住家飯 @ 姑奶屋企 ( OCT-2008 )

尋日番屋企拆完冰姑禮物包之後就同里奧大人食 Tea   食星洲炒米 + 紫菜魚腐湯金邊粉 + 油醬多   平時我哋都食得哂   但今日我無咩胃口   所以食剩半碟米粉   嘥哂呀 ~

食完咪又番屋企坐陣咯   之後接到 Blog 友冰姑電話   只傾咗 5 分幾鐘咋   真係唔夠喉   但趕住番教會   不得不收線呢 ~

崇拜完畢就即刻打的去姑奶屋企食飯   因為喺德國嘅舅父番咗嚟香港   所以食飯聚一聚 ~

諗住食完飯做下運動   點知無咩 Mood   所以都係無做到   做運動真係要好有決心   因為實在有太多種種藉口唔做呢 ~

~~~~

今朝天氣好好   所以心情都好好   所以就煮蛋丁丁做早餐喇   里奧大人食一次讚一次㗎 ~

叉燒蛋絲炒米粉 + 金銀蛋菠菜 + 淮山杞子圓肉茨實當參石斛豬展湯 ( OCT-2008 )

尋晚雖然夜瞓   但都堅持要番教會   因為之前太忙   成個月都無番過   所以同里奧大人一齊 10 點起身   梳洗後就打的去教會附近食早餐喇   諗住祟拜完就即去做機   咁食炸菜肉絲米粉配腸仔蛋   而里奧大人就要配火腿炒蛋嘅   食完就去祟拜喇 ~

本來諗住聽完道就即打的去做機   點知 12 點 45 分都仲未講完   所以唔做機喇   因為體育館 1 點 Close 嘛   橫掂唔駛做機   所以同里奧大人逛街市買餸   買咗 1 斤菠菜 ($6) 再買豬𦟌 $20 同 3 塊豬扒 ($15)   豬肉婆都唔知係咪未瞓醒   我好清楚講話要 $20 豬𦟌   佢居然斬 $36 比我   我話唔要咁多   $20 夠喇   咁啲豬扒又切到厚厚咁   真係唔知佢做咩嘅   咁厚好難煎家嘛 ~

 
之後同里奧大人慢慢行番屋企   再去 Jusco 買叉燒 ($18)   之後再睇下有咩鞋款   睇睇下咁就已經成 2 點幾   要番屋企放低嘢又去 Tea 喇   食咗 XO 醬炒公仔麵 同 三絲炒意粉   其實好怕肥   但又真係好想食囉 ~

本來我又諗住食完就去公園散步   但有輕微頭痛   唔想吹風   所以就改為同里奧大人行商場喇   終於行下行下搵到里奧大人想要嘅款   咁啱我又有想要嘅兩款鞋   買完就走喇   再行多陣   里奧大人又有鞋啱心水   所以順便買多兩對   拎住 5 對鞋真係唔番屋企唔得喇 ~

番到屋企已經 5 點半   要快快手咁煲湯 ~

是日晚餐 - 叉燒蛋絲炒米粉 + 金銀蛋菠菜 + 淮山杞子圓肉茨實當參石斛豬𦟌湯

叉燒蛋絲粉炒米粉 - 唔想食飯   所以煮超簡易米粉 ~

金銀蛋菠菜 - 菠菜含有酸性會破壞體內鈣質   所以滾完菠菜嘅水千萬唔好要呀 ~

淮山杞子圓肉茨實當參石斛豬𦟌湯 - 滋陰補腎   一個好好嘅湯水 ~

食完再沖埋涼就同里奧大人睇番獎門人   好鬼搞笑   尋晚仲一路食蝦片一路睇   真係勁嘆呀 ~

~~~~

今朝又係涷涷哋   不過呢啲天氣真係好舒服囉 ~

星期一嘅早餐多數想食甜嘅   所以就食芝腿菠蘿包 + 奶茶 ($15) ~

番到公司做埋少少嘢   就有大把私人時間喇 ~

晏晝帶飯   點知里奧大人同啲同事失散咗   所以搵我陪   我食完就去咗 Cafe 搵里奧大人   佢食咖啡牛腩意粉 Set Lunch   但份量好多   又要我陪食   真係飽到上心口呀 ~

