肉餅哥 @ 官塘 ( 7-OCT-2019 )

味菜牛柳炒麵 ($46) - 個麵脆卜卜

豆豉鯪魚油麥菜 ($58) - 味道 OK 呀   同埋份量都好多

( 7-OCT-2019  MON )

今朝同里奧大人 7 點半起身   食完早餐就去聽講座 ~

9 點開始   到 12 點幾有個 Break   全部人都喺會場食埋 Lunch   因為怕太遲走   會無車番屋企   所以縮短食 Lunch 時間 ~

1 點半再開始   4 點半結束   即搭車番屋企喇 ~

里奧大人就瞓覺   我就睇多陣電視先 ~ 

但我最終都瞓咗 1 個鐘   6 點 15 分起身   哈哈 ~

又未餓住   所以 7 點幾先去食飯   食完番屋企   我有啲唔舒服 ~

沖埋涼就休息   10 點半都瞓喇 ~

稻香超級漁港 @ 黃大仙 ( 6-OCT-2019 )

麻辣雞鍋 - 都麻辣喎   正

芫茜皮蛋湯底

稻香啲質素真係唔錯

叫咗好多食物   影唔切呀   哈哈

( 6-OCT-2019  SUN )

今朝 9 點 15 分起身   食完早餐就番主日學 ~

崇拜完畢就約埋姊妹 SF 一齊去食下午茶   食完再去弟兄 AL 屋企聚會 ~

雞翼沙律 - 沙律好味道

吞拿魚飛碟 - 唔夠脆   但就好多餡

2 點食到 3 點半   傾下傾下   比人催上樓喇   因為主人家整定涼粉比我哋食呀   哈哈 ~

上到弟兄 AL 屋企   見齊哂兩家人啦   原來佢哋只係早我哋 5 分鐘   即係每家都係等部 Lift 落嚟先上去   因為 AL 住頂樓   哈哈 ~

一埋位又係食食食同埋傾傾傾   把口真係無停過 ~

今日係姊妹 L 生日   所以佢買定個生日蛋糕   仲自己拎埋比我哋食   哈哈

里奧大人今日要番學   所以 7 點半先到   之後坐到 8 點就一齊出去食飯喇 ~

8 點半開始   食到 11 點   勁開心 ~

個個都要打的番屋企喇   番到去都 11 點半   即沖涼   抖陣就要瞓覺喇 ~

泰亞萊泰式美食 @ 紅磡 ( 5-OCT-2019 )

泰式咸脆豬肉炒椰菜苗 ($78) - 都好味   但脆豬肉啲皮唔脆囉

香草辣椒肉碎炒飯 ($45) - 好鬼辣呀   哈哈

涼粉冰 ($15) - 里奧大人話要用來解辣

( 5-OCT-2019  SAT )

今朝 7 點 50 分起身   等緊電梯嘅時候就開手機   見到 8 卦 Whatsapp 我   原來西瓜話今日交通混亂   所以唔駛番工   但好奇怪點解西瓜唔 Wechat 我啦   諗完就即刻睇到 Wechat 有信息   原來佢朝早 6 點幾已經發比所有同事   呢期 Wechat 成日係咁   收得好慢 ~

咁即番入屋企啦   里奧大人即問係咪唔駛番工 ?!   哈哈 ~

之後家姐問我塞唔塞車 ?!   我話今朝唔駛番呀   咁啱今日係 Berry 姐畢業   所以問我去唔去 ?!   我話睇里奧大人比唔比先啦   費事一陣無車出入仲煩 ~

睇多陣電視都瞓喇    里奧大人 9 點幾醒咗   我都醒埋 lu ~

等里奧大人沖埋涼就去食早餐   食完番屋企   里奧大人話 12 點半都出門口番公司   咁我話探 Berry 姐喇 ~

家姐車我去佢屋企再接 Berry 姐番學   但無哂的士   所以家姐話佢帶 Berry 出來   如果見到的士就上啦   叫司機照跳錶等到佢哋出來   咁我等咗 10 分鐘就有的士   之後打比家姐唔通   我心諗唔係佢 Call 咗車嘛   點知佢真係 Call 咗   咁我同司機講話唔好意思   依家唔駛出去   但我照比番的士錢   佢話唔收   我仍都照比   佢係都唔收   之後佢仲笑哂口話唔駛啦   都無跳錶   咁我話真係好多謝哂呀 ~

