煎帶子 + 西蘭花 + 豬腳薑 (外賣) ( 4-OCT-2009 )

( 4-OCT-2009  SUN )

今朝食完早餐番教會   之後再行超市入貨   番到屋企已經 2 點喇 ~

尋晚唔願做   所以留番今日做   執下抹下又要落街食 Tea   我其實唔多鍾意太晏食嘢   因為變相又要夜食晚飯   洗埋哂所有嘢   沖埋涼就要瞓   好似無哂時間咁 ~

今晚其實唔駛點煮就可以開飯   因為尋晚水姑特登煮咗啲梅菜排骨 & 燜冬菇比我   所以我係咁易買啲菜就得   正呀 ~

是日懶餐 - 煎帶子 + 西蘭花 + 豬腳薑 (外賣)

煎帶子 - 里奧大人問點解要煎帶子   因為已經有兩樣餸可以唔駛煮   但實不相暪   帶子仲有幾日就過期   又驚今晚唔煮就唔記得   所以非食不可呢   都唔知問咁多嘢做乜 ~

西蘭花 - 就咁灼熟就算   無加任何油鹽   又無點豉油蠔油   咁樣清清哋都好食 ~

豬腳薑 (外賣) - 百佳買㗎   真係唔錯   下次會再買嚟食呀 ~

中秋做節 @ 姑奶屋企 (大埔) ( 3-OCT-2009 )

豉油雞 / 白切雞 / 烤羊架 / 生炒排骨 / 腐皮卷 / 蒸魚 / 燜豬手 / 灼生菜 - 走油 / 勁薑叉燒炒飯 / 木瓜生果沙律 / 菲律賓甜品

( 3-OCT-2009  SAT )

今日假期   所以約咗我家姐 里奧大人家姐 & 姐夫一齊食早餐之後打麻將   好耐無打   所以好開心呀 ~

今次里奧大人無落場   所以佢喺房睇 DVD 自得其樂   我哋就喺出面撕殺喇 ~

次次打麻將都唔會落街食 Tea   多數叫外賣   最緊要快   食完又再打過   打到 6 點半就收工    一齊坐的士去姑奶屋企做節呢

司華力腸配薯條 / 星洲炒米 / 鹹魚雞粒炒飯 / 公司三文治

今次又齊哂人   但因為做節   所以食中菜   我都係鍾意食 雞翼 牛扒 壽司多啲 ~   

食完泡茶傾偈   諗住 9 點走   點知又傾下傾下成 10 點幾先走   番到屋企成個人散哂 lu ~  

住家飯 @ 媽咪屋企 ( 2-OCT-2009 )

苦瓜排骨 / 豉油王煎蝦 / 蝦膠魚肉釀茄子 & 豆卜 /  蒸桂花魚 / 蠔油燜鮮冬菇生菜 / 
淡菜豆腐魚湯

( 2-OCT-2009  FRI )

唔知道菇場對面間餐廳休息   所以去咗另一間食   呢個早餐超級難食嘅早餐 ~

  
老闆放假   所以又勁 Free   加埋今日 Happy Friday   聽日又中秋假期   真係無可能唔開心囉 ~

好快就 Lunch Time   但仲諗起今朝超難食嘅米粉   所以都無嘢想食   只想食包   最後去咗大榮華買咗個大包   食完都幾滯呀 ~

食完無聊 Check Email   估唔到有得 4 點收工   真係意想不到   因為諗住老闆唔喺度都應該唔會放早   同埋聽日都係假期   所以無啦啦有得放早真係好開心呀 ~

里奧大人接我放工   陪佢去大家樂食 Tea 再行陣就去媽咪屋企做節 ~ 

食完食下生果同月餅   本來諗住買六黃比媽咪   但估唔到美心話一個月前已賣哂   我記得上年都係好近中秋節先買都仲有貨喎   好在家姐就一早買咗四黃蓮蓉   不過今年啲月餅 Overall 都唔好味   點解會咁㗎 ~

難得聽日假期   所以同里奧大人行 APM 睇蠟像   超真呀   夜晚經過見到都幾驚下 ~

京蔥雞柳年糕 + 菜心 + 冰皮月餅 (楊枝金露) ( 1-OCT-2009 )

( 1-OCT-2009  THU )

尋晚瞓得勁差   依排都係瞓得唔係太好   諗到做人真係好化學咁   我嘅保險界朋友   原來 8 月中無啦啦走咗   本來唔知㗎   因為里奧大人有嘢搵佢   先知佢已經唔喺度   聽完真係好 Shock   加上奶奶又走咗   之前朱朱又走   加加埋埋真係好多嘢諗呀 ~

好在今日係假期   瞓得唔好可以再瞓啫 ~

依家屋企附近啲茶餐廳嘅早餐時間多數至到 11 點半   咁就唔駛咁趕   真係好好多呀 ~

食完買餸就番屋企睇 DVD   睇完就食 Tea   假期多數咁樣過   最緊要他他條條   真係唔想日日都咁緊張呢 ~

是日懶餐 - 京蔥雞柳年糕 + 菜心

京蔥雞柳年糕 - 8 蚊 3 大條京蔥   個個見到我拎住都望下果 3 條京蔥   本來仲想買嘢都費事喇     今次用燒汁整嘅   自己想食年糕   所以加埋一齊煮   里奧大人一見到啲年糕就即刻話   見到年糕都驚呀 ~

菜心 - 8 蚊 1 斤   但我買 5 蚊就覺得啱啱好 ~

飯後甜品 - 冰皮月餅 (楊枝金露) - 家姐之前買比我㗎   無乜特別   同綠豆蓉一樣囉   得嗰啲啲楊枝金露味咋 ~

元綠壽司 @ 大埔 ( 30-SEP-2009 )

