節瓜江瑤柱冬菇瘦肉粒湯飯 ( NOV-2008 )

呢排都要清清哋   所以最好就係瓜粒湯飯喇 ~

是日懶餐 - 節瓜江瑤柱冬菇瘦肉粒湯飯

節瓜江瑤柱冬菇瘦肉粒湯飯 - 將節瓜同瘦肉切粒   江瑤柱同冬菇就浸軟切粒   加雞粉調味   食嘅時候加啲胡椒粉仲正呀   真係又方便又好味呢 ~

~~~~

今日 Off   所以可以瞓晏啲   一起身先發覺已經 10 點 40 分   拿拿聲洗臉換衫食早餐   唔想食肉   所以去 KFC 食牛角包 + 奶茶 ($13.8)   食完就去百佳買鯇魚 + 甘筍   再殺入街市買竹庶茅根   百佳買竹庶茅根好貴   要 $8.9/1 扎   街市啲凍肉舖賣 $10/2 扎   差好遠呀   所以買咗 4 扎番屋企   咁樣甜啲吖嘛 ~

雖然 Off   但番到屋企掛住整呢樣整嗰樣   啲時間過得好快呢 ~

等埋里奧大人放工番屋企   就一齊去食 Tea 喇 ~

梅菜蒸肉餅 + 蒜蓉炒金菇 ( NOV-2008 )

尋晚特登接里奧大人放工   好在佢都精神   咁我都安樂啲 ~

之前已經醃好咗啲免治豬肉   所以番到屋企都好快可以食飯喇 ~

是日懶餐 - 梅菜蒸肉餅 + 蒜蓉炒金菇

梅菜蒸肉餅 - 最緊要清   最緊要快   所以就整肉餅喇   其實我最憎食肉餅   啖啖肉好唔健康呢 ~

蒜蓉炒金菇 - 擺咗成個星期   再唔食就會變壞㗎喇 ~

估唔到 8 點前可以食完飯洗埋碗   諗住沖涼   點知里奧大人話不如陪佢睇埋 "畢打自己人" 先沖啦   難得佢睇電視劇 Relax 喎   咁梗係陪啦 ~

睇完之後佢就做公司嘢   不過都好嘅   咁即係代表佢已經完全康復哂嘛 ~

依家點懶都好   都要比自己食生果   食完木瓜又他他條條睇下電視呢 ~

~~~~

今朝 6 點 15 分起身   因為約咗媽咪 朱朱食早餐呀 ~

真係好眼瞓   但聽日 Off 我想喺屋企休息   所以幾眼瞓都好   都要同佢哋食早餐呢 ~

番到菇場要拿拿臨做完哂手頭上嘅嘢   因為我唔鍾意堆埋啲嘢唔做呀 ~

問里奧大人想食咩   點知佢極度興奮話去興記食豬扒麵   所以咪同佢去囉   難以佢開口話食嘛   同埋今朝媽咪比咗樽竹蔗水   可以潤下  最多今晚清啲囉   我早餐仲未落格   所以食豬扒包算喇 ~

薑蔥雞肶 + 蕃茄薯仔魚湯 ( NOV-2008 )

見里奧大人唔舒服   我個心仲唔舒服   又擔心喎   我覺得係呢排成日出街食  所以食得太雜  無哂營養  又無湯水   無埋抵抗能力   加上里奧大人工作壓力大   又唔夠時間休息   所以咁易比病菌打倒   好可憐呀 ~

就係因為里奧大人病咗   所以嚟緊嘅將來我會發奮煮飯   煮到煮唔到為止 ~

尋日雖然請咗假   但真係忙過番工   陪完里奧大人睇醫生   之後去超市 街市 銀行   番到屋企再煲粥 拖地 清理文件等等 ~

晏晝清清哋   煲啖粥   加啲陳皮絲   但唔知點解個粥會咁杰嘅   唔知係咪因為唔係用電飯煲煲粥呢 ~

全日未停過   又要周不時摸下里奧大人有無標冷汗   搞到我呢日都精神緊張呀 ~

是日晚餐 - 薑蔥雞肶 + 蕃茄薯仔魚湯

薑蔥雞肶 -  里奧大人想食薑   所以整薑蔥蓉啦   雞肶就咁蒸   放落電飯煲都蒸唔熟   又要開火再蒸   麻鬼煩 ~

蕃茄薯仔魚湯 - 想醒胃啲   所以用 4 個蕃茄 + 1 個細薯仔 + 2 條紅衫魚   依家紅衫魚又貴咗咁   2 條要廿蚊呀   不過有營養   點都要買嘅   最多食埋條魚去囉 ~

