( 29-AUG-2009 ) + ( 30-AUG-2009 ) + ( 31-AUG-2009 ) + ( 1-SEP-2009 )

( 29-AUG-2009  SAT )

星期六啦   6 點 15 分起身同媽咪食早餐   不過好在次次都無想像中咁眼瞓   如果唔係我會發脾氣囉 ~

吉列魚柳腸仔配厚多士 - 我鍾意食魚   吉列魚柳都係魚   不過就好熱氣好肥   同埋我有時唔食塊皮   得嗰啲啲魚   好唔飽咁呢 ~

厚多士 - 塗滿牛油超正   但真係好肥囉

他他醬 - 大家樂嘅他他醬好好味   有啲酸瓜粒超醒胃

炒麵 - 媽咪食嘅

皮蛋瘦肉粥 - 都係媽咪食嘅   不過估唔到都有幾多皮蛋呢

番到菇場上網 Hea 下又到放工   真係好渴望每逢星期六都係 Off 嘅日子呀~

晏晝都仲未有胃口   所以同里奧大人食酸辣米線   刺激啲開胃啲咁呀 ~

番到屋企又第一時間沖涼 Hea 喺梳化   真係好攰   呢排攰得交關   里奧大人自己出去探奶奶   我就喺屋企休息   瞓咗兩轉覺   精神好多呢 ~

晚喺屋企樓下酒樓同姑奶慶祝生日   不過無影相   費事個個等食仲喺度慢慢影   雖然我都影得唔靚   但我又唔鍾意求其影喎   所以唔影就最好喇 ~

( 30-AUG-2009  SUN )

每月一到啦   全日瞓   但其實個肚唔係好痛   不過好攰唔想郁呢   就咁瞓咗一日   都幾舒服嘅 ~

  

( 31-AUG-2009  MON )

瞓得太差喇   所以請病假   瞓到 4 點幾先起身睇醫生   順便食少少嘢   費事一陣胃痛仲煩   里奧大人就去探奶奶   之後再買飯盒番屋企食   次次我一病佢就食外賣   好似好慘咁 ~

( 1-SEP-2009  TUE )

要番工喇   買咗粉果 & 奶茶番菇場食   樣樣食一半已經想反胃   有排先捱到放工啦 ~

  

晏晝又係無乜胃口   所以買杯熱菜蜜同咸餐包做 Lunch 算喇   不過放工就好鬼肚餓囉  
里奧大人又去探奶奶   探完就買車仔麵番屋企食   本來好期待食嘢   但食食下好想反胃   所以比埋里奧大人食喇 ~

叉燒粒炒飯 + 菜心 + 雜豆糖水 ( 28-AUG-2009 )

( 28-AUG-2009  FRI )

Happy Friday 啦   要食甜甜哋早餐   個人都應該開心啲呢 ~

今日係里奧大人嘅 Last Day   所以同佢去食 Pizza Hut 慶祝   希望佢可以開闢另一片新天地呀 ~

龍蝦大蝦湯 - 我無飲到   不過里奧大人話味道唔錯

忌廉雞湯 - 必飲   加埋黑椒粉好正

銀箔海鮮螺絲粉 - 無厘味道  又唔夠汁   好多螺絲粉好乾呀
海鮮寬條麵 - 完全唔掂   又係毫無味道可言   同埋又係好乾

百事 / 忌廉梳打 - 最正常係呢兩杯飲品   仲可以免費加飲添

晏晝太飽啦   加上之前又有冷飯   所以買啲餸就可以番屋企就得 lu

是日懶餐 - 叉燒粒炒飯 + 菜心 + 雜豆糖水

叉燒粒炒飯 - 19 蚊叉燒   真係覺得買盒叉燒飯食好過   唔駛又切又炒又洗咁

菜心 - 尋晚碟菜心實在太少啦   所以今日食番夠本

雜豆糖水 - 又係媽咪特登整比我食㗎   今次加埋清心丸   食完仲更加飽肚呀  

沙隴茶餐廳 @ 大埔 ( 27-AUG-2009 )

咕嚕班塊 - 酸酸甜甜夠開胃   食魚係其次   最鍾意係食啲配菜

菜心 - 12 蚊超細碟   有啲搵笨

( 27-AUG-2009  THU )

