打邊爐 @ 教友屋企 ( 28-FEB-2026 )

準備開餐

另一邊

慢活組係竹蔗茅根馬蹄湯底   快活組就係蕃茄豆腐湯底

姊姊 A 包嘅芹菜豬肉餃同韭菜豬肉餃   佢哋一家三口包咗 11 盒餃子   每盒 20 隻   皮薄餡靚   個個都話好好食呀

姊姊 R 整嘅碎雞件   姊妹 J 話啲雞好滑   不過我無食到呀

蜆同蠔好似有幾碟   因為姊妹 L 不斷拎食物上枱   有啲未食完就 Refill   所以我都影唔切呀

脆肉鯇

蝦

響鈴 / 金菇 / 杏鮑菇 / 蝦滑 / 墨魚滑 / 粟米 / 炸魚皮

仲有 4 斤生菜同西洋菜   姊妹 L 拎樽腐乳比我哋蘸   初初無咩人話要   之後佢講話係非遺   個個就爭住要   真係笑死   不過食落嘅口感同味道又真係同平時食開嘅唔同呢

我哋食哂肥牛   姊妹 L 話再比啲好嘅牛肉我哋食   咁出面個袋係紅色嘅   弟兄 A 話佢只係換咗個袋之嘛   哈哈   好鬼衰呀   原來牛小排已經加到 $198/磅   我睇佢買嘅份量都起碼有 5 磅呀

( 28-FEB-2026  SAT )

感恩一瞓天光呀   不過仲係有啲攰 ~

今朝同里奧大人去買早餐   買完就去佢公司   咁就可以慢慢嘆喇 ~

菇場唔忙呀   溫總同阿齋都問我做咩唔放埋今日   我話半日好易過   唔想嘥半日假   哈哈 ~

又可以做自己嘢到放工 ~

睇嚟今日都落足全日雨   所以好似陰陰涼涼咁   但其實好潮濕   最驚呢啲天氣   個人特別攰咁㗎 ~

我同里奧大人都未餓   所以差唔多 2 點 45 分先去食下午茶 ~

常餐 (茄牛米線 + 玉桂焦糖多士 + 熱飲 $33) - 呢個下午茶真係超級抵   同埋份量都唔少

食唔哂玉桂焦糖多士呀   要留番聽日食喇

食完都番屋企抖下   里奧大人沖埋涼就瞓晏覺   我又唔係咁眼瞓   但就唔想郁   哈哈 ~

4 點半出發去九龍灣   今晚小組團拜   好感恩今晚里奧大人番早   如果唔係就嚟唔到㗎喇 ~

去到 ML 屋企樓下見到 F 兩公婆   咁可以一齊上去喇 ~

J 兩公婆 + JO 兩公婆 + A 兩公婆打緊奉獻牌   JA 兩公婆都到咗   之後細老闆嚟咗   咁坐隔離就一齊傾偈啦   里奧大人就同 A 傾偈   好難得咁樣坐埋一齊傾偈呢 ~

弟兄 A 拎咗支紅酒一齊飲   不過個木塞只係抽咗一半   好在最後都抽哂出嚟

仲有好多零食   不過我無影到

姊妹 J 喺帝苑買嘅馬蹄糕   仲有姊妹 L 整咗海帶湯同羅漢果茶

傾傾下偈   弟兄 JA 喺群組問係咪 XX ?!   我哋話係 XX 呀   最搞笑係屋主無講邊度囉   只係講幾座幾室   可能佢覺得個個都知佢住邊呀   咁我問佢有無去錯 ?!   弟兄 A 話就算去咗都唔話你知啦   哈哈 ~

T 兩公婆都嚟埋   我話人齊可以開餐啦   之後個個一齊話 TT 未到呀   居然唔記得 TT   我即刻話 TT 係喺我心中   哈哈   無耐 TT 都嚟埋   真係可以開得餐喇 ~

初初諗住一路食一路等㗎   因為有啲弟兄姊妹未咁早到   但感恩 6 點半都齊哂人呢 ~

弟兄 AS + J + JA + ML + Jack 係快活組   姊妹 J 坐正中間就最好囉   可以兩邊食   哈哈 ~

我哋嘅鍋比較慢   所以我話呢邊係慢活   另一邊個爐真係好快熱㗎   佢哋真係密密食   我哋仲搞笑   換咗 3 個鍋呀   弟兄 A 話可能啲水未滾就落餃子   因為次次都係餃子皮黐底呀 ~

