焗豬扒飯 + 酥皮湯 + 燒賣粉果 (外賣) ( MAY-2008 )

今日瞓到 3 點幾先叫做好啲有胃口   所以里奧大人就拿拿聲去買嘢比我食   成日無食嘢   所以要食啲比較易消化嘅食物   就係粟米磨菇粥喇 ~

之後一齊睇下電視   越睇越攰   又瞓着咗喇   醒咗真係唔敢再瞓   如果唔係夜晚瞓唔着仲慘 ~

突然好想食酸嘢   所以就叫里奧大人去大家樂買焗豬扒飯加酥皮湯   再加燒賣粉果   最後飯同湯都食唔哂   嘥哂 ~

雖然全日都唔係咁舒服   但得到里奧大人嘅超體貼勁關懷   要咩有咩   叫咩做咩   發脾氣都會體諒妳   又確實令我好感動嘅   所以有時病下都幾好嘅 ~

車仔麵 (外賣) ( MAY-2008 )

尋晚放工要即刻走喇   因為約咗人上屋企換燈   本來唔想換住   但係夏天一開窗   就會好多嘢飛入去燈罩入面   要清洗好麻煩   所以索性換哂啲燈算喇 ~

好在早番到屋企   拿拿聲用垃圾袋舖枱面 鞋櫃 地櫃 床   如果唔係整到全部都係灰就難清理㗎喇 ~

話明 7 點半   點知成 8 點先到   整到成 9 點先搞掂   自己又唔係咁舒服   所以叫里奧大人買車仔麵食算喇 ~

~~~~

今朝北上   唔記得大陸有小黃金週   好在中醫師有開診咋   如果唔係就白白浪費咗半日嘅 A/L 喇   因為每月一到唔多舒服   又無咩胃口   所以睇完就即刻搭車番屋企休息喇 ~

 

一早諗好咗   睇完中醫就陪里奧大人攞功課再去篤波   點知最後自己就要喺屋企休息   得里奧大人一個人孤令令去攞嘢   好似好可憐咁 ~

瞓咗成日都仲係無咩胃口   所以里奧大人又要孤令令買車仔麵番屋企食   而我就係咁瞓係咁瞓 ~

蒿麥冷麵 + 餃子 + 牛油香草粟米 + 煙三文魚 (外賣) + 蕃茄薯仔紅衫魚湯 ( MAY-2008 )

尋日五一勞動節   所以有勞動嘅就要放假一天   不過勞動假唔係比妳休息   而係比妳更加勞動 ~

 9 點半里奧大人就起咗身   悶悶不樂咁喺廳睇書等我起身   好在我咁啱起身去洗手間   見到佢咁可憐   .所以我都唔瞓   一齊去食早餐喇   食腸蛋煙肉公仔麵   里奧大人就食炸菜肉絲麵   個麵雖然白雪雪無咩味咁   但其實好好味 ~

番到屋企同里奧大人一齊執書櫃   里奧大人終於育放棄儲咗多年嘅公仔書   咁樣個書櫃就可以清咗三分一喇   仍都可以將放喺其他櫃嘅書放埋一齊再分類   真係好整齊呀 ~

執咗個幾鐘就同里奧大人做機   好辛苦做咗半個鍾跑步機先消耗咗 100 卡路里   咁我咁食法   真係跑半日都唔掂呀   所以我決定唔比自己食咁多   真係要減肥   唔係 Keep Fit 喇 ~

之後再去買防潮防臭用品   再去街市買餸菜   太耐無滾湯   所以買咗蕃茄薯仔 ($9) + 3 條紅衫魚 ($13) + 3 支粟米 ($7) + 大木瓜 ($12) 就走喇 ~

番到屋企熨衫   沖埋涼就執下嘢   又已經 2 點半   時間過得真係好快   又要食 Tea 喇   里奧大人想去麥記喎   是但啦   橫掂我都好想食 Shake 薯條   食咗至尊漢堡餐 + 魚柳包 + 紅豆批   樣樣都好食   但個批就甜到上腦呀 ~

食到咁飽   當然一定要行下啦   所以就去 Jusco 買晚餐喇   買餃子同三文魚   跟住就番屋企抖喇 ~

執開有條路   所以順便執埋放相薄嘅櫃   以前好鍾意睇番 N 年前啲玉照   但依家勁唔想睇   因為真係脹爆咗好多   好肥膩   依家仲要次次睇親都要鬼鬼祟祟咁睇   因為唔想比里奧大人恥笑呀    
執完相又係時候煮晚餐喇 ~

是日晚餐 - 蒿麥冷麵 + 餃子 + 牛油香草粟米 + 蕃茄薯仔紅衫魚湯

蒿麥冷麵 - 又要煮又要過冷河又要雪涷   我覺得幾麻煩   不過里奧大人話好想食   咁就無辦法啦 ~

 
餃子 - 包裝煮法: 煎 1 分鐘   加少少水冚蓋 4 分鐘   再煎到收哂水同埋黃金色就 OK   但都唔黃金色嘅   煎到甩哂底   同灼嘅一樣款嘅 ~

牛油香草粟米 - 超易整   又好味 ~

蕃茄薯仔紅衫魚湯 - 太耐無滾湯   所以又係滾番呢過好味好味好好味嘅湯 ~

雖然全日都好忙   但我用好輕鬆嘅心情做嘢   所以一啲都唔辛苦   仲好開心   如果平時都學識放咗工都可以用輕鬆嘅心情做任何嘢就好喇 ~