之後等埋家姐出埋嚟就上車   Berry 會暈車浪㗎   但又好 8   成日要望住窗 ~

11 點 45 分開始上堂   但我哋早去到   咁同 Berry 同學玩啦   有拉布拉多同金毛   我覺得係大隻架   不過都好乖   唔好係咁撲我就得喇 ~

隻拉布拉多好搞笑   喱埋喺工人張櫈下面   Berry 姐仲衰   跟佢主人走呀   哈哈

初初以為 Berry 最大年紀 (其實都只係 11 個月大)   估唔到其他狗狗只係 9 個月大咋   但最細隻係 Berry 先搞笑   同埋最鬼嘈啦   成日吠   人同狗都比佢嚇到彃起呀   我睇住隻金毛被 Berry 吠聲嚇到彈起身   哈哈 ~

不過我最驚隻唐狗   所以工人企喺 Berry 姐後面   我企工人後面   家姐企我哋隔離   有咩 "依郁" 就可以救我哋喇   哈哈 ~

放學有 15 分鐘比啲狗狗玩   3 隻大嘢自己玩   Berry 姐就喱埋喺我腳底   之後隻金毛過嚟撩佢玩   一嘢踩落我腳度   痛到我呢   怪不得 Berry 唔鍾意同佢玩啦   之前好大力拍佢   不過佢其實又唔知自己大力嘅 ~

我聽到 Berry 兩下慘叫聲   我正想抱起佢   最搞笑 Miss 問邊個慘叫 ?!   知道係 Berry 就叫所有狗要 Stop   因為 Miss 知道 Berry 係好驚   家姐話第一堂嘅時候   Miss 話 Berry 仲係咁驚就要離場   驚 Berry 心臟仔負荷唔到呀 ~

好乖咁

又 8 又驚   堅係門口狗

Berry 嘅畢業証書

咁 Call 車番家姐屋企   抖陣就同家姐去食嘢   等入去停車場等咗好耐呀 ~

等到 3 點先食下午茶   商場無咩店舖開   但食店就有   所以好多人等   所以同家姐講話見到有食店開就去食喇 ~

因為一陣買珍珠奶茶   所以我話飲餐湯   家姐話估我唔到   個湯好飲   有好多菜粒

香辣欖油煙鴨胸炒天使麵 ($39) - 好味呀   同埋份量都好多   以 $39 來說絕對抵食

千島吉列脆魚柳 ($32) - 家姐話食魚柳   真係估佢唔到   佢鍾意食肉嘛   不過又記得家姐話媽咪走咗之後   唔係咁鍾意食肉了

食完就去廣良興買豬肉乾同肉鬆   最後再去茶湯會買 2 杯黑糖珍珠奶茶就番屋企喇   買咗杯比工人飲   估唔到佢都鍾意飲   因為我話要半糖嘛 ~

我同里奧大人食晚飯   所以 7 點 15 分出車   但勁塞車囉   我番到屋企擺得啲嘢就搭車去搵里奧大人   但家姐塞成個鐘先番到屋企 ~

等到里奧大人 8 點半就搞掂   又去食泰菜喇 ~

食完即番屋企   沖埋涼就休息   雖然今日放假   但我仲攰過番工   哈哈 ~

今晚差唔多 11 點半先瞓   始終咁夜食飯   唔想咁快瞓呀 ~

豬肉丸 + 雞肉腸 ( 4-OCT-2019 )

( 4-OCT-2019  FRI )

感恩一覺瞓天光   起身都好精神呢 ~

坐車聽到有個男人同女人傾電話   聽到佢話今日星期五   聽日星期六   後日星期日   我覺得好搞笑呀   唔駛你講都知啦   哈哈 ~

今朝食腿蛋治   無咁熱氣 ~

菇場唔忙   可以抖抖 ~

Lunch Time 行陣   買埋水餃米就番菇場喇 ~

仍然唔忙   今晚有示威活動   所以交通混亂   所以唔駛番學 ~

放工全公司嘅人係即刻走   好似掛 8 號風球咁 ~

等巴士都好多人   同埋見到好塞車   感恩我好快可以番到屋企 ~

里奧大人 6 點半番到屋企   咁我話唔太餓   想 7 點半先煮麵呢 ~

是日懶餐 - 豬肉丸 + 雞肉腸

豬肉丸 - 冰格有呢啲方便餸真係唔錯   諗唔到煮咩就食呢啲 ~

雞肉腸 - 又係喺 Ikea 買㗎   但 10 月尾到期   又要快啲清埋去喇 ~

洗埋碗就開機洗衫   之後沖涼休息喇 ~

睇多陣電視   11 點幾先瞓 ~

龍城冰室 @ 九龍灣 ( 3-OCT-2019 )