個個見到個鍋無嘢就會落咁啲嘢   ML 想直接倒盒豆腐落鍋   我同 TT 即刻用手檔住呀   佢哋話我哋反應好快   我話梗係啦   彈到塊臉好痛㗎 ~

細老闆話睇我 FB   好多時都啲嘢食都係家姐比   姊妹 J 話仲有朋友比呀   佢話成日會睇我寫啲咩   又話我煮嘢好叻   我話我煮嘅嘢非常簡單   弟兄 A 先係高手啦   個個都話佢煮黃金蝦好食呀 ~

唔知邊個話如果客廳飯廳各一張枱打邊爐就可以鬆動啲   但 ML 想坐哂一邊就方便傾偈   之後 A 話要換張 6 人梳化啦   再話要換埋個爐   仲要換多個大雪櫃   話比半年時間比佢   我哋半年後再嚟 Check 下   哈哈 ~

食完都差唔多 8 點半   之後經文分享完就玩遊戲喇 ~

玩 7 字拍   里奧大人 27 拍完就到我拍   J 即刻指住我大聲叫呀   我話咩呀   我啱呀   之後大家一齊話佢做咩隊人呀   佢要拎盒餃子番屋企呀   哈哈 ~

本身有個捉蟲遊戲   但大家左加手好唔協調   所以要放棄 ~

姊妹 G 話玩獎門人個遊戲啦   佢係第一個講食物   之後我係第 3 個講   但話我量數唔啱   咁我即刻話我唔識玩呀   另一邊開始玩先啦   所以我變咗第 19 個玩   大把時間我諗呀   但真係拍到大脾痛   哈哈 ~

有弟兄玩得叻少少   姊妹 R 就話可以去日間老人院   再隔多幾個玩就變咗暫託   之後到我哋呢邊玩直頭話老人院都唔收呀   真係笑到大家肚痛   一路玩一路笑到唔知自己講咩   仲話玩一轉已經要成個鐘呀   哈哈哈哈 ~

弟兄 JA 要番工要 9 點走   不過我同里奧大人玩到 9 點 15 分都走喇   佢聽日要開會有嘢要預備   所以唔想咁遲走呢 ~

今次重新番小組   成員已經有變動   4 對夫婦走咗但有 4 夫婦入嚟   人數係同以前一樣   感恩大家都傾得埋   始終小組生活都好緊要   大家可以互相扶持呢 ~

番到屋企都 10 點   開埋機洗衫先沖涼 ~

今晚真係辛苦哂 ML 兩公婆   又買又洗   清潔完都 11 點幾 ~

里奧大人 11 點瞓覺   我仍然係興奮狀態   差唔多 12 點先瞓呀 ~

蘇曉玥江南小食 ♡ 深圳 DAY 3 ( 27-FEB-2026 )

( 27-FEB-2026  FRI )

尋晚瞓得都唔錯   不過半夜又覺得熱熱哋咁呢 ~

今朝仍然係 8 點 45 分起身   沖埋涼就去食早餐喇 ~

影到咁黑   好似去食晚餐   哈哈

腸仔 / 油炸鬼 / 麥樂雞 / 薯條

蒸餃子 / 豬肉燒賣

包點

雞蛋 / 粟米 / 蕃薯

手拍青瓜

排骨 / 菜心

炒公仔麵 / 煎蛋

豆漿

消毒保潔櫃

我們的早餐

里奧大人真係好鍾意食窩夫同甜甜圈

豆漿好味呀   同埋個溫度啱哂我   熱得嚟係入到口但唔係暖

我第 2 Round 都係食炒公仔麵   我覺得非常之好食呀

呢間係酸菜魚店

食到 9 點 40 分都上房休息喇   去深圳旅行就係咁   始終商場又未咁早開嘛 ~

走廊都光猛㗎

好似隻眼

再睇飛馳人生 2 

房卡

景觀

還原 

11 點 45 分 Check-out   今日會去領展中心城行下   會喺會展中心站落車   我成日搞錯哂領展會展   所以次次講之前都要睇一睇先講呢 ~

去地鐵站係非常之近

1 號線 C 出口   我就成日無記住幾號線   所以一定要跟住里奧大人   哈哈

我哋去領展中心城 (B 出口)

