海南雞肶飯 + 魚柳蜜桃沙律 + 跑步機 ( MAY-2008 )

尋晚好開心喎   因為可以同里奧大人一齊放工   真係好難得   依家里奧大人仲未咁忙   所以一定要好好珍惜一齊放工嘅日子 ~

我話煮臘味飯 + 罐頭粟米湯做晚餐   因為好似好耐無煮過飯咁   里奧大人就話諗諗先   唔係佢唔想食我煮嘅嘢   而係話唔想我咁辛苦喎   諗到番屋企就話去食海南雞飯   咁是但啦 ~

去完買生果再去餐廳食飯   真係好 Enjoy 呢啲生活呀 ~

由於我要進行減肥計劃   所以一飯一沙律   海南雞肶飯套餐 + 魚柳蜜桃沙律套餐   但個汁就唔係好掂   可惜可惜   埋單 $110 真係抵   因為啲份量真係好多 ~

晚餐咁肥膩   同埋唔知係咪呢排無做運動   瞓得唔好   所以抖咗陣就同里奧大人做機 lu ~

太耐無做   有啲吃力   不過我會堅持   因為我未試過會咁堅持 ~

番到屋企真係有啲攰   沖埋涼   睇陣電視   11 點就瞓喇 ~

~~~~

今朝好熱呀   不過巴士又好涷喎   所以一定要有外套跟身   如果唔係遲早病呀 ~

成日食包做早晨食到有啲悶   所以食炒米粉 + 奶茶 ($13)   碟米粉鹹到爆   日日咁食真係食到腎有事呀   又油   呢餐食得好慘 ~

晏晝自己買車仔麵 ($17) 番公司食   自己一個食有啲唔慣添 ~

尋日里奧大人話出面食一個 Lunch Set 閒閒哋要三十幾   最慘係食唔哂   所以叫我第時唔好帶飯   一齊出去 Share 食仲好喎   咁又幾好嘅   又可以見下又唔會嘥嘢   食完仲可以行一陣幫助消化   一於係咁話啦 ~

川滬小館 @ 大埔 ( MAY-2008 )

尋日同里奧大人 Lunch 之後   番到公司肚屙咗 3 次   之後又胃痛   無哂心機   不過好在里奧大人無事咋   如果唔係我就唔安樂喇   因為係我提議去嗰間餐廳度食嘢嘛 ~

本想諗住晚餐煮水蛋同炒粒粒   但咁嘅情況下都係唔煮   因為無心機   煮咩都會唔好食   無謂嘥時間啦   而喺坐車番屋企途中   突然好掛住台灣嘅生煎包   所以疊埋心水唔煮飯   去川滬小館食生煎包同小籠包算喇 ~

唔知點解尋晚成條街都無咩人   7 點幾食飯時間喎   平時排長龍嘅壽司店有好多吉枱   去到川滬又係好多枱比妳任坐   所以我揀咗個對住電視嘅卡位   一路食一路傾一路睇   幾正呀 ~

食咗小籠包 + 生煎飽 + 涼拌鮑片 + 排骨湯麵 + 蒜蓉炒白菜仔 + 酒釀丸子   埋單 $130   味道唔錯   特別係酒釀丸子   超好味   不過如果係桂花丸子更好   清香啲   同埋我唔係咁鍾意有酒味嘅嘢   但碟菜就少得離奇囉   仲要 $38   簡直搶錢呀 ~

尋晚都無做機   所以熨到啲衫直一直就當做運動   再煲埋藥   執下嘢已經 10 點幾   仲未沖涼添喎   點解啲時間過得咁快嘅 ~

~~~~

今朝天氣又係唔錯   所以心情都靚好多 ~

飲完啲中藥   搞到我個口好苦   所以食甜甜地嘅芝腿菠蘿包 + 咖啡 ($17)   之前幾日食仲係 $15   依家 $17   一貴就貴 $2   真係咩鬼都貴 ~

依家番到公司樓下就會好開心   因為可以望到里奧大人嗰座 Building   就好似望到里奧大人咁   所以次次都會笑住嚟入公司 ~

晏晝又同里奧大人一齊食喇   不過大家都無咩胃口   所以只好選擇食車仔麵   食完行一陣又要分道揚鑣喇 ~

味千拉麵 @ 大埔 ( MAY-2008 )

星期一無 Mood   雖然遲到   但都要食埋早餐先番公司   就係食吞拿魚治烘底 + 奶茶 ($16)   如果唔係啲時間真係好難過 ~

好在無咩嘢做   晏晝又同里奧大人一齊食 Lunch 喇   Share 食串燒雞串拚薄牛扒意粉 + 熱檸茶 ($32)   難食到呢   好在我咁啱無胃口   唔係就要嘥多份嘢食喇 ~