今朝早咗   所以可以食去菇場對面食早餐   其實真係有好有唔好   好嘅就係食完行過對面就番到菇場   夠方便   唔好嘅就係食完無乜點郁  番到菇場又只係坐坐坐   不過依家咁熱   都係近啲好   好怕沖完涼又成身汗  立黐黐咁   勁唔鍾意呀 ~

一早諗定埋 Lunch 去美心快餐   因為好想食喇沙米粉   點知無喎   極度失望呀   但又難得有位   所以唔轉場喇 ~

豉油雞河粉 - 實在太想食喇沙米粉喇   所以覺得呢碗河粉唔好食

叉燒燒鴨飯 - 里奧大人最鍾意食叉燒   燒鴨就麻麻   不過知我鍾意食   Share 食   其實我最鍾意係因為有酸梅醬咋

放工同里奧大人探奶奶   我多數會買燒賣填肚   但其實又唔係咁餓   但唔食呢   到咁上下又餓喎 ~

番到屋企差唔多 9 點   好怕咁夜食飯   好似無時間消化咁   因為食完番屋企沖涼坐陣就瞓   實在太攰喇   想夜啲瞓都唔得呀 ~

住家飯 @ 媽咪屋企 ( 26-AUG-2009 )

煎倉魚 (粟米汁) - 超好味   實在太鍾意食魚啦

嘉美雞 - 啲肉好滑   正呀

薑蔥蓉 - 加埋指天椒仲正   不過無加都好好味呢

炒蟹 - 佢哋話好多肉   但我無食到   因為皮膚敏感唔敢食

蒜炒椰菜花 - 我麻麻哋鍾意食椰菜花

紅蘿蔔粟米魚唇豬展湯 - 勁耐無飲湯   好清甜好好飲呀

( 26-AUG-2009  WED )

因為時間關係   又要食吞拿魚治烘底   依家我飲奶茶唔落糖   又唔錯喎   好在唔澀   同埋感覺好似健康啲咁 ~

我好怕人講嘢同講電話大聲   但菇場啲人正正就係咁   最慘係我前右左嘅同事講電話好大聲   真係好怕   不過應該係同廠同事傾先咁大聲   因為有時講電話係無咁大聲嘅   知乜事啦 ~

仲有個工作狂經理   成日講嘢都好大聲    最慘係 Lunch Time 都同同事傾工事   明知人伏喺枱瞓就細聲啲啦   真係吖   有時想瞓下都唔得   但我又唔懶一路聽歌一路瞓喎 ~

晏晝又係同奧大人行遠少少食 Lunch   今次佢食巴西豬仔柳意粉餐   我食脆咋豬扒包   唔想食咁飽呀 ~

今晚好開心呀   因為同里奧大人番媽咪屋企食晚飯   家姐又番嚟   仲更加開心呢 ~

食下傾下時間真係好快過   今次媽咪仲煲咗雜豆糖水比我拎番屋企   講咗一次又有得飲   唔知係咪個個媽咪都係咁嘅呢   一話鍾意食就成日整   整到要叫停先唔整㗎   不過如何佢覺得有益呢   就點叫停都會整囉 ~

味皇餐廳小廚 @ 佐敦 ( 25-AUG-2009 )

( 25-AUG-2009  TUE )

早餐無啦啦超肚餓   所以食飽啲   不過真係飽啲無咁眼瞓   但點解晏晝食得飽會眼瞓嘅 ~

以前番工   成日聽啲同事話公司有靚仔靚女睇下就好啦   我覺得無乜嘢   但依家終於明白哂啦    如果公司有靚仔靚女睇下真係好好多呀   無咁悶   但係我對面嗰個就比較恐怖啲   頭髮勁乾旱  又厚   又齊陰   成隻鬼咁   塊臉又油喎   好怕啲人塊臉油淋淋㗎   好心整下個樣先出街嘛 ~

隔離 Partner 仲勁   我做咗 3 年   佢都係着 Tee + 牛仔褲波鞋   只係見過佢一次換另一條褲   佢又問我點解唔剪餖頭髮 ?!   我話長頭髮有女人味   佢話結咗婚就唔駛喎   我覺得唔係咁囉   我最怕啲人成日話結婚生仔之後無時間打扮   好快變黃臉婆   懶就懶啦   過到自己嗰關先得㗎   係咪先 ~