同個男人撞哂衫

@ 領展中心城

一入到去領展中心城   里奧大人就周圍望   之後話樓上有間瑞幸呀   我話見唔到喎   所以我每次去旅行   一話想食咩飲咩買咩   佢就一定周圍望下有無㗎 ~

領展中心城都有金逸影城

又係里奧大人叫我睇㗎   依家佢每次入去 TOP TOY 都係第一時間睇小新

差唔多 12 點半   里奧大人見到湘辣辣   話依家食午餐都可以呀 ~

全場爆滿   得幾張吉枱咋   咁坐低之後   里奧大人去瑞幸買咖啡比我飲呢 ~

之後我轉枱   再點埋餐   差唔多 1 點半先開餐   咁仲好呀   我頭先真係未餓呀    哈哈 ~

本身坐呢個位置

牛肉 CP

我同里奧大人講話一定要飲杯瑞幸咖啡   地下嗰間無 RMB9.9/杯   我話正價 RMB22 就唔飲喇   之後再睇樓上嗰間都係 RMB22   我都話唔飲喇   里奧大人話飲啦   又唔係成日飲   佢就出咗去買喇   番到嚟就話呢間係 RMB9.9 呀   好在佢堅持要我飲咋   哈哈   感恩感恩

飲咗幾次橙 C 美式   呢杯係最好飲   有好濃的橙味同啡味呀

膠紙黐實開口就唔會漏瀉

坐卡位就舒服啲呢

我鍾意四方型電飯煲   收納係易好多㗎

雖然我好飽   但都要食碗五常白飯呀 

開餐

鮮貝戀上蝴蝶蝦 (RMB49) - 啲蝦都彈牙喎   其實蒜蓉粉絲係好食   不過太油唔敢食咁多

慶住食就最好

招牌鮮炒花龍 (RMB89) - 就係特登嚟食呢個牛肉㗎

咁大片肥膏就一定唔食㗎喇

手打鴨屎香檸檬茶 (RMB15)

呢個電飯煲起碼可以裝 6 碗飯   我覺得兩個人根本無可能食得哂

冰粉係免費嘅

@ 湘辣辣

@ 瑞幸咖啡

易烊千壐係驚蟄無聲嘅男主角   但佢個名真係好難記呀   哈哈

太二   只用活活活活魚

真係好想買五常大米

好多商場都有襲兔星球彈珠屋   一贏咗就要敲個鈴   所以都好嘈下   哈哈

我記得領展中心城有 SANFU

依家鍾意輕身嘅袋   但上年買咗 3 個   所以今年唔敢再買袋喇

呢件衫嘅質料都 Soft   可惜無碼

里奧大人着呢件背心去旅行都好呀   可以幫我袋幾包紙巾   唔駛我成日喺手袋拎出嚟   哈哈

以前就鍾意呢啲衫

嚟咗深圳 3 日   我發覺好多男女都係着呢啲闊腳褲   如果腿長同瘦就着得好睇嘅   我咁矮   着咗就更加顯矮添呀   哈哈

指定保溫杯 (RMB29-39)

諗住買小白嘅保溫杯 (RMB49.9)   但新貨都有啲色甩咗就唔要喇

色彩繽紛   睇見都開心

好想買嘢   就買咗橡筋圈喇   反正我好熱   扎起頭髮真係舒服好多

RMB9.9/2 件 (約 HK$11.40) 真係好抵呢

我話想要呢頂帽   里奧大人問我係咪鍾意 Snoopy ?!   我話只係鍾意呢隻綠色

里奧大人話 RMB50 就送比我   呢頂帽係 RMB49.9 (約 HK$57.48)   哈哈哈哈

@ SANFU

我有對綠色大頭鞋   下次買埋條綠色褲先   之後變咗成隻青蛙咁   哈哈

里奧大人知我鍾意食甜品   所以見到鮮芋仙就話食甜品喇 ~

鮮芋仙招牌 (仙草凍+仙草沙冰+大芋園+芋泥球 (RMB30 約 HK$34.56) - 其實我好飽   但都想食埋個甜品   同埋我好想坐呀   呢幾日狀態唔太好   行多兩行就想坐