依家無嘢做喺度諗   自己係咪好小氣   因為我已經無再同嗰條友打招呼   就係食飯成日要我比錢先嗰條友   本來都唔憎佢   但就因為呢件事令到我憎到佢不得了   事緣係 Annual Dinner   同事 C + W + l 係 Frd 底   約埋條友打牌 (l 同條友係同 Department)   咁條友同我講話唔想打   我話唔係嘛   約哂人喇噃   條友話驚佢哋打得好勁   夾埋嚟坤佢   我話妳一早問人打幾大嘛   同埋啲師奶唔會打好大嘅   條友話不如同我一齊輪流打   我話唔喇   妳自己打啦 ~

妳話條友幾賤吖   唔知大哋打幾大   又唔知人哋會唔會坤佢   居然要我一齊落搭   妳話係咪路呀   好嘢又唔見妳話叫我一齊 ?!   自此之後我已經當佢隱形   我見到佢都會扮見唔到佢   我真係唔想咁假對佢笑   而我仍都真係笑唔出 ~

個人仲係好攰   跟本仲未有頭緒煮咩好   所以就同里奧大人去味千拉麵食晚餐喇 ~

食味千拉麵 + 蒜片雞腎 + 餃子 + 炒雜菜   唔知點解   硬係覺得所有嘢都無咩味咁嘅 ?!   埋單 $121   本來想做會員   但今次啲嘢食真係麻麻   可能隔一排先去   所以都係唔做喇 ~

番到屋企又要開始煲中藥.   排無煲   再煲嗰陣濃濃中藥真係幾難頂 ~

~~~~

今朝天氣好清涼...真係好舒服...心情都靚百倍呀 ~

空肚飲藥已經有啲飽肚   所以食奶油多 + 奶茶 ($13) 就番公司喇 ~

菇場一片死寂   妳話無得上網係咪好慘吖 ~

同里奧大人食 Lunch   食四寶米粉同豬扒腸仔米粉   難食到爆   幾個月前食仲好好食   估唔到改咗名之後就咁難食 ~

無嘢做又諗下自己   其實自己都好易滿足.   要比我見到里奧大人 媽咪 家姐 朱朱有舒適嘅住所   有冷氣   可以沖熱水涼   有洗衣機   有錢買自己鍾意嘅嘢 / 食嘅嘢   有能力賺錢 / 駛錢   每年去一次旅行   有得上網 / MSN 咁就得好滿足喇 ~

焗豬扒飯 + 酥皮湯 + 燒賣粉果 (外賣) ( MAY-2008 )

今日瞓到 3 點幾先叫做好啲有胃口   所以里奧大人就拿拿聲去買嘢比我食   成日無食嘢   所以要食啲比較易消化嘅食物   就係粟米磨菇粥喇 ~

之後一齊睇下電視   越睇越攰   又瞓着咗喇   醒咗真係唔敢再瞓   如果唔係夜晚瞓唔着仲慘 ~

突然好想食酸嘢   所以就叫里奧大人去大家樂買焗豬扒飯加酥皮湯   再加燒賣粉果   最後飯同湯都食唔哂   嘥哂 ~

雖然全日都唔係咁舒服   但得到里奧大人嘅超體貼勁關懷   要咩有咩   叫咩做咩   發脾氣都會體諒妳   又確實令我好感動嘅   所以有時病下都幾好嘅 ~

車仔麵 (外賣) ( MAY-2008 )

尋晚放工要即刻走喇   因為約咗人上屋企換燈   本來唔想換住   但係夏天一開窗   就會好多嘢飛入去燈罩入面   要清洗好麻煩   所以索性換哂啲燈算喇 ~

好在早番到屋企   拿拿聲用垃圾袋舖枱面 鞋櫃 地櫃 床   如果唔係整到全部都係灰就難清理㗎喇 ~

話明 7 點半   點知成 8 點先到   整到成 9 點先搞掂   自己又唔係咁舒服   所以叫里奧大人買車仔麵食算喇 ~

~~~~

今朝北上   唔記得大陸有小黃金週   好在中醫師有開診咋   如果唔係就白白浪費咗半日嘅 A/L 喇   因為每月一到唔多舒服   又無咩胃口   所以睇完就即刻搭車番屋企休息喇 ~

 

一早諗好咗   睇完中醫就陪里奧大人攞功課再去篤波   點知最後自己就要喺屋企休息   得里奧大人一個人孤令令去攞嘢   好似好可憐咁 ~

瞓咗成日都仲係無咩胃口   所以里奧大人又要孤令令買車仔麵番屋企食   而我就係咁瞓係咁瞓 ~

蒿麥冷麵 + 餃子 + 牛油香草粟米 + 煙三文魚 (外賣) + 蕃茄薯仔紅衫魚湯 ( MAY-2008 )

