蒜蓉豆豉蒸排骨 + 超甜粟米 ( 30-APR-2026 )

( 30-APR-2026  THU )

今朝瞓到 6 點 53 分   諗住再瞓但又瞓唔到   又望下個鐘只係 7 點 08 分   最後 7 點 21 分都起身喇 ~

早餐食雞尾包   雖然好甜   但我都幾鍾意食㗎 ~

船頭好怕熱   但佢話估唔到我怕熱過佢   因為我一年四季都係蓋冷氣被 ?!   佢個樣好驚訝咁問冬天都係冷氣被 ?!   我話係呀   佢話咁妳真係好怕熱   哈哈 ~

Lunch Time 出去行陣就去食刀削麵   因為好想食醃蘿蔔呀

熱拌春卷刀麵 ($55) - 今次要中辣   估唔到好辣呀   醃蘿蔔偏酸但都好味   食完呢碗麵真係超級飽   我下次都係夜晚去食好啲   哈哈

忙下停下   好快放工 ~

番到屋企都即刻預備晚餐   里奧大人 6 點鬆啲番到屋企   話食完飯要番公司做嘢呢 ~

是日晚餐 - 蒜蓉豆豉蒸排骨 + 超甜粟米

蒜蓉豆豉蒸排骨 - 本身煮臘腸蒸排骨   但今晚我仲係好飽食唔到咁多嘢   所以就咁蒸少少排骨算喇 ~

超甜粟米 - 又係要清埋去   其實里奧大人成日叫我唔好食咁多粟米   知我個胃唔係咁好   不過我話 $7/條但 $10/3 條就買 3 條囉   哈哈 ~

本身諗住洗埋碗就沖涼休息   不過最後都係同里奧大人一齊去佢公司   因為佢約咗 MM 做啲批盪   咁我都可以去幫下手   快快做完快快收工呢 ~

做到差唔多 9 點   之後里奧大人話請食糖水呀 ~

我食嘅香芋芋圓仙草 ($42)

里奧大人食嘅大滿貫燒仙草 ($42)

MM 食嘅芒汁雪燕芋圓西米露 ($48)

食下傾下   差唔多 10 點 15 分先走呢 ~

番到屋企即沖涼   再睇多陣 Youtube   今晚 11 點半都瞓 lu ~

富華燒味餐廳 @ 紅磡 ( 29-APR-2026 )

我食咖哩牛腩飯   里奧大人就話要食脆脆肉絲炒麵

( 29-APR-2026  WED )

感恩一覺瞓天光呀   如果日日係咁就好 lu ~

今朝同里奧大人一齊去買早餐   買完就去佢公司喇 ~

菇場忙下停下   好快又到 11 點 45 分 ~

離遠睇以為做咩有塊尿片   之後先記得係船頭比嘅懶人抹布手套   佢話用嚟抹馬桶邊嘅

Lunch Time 蒸完飯都出去行下   雖然落好大雨   但我想去友誠買啤酒   買完再去買雞骨草比里奧大人先番菇場 ~

唔忙就做自己嘢   放工即走   等車嘅時候   里奧大人打嚟話公司有急事要處理   所以想出去食飯之後再番公司   咁樣我唔駛煮完等佢   因為佢唔知幾時走得   又驚我等得耐會餓   咁出去食就最好喇 ~

食完就買埋麵包先番屋企   開埋機洗衫就沖涼 ~

抖陣就飲湯   里奧大人 7 點半番到屋企   叫佢沖埋涼就飲湯呢 ~

呢排嘅節目係一齊睇 "逐玉"   不過我睇到 11 點都瞓先喇 ~

炸腐皮蝦卷拚金菇牛肉卷便當 + 泡菜汁豚肉鍋 (外賣) ( 28-APR-2026 )

炸腐皮蝦卷拚金菇牛肉卷便當 ($68) - 呢兩個餸都好味道   但食唔哂啲餸   咁里奧大人可以帶飯 lu

泡菜汁豚肉鍋 ($48) - 食唔落碗飯   所以又比里奧大人帶飯喇

( 28-APR-2026  TUE )