食完又周圍行下   嚟深圳真係好 Relax   我安排嘅行程只係飲飲食食同買下嘢   好感激里奧大人會陪住我咁做   真係我話去邊就去邊   佢唔會有任何意見㗎 ~

經過薜記   里奧大人居然話要買豬肉脯   咁佢真係好鍾意食啦   不過就唔會買好多   始終留得唔耐呀

職員比我嘅時候   我都無試   之後另一個再比   我就試下啦   估唔到係勁好味呀   外面脆卜卜   蕃薯又香甜   所以買咗少少呀

唔想里奧大人拎咁重咋   唔係都想買呢包香糯鮮玉米

現烤豬肉脯 (RMB57.79) / 現烤紅薯條(帶皮) (RMB22.44) 合共 HK$88.93   里奧大人話抵呀

@ 薜記炒貨

@ 蕉下

通風防曬衣都幾唔錯   因為質料肯定夠輕身

潮汕小竼   下次會試下呢啲潮州小食

柿柿喜物

@ 皇庭廣場   有好多試食呀   定係上次無留意呢

味巴哥

焗外人   我真係覺得呢個名好搞笑   仲有一間叫調茶局又係好搞笑

港究茶

@ 皇庭廣場

去完皇庭廣場就去連城新天地行下   順便食埋晚餐先番香港 ~

今日天色昏暗   但一樣咁濕濕熱熱呀

去連城新天地

茶救星球就無試過

連城新天地都有好多食店

大家樂就一定唔會去食啦

蟹黃小籠湯包 (RMB36) - 食咗 2 籠

仍然係好多肉汁

鮮榨楊梅 (RMB9) - 里奧大人話一定要飲

現叫即制   所以需時等候

@ 蘇曉玥江南小食

食完就搭地鐵番酒店喇   我話今次終於食到攰   里奧大人話唔明講咩   我話食到個口好攰呀   之後佢話要 Full Stop 添   話個肚好 Full 要 Stop 喎   真係仲爛過我   哈哈 ~

我一定要揀強冷車廂

6 點 20 分到酒店

兩隻獅子

次次買完嘢都係里奧大人拎嘅   辛苦佢了

環環緊扣

憑劵拎行李

機械人過嚟 Say Goodbye   哈哈

搞掂已經 6 點半   係時候番香港喇 ~

里奧大人終於忍唔住要去買阿甘鍋盔   不過係番屋企先食呢

里奧大人只鍾意食紅糖豆沙鍋盔 (RMB9 約 HK$10.37)

呢幾塊都唔係紅糖豆沙   所以要等職員再烤喇

吃盔是福

阿甘鍋盔．荆州非物質文化遺產

好大個插蘇

現烤即食

即場食更加好食

滿載而歸

6 點 45 分去到羅湖口岸   過關唔係好多人 ~

今次只係買 2 包零食   算係最輕輕鬆鬆番香港呀

感恩今次有孖位坐呀   因為當時好多人等車㗎 ~

我同里奧大人講話話咁就過咗三日一夜   里奧大人好大反應話三日兩夜呀   哈哈 ~

本身諗住去潮州㗎   買哂高鐵車票同訂埋酒店   但最後都取消咗   不過好在真係無去咋   因為體力真係支持唔住呀 ~

我話呢次過關真係好順利   之後再話唔會出唔到閘咁邪嘛   諗住求其講下   點知真係出唔到呀   好在咁啱有職員咋   佢話我頭先無入閘呀   但我入閘係聽到嘟一聲㗎喎 ~

7 點 51 分

番到屋企即開機洗衫   之後沖涼休息喇 ~

焗熱鍋盔   里奧大人話仍然咁好食   我都叫佢買多兩塊啦

呢兩樣零食   下次一定會再買   如果仲有嘅話

睇下 Youtube   今晚 11 點都要瞓覺喇   聽日要番工呢   好在只係半日   所以唔想請假   哈哈 ~