豬柳漢堡炒鳥冬 + XO 醬炒西蘭花 ( 1-jul-2009 )

( 1-jul-2009 wed )

正啦   又放假   等咗好耐喇 ~ 

同里奧大人10 點起身   去太興食早餐   雖然要等十幾張枱   但今次我真係好想食太興早餐   所以都照等   好彩等咗一陣就有位   不過係圓枱要搭枱   無所謂啦   好過出面企係度等咁熱嘛 ~ 

今次 so 啦   食多半份早餐呀   因為搭枱關係   食嘅早餐又差唔多   唔係隔離就係我架啦   我食之前問清楚係咪隔離先食架   點知無啦啦又黎多份   我即刻同 waiter 講食錯咗   個 waiter 話又佢啦   食埋佢丫   噢   又好喎   不過呢餐早餐真係好飽呢   哈 ~ 

食完就去租碟   太熱喇   唔想出街   煲碟就最好喇 ~ 

里奧大人出去跑步   我就熨衫當做運動   又掃下地   呢度執下果度執下   時間過得好快咁呀 ~

諗住去大家樂食 tea   點知勁多人   所以又去茶餐廳喇 ~ 

買完餸就番屋企睇碟   今次租咗 "葉問" 同 "冰河世紀 2"   但我唔鍾意臨瞓前睇 d 打鬥戲   所以睇咗 "葉問" 先   真功夫真係好好睇呀 ~ 

知道夜晚再要睇多隻碟   所以就煮 d 極度 easy 又可口嘅晚餐喇 ~  

是日晚餐 -  豬柳漢堡炒鳥冬 + XO 醬炒西蘭花

豬柳漢堡炒鳥冬 - 掉咗個包裝袋   所以唔記得要唔要浸水先炒   不過時間關係   我就咁炒   所以碎濕濕 ~

XO 醬炒西蘭花 - 本來想蒜蓉炒就算   但驚里奧大人悶   所以求其加 XO 醬當新餸   食完飯  沖埋涼   再嘆住冰凍車喱子睇 "冰河世紀 2"   爽爽爽呀 ~