尋日五一勞動節   所以有勞動嘅就要放假一天   不過勞動假唔係比妳休息   而係比妳更加勞動 ~

 9 點半里奧大人就起咗身   悶悶不樂咁喺廳睇書等我起身   好在我咁啱起身去洗手間   見到佢咁可憐   .所以我都唔瞓   一齊去食早餐喇   食腸蛋煙肉公仔麵   里奧大人就食炸菜肉絲麵   個麵雖然白雪雪無咩味咁   但其實好好味 ~

番到屋企同里奧大人一齊執書櫃   里奧大人終於育放棄儲咗多年嘅公仔書   咁樣個書櫃就可以清咗三分一喇   仍都可以將放喺其他櫃嘅書放埋一齊再分類   真係好整齊呀 ~

執咗個幾鐘就同里奧大人做機   好辛苦做咗半個鍾跑步機先消耗咗 100 卡路里   咁我咁食法   真係跑半日都唔掂呀   所以我決定唔比自己食咁多   真係要減肥   唔係 Keep Fit 喇 ~

之後再去買防潮防臭用品   再去街市買餸菜   太耐無滾湯   所以買咗蕃茄薯仔 ($9) + 3 條紅衫魚 ($13) + 3 支粟米 ($7) + 大木瓜 ($12) 就走喇 ~

番到屋企熨衫   沖埋涼就執下嘢   又已經 2 點半   時間過得真係好快   又要食 Tea 喇   里奧大人想去麥記喎   是但啦   橫掂我都好想食 Shake 薯條   食咗至尊漢堡餐 + 魚柳包 + 紅豆批   樣樣都好食   但個批就甜到上腦呀 ~

食到咁飽   當然一定要行下啦   所以就去 Jusco 買晚餐喇   買餃子同三文魚   跟住就番屋企抖喇 ~

執開有條路   所以順便執埋放相薄嘅櫃   以前好鍾意睇番 N 年前啲玉照   但依家勁唔想睇   因為真係脹爆咗好多   好肥膩   依家仲要次次睇親都要鬼鬼祟祟咁睇   因為唔想比里奧大人恥笑呀    
執完相又係時候煮晚餐喇 ~

是日晚餐 - 蒿麥冷麵 + 餃子 + 牛油香草粟米 + 蕃茄薯仔紅衫魚湯

蒿麥冷麵 - 又要煮又要過冷河又要雪涷   我覺得幾麻煩   不過里奧大人話好想食   咁就無辦法啦 ~

 
餃子 - 包裝煮法: 煎 1 分鐘   加少少水冚蓋 4 分鐘   再煎到收哂水同埋黃金色就 OK   但都唔黃金色嘅   煎到甩哂底   同灼嘅一樣款嘅 ~

牛油香草粟米 - 超易整   又好味 ~

蕃茄薯仔紅衫魚湯 - 太耐無滾湯   所以又係滾番呢過好味好味好好味嘅湯 ~

雖然全日都好忙   但我用好輕鬆嘅心情做嘢   所以一啲都唔辛苦   仲好開心   如果平時都學識放咗工都可以用輕鬆嘅心情做任何嘢就好喇 ~

~~~~

今朝遲到   所以只可以去 KFC 買鬆餅 + 奶茶 ($11) 番公司食 ~

唔知點解   無咩 Mood 咁   做咩都懶洋洋 ~

晏晝超開心   因為同媽咪 家姐去大榮華飲茶   食牛骨髓炒麵 + 牛柏葉 + 煎魚餅 + 炸雲吞 + 白蓮蓉包   唔係咁飽   我掛住傾偈傾到唔想食嘢 ~

最後衝刺 @ 元綠壽司 ( MAY-2008 )

本來諗住求其煮一餐   但里奧大人打電話話想同我一齊做機   叫我唔好煮飯喎   咁就可以慳番啲時間   咁又真係慳咗唔少時間嘅 ~

里奧大人就話去元祿食壽司   我真係好開心㗎   因為里奧大人記得上次無食到   要食番補數   所以呢餐真係好窩心呀 ~

今期元綠好抵   有啲手卷係買一送一   所以食咗軟殼蟹手卷 x 2 + 鰻魚手卷 + 三文魚手卷 +  燒魷魚鬚壽司 + 北寄貝壽司 + 天婦羅蟹柳壽司 + 冷辣辣麵 + 地獄煮蜆 + 天婦羅南瓜蕃薯   用埋張 78 折 Coupon   埋單 $150 好抵呀 ~

番到屋企仲可以抖一陣   再同里奧大人做機 ~