番到公司附近   麥當勞有流動車派即磨咖啡   唔駛排隊   所以拎杯試下   味道一般啫   仲諗住好香咖啡味添 ~

酸辣米線 ( OCT-2008 )

尋日口淡淡   所以一定要食啲刺激性食物嚟刺激味雷呀 ~

同里奧大人又去食酸辣米線   食到一半已經肚脹   因為我係一啖米線一啖湯呢 ~

~~~~

今朝勁反胃   所以食芝腿治烘底 + 凍檸茶 ($18)   飲完酸嘢舒服哂 ~

番到菇場上唔到網   又 M 唔到   好在有嘢做   又好在 11 點幾搞番掂   原來無得上網無得 M   真係痛苦到爆㗎 ~

遠方 Blog 友寄來的禮物包 ( OCT-2008 )

之前 Blog 友 冰姑  已經話會寄一箱禮物比我   咁好彩里奧大人今日 Off   可以幫我去 Post Office 拎禮物喇 ~

打比里奧大人問禮物 Size   佢話一大箱喎 ~

我放工即番屋企急不及待拆禮物   好興奮呀   因為一開全部都係零食呀   嗰一刻覺得自己好似人在他鄉   唔喺香港咁呀   因為見到好多好熟悉嘅牌子呢 ~

里奧大人見住我一路拎出嚟一路笑   佢自己都笑埋一份   仲話駛唔駛咁多嘢食呀   開心死妳啦 ~

冰姑   有啲食物香港有得買㗎   唔好嘥錢買嘛   知妳愛我咯   衰鬼 ~

仲更加有樣驚喜就係冰姑打嚟搵我呀   好彩平時同佢 M 得多   唔係佢第一句講嘅說話   我實會 Cut 線呀   第一次同佢傾電話   但個感覺好舒服   好似識咗好耐咁   最估唔到原來佢講嘢又係好快㗎   啱哂我呢啲快人快語型   最可惜我要番教會   如果唔係可以傾耐啲添呀   唔好意思呀   冰大姑 ~

今日真係好驚喜呀   沙冰姑   aku cinta pada mu ~

再瞓瞓瞓 ( OCT-2008 )

尋日仲係身體不適   所以請 S/L 喺屋企休息 ~

瞓醒睇醫生   睇完醫生再瞓過 ~

之後睇下電視   再等里奧大人番屋企   佢食梅菜扣肉飯   但我無咩胃口   所以食個蘋果算喇   之後傾下偈偈   打陣機   沖涼就瞓覺 lu ~

~~~~

今朝好好多喇   不過仲係有啲攰 ~

早餐食燒賣 + 奶茶 ($13)   勁難食勁難飲 ~

番到菇場有嘢做   但當然無咩 Mood 做啦   因為仲係好攰 ~

晏晝同里奧大人去餐廳食 Lunch   食時菜火腩飯 + 奶醬多 + 例湯 + 鴛鴦 ($48)   其實無咩胃口   但最低消費每人要 $9   所以咪要叫多啲囉   但自己計錯數   搞到食唔哂啲嘢   激屎人呀 ~

瞓瞓瞓 ( OCT-2008 )

尋日仲係唔多舒服   所以請病假喺屋企休息 ~

瞓醒睇醫生   睇完醫生再瞓過 ~

里奧大人就慘啲   假期一個人出去食嘢   晚飯又要外賣   不過佢應該幾 Enjoy 咁 Free 嘅   鍾意食咩就食咩   而我基本上全日都係瞓瞓瞓 ~

水餃米粉 ( OCT-2008 )

尋晚呢   里奧大人好夜先放工   所以就趁機拖地加熨衫 ~

如果里奧大人喺屋企我係唔會拖地   因為見到佢他他條條坐喺梳化睇報紙唔駛做嘅樣   我會好掹   拖都拖得衰過人㗎 ~

所以我多數一個人喺屋企先拖地   一路拖地一路炸機   爽呀 ~

是日懶餐 - 水餃米粉

水餃米粉 - 水餃 + 米粉   懶人屋企必備呀 ~

~~~~

今日係國慶   所以放假一天   但每月一到   所以瞓咗成日 ~