感恩瞓得都唔錯   呢排都唔係成日瞓得好   所以每月一到完咗都要去睇中醫調理一下身體呢 ~

早餐仍然食栗子千層包   我覺得配黑啡就最好   感覺無咁滯 ~

菇場唔忙   可以做自己嘢 ~

Lunch Time 蒸完飯就去 Mikiki 行下   之後去埋 iEAT 買蕃薯就番菇場開餐 lu ~

唔忙又做自己嘢喇   放工去里奧大人公司食晚餐   因為佢食完要開會呀 ~

我食完就去樓上買排骨粒   再去大生買啲嘢就番屋企 lu ~

沖埋涼就抖半個鐘   等個人覺得好凍就熨衫   咁樣就唔會熨到出汗   好多時沖完涼同吹完頭都有啲熱   再即刻熨衫真係要熨完再沖多次涼㗎 ~

里奧大人 9 點 45 分留到屋企   佢第一句就問做咩唔睇 "逐玉" ?!   我話想抖下   哈哈 ~

今晚都忍唔住飲咗啤酒   其實頭先睇 Youtube 都有啲眼瞓   里奧大人 10 點 20 分都瞓覺   咁我都瞓覺喇 ~

煎咖哩雞翼 + 脆門鱔魚皮 (外賣) ( 27-APR-2026 )

( 27-APR-2026  MON )

尋晚去咗 2 次廁所   不過都預咗㗎喇   但感恩起身都精神 ~

臨醒之前發咗個夢   我緊搭扶手電梯去另一個商場   之後約咗里奧大人喺 AEON 門口等   當我搭扶手電梯嘅時候係去咗另一個地方   我覺得好多時星期一番工都係咁   可能成日驚鬧鐘唔響呀 ~

早餐食栗子千層包   雖然好味道但比較油 ~

菇場忙呀   所以好快又到 11 點 45 分喇 ~

Lunch Time 蒸完飯就去一田行下   之後買埋炸魚皮就番菇場開餐 lu ~

忙下停下   又係快放工咁呢 ~

番到屋企即滾熱啲湯   但仲要飲多一晚先飲完   所以一煲湯就要飲幾晚 ~

是日晚餐 - 煎咖哩雞翼 + 脆門鱔魚皮 (外賣)

煎咖哩雞翼 - 又係失敗之作   煎到甩皮甩骨勁樣衰囉   下次用易潔鑊   希望煎得靚仔啲啦 ~

脆門鱔魚皮 (外賣) - 突然想食就買啦   不過今次好硬呀 ~

洗埋碗就開機洗衫   我就沖涼休息   里奧大人就熨衫 ~

今晚都係睇 "逐玉"   不過我今晚 10 點半都瞓覺先喇 ~

鎮江金沙骨 + 雪梨雪耳乾螺頭豬骨湯 ( 26-APR-2026 )

 

( 26-APR-2026  SUN )

今朝同里奧大人食完早餐就番屋企休息   抖到 8 點 40 分先出門口買嘢 ~

今日拎架戰車出去   咁可以買多啲嘢喇   同埋唔駛拎住真係舒服好多呢 ~

第一時間去買西施骨 豬軟骨同埋金沙骨   費事一陣唔記得又要番轉頭   買完就去買紅蘿蔔粟米   再去佳寶買 2 Pack 奶茶同鎮江骨醋   之後去 360 買 9 罐咖啡喇   飲品係最重   所以拎得戰車都一定會買飲品   哈哈 ~

反正順路就去惠康買藍莓同麵包   最後買埋砵仔糕就番屋企喇 ~

Driscoll's ($25.5/3 盒) 咁平應該係中國嘅   但對我嚟講就無咩問題喇   我之前都喺 HKTV mall 買中國嘅藍莓都係好甜㗎

番到屋企即煲湯   搞掂就沖涼再執嘢 ~

材料有雪梨乾 沙參 玉竹 雪耳 紅蘿蔔 粟米 南北杏 蜜棗 西施骨 乾螺頭

執好嘢就熨衫   之後就燜金沙骨喇 ~

感恩又唔攰喎   睇下 Youtube 又已經 2 點   但里奧大人 2 點 45 分先番到屋企   好在我番屋企前買咗急凍水餃   咁唔駛出去食   慳番唔少時間㗎 ~

