鮮蝦雲吞 (外賣) + 菠菜 + 芫茜皮蛋魚片湯 ( 3-AUG-2009 )

( 3-AUG-2009  MON )

今朝去美心食炒米粉 + 奶茶   因為坐得比較舒服   同埋比較靜   我好怕晨早流流咁嘈㗎 ~

個天又係好焗   番到菇場特別攰呀   又靜   好在唔悶咋   一日咁長真係好難過呀 ~

天氣焗 + 唔夠瞓真係無乜胃口   所以同里奧大人去食燒豬肋骨沙律餐    不過今次啲沙律麻麻哋   啲薯仔生生哋咁嘅   但係件奶醬多士就好好味囉   厚多士真係好食好多呢 ~

里奧大人牙肉腫   所以唔滾啖下火湯都唔得啦   不過就唔會煮餸   太攰喇 ~

是日晚餐 - 鮮蝦雲吞 (外賣) + 菠菜 + 芫茜皮蛋魚片湯

鮮蝦雲吞 (外賣) - 6 粒 ($12)   以前好大粒   依家細咗好多   不過啲蝦仲係咁爽呢 ~

菠菜 - 就咁灼就算喇   點辣椒豉油都唔錯吖 ~

芫茜皮蛋魚片湯 - 下火湯   希望飲完真係會下火啦 ~

星林居雲南米線餐廳 @ 尖沙咀 ( 2-AUG-2009 )

我嘅豬軟骨腐竹米線 (走肉碎 ) (小辣) - 走咗肉碎一啲都唔辣   但唔走又好多肥豬肉粒喎

里奧大人嘅豬腩肉油麥菜米線 (小辣) - 豬腩肉超入味  勁正呀

晴晴嘅雞中翼豬紅豬軟骨米線 (小辣) - 聽講雞翼又係好入味

水姑嘅餸   因為有 6 樣餸   所以同米線分開上 - 有豬皮 餃子 炸醬 腐竹   其他唔知係乜   豬皮又係勁入味   好食呀

鹹檸七 - 將隻鹹檸檬 "篤" 得太犀利   飲到最尾 1 / 3 好鹹呀   不過就好鍾意呢隻酒杯   好似豪飲啤酒 Feel 咁呀

柑桔蜜 - 飲咗一啖  唔記得點咯   不過又係好鍾意呢隻杯囉

( 2-AUG-2009  SUN )

10 點起身喇   本來諗住行路番教會   但好焗   最後都係要打的番教會   啱啱沖完涼真係唔想咁快就立黐黐呀 ~

   
早餐去教會附近食   唔駛咁趕嘛   平時已經趕啦   唔想放假都咁趕呀 ~

番完崇拜就要番屋企喇   因為家姐去我屋企呀   尋日無拎到泡菜走   所以家姐特登拎番比我呢   傾下傾下已經 2 點半 所以去食 Tea 喇   多人食嘢真係開心啲呀 ~

我嘅墨丸腐皮角金邊粉 / 里奧大人嘅豉油王肉絲炒麵 / 家姐嘅干炒三絲意粉

天氣實在太焗喇   企喺度啲汗都直流咁呀   番到屋企又要再沖多次涼   之後就去醫院探奶奶喇 
 一早講好話去尖沙咀食米線   水姑一家又有興趣喎   所以一齊打的去尖沙咀   仲平仲方便呀 ~

難得去食米線   點知個頭痛   無乜心機   食之無味咁   同埋今次走肉碎   所以唔辣   食得唔過癮呀 ~

住家飯 @ 家姐屋企 ( 1-AUG-2009 )

( 1-AUG-2009  SAT )

早餐去美心快餐食炒麵   估唔到有炒麵食   所以好開心呢 ~

今日同媽咪去家姐屋企打牌食飯   所以番到菇場   個心完全唔喺菇場度呀 ~

晏晝約咗里奧大人 媽咪同家姐元朗等   又係去田中食晏   因為上次實太抵食喇   又新鮮   不過今次失色咗呀   都係無期望好啲 ~   

食完就去家姐屋企打麻將喇   3 點打到 7 點半   財散人安樂   但點解得我一個輸嘅   好在里奧大人比番啲啲我   咁我唔駛咁傷   嗰一刻覺得里奧大人好好呀   哈哈 ~

最鍾意同屋企人打麻將   打下笑下食下傾下   時間過得特別快㗎 ~

8 點幾食完飯   坐一陣   Upload 下相   差唔多 9 點半先走   送埋媽咪去巴士站   番到屋企都差唔多 10 點半 lu   好眼瞓呀 ~ 

食棧 @ 大埔 ( 31-JUL-2009 )

香茅豬扒湯金邊粉 / 馬拉盞炒通菜 / 石榴子冰

( 31-JUL-2009  FRI )

話咁快又 Happy Friday   期待放假嘅心情真係好開心呢 ~

番到菇場又係好開心   因為有錢賺又他條   呢份工真係養到我肥肥白白呀 ~

晏晝同里奧大人去食粉麵   呢個天時真係唔知食乜好   不過食乜都唔緊要   最緊要有杯凍飲呢 ~

牛丸河 / 炸魚片頭麵

放工同里奧大人去醫院探奶奶   本來話買燒賣比里奧大人食   佢又話唔駛   點知去到醫院話肚餓    去 OK 買咗個杯麵   見佢食我又想食喎   買咗盒 XO 醬蘿蔔糕   毫無味道   食麵粉咁 ~

7 點半就要走喇   又未肚餓   所以番屋企附近先食晚餐   突然又好想食越南湯粉   所以就去食棧開餐喇 ~

粟米龍脷柳拌豉油王蔥粒炒飯 + 牛油香草粟米 ( 30-JUL-2009 )