今次里奧大人唔舒服   我特登請假陪佢   佢話好感動呢   因為估唔到我會咁做喎 ~

我覺得佢今次病係我做成   因為我懶   成日無煮飯   佢又為咗可以令我有舒適嘅生活   所以佢份工點辛苦都要番工   我個心真係好痛好痛 ~

我情願我有病   因為我唔想病會令佢辛苦   我病無所謂   唔食嘅話   體內仲有大量脂肪燃燒   工作壓力又唔大   留番第日做都得   但里奧大人一唔番工   手頭上嘅嘢都係佢做番   所以好慘呢 ~

~~~~

今朝早咗起身   所以去美心食早餐  食至愛嘅吉列魚柳腸仔厚多士 + 奶茶 ($21) ~

食到飽飽番菇場   又係忙到震   好充實呢 ~

晏晝同里奧大人去公司附近食 Lunch   食完可以快啲番公司休息   基本上茶餐廳無咩嘢係唔油膩   所以清清哋食粟米豬扒飯 + 熱檸檬菜蜜 ($37)   不過個汁超稀   無咩味   所以真係好清囉 ~

住家飯 @ 奶奶屋企 ( NOV-2008 )

尋晚放工去奶奶屋企食飯   所以我又可以順便探探媽咪同朱朱喇 ~

睇見媽咪餵朱朱食營養糊仔就好笑   一路餵一路腳撐撐   係都要走   閒閒哋要餵半個鐘   一路餵又要按摩下咁   餵完好似打完仗咁攰   笑爆咀 ~

坐咗個幾鐘就同里奧大人去奶奶屋企食飯   今次我就醒喇   食之前問有無隔夜餸   有就唔食嗰碟㗎喇 ~

同里奧大人坐車時傾偈   佢話同我晏晝食飯嘅時候係好開心㗎   因為有時工事好煩   見到我會開心啲喎   不過我都信嘅   話哂我都係人見人愛嘛   哈哈哈哈 ~

番到屋企當然要食生果啦   食咗生果真係做咩都順過人㗎 ~

~~~~

今朝開始涼咁噃   不過最唔鍾意毛毛雨囉 ~

天氣轉涼就要食飽啲   所以食五香肉丁腸仔蛋麵 + 熱央 ($18)   食飽渾身是勁呀 ~

番到菇場又係咁忙   咁都好   代表好生意嘛 ~

晏晝同里奧大人食黑椒牛扒雞串意粉餐 + 油醬多   估唔到會有中式餐湯   太耐無飲湯   所以覺得都唔錯呢 ~

麥當勞蘋果批 ( NOV-2008 )

尋晚放工約保險朋友喺麥當勞傾嘢   費事齋坐咁肉酸   所以就買蘋果批 + 橙汁 喇 ~

之後里奧大人就一齊傾埋   但佢個胃唔舒服   買個雙層芝士孖寶 + 可樂   諗住飲汽水 "Ur" 胃氣   點知都係唔得   之後仲面青青手又凍   嚇到我吖   等里奧大人休息一陣就拿拿臨打的番屋企喇 ~

番到屋企里奧大人即刻瞓覺   而我就喺高度戒備下做家務同睇電視呀 ~

諗住瞓覺   點知里奧大人起身話肚餓食杯麵   我又點忍心吖   所以煮咗水餃米粉比佢食   等佢食完   我就洗埋碗先瞓呀   好到吖 ~

~~~~

今朝里奧大人都係唔舒服又無咩力   所有我都請假陪佢呀 ~

去麥當勞買外賣   食完就即刻睇醫生喇   原來感冒菌入腸胃   唔怪之得個胃痛啦   陰公 ~  

元綠壽司 @ 大埔 ( NOV-2008 )

尋日本來要出去做個 Research 訪問   但見里奧大人難得喺屋企唔做功課好 Relax 咁抖下   所以我都唔做 Research 喇   想留番喺屋企陪里奧大人呀 ~

之前感冒   依家每月一到   日日出去食咁   食到無嘢想食  一諗起食咩就頭痛 ~

太遠又唔想行   所以又係去茶餐廳食 Tea ~

星期日真係無咩節目好睇   多數都係睇報紙雜誌打機咁過 ~

夜晚又要諗諗食咩   真係好難諗   食元綠壽司算喇 ~

~~~~

今朝食芝腿菠蘿包 + 凍奶茶 ($17)  唔知係咪幾日無飲奶茶   所以飲完特別精神   再加上菇場超忙   所以更加衝勁呀 ~

晏晝同里奧大人食米線    近近哋又好味   掛住同里奧大人傾偈   居然唔記得影佢嗰碗添   女人真係講起嘢上嚟就咩都唔記得 ~

老地方 @ 大埔 ( NOV-2008 )

今朝雖然都仲係唔舒服   但都照番工   半日應該好易過嘅   好彩老細 12 點有事走先   我可以大模師樣咁伏喺枱休息喇   再校定電話鬧鐘   1 點鐘即響即醒即走呀 ~

番到屋企又係瞓   瞓到 4 點幾   個人當堂好番哂   之後同里奧大人去食 Tea 喇   食完番屋企都係"灘" 喺梳化唔願郁 ~

坐到 8 點幾   雖然我唔餓   但里奧大人都會應該餓啦   所以就落街食飯 lu ~

無咩胃口   同里奧 Share 食沙爹炸雞翼撈麵 + 菜心   食完又拿拿聲番屋企休息喇 ~

呢日只係坐瞓食   都幾辛苦下   因為無咩郁   所以腰骨好痛呢 ~

~~~~

今朝都無番祟拜   可以同里奧大人慢慢食早餐呢 ~