越棧 ( JUL-2008 )

尋日勁開心勁嘆   因為晏晝覆診   所以約媽咪 里奧大人去美心皇宮飲茶   里奧大人要上大陸   所以飲到 1 點就要走喇   而我同媽咪就飲到 2 點幾 ~

去到醫院 3 點 45 分   遲咗 15 分鐘   好在都係一個鐘頭內搞掂   感謝神   我甲狀腺正常   但仲係貧血囉 ~

臨番屋企前去街市買 3 磅龍眼 ($20) + 1 磅荔枝 ($13)   其實呢兩樣生果都無益   但好想食呀 ~

難得 5 點幾可以坐喺屋企   所以拿拿聲開機洗衫   難得呢幾日咁好太陽嘛 ~

尋晚又唔駛煮飯住   所以同里奧大人去新開嘅越棧試下   叫咗雜錦拚盆 + 牛腩片湯金邊粉   埋單 $97 唔駛加一又幾抵喎   但唔係咁好食囉   同埋無咩選擇 ~

番到屋企沖完涼再食埋里奧大人買嘅砵仔糕   又多豆又煙煙韌韌   好好味呀 ~

之後再一路食荔枝一路睇電視   勁正 ~

~~~~

尋晚瞓得好差   真係年紀大喇   食幾粒荔枝啫   燥到瞓唔着呀   所以今朝早咗少少起身   可以食炒米粉 + 咖啡   星期六真係食咩都好味過人呀 ~

老細放大假   番到菇場個個同事都吹水   當然我都唔例外啦   同一間公司出品嘛   之後 1 點準時放工 ~

車仔麵 ( JUL-2008 )

尋晚打比診所問朱朱情況...話朱朱好精神   依家吊緊鹽水同聞緊氧氣 ~

都仲係超級攰   所以都係等里奧大人放工之後買車仔麵番嚟食算喇 ~

其實想探朱朱㗎   不過護士話唔抱得朱朱   因為聞緊氧氣唔係咁好喎   所以無去囉   希望朱朱快啲出院啦 ~

前一晚瞓我勁差   所以 10 點就已經去瞓覺 lu ~

~~~~

今朝 Friday 好胃口   所以食芝蛋治烘底 + 奶茶 ($15) ~

番到菇場扮下做嘢   晏晝同媽咪飲茶   之後去覆診喇 ~

唔去唔得嘅元綠壽司 ( JUL-2008 )

尋日朱朱無啦啦唔舒服   搞到我哋一家人勁擔心 ~

都唔記得講   朱朱病都病得惡過人   點解咁講呢   因為個護士想抱起朱朱 Check 心跳時   朱朱一嘢咬個男護士   嚇到佢即刻縮手   我又尷尬   真係唔知好嬲定好笑 ~

咁尋晚打去問朱朱情況   醫生話心臟同哮喘無問題㗎喇   但肝臟同胰臟嘅酵素好高 (正常 1,000   但朱朱 3,000)   所以要留兩晚醫院落藥同吊鹽水呀 ~

家姐尋晚探朱朱   家姐問抱唔抱得朱朱   護士話唔得住   要聽埋佢講朱朱情況先可以抱   但朱朱係咁抓門   所以護士好無奈咁叫家姐抱好朱朱再聽啦   家姐話朱朱超嗲   個頭仔挨哂落家姐隻手度瞓覺呀   家姐走嗰陣時   朱朱由左邊行到右邊係咁望住家姐   好可憐呀 ~

尋日里奧大人上大陸   諗住無咁快番到屋企   所以買隻茶葉蛋醫肚   食到一半里奧大人話 20 分鐘可以番到屋企   無啦啦咁快嘅 ~

本來想食車仔麵   但里奧大人落車嘅巴士站正正係元綠門口   咁吸引   唔入唔得啦 ~

由於我食咗隻茶葉蛋有啲滯   所以只係食熟帶子壽司 / 素魚翅海蜇壽司 / 天婦羅蟹柳壽司 / 韓式螺肉壽司 / 巴黎汁焗餃子 / 辣味日式炸雞拉麵 / 芒橙樂 / 巨峰葡萄蘆薈   埋單 $148   我覺得係有史以嚟最飽係呢次 ~

食完番屋企   里奧大人就自己去做機   我就沖涼休息喇  ~

~~~~

今朝天氣非常好   但勁熱 ~

無咩胃口   所以去 KFC 食焗鬆餅 + 奶茶 ($11)   但唔好食呀 ~

尋晚瞓得唔好   番到菇場都好似夢遊咁~

晏晝同里奧大人去麥記食咗黑椒漢堡餐 (加大) + 1 個黑椒漢堡   今次黑椒汁唔夠多   薯條又唔熱   最慘係好嘈   嘈到頭痛呀 ~

叉燒燒鴨飯 @ 大家樂 + 朱朱入院 ( JUL-2008 )

尋晚我都仲係無胃口   所以里奧大人去大家樂買叉燒燒鴨飯算喇 ~

食完一陣   沖涼就瞓 lu ~