晏晝同里奧大人行遠少少食 Lunch   都係唔好食米線   費事身水身汗   所以食豬肋骨意粉餐 + 奶醬厚多士   好正呀   又抵   $46 咋   又坐得舒服喎   之後里奧大人同我講番   佢話見我睇住米線嘅餐牌   佢好驚我叫米線   因為佢話佢去到已經成身濕哂   不過見我想食都會食嘅   哎呀   我個人最好㗎啦   見你辛苦我都唔食啦 ~

放工又同里奧大人探奶奶   本來諗住番屋企食飯   但去到佐敦已經 7 點 50 分   都係食埋嘢先番屋企   有多啲時間消化嘛 ~

今次去味皇餐廳小廚   叫咗無骨海南雞飯餐 + 蝦米肉碎炒四季豆   不過呢間嘢我唔會再幫襯    因為啲人無禮貌   同埋最離譜係我嘅套餐係有生菜   我要走油   等咗好耐都未有   我追 Waiter   佢居然話係我話走生菜   仲要話問咗廚房話我係走生菜喎   顛啦   走生菜就唔叫套餐啦   衰咗又唔認   最憎呢啲服務態度呀 ~

里奧大人好鍾意食大菜糕   所以買咗杯嚟試   點知唔好味   依家真係好難搵到好味嘅大菜糕喇 ~

薑蔥蒸雞翼 + 菜心 + 芫茜皮蛋魚片湯 ( 24-AUG-2009 )

( 24-AUG-2009  MON )

不嬲係 7 點 27 分鬧鐘響   再懶床 3 分鐘先起身   但因為係星期一   所以教 7 點 31 分鬧鐘   再懶床 3 分鐘先起身   雖然都一樣係唔想起身   但感覺好似瞓多咗咁好啲囉 ~

早餐都唔可以食太多喇   因為無乜時間   所以都係三文治餐啦 ~

唔知點解   菇場一到 11 點左右就好靜   可能個個上網睇報紙都未定呀 ~

諗住同里奧大人食 Lunch   點知有同事臨時約咗佢喎   所以我買炒米粉番菇場食算 lu    太熱喇   唔想周圍行 ~

今晚又可以同里奧大人一齊放工搭車番屋企   太好喇 ~

是日晚餐 - 薑蔥蒸雞翼 + 菜心 + 芫茜皮蛋魚片湯

薑蔥蒸雞翼 - 太耐無煮飯   都係簡簡單單穩陣啲   本來想煎㗎   但驚自己太攰無心機   所以就咁蒸算喇   放入飯煲超方便 ~

菜心 - 8 蚊 1 斤   但我買 6 蚊   好彩無比人鬧   因為唔想格硬食哂   太飽都好辛苦㗎   同埋食唔哂要掉好浪費囉 ~

芫茜皮蛋魚片湯 - 4 蚊芫茜 + 1 隻 皮蛋 + 5 蚊大魚片   估唔到又有松花皮蛋   我覺得真係好靚呀 ~

之前喺大昌買咗 Potong 嘅紅豆味 & 芋頭味雪條   $19.9/6 條抵啦   不過里奧大人唔比我買太多   驚最後差唔多到期要佢狂隊喎 ~

阿妮沙茶麵 @ 佐敦 ( 23-AUG-2009 )

( 23-AUG-2009  SUN )

呢排太攰喇   所以瞓到唔願起身呀 ~

出面超焗   同里奧大人食完早餐番屋企   企喺度唔郁已經標哂汗喇 ~

呢排屋企好似幾乾淨咁   所以係咁易抹下就搞掂   不過就要熨 2 機衫囉   熨咗成個鐘   超攰呀 ~

2 點半先食 Tea   一入到去   老闆娘就話有秋刀魚呀   仲話我講過一次佢就成日記住咁話喎   咁真係唔食唔俾面啦 ~

之後里奧大人兒生女上我屋企   因為里奧大人教佢讀書方法   教完就去探奶奶喇 ~

唔知食乜好   所以周圍行   咁啱見到 "阿妮沙茶麵"   之前飲食男女有介紹過   話呢間食店嘅廚師係台灣人   咁試試囉 ~