滑蛋粟米班腩

馬拉盞通菜炒牛肉

( 3-OCT-2019  THU )

今朝起身沖埋涼   居然覺得熱   依家都 10 月啦   諗起以前真係一年有四季   依家好似一年得一季咁   慘 ~

早餐食吞拿魚治烘底   我鍾意食他他醬㗎   因為有啲酸瓜粒 ~

菇場忙呀   好在記得飲中藥   但飲完之後勁反胃   唔知係咪呢排飲得太多玫瑰花茶呢 ~

之前一開見到有好大粒嘢   以為係巨強呀

Lunch Time 一到都出去行下   行下又無咁反胃   咁順便買埋燒賣+炒麵就番去喇 ~

無咁忙就可以抖下   呢排個人比較攰呢 ~

放工去一田行陣   買咗 1 條披肩   買完即走   費事又亂買嘢 ~

里奧大人 6 點放工   咁再約埋姊妹 SF 去龍城食晚飯 ~

姊妹 SF 一見里奧大人就話佢番工精神咗   哈哈   有記托肯定好好多啦 ~

之後大家又分享啲工作經驗   講真   我係好欣賞里奧大人一樣嘢   就係佢唔怕付出   同埋好主動解決問題   遲放工都唔會計較   最緊要做好件事 ~

之前喺教會事奉   佢做我個位   係咁問我係點做 ?!   我實在太慚愧   唔知點教佢   因為我都無認真去問人哋點做   咁之後到佢做   我反而要問番佢點做 ~

傾到 7 點 50 分   係時侯要走喇 ~

今晚去九龍灣聽 "生命之道"   差唔多 9 點 40 分散會 ~

番到屋企即開機洗衫   沖埋涼就休息 lu ~

諗住 11 點瞓   但最後都係 11 點半先瞓 ~

翠河茶餐廳 @ 官塘 ( 2-OCT-2019 )

銀芽肉絲炒麵

洋蔥豬扒

( 2-OCT-2019  WED )

又 10 月喇   感覺第一星期番工就係星期三   真係爽   哈哈 ~

早餐食芝腿治烘底   食到悶但仍然照食   因為呢排濕疹   唔想食咁多甜嘢住 ~

菇場勁忙呀   做到成 12 點先可以抖 ~

又到 10 月喇

Lunch 食 Flakes + 豆奶就算喇   唔想食咁飽呀 ~

忙下停下   突然間好攰   可能唔夠飽   哈哈哈哈 ~

放工即去睇中醫喇   呢排成日發夢   人又攰   骨又痛   係時候又要調理下呢 ~

今次嘅上下壓係 130/90   醫師話下壓高咗啲喎   我話其實上下壓都高啦 ~

里奧大人 6 點放工   咁叫佢番屋企先喇 ~

睇完都成 6 點半   番到屋企都 7 點幾   所以出去食 lu ~

食完即番屋企   沖埋涼就休息   今晚好鬼攰 ~

睇 Youtube 睇到瞓着   好似 9 點瞓到 9 點半   醒果下好精神   勁驚呀   好在再睇睇下都攰咋 ~

終於 10 點半都自己瞓先   瞓多啲先好   濕疹快啲好番 ~

麻辣手撕雞 (外賣) + 粟米湯 ( 1-OCT-2019 )

( 1-OCT-2019  TUE )

今朝瞓到 10 點都自然醒喇   刷牙沖涼就出去食早餐 ~

食完就番屋企開機洗衫   之後就執嘢喇   又執咗一大堆嘢去掉   爽呀 ~

差唔多 2 點半就出去食下午茶   食完行陣就番屋企   呢幾日天氣好焗熱   都唔想喺條街咁耐 ~

6 點半去買雞   之後再煲飯   7 點幾先開餐 ~

是日懶餐 - 麻辣手撕雞 (外賣) + 粟米湯

麻辣手撕雞 (外賣) - 今次要少辣都好辣喎   好在真係要少辣   唔係食唔落呀 ~

粟米湯 - 就咁粟米湯真係無咁好飲   但又唔記得買雞蛋   唉 ~

洗埋碗就沖涼   之後休息喇 ~

11 點半瞓覺   雖然唔太眼瞓   但都照瞓喇   聽日要番工呢 ~