茄汁洋蔥豬扒 + 蔥粒炒飯 ( 4-JUL-2009 )

( 4-JUL-2009  SAT )

今朝晏少少先起身   真係好爽呀   再食埋個芝士腸炸菜肉絲出前一丁做早餐仲爽呀   不過食麵唔飲凍嘢真係好鬼熱   但係又唔想比自己一早起身飲凍嘢   對身體唔好嘛 ~

本來今日好開心㗎   因為諗住去同媽咪 里奧大人去家姐屋企玩   點知家姐同事確診有流感   咁就唔喇   驚媽咪老人家身體弱嘛   所以取消算喇 ~

無哂 Mood 添   因為我唔鍾意 Plan 好咗之後有改變嘅人嚟㗎 ~

放工同里奧大人去食 Tea   又唔想出街   所以又租 DVD 喇   今次租 "霍元甲" 同埋 "特務 S 嘜" ~

今日晚餐好方便   所以就咁去街市買個洋蔥就可以番屋企睇碟喇 ~

是日懶餐 - 茄汁洋蔥豬扒 + 蔥粒炒飯

茄汁洋蔥豬扒 - 食多啲洋蔥好呀   殺菌消毒呀   哈哈 ~

蔥粒炒飯 - 無心機整   所以求其用老抽整靚個樣就算喇 ~   

咖哩餐 ( 3-JUL-2009 )

( 3-JUL-2009  FRI )

今朝特登早少少起身   諗住去百佳買嘢有環保袋   點知啲袋肉酸到爆   得豆豉鯪魚同金鳳米   最離奇係 8 點半已經派哂   可能呢間比較細   所以分配得唔多啦 ~

行到熱辣辣   無哂胃口   所以都係食番三文治算喇 ~

雖則 Happy Friday   但無嘢做都真係幾悶   無哂 Mood ~

太熱喇   真係唔想行咁遠   同里奧大人去麥當勞   今餐啲薯條唔掂啦   又硬又乾 ~

今晚又係勁他條呀   因為之前整好咗咖哩   所以買條法包番屋企就可以開餐喇 ~

是日咖哩餐 - 材料有薯仔 + 紅蘿蔔  + 紫洋蔥 + 魚棗 + 龍蝦丸

里奧大人話喉嚨唔舒服   唔想食乾爭爭嘅包   想食福麵   我當然唔比啦   難得唔駛煮飯   無啦啦要我煮麵   我唔會㗎   同埋已經整好咗熱辣辣嘅咖哩   咁等埋個麵咪凍哂囉   照食包算啦   點咖哩汁就唔會乾爭爭啦 ~

雖然呢餐係煮好咗   但我好有心機咁慢慢整熱啲咖哩㗎   因為我兩次煮咖哩都煮濃咗   所以今次企定定  慢慢攪㗎 ~

我又將個法包喺易潔鑊慢慢烘熱   外脆內軟   好好味㗎 ~

食完咁燥熱嘅嘢   食番碗沙律就得啦   唔好嘈喇 ~

冬菇臘腸蒸雞翼 + 蒜蓉炒脆肉瓜 ( 2-JUL-2009 )

( 2-JUL-2009  THU )

好眼瞓呀   尋晚瞓到半夜三更比怪聲嘈醒   濛濛龍龍以為自己發夢   但又真係聽到怪聲   好驚呀   嚇到成個身熱哂   啲聲又好似越聽越近咁   哎呀   原來係里奧大人發出啲怪聲呀   係咁 "烏烏烏烏" 聲   我即訂輕輕推下佢   等佢唔好再烏烏叫呀   如果唔係應該可以一覺瞓天光呢 ~

尋朝早餐太鹹啦   所以好想走去食甜嘅早餐 ~

番到菇場都好開心   感覺好似番多兩日又放假咁   最鍾意係星期三放假   啲時間好似過得好快咁㗎 ~

晏晝同里奧大人去食煎餃子    雜誌話好食   咁就試下啦   又唔駛等位   只不過要等成 20 分鐘先有食   仲要催先有   我覺得係漏咗單先咁耐囉   同埋都唔係咁好味啫   真係期望太大失望真係越大喇 ~

隨餐附送嘅酸辣湯 / 加 $5 嘅凍豆漿

芝士南瓜煎餃子 - 撞鬼   啲芝士有陣 "壓" 味咁呀   就咁食真係好難食   我狂蘸黑醋同辣椒醬   雖然味道極唔夾   但都好過一陣 "壓" 味呀

辣韓式煎餃子 - 又話好辣   等我仲驚里奧大人食唔到添   點知呃鬼嘅   一啲都唔辣

今晚發達啦   因為醃好哂餸   只係去街市買菜同生果就搞掂   里奧大人又 7 點鐘番到屋企   咁 7 點 15 分就可以開飯喇 ~

是日懶餐 - 冬菇臘腸蒸雞翼 + 蒜蓉炒脆肉瓜

冬菇臘腸蒸雞翼 - 超簡單又好味   蒸嘅雞翼真係好滑呀 ~

蒜蓉炒脆肉瓜 - 都係超簡單又好味   炒嘅脆肉瓜真係好爽呀 ~

豬柳漢堡炒鳥冬 + XO 醬炒西蘭花 ( 1-JUL-2009 )

( 1-JUL-2009  WED )

正啦   又放假   等咗好耐喇 ~

同里奧大人10 點起身   去太興食早餐   雖然要等 10 幾張枱   但今次我真係好想食太興早餐   所以都照等   好彩等咗一陣就有位   不過係圓枱要搭枱   無所謂啦   好過出面企係度等咁熱嘛 ~