~~~~

今朝里奧大人無帶公司 Pass   好在同佢同一區   又好在我今朝遲出門口   唔係又要等同事去洗手間   佢先可以去洗手間喇 ~

好在今朝無咩胃口   買咗燒賣 + 奶茶 ($11) 番公司食   如果唔係會無時間食早餐㗎 ~

媽咪 10 點幾打嚟   話朱朱咳咗一聲之後硬哂   一抱起個身就軟 Lai Lai 唔郁   嚇到媽咪即刻打比我   我就即打的番屋企接朱朱再去寵物醫院   初步檢驗應該係心臟病發   所以要留院聞氧氣   好在無事咋   朱朱都十幾歲喇   真係好擔心㗎 ~

條街熱到呢   熱到胃口都無呀   所以晏晝唔食嘢喇   瞓覺休息 ~ 

住家飯 @ 奶奶屋企 ( JUL-2008 )

里奧大人做功課做到 7788   所以可以去奶奶屋企食飯喇 ~

今晚食炸豬扒 + 蒸魚 + 腐乳通菜 + 菜心   食完番屋企 lu   因為想睇錄咗嘅歐洲國家杯呀 ~

番到屋企即沖涼   之後就可以一路嘆龍眼一路睇波喇 ~

其實一早已經知賽果   所以都唔係用好開心嘅心情好睇   西班牙對德國 1:0   點解呀 ~

~~~~

今日 1 / 7 放假呀   同里奧大人去太興食早餐   食花生醬厚多士 + 火腿通粉餐   超飽   之後我番屋企休息喇   因為每月一到呀 ~

3 點幾里奧大人出去買 Tea   我食粟米磨菇粥   里奧大人食酸辣雲吞米線   我食完又繼續瞓喇   好在假期   瞓幾耐都得 ~

變形薯仔餅 ( JUN-2008 )

尋日同里奧大人去大家樂食 Tea   因為驚落雨麻煩   唔想行咁遠呀 ~

食燒鴨瀨同叉燒瀨   啲燒鴨皮好好味呀   食完同里奧大人去買零食就番屋企喇 ~

是日懶餐 - 薯仔餅

薯仔餅 - 唔知點解   媽咪煎嘅係一塊塊同煙煙韌韌   但我煎親都係一 Pat Ppat 咁嘅   離遠睇仲以為係糯米飯呀 ~

一路食生果一路睇獎門人   不過麻麻哋好笑   失望失望 ~

我勁鍾意食大樹菠蘿   今次買 $20/盒   但唔係咁甜囉 ~

里奧大人覺得大樹菠蘿有陣味   所以唔食   咁就食龍眼啦   我會拻好放入雪櫃   雪涷好好味㗎   不過我好憎拻龍眼   因為拻到手指好痛㗎 ~

食開有條路   再食馬仔 齋雞粒同檸汁薑   嚇到里奧大人暈咁滯   因為佢話食完飯無幾耐可以食咁多嘢喎 ~

~~~~

今朝無啦啦落超級大雨   好在長期帶備縮骨遮   唔係就慘喇 ~

尋晚食得飽得滯   所以食奶油多 + 奶茶 ($13) ~

番到菇場又忙喎   今日我會努力工作   因為我受人錢財 ~

晏晝同里奧大人去茶餐廳食 Lunch   食鹹魚叉燒粒炒飯 + 鴛鴦腸 (叉燒 / 牛肉)   $48 埋單   我好唔鍾意食叉燒   但里奧大人就好鍾意食   所以我要成日就佢食叉燒   真係覺得自己好好呀 ~

粉絲焗蝦煲 + 腐乳炒通菜 + 跑步機 ( JUN-2008 )

尋日同里奧大人食完 Lunch   番到屋企抖一陣就一齊做機 lu ~

唔知點解   個人呢排好唔願郁   家務都唔願做呀   但唔做又唔得喎   係咁易洗衫熨衫簡簡單單就算喇 ~

平時星期六我多數會煲湯   但里奧大人呢排熱氣   所以改煲菊花茶同埋煲定腐竹糖水   咁應該夠清潤喇啩 ~

是日晚餐 - 粉絲焗蝦煲 + 腐乳炒通菜

粉絲焗蝦煲 - 第一次整嘅   原本 Recipe 係要用日本長蔥 / 中蝦 / 辣椒 / 蒜頭 / 豆豉 / 粉絲同埋係焗嘅方法來煮   但我懶唔想開爐   唔想買多樣嘢   所以用急涷蝦 (因為已過期 1 日)   走蔥走辣椒   就咁用蒜粒 / 豆豉 / 蝦 / 粉絲同金菇加大量辣麻油一齊炒   我覺得超正呀 ~

腐乳炒通菜 - 我成日覺得炒菜好煩   驚炒極都唔熟   但 Recipe 教灼完再炒   咁就好好多喇   咁樣唔會唔熟嘛 ~

洗埋碗同里奧大人睇 Scanner 再行百佳   終於忍唔住買 4 排益力多   因為 $15.8/2 排   最主要係益力多溝綠茶粉可以清宿便   所以耐唔耐都要飲下 ~

番到屋企沖涼之後就食齋鴨腎同飲腐竹糖水喇   唔係太甜   飲完覺得皮膚都滑啲咁呀 ~

~~~~

今朝 10 點起身喇   因為要番祟拜   梳洗完就打的去教會附近食早餐   食蛋麵同丁蛋麵   食完番教會喇 ~

之後同里奧大人去街市買嘢就番屋企   抖陣就食 Tea  ~