~~~~

今朝遲到   所以只可以去 KFC 買鬆餅 + 奶茶 ($11) 番公司食 ~

唔知點解   無咩 Mood 咁   做咩都懶洋洋 ~

晏晝超開心   因為同媽咪 家姐去大榮華飲茶   食牛骨髓炒麵 + 牛柏葉 + 煎魚餅 + 炸雲吞 + 白蓮蓉包   唔係咁飽   我掛住傾偈傾到唔想食嘢 ~

最後衝刺 @ 元綠壽司 ( MAY-2008 )

本來諗住求其煮一餐   但里奧大人打電話話想同我一齊做機   叫我唔好煮飯喎   咁就可以慳番啲時間   咁又真係慳咗唔少時間嘅 ~

里奧大人就話去元祿食壽司   我真係好開心㗎   因為里奧大人記得上次無食到   要食番補數   所以呢餐真係好窩心呀 ~

今期元綠好抵   有啲手卷係買一送一   所以食咗軟殼蟹手卷 x 2 + 鰻魚手卷 + 三文魚手卷 +  燒魷魚鬚壽司 + 北寄貝壽司 + 天婦羅蟹柳壽司 + 冷辣辣麵 + 地獄煮蜆 + 天婦羅南瓜蕃薯   用埋張 78 折 Coupon   埋單 $150 好抵呀 ~

番到屋企仲可以抖一陣   再同里奧大人做機 ~

綜合丸麵 + 雲吞麵 + 蠔油唐生菜 + 跑步機 ( APR-2008 )

尋日里奧大人要北上   番落香港嘅時候又塞車   而我又唔駛煲中藥   所以就有好多時間   可以他他條條去街市買雲吞 ($12) 同唐生菜 ($6)   番到屋企又可以慢慢拖地同開機洗衫   最正係可以無壓力下咁睇電視   唔駛一路掛住望鐘一路睇電視   真係好正呀 ~

是日懶餐 - 綜合丸麵 + 雲吞麵 + 蠔油唐生菜

綜合丸麵 + 雲吞麵 - 至在清埋啲麵 ~

蠔油唐生菜 - 懶呀   所以蘸蠔油食 ~

食完抖陣   又同里奧大人做機喇 ~

番到屋企沖涼之後就飲杯黑木耳   再食 2 個細布冧   好脹肚呀   所以熨衫當做運動喇 ~

~~~~

今朝天氣好好   涼涼哋咁   如果日日係咁就好喇 ~

今晚可能有機會蒸水蛋   所以早餐唔食三文治   食芝腿菠蘿包 + 咖啡 ($15) ~

晏晝就非常非常非常非常之開心喇   因為媽咪請我.家姐同里奧大人去 Ruby's Tuesday 食嘢呀   有愛心湯飲   又一路食一路傾偈   開心到爆呀   如果我晏晝唔駛番工妳話幾好   呢個 4 月真係好開心呀 ~

粟米燴豬扒 + 湯 + 紅豆年糕 + 跑步機 ( APR-2008 )

呢排瞓得唔好   所以成日都好鬼攰咁   勁辛苦呀 ~

雖然攰   但都唔係好想下下出去食   因為真係好無益呀 ~

是日晚餐 : 粟米燴豬扒 +  湯  + 紅豆年糕

粟米燴豬扒 - 用豉油 + 生抽 + 蒜蓉 + 胡椒粉 + 生粉醃一晚   再加一罐粟米湯同一隻蛋   唔駛加水一齊燴   方便得嚟又好好味 ~

湯 - 隔夜湯只需翻滾就飲得   又係好方便 ~

食完之後就同里奧大人去做機   兩個人一齊做真係無咁悶呀 ~

尋晚睇下個廚櫃   發覺有啲罐頭擺咗 2 年   但又未過期   都唔知食唔食得 ?!   仲有就係雪櫃盒韓式辣椒醬   用咗 1 次已經擺到過期 (15-3-2008)   但我真係唔捨得掉   我會照食   所以應該會留到 6 月到先掉 ~

咁尋晚食飯又好似食唔飽咁   所以整埋啲過期 (19-4-2008) 嘅年糕   加埋紅豆蓉一齊煮   真係好好味   但就好飽肚下囉 ~

尋晚睇無線 "一百萬人的故事"   講啲低收入人仕   聽完真係覺得佢哋好慘   但有啲又唔抵爭   好似有個後生仔怨收入少   拖都唔敢怕   無錢喎   但咁點解你自己之前唔勤力啲讀書呢 ?!   仲喺度怨人   有個師奶又話自己有 3 個小朋友   所以啲錢緊緊夠用   咁點解妳又生咁多呢 ?!   我真係好唔明白囉 ~

睇睇下有啲掹   所以走去瞓覺喇 ~