今次正啦   食多半份早餐呀   因為搭枱關係   食嘅早餐又差唔多   唔係隔離就係我㗎啦   我食之前問清楚係咪隔離先食㗎   點知無啦啦又嚟多份   我即刻同 Waiter 講食錯咗   個 Waiter 話由佢啦   食埋佢啦   又好喎   不過呢餐早餐真係好飽呢   哈哈 ~

食完就去租碟   太熱喇   唔想出街   煲碟就最好喇 ~

里奧大人出去跑步   我就熨衫當做運動   又掃下地   呢度執下嗰果度執下   時間過得好快咁呀 ~

諗住去大家樂食 Tea   點知勁多人   所以又去茶餐廳喇 ~

買完餸就番屋企睇碟   今次租咗 "葉問" 同 "冰河世紀 2"   但我唔鍾意臨瞓前睇啲打鬥戲   所以睇咗 "葉問" 先   真功夫真係好好睇呀 ~

知道夜晚再要睇多隻碟   所以就煮啲極度 Easy 又可口嘅晚餐喇 ~

是日晚餐 -  豬柳漢堡炒鳥冬 + XO 醬炒西蘭花

豬柳漢堡炒鳥冬 - 掉咗個包裝袋   所以唔記得要唔要浸水先炒   不過時間關係   我就咁炒   所以碎濕濕 ~

XO 醬炒西蘭花 - 本來想蒜蓉炒就算   但驚里奧大人悶   所以求其加 XO 醬當新餸   食完飯   沖埋涼   再嘆住冰凍車厘子睇 "冰河世紀 2"   爽呀 ~

住家飯 @ 媽咪屋企 ( 30-JUN-2009 )

清蒸青斑加鹹魚 / 蝦醬炒通菜 / 絲瓜野生竹笙魚滑湯 / 金枕頭 / 黃皮

( 30-JUN-2009  TUE )

早餐 : 芝士蘑菇雞肉腸片三文治烘底 & 奶茶

午餐 : 同里奧大人 & 媽咪去美心皇宮飲茶   因為媽咪媽咪煲咗紅棗山斑魚湯呢 ~

蟹籽燒賣 / 龍蝦湯鮮竹卷 / 煎腸粉 / 乳豬飯 / 叉燒包 /紅棗山斑魚湯

晚餐 : 去媽咪屋企食呀   家姐咁啱唔番屋企食飯   里奧大人就番奶奶屋企食   所以我想陪下媽咪   食完飯   幫媽咪按下腳   之後 Join 里奧大人一齊番屋企喇 ~   

芝士焗肉醬意粉 + 粟米蛋花湯 ( 29-JUN-2009 )

( 29-JUN-2009  MON )

星期一起身係最痛苦   真係好想瞓到自然醒呀 ~

瞓得好都好啲   最慘尋晚瞓得唔好   勁痛苦呀 ~

今朝好想食芝蛋治同熱央呀   我已經係要走牛油少蛋   但都覺得好漏 ~

番到菇場仲慘   靜到呢   出現耳鳴呀   妳話無得上網嘅話   實有抑鬱症都似 ~ 

晏晝同里奧大人行遠少少食 Lunch   不過真係好熱呀   哈哈 ~

放工去超市買嘢   再等埋里奧大人放工一齊買衫   之後就番屋企   一齊放工真係好開心 ~

是日晚餐 - 芝士焗肉醬意粉 + 粟米蛋花湯

芝士焗肉醬意粉 - 唔知點解整唔到紅卜卜顏色嘅   但一樣好好食喎   今次用一整包 Mozzarella Cheese   因為 3/7 到期   超正呀   煙煙韌韌咁   又唔覺好漏喎 ~

粟米蛋花湯 - 無買菜   所以用粟米湯頂上 ~

三文魚扒 + 菜心 + 五香肉丁炒飯 ( 28-JUN-2009 )

( 28-JUN-2009  SUN)

一早諗好要食公仔麵   所以呢朝有得食好開心呢   呢間茶餐廳嘅公仔麵   口感勁似出前一丁㗎   咁就唔駛特登加 $3 轉丁啦 ~

番到屋企即做家務喇   因為想晏晝他他條條睇報紙嘆下呀 ~

里奧大人依家又 Join 番跑步   我就唔啦   因為平時夜晚跑步真係好趕   買餸煮飯食飯洗碗   樣樣都要快   好緊張   攪到個人仲攰咁   所以我改為夜晚喺屋企做運動就算 lu ~

同里奧大人食酸辣米線   等食期間聽到有班女仔話食薯條嘅時候   發現有隻 "蚊之" 響碟薯條度   叫個 Staff 睇睇   個 Staff 話隻 "蚊之" 係飛入嚟   唔係炸嘅時候喺度㗎   咁叫廚房整過一碟妳哋啦   最搞嘢係班女仔仲繼續食碟有 "蚊之" 嘅薯條喎   之後老闆娘黑哂面叫個 Staff 埋去話   妳應該同班女仔講隻 "蚊之" 點點點   個 Staff 又話我都係咁講點點點㗎   個老闆娘都唔知有無搞錯嘅   呢度係妳地方   更係要負責啦   一碟薯條都咁緊張   頂佢唔順呀 ~

是日晚餐 - 三文魚扒 + 菜心 + 五香肉丁炒飯

三文魚扒 - Jusco 買嘅   我覺得無咁腥   之前喺百佳買嗰啲好腥㗎   搞到我曾經好抗拒三文魚扒呢   今次好有心機煎到金黃色咁   但點解唔脆嘅 ~

菜心 - 見到好靚咁   所以買嚟食   估唔到真係好甜呀 ~

五香肉丁炒飯 - 五香肉丁擺咗喺雪櫃已經一個星期   估唔到仲未壞   所以用嚟炒飯   好惹味呀 ~ 

飯後果 - 水姑奶買咗 5 磅車厘子比我哋呀   太好啦   正想補血 ~