番   仲要戴住口罩同行得好慢   佢病咗成個星期有多都仲未復完呀   好心今日喺屋企休息啦   食藥再瞓足全日抖夠   之後精精神神番工仲好啦   依家仲傳染埋比阿花   真係多得佢唔少 ~

Lunch Time 出去行陣再食鯪魚球河   食完就去 Mikiki 行下   之後買咗條裙   只係 $199   買完都即番菇場喇   原來已經 12 點 50 分呢 ~

仍然唔忙就 Skype 啦   雖然無嘢做   但同樣都係望住電腦   所以對眼都好攰   哈哈 ~

放工睇中醫   醫師話我依家個脈都有力   咁就好喇 ~

但我話呢排瞓得唔好   所以加重啲藥   令我瞓得好啲 ~

睇完去買燒鴨   之後諗住買個魚香茄子   咁唔駛特登煮菜嘛   點知又無   咁再去買菜啦   但得番啲唔靚嘅   所以都唔買喇 ~

番到屋企即沖涼   之後先滾粟米湯   搞掂就里奧大人啱啱番到嚟   可以即刻開餐呢 ~

是日晚餐 - 煙燻燒鴨 (外賣) + 粟米湯

煙燻燒鴨 (外賣) - 買咗半隻   本來今晚出去食   但里奧大人同水姑食咗下午茶   我唔想佢又特登陪我食但又食得少   咁我買燒鴨番屋企   佢食少少都無所謂   因為可以留番呢 ~

粟米湯 - 依家 S&W 呢個牌子嘅粟米湯   真係少咗好多粟米 ~

洗埋碗就開機洗衫   之後休息   里奧大人就熨 2 機衫喇 ~

睇陣 Youtube   今晚 10 點 45 分都瞓覺 lu ~

臘潤腸蒸排骨 ( 5-MAY-2024 )

( 5-MAY-2024  SUN )

尋晚比里奧大人鼻鼾嘈醒   但感恩好快瞓得番   不過今朝起身有啲攰囉 ~

今朝同里奧大人出去食早餐   食完就去佢公司幫手喇 ~

陪阿妹食早餐   做完嘢又傾陣偈   傾到唔記得睇時間走呀   今朝去自己教會事奉   遲咗 3 分鐘先到呀   真係勁唔好意思 ~

事奉完再去買麵包   之後諗住同里奧大人即刻去食下午茶   後尾又要上去佢公司等佢放工   最後約埋榴槤兩公婆一齊食下午茶 ~

里奧大人唔係坐我對面   所以都唔影佢嗰份下午茶喇   咁我同榴槤講話食呢啲唔駛咁飽   榴槤好愕然話呢啲都唔飽 ?!   里奧大人笑住話睇佢身型   都知呢啲只係輕盈餐啦   哈哈   但我真係覺得食肉係飽啲嘛

食下傾下   好快又到 4 點   係時候走人喇   哈哈 ~

番到屋企都休息下   今日滕來滕去有啲攰   里奧大人沖埋涼就瞓覺   我之後睇睇下 Youtube 都瞓着咗   不過好似瞓咗 20 分鐘左右 ~

里奧大人瞓到 6 點幾   咁我都預備煮飯   今日 3 點先食嘢   所以唔係咁餓   晏啲食都無所謂 ~

是日懶餐 - 臘潤腸蒸排骨

臘潤腸蒸排骨 - 其實如果唔駛整 Lunch Box 比里奧大人   我直頭想就咁煮腸仔丁麵 Share 食算喇   但要整比里奧大人食   就整個簡單到不能再簡單嘅餸囉   哈哈 ~

今晚里奧大人主動話洗碗   可能佢知我好攰   因為平時我食完飯即洗碗   今晚坐喺度 10 分鐘都仲未去洗呀   哈哈 ~

沖埋涼就休息   睇下 Youtube   今晚 10 點 45 分都瞓覺 lu ~

ChiMac @ Foodeli @ 九龍灣 ( 4-MAY-2024 )

蔥蒜醬油炸雞套餐 (無骨炸雞 $59) - 今次只係配炸薯條同韓國檸七   無咗紫菜飯   仲貴咗 $1 添   呢個蔥蒜醬油味道都 OK   但唔會再食第 2 次   哈哈哈哈

經典甜辣炸雞套餐 (無骨炸雞 $59) - 里奧大人指定要食呢個味道

( 4-MAY-2024  SAT )

感恩一覺瞓天光呀   想起身嘅時候就啱啱鬧鐘響   感覺好似自然醒咁   哈哈 ~

同里奧大人出去食早餐   雖然落好大雨呀   但又唔會話影響心情   去到餐廳先知係黃色暴雨警告   不過今日應該都係成日落雨㗎喇 ~

食完就去里奧大人公司坐陣   等無咁大雨先番工呀 ~

菇場得 7 個人番工   真係做咩都得   哈哈 ~

好在有 2 把風扇仔   咁對鞋同襪就好快乾㗎喇

天文台話未來 2 小時有機會黑雨   所以船頭同阿渠 12 點 45 分走   不過我又唔需要咁早走囉   因為我要同家姐交收嘛  之後小說同阿 B 就 12 點 55 分都走   咁我都走喇   剩番阿怪同阿後   不過阿後肯定叫阿怪快啲走   唔好阻住佢鎖門囉 ~

