見里奧大人唔舒服 我個心仲唔舒服 又擔心喎 我覺得係呢排成日出街食 所以食得太雜 無哂營養 又無湯水 無埋抵抗能力 加上里奧大人工作壓力大 又唔夠時間休息 所以咁易比病菌打倒 噢 好可憐呀
就係因為里奧大人病咗 所以黎緊嘅將來我會發奮煮飯 煮到煮唔到為止
晏晝清清地 煲啖粥 加 d 陳皮絲 但唔知點解個粥會咁杰嘅 唔知係咪因為唔係用電飯煲煲粥呢
全日未停過 又要周不時摸下里奧大人有無標冷汗 搞到我呢日都精神緊張呀
是日晚餐 - 薑蔥雞肶 + 蕃茄薯仔魚湯
薑蔥雞肶 - 里奧大人想食薑 所以整薑蔥蓉 雞肶就咁蒸 放落電飯煲都蒸唔熟 又要開火再蒸 麻計煩
蕃茄薯仔魚湯 - 想醒胃 d 所以用 4 個蕃茄 + 1 個細薯仔 + 2 條紅衫魚 依家紅衫魚又貴咗咁 2條要 20蚊呀 不過有營養 點都要買嘅 最多食埋條魚去囉
我情願我有病 因為我唔想病會令佢辛苦 我病無所謂丫 唔食嘅話 體內仲有大量脂肪燃燒 工作壓力又唔大 留番第日做都得 但里奧大人一唔番工 手頭上嘅嘢都係佢做番 所以好慘呢
今朝早咗起身 所以去美心食早餐 食至愛嘅吉列魚柳腸仔厚多士 + 奶茶 ($21)
食到飽飽番菇場 又係忙到震 好充實呢
晏晝同里奧大人去公司附近食 lunch 食完可以快 d 番公司休息 基本上茶餐廳無咩嘢係唔油膩 所以清清地食粟米豬扒飯 + 熱檸檬菜蜜 ($37) 不過個汁超稀 無咩味 所以真係好清囉
沒有留言:
發佈留言