鮮肉三鮮高麗菜水餃

食完就繼續睇 Youtube   里奧大人就沖涼瞓晏覺   佢瞓到 5 點半就起身   之後 6 點去做機   咁我都預備晚餐 lu ~

是日晚餐 - 鎮江金沙骨 + 雪梨雪耳乾螺頭豬骨湯

鎮江金沙骨 - 今次好比心機整㗎   燜咗個幾鐘呀   里奧大人都話好味道   同埋啲肉好腍   以前成日煮到好 "鞋" 嘛   同埋一秒脫骨   真係煮咁多年飯   第一次可以煮到咁   下次會再整 ~

雪梨雪耳乾螺頭豬骨湯 - 想清埋 4 個乾螺頭   所以又煲呢個湯喇 ~

洗埋碗就沖涼   8 點半先開始睇 "逐玉" ~

紅豆砵仔糕又係好味道

雖然好睇   但睇到 11 點都要瞓覺喇 ~

板燒雞腿包套餐 + 麥香雞 (外賣) ( 25-APR-2026 )

( 25-APR-2026  SAT )

尋晚去完廁所都好快瞓得番   瞓到 7 點半都起身 lu ~

早餐食茄汁薄餅   食完再靈修半個鐘就番工喇 ~

菇場 3D   加上好多同事去咗廣州   所以特別靜呀 ~

我習慣將廚房紙撕開一張張再對摺嘅   咁樣拎起嚟方便啲   阿齋聽到我撕嘢又喺度笑   佢話上前見我咁做   佢都咁樣做呀

放工買埋酸辣米線就去里奧大人公司   我食完就去參加 LA 活動 ~

活動完畢就去惠康買急凍雞翼同涼粉   買完番屋企放低再去買蛋撻   難得 MM 番嚟嘛   好在里奧大人見到我拎盒蛋撻   咁樣可以幫我派比啲同事食喇 ~

傾多陣就要番崇拜喇   散會之後就等里奧大人放工 ~

今晚想食薯條呀   所以里奧大人就去買外賣   我就番屋企沖涼先 ~

等埋里奧大人沖完涼先食   食完就睇 "逐玉"   睇到 11 點 15 分先瞓呀 ~

富華燒味餐廳 @ 紅磡 ( 24-APR-2026 )

脆脆肉絲炒麵 ($52)

招牌焗鮮茄豬扒飯 ($52)

( 24-APR-2026  FRI )

尋晚去完廁所都算快瞓得番   但今朝應該又係 6 點幾醒醒哋   之後好難瞓番   不過應該都有瞓到嘅   因為鬧鐘響嘅時候   起身又唔攰呢 ~

今朝同里奧大人出去食早餐   食完就去佢公司坐陣先番工   星期五多數係咁 ~

菇場唔忙   船頭話今朝涼咗好多   我話我家姐今朝又係咁講呀 ~

阿齋又比咗啲花茶比我   好飲就會叫佢幫我買喇

Lunch Time 蒸完飯就出去 Mikiki 行下   我覺得條街好凍呀   有一刻真係好想番上去拎外套囉   不過最後都寧願急步行喇   哈哈 ~

去完一田行陣   諗住買橙但又無貨   最後去 DAISO 買支味醂就番菇場開餐 lu ~

我一坐低   船頭問我有咩收穫 ?!   佢同阿齋一聽到我拎嘢出嚟就會咁問㗎 ~

唔忙又做自己嘢   所以好快就 5 點半 ~

放工即走   今晚要做義工   所以同里奧大人出去食   去到餐廳叫好哂嘢   收到阿妹 Whatsapp 話里奧大人仲喺公司要處理突發嘢   咁我唯有食完先拎比里奧大人啦 ~

去到里奧大人放低盒飯就要去 LL 活動做義工   今晚差唔多 9 點先完畢   之後再同義工傾一陣偈就走喇 ~

里奧大人今晚喺屋企開會   所以我沖埋涼就睇 Youtube   佢差唔多 10 點先開完會   佢問我做咩唔睇 "逐玉"   我話一個就唔睇啦 ~

之後同佢一齊睇 "逐玉" 花絮   我好鍾意睇呢啲㗎   睇到 11 點 15 分都瞓覺 lu ~

咖哩雞肉意粉 + 超甜粟米 ( 23-APR-2026 )