今日本身有 LA 活動   但最後都要取消   咁當放咗一日假呢   哈哈 ~

家姐又未到   所以去買新鮮豬扒同排骨   買完再去地鐵站   等咗幾分鐘   之後家姐都到喇   不過傾咗幾句都走喇   佢約咗糟糟 2 點喺九龍城   雖然 15 分鐘實會到   但唔想佢咁趕囉 ~

感恩無落雨   咁同里奧大人去麥當勞食午餐喇   終於清哂啲 Coupon ~

估唔到麥記嘅熱奶茶唔錯喎   我要少奶   但飲落唔澀

食完番屋企   見無落雨就拎嘢去舖頭   搞掂就搭車出九龍灣   咁我其實都想行 mega BOX   難得見有 Shuttle Bus 唔駛排隊   所以即上車喇 ~

真係搞鬼啦   我正想睇鞋同藥妝部   但咁啱裝修   咁無計啦   周圍行下   好感恩比我買到 6 個運動型 Bra   叫到有收穫   哈哈 ~

買完就坐 Shuttle Bus 去德福   都已經 5 點幾喇   所以同里奧大人食埋炸雞先再行 ~

咁食完就去 MUJI 買包   麵包部又裝修   真係笑死   今日想買咩嘅地方都係裝修   最後買咗藍莓棉花糖比家姐同阿妹就走喇 ~

最搞笑我同里奧大人話 MUJI 無得買包   佢話妳頭先唔係買咗咩 ?!   我話買包喎   佢以為係 Bra 呀   仲奇怪點解我買完又買   哈哈 ~

買完都搭車番屋企喇   番到屋企已經 7 點幾   出街啲時間真係過得好快呀 ~

沖埋涼就開機洗衫   之後睇 Youtube   今晚 11 點先瞓   里奧大人話我今晚咁夜瞓   因為佢習慣咗我 10 點幾瞓呢 ~

煎釀三寶 (外賣) + 麻醬拍青瓜 ( 3-MAY-2024 )

( 3-MAY-2024  FRI )

尋晚瞓得都唔錯   去完廁所都好快瞓得番呢 ~

早餐食丹麥條   里奧大人食剩 1 件話留番晏晝   我話唔好擺咁耐啦   佢話好飽   因為我之前問過佢 1 條 Share 食夠唔夠飽 ?!   佢話佢放假就夠   但番工就唔夠   所以我咪買 2 條囉   之後佢都話記得咁講過   哈哈 ~

菇場唔忙   傾下偈又到 11 點 45 lu ~

Lunch Time 出去食鯪魚球米   之後去買青瓜   再行多陣就番菇場喇 ~

仍然唔忙又做下自己嘢   所以好快放工 ~

放工即走   去完大生換嘢   行行下突然間有個人叫我   原來係里奧大人   最搞笑佢問我去邊   感覺好似唔駛煮飯就周圍去咁 ~

番到屋企就整青瓜   諗住煮福麵定丁麵好   咁啱里奧大人番到嚟   佢話福麵好呀   之後又話煮一丁比我食   我話食咩都無問題啦   難得佢煮比我食   哈哈 ~

是日懶餐 - 煎釀三寶 (外賣) + 麻醬拍青瓜

煎釀三寶 (外賣) - 唔知煮咩呀   又唔想食手撕雞   所以買煎釀三寶喇 ~

麻醬拍青瓜 - 唔想嘥時間浸菜淥菜   咁整拍青瓜就最緊單方便   哈哈 ~

洗埋碗就沖涼   之後休息休息 ~

雖然今晚無煮飯   但都好攰咁   所以今晚 10 點半都瞓覺喇 ~ 

蜜汁焗金沙骨 + 芥蘭苗 ( 2-MAY-2024 )

( 2-MAY-2024  THU )