( 30-JUL-2009  THU )

今朝里奧大人 7 點 40分打比我   話吐露港勁塞車   半個鐘頭都無郁過   所以叫我搭火車好啲   因為唔知塞到幾時喎 ~

咁搭火車番工啦   不過就好鬼煩囉   因為要坐 Shuttle Bus 到火車站   坐完火車又要轉地鐵   轉到頭都暈   要 1 個鐘多啲啲先番到菇場   仲要企足全程   又多人   最鬼憎呀 ~

無啦啦又瞓矮頸喎   成程車拎住個袋又重喎   真係好想叫人起身比個位我坐呀 ~

食埋早餐先番菇場   不過就要飲凍奶茶囉   再飲熱就會好遲㗎喇   費事啦   不過覺得飲凍奶茶係無咁提神咁   唔知點解 ~

番到菇場無哂心機啦   條頸痛到顛   慶合合咁好辛苦呀 ~

晏晝無啦啦落大雨   所以同里奧大人臨時改去大家樂   但超多人   第時都係去附近茶餐廳好啲   唔駛嘥時間等位 ~

次次晏晝食飯就會好眼瞓   飯氣攻心好難頂   做乜都無原動力   只係好想番屋企瞓覺 ~

是日懶餐 - 粟米龍脷柳拌豉油王蔥粒炒飯 + 牛油香草粟米

粟米龍脷柳拌豉油王蔥粒炒飯 - 本來想整意粉   但又唔想開焗爐喎   又突然記得有冷飯   所以整咗呢碟飯   個粟米汁真係唔知想點   唔識打茨   就咁用乾蔥蓉 + 雞蛋 + 粟米再加啲水  再加生粉水  煮嘅時候有汁咁㗎   但上碟無哂汁咁喎 ~

牛油香草粟米 - 唔想淥菜   因為唔想洗菜摘葉浸菜   好攰唔想攪咁多嘢   所以整粟米算喇   但唔知係咪個人作唔舒服   對住啲粟米唔係話勁想食   定係開始厭咗呢 ~

飯後果食榴槤   街市買 $15/Pack 咋   我見好靚咁   摸落又腍腍哋又平   一於買嚟食   估唔到真係又甜又多肉   食咗幾舊已經飽喇   超滿足呀 ~

蜜糖豬扒 + 涼拌皮蛋 + 菜心 + 蕃茄湯米線 ( JUL-2009 )

( 27-JUL-2009  MON )

落雨天陰陰 + 唔夠瞓 + 星期一   真係好痛苦呀 ~

我幾趕都好   都會去食早餐   雖然係趕   但總好過番菇場食   一個人坐喺自己位食早餐   感覺好悶呀   同埋番到菇場已經有啲同事開緊工   我食早餐都唔好意思啦   咁不如出去食   遲少少番好過呀 ~

今日媽咪煲咗北芪淮山圓肉杞子山斑魚湯   所以同埋里奧大人又去美心皇宮飲茶喇   飲湯飲到飽唔想食   叫咗一個餐 (2款點心 + 雪菜火鴨燜米)   呢個燜米好好味   濕濕哋咁   如果自己可以整到咁就發達喇 ~

今晚放工又可以同里奧大人齊搭車番屋企   雖然成日見   但我都覺得好開心呀 ~

是日懶餐 - 蜜糖豬扒 + 涼拌皮蛋 + 菜心 + 蕃茄湯米線

蜜糖豬扒 - 醃咗一晚嘅豬扒   煎香再掃蜜糖   超正呀   呢次係我第一次煮到啲豬扒唔 "鞋" 㗎咋   唔知係咪因為醃嘅時候落多咗生粉呢 ~

涼拌皮蛋 - 好想食皮蛋但無尖椒   所以用蒜蓉+蔥花再加麻油   味道都唔錯噃   不過隻皮蛋有啲怪呀 ~

菜心 - 尋晚食剩半斤嘅菜心   用薑蔥落拌嚟食   真係好好味㗎   好過食蠔油   又貴又無益 ~   

蕃茄湯米線 - 雖然都係即食制品   但感覺好健康咁呀 ~

我真係辛苦命   如果屋企有嘢未做呢   我會成日籮籮攣咁   好想快啲搞掂   同埋唔鍾意做啲唔做啲咁   所以尋晚洗完碗就抹地   沖完涼再熨衫   真係有啲虛脫呀   但唔做又唔安樂喎 ~

做完舒服哂   個人都開心啲呀   所以食我最鍾意嘅薄荷朱古力雪糕嚟獎勵自己呀 ~

栢檔無骨海南雞飯 @ 佐敦 ( 29-JUL-2009 )

( 29-JUL-2009  WED )

今朝早咗出門口   所以可以他他條條去遠啲食早餐   早餐又米粉又飲熱嘢   但坐喺冷氣地方真係唔覺熱   點知一出門口呢   熱到暈   行到番菇場成身濕哂   勁想番屋企沖涼呀 ~

番到菇場又要 Pack 嘢   熱到出油呀   立黐黐超辛苦呀 ~

晏晝無力行咁遠   所以同里奧大人去麥記食 Lunch   無啦啦又覺得啲薯條好好味   唔知係咪頭先太體力勞動得滯呢 ~

番到菇場再 Pack 過   差唔多 3 點幾就攪掂   真係有啲虛脫呀   但又有嘢做喎   想抖下都唔得添 ~

放工同里奧大人去醫院探奶奶   之後就去佐敦附近食嘢 ~

今次去栢檔去骨海南雞飯   又話去骨   但點解雞肶同雞翼係有骨嘅   油飯又唔油   不過都無乜所謂   最緊要係有啲酸辣汁   如果自己識整就好喇 ~