 

( 23-APR-2026  THU )

尋晚半夜去完廁所   感恩都好快瞓得番 ~

沖完涼諗住喺焗爐拎麵包出嚟   點知原來無插插蘇   真係好彩突然間想拎出嚟咋   如果唔係就真係食之前先知無開焗爐呀 ~

早餐食菠蘿油   里奧大人話見到盒奶茶就想笑   話我平時佢飲就叫佢唔好飲咁多   依家差唔多到期就要佢日日飲   佢啲語氣表情真係勁似我㗎   哈哈 ~

菇場忙下停下   好快又到 11 點 45 分喇 ~

Lunch Time 蒸完飯就出去一田行下   雖然有啲攰   但點都想行下呢 ~

唔忙就做自己嘢   放工即走   番到屋企即刻預備晚餐   之後里奧大人就啱啱做完機番嚟   叫佢沖埋先食飯   反正都要等嘛   哈哈 ~

是日晚餐 - 咖哩雞肉意粉 + 超甜粟米

咖哩雞肉意粉 - 屋企真係要有啲咖哩醬料   諗唔到煮咩就用佢㗎喇 ~

超甜粟米 - 今次啲粟米都好甜   不過食埋呢次要停一停 lu ~

洗埋碗就開機洗衫   之後沖涼休息   里奧大人就熨衫 ~

等佢搞掂就睇 "逐玉"   今晚有啲位又係好感人   真係睇到眼濕濕   尋晚有 Part 睇到喊添呀 ~

睇到 23 集   但我睇到 10 點 20 分都瞓覺喇   睇劇要聚精會神咁睇   所以好快攰   哈哈 ~

燒汁燜茄子雞柳 + 超甜粟米 ( 22-APR-2026 )

( 22-APR-2026  WED )

感恩瞓得唔錯呀   如果無去廁所就更加好呢 ~

早餐食甜餐包   里奧大人就食麥包   我真係好怕食有提子嘅包呀 ~

菇場忙咗陣就可以抖下   船頭見我着褲   笑住話我做足預寒措施   我話每月一到真係特別怕凍呀 ~

Lunch Time 即去買飯   因為個肚都仲係扯住扯住   個人有啲攰   所以唔周圍行喇 ~

茄汁豬扒拚蘿蔔牛腩飯

船頭買咗樽蒜蓉   我話家姐成日比我   之後佢笑住話家姐咁好嘅   再話家姐一定係好嘅   因為佢都係家姐   哈哈   CC 又係成日提住細佬㗎 ~

唔忙就繼續休息   放工即走喇   買埋麵包就番屋企   里奧大人問做咩買麵包 ?!   妳唔係鍾意星期四都出去食早餐咩 ?!   我話因為奶茶 27 號到期   我想到期前飲哂呀 ~

雖然攰   但醃咗雞扒   所以呢兩晚點都要煮喇 ~

是日晚餐 - 燒汁燜茄子雞柳 + 超甜粟米

燒汁燜茄子雞柳 - 呢個餸算係好簡單   最緊要有瓜有肉呢 ~

超甜粟米 - 好甜呀   我買咗 3 條   希望其餘 2 條都係咁甜啦 ~

洗埋碗就沖涼休息   今晚都唔做家務住喇   里奧大人就去做機 ~

我睇 Youtube 啦   呢排成日睇 "逐玉"   覺得睇 Youtube 好多嘢未睇咁   哈哈 ~

里奧大人沖埋涼就話睇 "逐玉"   但我睇到 10 點半都瞓覺喇   里奧大人叫我睇埋呢集先啦   仲有 10 分鐘咋   我話真係好攰唔睇呀   佢真係好搞笑囉   我每次話瞓   佢都要我睇埋先瞓 ~

五香牛雜米 + 鮮蝦雲吞麵 (外賣) ( 21-APR-2026 )

估唔到外賣嘅米粉份量比堂食仲多   食到成個肚脹哂呀

( 21-APR-2026  TUE )