尋晚瞓到半夜又醒一醒   之後轉幾轉身又瞓得番   但今朝起身都有啲攰咁 ~

好在同里奧大人出去食早餐   咁樣可以 Relax 下 ~

里奧大人一定係少通粉   今次廚房無少到通粉呀   所以真係食唔哂   同埋我其實食三文治已經好飽   想幫手食都幫唔到囉

食完就去里奧大人公司坐陣   有時坐到唔想番工   哈哈哈哈 ~

菇場忙呀   月頭多數係咁呢 ~

5 月新開始

我依家都仲鍾意 APEACH   但買嚟擺又浪費   所以買比家姐最好   因為佢都會寫嘢喺日曆   我又可以睇下每個月唔同嘅版面   哈哈

Lunch Time 出去食墨魚丸米   食完就去買菜買麵包   再去養和堂買雞骨草就番菇場喇 ~

家姐話呢碗係蔥米加墨魚丸

唔忙又做下自己嘢   今日西瓜唔喺度   所以成日上網都得 ~

Berry 姐 2 點開始瞓

瞓到 4 點仲未起身

放工即走   番到屋企即預備晚餐   里奧大人今晚 6 點幾先番到屋企   不過要等陣先可以食飯呢 ~

是日晚餐 - 蜜汁焗金沙骨 + 芥蘭苗

蜜汁焗金沙骨 - 完全唔記得可以有叉燒醬呢樣嘢   之後買咗諗住焗叉燒家嘛   不過依家焗金沙骨都好味道㗎 ~

芥蘭苗 - 呢度細細盒只係 $5.9   我覺得好抵   同埋一次過可以食哂 ~

洗埋碗就開機洗衫   之後沖涼休息   里奧大人就熨衫

10 點半諗住燜手機瞓覺   點知收到石頭姐姐 Whatsapp   咁傾陣偈啦   所以今晚 11 點先瞓呀 ~

辣汁焗雞下肶 + 叉燒炒麵 + 菜心苗 ( 1-MAY-2024 )

( 1-MAY-2024  WED )

尋晚瞓到半夜   感覺自己扯鼻鼾   所以好辛苦咁抖氣   但都瞓到 8 點又唔錯喎   哈哈 ~

里奧大人未起身  咁我都繼續瞓   我呢排要補睡眠呀 ~

瞓到 10 點先起身   但起身嘅時候背脊好痛呀   所以里奧大人即刻幫我拍幾下   當堂舒服好多呀 ~

刷埋牙就即刻去食早餐喇   瞓夠食米粉餐   真係覺得好味好多咁   哈哈 ~

食完都番屋企喇   的起心肝抹廚房   估唔到又唔污糟喎   不過基本上都唔會點污糟嘅   因為平時煮完都會抹下呢~

搞掂就沖涼   之後睇福寶 ~

2 點左右出去黃埔   經過粥舖   問里奧大人食唔食炸兩 ?!   佢話食呀   咁就去食粥喇 ~

家姐好搞笑   話係咪艇仔粥多料   所以加碗白粥一齊食 ?!   我話里奧大人啱啱先話碗艇仔粥無咩料囉

炸兩嘅油炸鬼好脆呀   真係好耐好耐無試過咁喇   所以里奧大人話下次都會再嚟食   哈哈

食食下   里奧大人叫咗碟炒麵   佢同家姐都覺得我食白粥唔夠飽   哈哈

我其實間唔中都食白粥   家姐同里奧大人都話估唔到   我以前好鍾意喺聖羅蘭買饅頭同全麥饅頭食㗎   佢哋都話估唔到我鍾意食   可能覺得無餡   但我話甜甜哋好味呀   我有時都會就咁食幾啖白飯   里奧大人話無味點食呀   我話白飯甜甜哋㗎噃 ~

食完就周圍行   諗住買對鞋   款式啱又做緊特價   但得 Display 咋   不過就算想買都唔會買   因為個 Sales 黑口黑面好無禮貌 ~

咁行下 AEON 超市   但又係好多人   所以行咗一陣都走人 lu ~

依家啲榴槤貴到離哂大譜   家姐話係咪打錯價錢呀   哈哈哈哈   

仍然想睇鞋   所以去黃埔天地行下   見到鞋款啱但鞋底唔啱   好多時都係咁㗎 ~

好搞笑囉   睇鞋嘅地方有麵包蛋糕 Display

經過 DONKI   我話唔會去買嘢啦   咁里奧大人話去洗手間   我就入去睇下   比我買到 Pack 日本洋蔥同埋零食   里奧大人就話我囉   頭先有人話唔會喺度買嘢   哈哈 ~

買完再去成興隆就番屋企喇   原來已經 4 點半了 ~ 

YAGAI DRIED SALAMI CHUCK ($48.9)   喺 DONKI 買㗎   原價 $101.9 就唔會買囉   呢個當小食都唔錯   同埋里奧大人有時午餐焗福麵   叫佢拎幾塊做餸都得   最緊要唔駛加熱呢

巴馬火腿肉塊   好似 $40

今朝見到自己咀唇無咩血色   所以買定 2 Pack 牛梅花肉   下個星期可以煮呢

休息到 5 點 15 分就預備晚餐 lu   今晚又焗又炒   所以要啲時間呀 ~

是日晚餐 - 辣汁焗雞下肶 + 叉燒炒麵 + 菜心苗

辣汁焗雞下肶 - 將 2 隻雞肶去肉比里奧大人做 Lunch Box   剩番 1 隻就聽晚再食   我叫里奧大人不如食埋去啦   但佢話好飽   話今日把口無停過   哈哈 ~

叉燒炒麵 - 今晚一定要煮呀   好在里奧大人依家帶飯   咁可以比多啲炒麵比佢   但叉燒就一定要今晚食哂喇 ~

菜心苗 - 喺另一間買嘅   但唔甜囉 ~    

洗埋碗就沖涼   之後休息喇 ~

繼續睇福寶   睇到 11 點都瞓覺 lu ~