~~~~

今朝好早番到公司附近   所以可以食米粉   食五香肉丁腸仔米粉 + 奶茶 ($18)   諗住慢慢嘆   點知有個人坐喺我對面   嗰個人係成日望住我   疑似地盤佬   佢啲指甲有黑邊   同埋啲手指好粗   唔似做文職囉   已經第 3 次見到呢個人㗎喇   次次都望住我笑   咁我當然又會笑啦   唔通就係咁樣就出事?!   食食下 Feel 到比佢昅住   點知一望佢   佢就扮望第到   到第二次我就巢銀包...又 Feel 到比佢昅住   一望又係扮望第到 ~

之後番到菇場   真係悶到爆呀 ~

晏晝帶飯   比啲同事搞到無咩胃口   因為食飯前 Toilet 塞咗   佢哋話啲嘢就嚟浮到出嚟喇   妳話啦   聽完仲有咩胃口食吖 ~

叉燒蛋絲炒米粉 + 金銀蛋菠菜 + 淮山杞子圓肉茨實當參石斛豬展湯 ( APR-2008 )

尋晚雖然夜瞓   但都堅持要番教會   因為之前太忙   成個月都無番過   所以同里奧大人一齊 10 點起身   梳洗後就打的去教會附近食早餐喇   諗住祟拜完就即去做機   咁要食飽啲   食炸菜肉絲米粉配腸仔蛋   而里奧大人就要配火腿炒蛋嘅   食完就去祟拜喇 ~

本來諗住聽完道就即打的去做機   點知 12 點 40 分都仲未講完   所以唔做機喇   因為體育館 1 點 Close 嘛   橫掂唔駛做機   .所以同里奧大人逛街市買餸   買咗 1 斤菠菜 ($6) 再買豬展 $20 同 3 塊豬扒 ($15)   豬肉檔阿婆都唔知係咪未瞓醒   我好清楚講話要 $20 豬𦟌   佢居然斬 $36 比我   我話唔要咁多   $20 夠喇   咁啲豬扒又切到厚厚咁   真係唔知佢做咩嘅   咁厚好難煎家嘛 ~

之後同里奧大人慢慢行番屋企   再去 Jusco 買叉燒 ($18)   之後再睇下有咩鞋款   睇睇下咁就已經成 2 點幾   要番屋企放低嘢又去 Tea 喇   去餐廳食 XO 醬炒公仔麵 同 三絲炒意粉   其實好怕肥   但又真係好想食囉 ~

本來我又諗住食完就去公園散步   但有輕微頭痛...唔想吹風   所以就改為同里奧大人行商場喇   終於行下行下搵到里奧大人想要嘅款   咁啱我又有想要嘅兩款鞋   買完就走喇   再行多陣   里奧大人又有鞋啱心水   所以順便買多兩對   拎住 5 對鞋真係唔番屋企唔得喇 ~

番到屋企已經 5 點半   要快快手咁煲湯喇 ~

是日晚餐 - 叉燒蛋絲炒米粉 + 金銀蛋菠菜 + 淮山杞子圓肉茨實當參石斛豬展湯

叉燒蛋絲粉炒米粉 - 唔想食飯   所以煮超簡易米粉 ~

金銀蛋菠菜 - 菠菜含有酸性會破壞體內鈣質   所以滾完菠菜嘅水千萬唔好要呀 ~

淮山杞子圓肉茨實當參石斛豬展湯 - 滋陰補腎   一個好好嘅湯水 ~

食完再沖埋涼就同里奧大人睇番獎門人   好鬼搞笑   尋晚仲一路食蝦片一路睇   真係勁嘆呀 ~

~~~~

今朝又係涷涷哋   呢啲天氣真係好舒服囉 ~

星期一嘅早餐多數想食甜嘅   所以就食芝腿菠蘿包 + 奶茶 ($15) ~

番到公司做埋少少嘢就有大把私人時間喇   晏晝帶飯   點知里奧大人同啲同事失散咗   所以搵我陪   我食完就去咗 Cafe 搵里奧大人   佢食咖啡牛腩意粉 Set Lunch   但份量好多   所以又要我陪食   真係飽到上心口呀 ~

番到公司附近   麥當勞有流動車派即磨咖啡   唔駛排隊   所以拎杯試下   味道一般啫   仲諗住好香咖啡味添 ~