尋晚幾乎每兩個鐘就去一次廁所   因為個量比較多真係唔去唔得   所以好似無瞓過咁 ~

起身嘅時候又頭痛   個肚就持續好輕微咁扯住痛   所以同西瓜請完病假都即刻瞓番喇 ~

瞓到 10 點都叫做精神啲   可以起身整早餐 ~

早餐仍然食丹麥酥麵包   所以覺得 1 Pack 食兩餐就最好   哈哈 ~

里奧大人今日放假   不過佢食完早餐都要番公司處理啲 Urgent 嘢   我就去睇醫生 ~

睇咗 20 分鐘   因為醫生實在太細心喇   有啲嘢講到好誇張咁   仲想我即刻去急症   但我唔會去啦   又唔係第一次係咁   所以睇完都 11 點幾   拎完藥就去萬寧同大生買埋嘢先番屋企 ~

沖埋涼就開機洗衫   再睇下 Youtube 又已經 1 點   里奧大人啱啱番到屋企   可以食午餐喇 ~

依家里奧大人都勁鍾意睇 "逐玉" 呀   我一坐低就叫我睇   一開電視又叫我睇   好搞笑囉   但確係好睇嘅   人靚衫靚   拍得又靚   所以唔覺唔覺又睇哂 1 集咁呢 ~

睇到 3 點要瞓陣呀   個人突然好攰又凍喎   我喺房唔駛開冷氣要蓋住張毯瞓覺   仲要係關咗房門   所以里奧大人話肯定我唔舒服   唔係無可能唔開冷氣呀   哈哈 ~

瞓到 4 點 10 分呀   個人當堂精神哂 ~

里奧大人 6 點鬆啲去買晚餐   佢話正呀   我以為佢好餓   原來佢話食完抖下   可以 7 點去做機   之後再睇 "逐玉" ~

我食完抖陣就沖涼   里奧大就去做機 lu ~

每月一到個人係比較凍   今晚沖完涼都只係開風   里奧大人反而話焗   平時只有我講㗎咋   哈哈 ~

睇 "逐玉" 睇到 10 點半都瞓喇   只係睇咗 16 集咋   仲有 24 集要睇呀 ~

廈門炒米拚乾炒牛河 ( 20-APR-2026 )

Smoked Oysters 係西瓜嘅加拿大手信

( 20-APR-2026  MON )

感恩一覺瞓到 7 點 15 分   咁都起身整早餐 lu ~

早餐食丹麥酥麵包   好耐無食覺得好食呀   哈哈 ~

菇場忙呀   星期一忙就最好 ~

Lunch Time 蒸完飯就出去買菜   買完都即番菇場開餐喇 ~

忙下停下   放工即走   里奧大人今日去舖頭幫手   佢同水姑食下午茶   但佢哋食唔哂   所以問我想食咩   咁每樣剩一半就可以做晚餐   我唔駛煮就最開心   哈哈 ~

番到屋企只係蒸熱晚餐   所以又煮蕃薯糖水喇 ~

食完抖陣先洗碗   每月一到真係做咩都要抖下先做   哈哈 ~

沖埋涼就可以休息   因為里奧大人熨咗衫   所以佢都有時間去做機呀 ~

等佢沖完涼就食蕃薯糖水同埋睇 "逐玉"   完全唔似星期一呀   哈哈 ~

雖然好睇   但我有啲攰   所以我睇到 10 點半都瞓先喇 ~

燒汁焗雞扒拚蒜味腸 ( 19-APR-2026 )

中午食剩半盒炒飯   今晚要全埋去喇

( 19-APR-2026  SUN )

今朝同里奧大人一齊起身   我沖埋涼就去家姐屋企 ~

家姐同 U 姐陪 Berry 行街   Berry 見到我後面就已經撲埋嚟   咁就乖喇 ~

陪佢行咗半個鐘就同家姐去食早餐   咁都好㗎   我本身唔餓   但頭先行到出汗就開始有啲餓 lu ~

我同家姐講話之前發咗兩次夢   都係離開咗公司但唔開心嘅   里奧大人話因為妳依家做得開心先咁樣囉   家姐都話係呀   以前只提 8 掛   好少提船頭   依家成日提佢   我話依家坐對面嘛   同埋以前佢係唔會無啦啦 兜個大圈嚟我嗰邊囉 ~