( 30-SEP-2009  WED )

今朝有胃口啦   食腿蛋治烘底 + 奶茶   但麵包烘得太乾   超難啃呀 ~

晏晝想食啲熱嘢   買沙爹牛肉米粉   點知油到爆   又係超難食   食到一半食唔落喇 ~

夜晚終於有胃口啦   想食濃味嘢   所以去元綠壽司   因為落大雨唔想行咁遠呢 ~

( 25-SEP-2009 ) + ( 26-SEP-2009 ) + ( 27-SEP-2009 ) + ( 28-SEP-2009 ) + ( 29-SEP-2009 )

( 25-SEP-2009  FRI )

今日請假   因為呢日係奶奶安息禮拜 ~

同里奧大人食完早餐   番屋企再 Prepare 嘢   梳洗後就陪我覆診   感謝神   醫生話我報告好好   同埋差唔多一年都無翻發   所以我依家只需要一年覆診一次   實在好開心呢   但仍然要食鐵丸   仲諗住睇住可以即走添 ~

取藥處要等一百個號碼先到   所以同里奧大人去 Canteen 醫肚   啲嘢食難食到不得了   叉燒湯濛無味嘅   湯都無味   超難頂 ~

食完就再去取藥處拎藥   時間啱啱好   之後拿拿聲打的去世界大酒店 lu ~

感謝神保守帶領   安息禮拜一切都好順利 ~

完畢之後就一齊去 Food Court 食嘢   食完就各自歸番屋企休息 ~

( 26-SEP-2009  SAT )

朝早同里奧大人去紅磡火車站麥記食早餐   估唔到都好多人喎 ~

食完就去大酒店   再去火葬場   之後去食解穢酒   所有嘢終於搞掂哂 lu ~

番到屋企好攰   所以都無煮飯   出街食飯算喇 ~

( 27-SEP-2009  SUN )

今朝番祟拜   所以喺教會附近食早餐 ~

因為 11 點幾先食完早餐   所以多數 3 點幾先食 Tea   食完再去買餸   番到屋企已經 5 點   時間真係好唔見駛呢 ~

是日懶餐 - 勝瓜魚滑湯

勝瓜魚滑湯 - 2 條勝瓜 + $10 鯪魚肉   呢個湯超方便又飽肚   飯都唔駛食呀 ~

( 28-SEP-2009  MON )

每月一痛   雖然唔係話好痛   但個肚成日扯住扯住好辛苦   但又唔想成日請病假   所以呢日喺菇場係咁瞓   放工即打的番屋企   好在有 8 折   埋單 $110 算抵啦   6 點番到屋企喎   如果坐巴士要 6 點 40 分先番到呀   我真係頂唔順呀 ~

呢日又全日無食嘢   一食就想嘔   所以番到屋企即刻沖涼瞓覺   舒服好多呢 ~

( 29-SEP-2009  TUE )

呢日都仲係有啲唔舒服   同埋瞓得唔好   個人超攰超攰又無胃口喎   所以勁想快啲放工番屋企   本來想坐巴士   但諗諗下都係唔好   所以又打的   嚟緊呢個星期要節衣縮食喇 ~

今日又全日無食過嘢   但番到屋企沖過涼就舒服好多   開始精神同有啲胃口   勁想食燒賣腸粉   所以里奧大人即刻買番屋企喇   因為過咗一陣又可能唔想食呢 ~

釀尖椒 + 蕃茄薯仔排骨湯 + 冰皮月餅 (綠豆蓉) ( 24-SEP-2009 )

( 24-SEP-2009 THU )

今日 Off   因為想陪下里奧大人   不過其實自己都想偷懶嘅   都係唔好講到自己咁偉大咁呢 ~

唔知好彩定唔好彩   今朝煤氣公司有人驗查煤氣    哎呀   我哋又要換煤氣喉呀   因為上層啲單位應該爆過鹹水   所以腐蝕咗條喉   一定要換   因為驚唔知幾時會流煤氣呀   又要比 $3,300 呀 ~

朝早同里奧大人 & 2 姑奶一齊食早餐   食下傾下已經 12 點幾   點解時間過得咁快㗎   之後同里奧大人去買餸   咁就過咗半日喇 ~

3 點幾先食 Tea   今次又試食冬蔭功魚片頭湯粉   但都係接受唔到椰奶味   我記得喺泰國飲嘅冬蔭功好好味㗎噃   無咁重椰奶   點解咁㗎 ~

是日晚餐 - 釀青椒 + 蕃茄薯仔排骨湯

釀青椒 - 一份尖椒只係 $5   再買 $10 鯪魚肉咁就可以整一樣餸   真係好抵呢   不過我覺得釀青椒都幾麻煩   今次用鐵鑊煎   因想要有金黃效果   雖然落咗好多油   但都同樣痴鑊   麻麻煩煩    又再用番易潔鑊煎   估唔到都會有金黃效果   之得一早用易潔鑊啦 ~

尖椒皮蛋 - 突然好想食皮蛋   加啲尖椒 麻油 蒜蓉一齊食又唔錯噃 ~

蕃茄薯仔排骨湯 - 4 個蕃茄 + 1 個中薯仔 + $10 排骨   呢個湯超甜   又有營養   不過就唔鍾意又批又切囉 ~

冰皮月餅 (綠豆蓉) - 家姐之前買咗 3 Pack 唔同味嘅冰皮月餅比我   今次試綠豆蓉   勁失望   無味   口感又唔好喎   同幾年前食嘅差好遠呢 ~