所以真係好感恩嘅   因為我都同里奧大人同家姐講過以前船頭係點樣對我   但阿中走咗之後就 180 度轉變   咁好肯定阿中打我唔少毒針囉   唔係無理由阿中一走咗   佢就完成兩個人嘛 ~

食完就去 A1 買麵包   不過職員話嘟唔到張優惠劵   咁一陣先再買 ~

家姐話之前離遠見到有個人   膊頭上面有嚿黑色嘢   我話係咪鸚鵡 ?!   佢奸笑話唔係   叫我再估   我好大聲話老鼠呀 ?!   有個婆婆聽到之後企定定眼碌碌好驚話 "唔係呀有老鼠"   笑死我哋呀   我哋話唔係有老鼠呀   我哋傾緊偈咋   之後家姐話嚿嘢係頭髮呀   勁恐怖囉 ~

一入屋又聽到 Berry 尖叫   見到我真係咁興奮咩   哈哈 ~

叫完又瞓地下   但點都唔坐梳化

今日家姐唔駛出貨就可以坐定定傾偈喇   之後講開 Office 地址   佢即刻諗起以前舊地址有鬼   話耳邊成日都聽到 "her" 一聲   咁都知咩事啦   仲話有次同事去廁所有人拍門   但嗰時係無人番工㗎   呢下最恐怖   所以我成日話西瓜肯定唔怕鬼   哈哈 ~

之後又話肥仔買咗樓   要請家姐食飯   我話佢真係咩都同妳講喎   我再講其實妳好多朋友都係由做同事變為朋友   有啲仲係第一份工添呀   所以到依家仲 Keep 住聯絡真係好好呀   但佢話唔會有人無朋友呀嘛   咁我覺得有都唔出奇㗎   不過出嚟做嘢   我眼見唔少都係由同事變為朋友   始終一齊相處過   點都知大家係啲咩嘢人   唔好就唔會同妳做朋友啦   哈哈 ~

差唔多 11 點   家姐話拎冷氣被去洗   同埋去買丹麥酥麵包比我喎   話 20 分鐘就番到嚟   所以佢叫我陪 Berry 女瞓覺   係都唔比我去呀 ~

我托住 Berry 下巴瞓覺   佢瞓到有鼻鼾聲

家姐一番嚟就要自己瞓呀

田雞腳

我差唔多 12 點半都走喇   家姐同 Berry 就送我搭車   Berry 女又係唔理我   哈哈 ~

今日里奧大人去買午餐   我落車就可以一齊去佢公司喇 ~

香蔥鹹魚雞粒炒飯 - 我未餓   所以叫里奧大人自己食   食唔哂就留番做晚餐

坐到 2 點都走喇   因為里奧大人要開會   咁我就同阿妹一齊行   可惜我今日要大清潔屋企   唔係都會同阿妹 大餅一齊吹水呢 ~

番到屋企都即刻大清潔   差唔多 3 點就抖下   仲要食肉鬆蛋捲同飲杯熱豆漿充飢呀 ~

抖下又再執下個食物櫃   好在執下咋   原來有 2 支老抽同埋醃肉醬   仲有 3 樽蒜蓉   我都唔記得幾時買過蒜蓉添   所以呢排真係唔好買任何醬料喇 ~

搞掂就開機洗衫同熨衫   做到 5 點終於做哂所有嘢 ~

睇下 Youtube   6 點半開始預備晚餐   但里奧大人 7 點半先番到屋企   好在今晚只係焗嘢   咁就可以擺喺焗爐保溫呢 ~

是日晚餐 - 燒汁焗雞扒拚蒜味腸

燒汁焗雞扒拚蒜味腸 - 唔想啖啖肉   所以加罐粟米 ~

洗埋碗就沖涼休息   個肚有好輕微嘅扯住痛同埋今日特別攰   原來每月一到   谷咗一排終於嚟喇 ~

同里奧大人一齊食蕃薯糖水一路睇 "逐玉"   今晚唔睇 "中年好聲音 4" lu ~

里奧大人同事嘅日本手信

里奧大人話睇 "逐玉"   我話 10 點半喇喎   佢話睇 1 集咪得囉   之後我睇到 11 點 05 分都瞓   佢就應該繼續睇㗎喇 ~