幸運感恩 @ 馬來西亞。吉隆坡。美好回憶記錄 ( DEC 2011 )

講番點解今次選擇去馬來西亞先   就係因為阿表住吉隆坡嘛   真係好想探佢囉   其實之前諗完 2 月去   不過農曆新年嘛   阿表要番家鄉   同埋好多地方都唔開   所以無去   咁諗住 10 月去   點知做完手術仲未復原   又唔去得啦   咁 12 月咁啱聖誕節係紅假   里奧大人又要清假   我又剛剛送走每月一到   阿表同小寶又喺吉隆坡   所以今次呢個假期嘅日子真係好 Perfect 呢 ~

其實我 2006 年同媽咪跟團去過 KL 㗎喇   不過跟團真係唔好玩   但最開心係同媽咪一齊去囉   我記憶最深只係黑風洞   雲頂   食嘅就係 Roti   Tissue Roti   椰漿飯同埋 D24   其他真係無咩印象 ~ 

因為覺得 KL 無咩嘢玩   無咩嘢食   我再睇埋天書   仲更加覺得悶   哈哈   所以原本打算 4D3N   但其實我又唔想咁趕   所以就想 5D4N   之後諗諗下反正去玩   不如 6D5N   我仍都同里奧大人講   呢個旅程可能有兩日會喺阿表屋企都未定㗎   佢話無問題   因為今次佢都想探阿表   同埋想 Relax   所以無地方玩都無問題 ~

本來阿表都預咗我同里奧大人會有二人時間   夜晚再 Join 一齊食飯   但我都同里奧大人講   咁難得去馬來西亞見阿表   我哋未必有時間兩個人拍拖周圍行   不過佢都話無所謂   一齊行一齊食仲開心   最緊要唔好阻到人哋就得   好開心里奧大人當阿表同小寶係自己朋友   因為佢係叫影子   唔係叫妳朋友影子呢 ~

天氣方面: 臨去之前一星期   阿表話日日落雨   又水災   之後再上網睇   原來馬來西亞嘅 10月至12月係雨季   其實個心真係沉一沉   因為里奧大人第 1 次去馬來西亞嘛   我想好天氣囉   成日落雨影相又煩   不過真係好感恩   只係到埗時落咗白頭雨   其餘時間都藍天白雲   咁去馬六甲都有落雨   不過都唔係好大果隻囉 ~

住宿方面: 呢間酒店要 Black List 喇   我一入洗手間已經唔多鍾意   牆身有啲漬   同埋啲掛勾又生鏽   毛巾架又想跌落嚟咁   水龍頭直頭跌得出嚟嘅   又無拖鞋   之後先發覺原來呢層食吸煙嘅   但明明同旅行社講咗不吸煙家嘛   都唔知點搞嘅 ~

交通方面: 今次全程出入都係由阿表同小寶管接管送   所以無遇到任何交通問題   哈哈   今次仍非常幸運感恩   無咩點塞車   應該係阿表避過哂塞車時間呢 ~  

食物方面: 簡直令我回味啦   我係超鍾意食醬汁嘅人   佢哋啲醬汁係好香濃惹味   香港就比較稀   可能我食親都係平嘢啦   而 Mamak 檔咁平民化都唔會求其   比人感覺到好重視每一位客人咁呢   同埋今次好感恩好幸運食到貓山王呀 ~

其實我今次只係略略話比阿表知我想食咩   去邊度地方咁   但阿表居然做咗個 Itinerary 比我哋   果刻真係好感動   之後我番到香港   佢又幫我寫埋去過嘅地方   同埋食過嘅嘢   佢真係好重視我哋今次嚟馬來西亞遊   而我仍同時覺得自己好衰同好懶   話就話自己係自由行   但咩都無諗   要阿表同小寶費盡心思 ~

佢重成日強調會因天氣交通而改變行程   我哋真係無所謂   有人安排整個行程   真係唔會要求咁多   最緊要隨心而行   因為呢個旅程最主要係探阿表呢   總之一齊就得㗎喇 ~

講開又講   我呢一兩次去旅行都會當自己係當地人   要接受到當地文化   先會可以真真正正享受旅行嘅樂趣呢   同埋個個國家都有特色之處   如果下下用香港嚟比較   咁樣就好唔公平喇   同埋擴闊唔到自己嘅眼光呢 ~  

今次第 2 次去 KL 就真係好盡慶好開心喇   意想不到原來 KL 咁多嘢食   因為我唔會用香港嘅味道做準則   文化唔同嘛   唔可以咁比較   加埋又有好友全程陪住   感覺好似 4 個人一齊去旅行咁呀   而佢哋處處照顧周到   真係令我好感動好感動呢 ~

呢個旅程得到阿表同小寶細心熱情款待   我同里奧大人會永遠記得   再次多謝阿表同小寶   Terima Kasih ~

幸運感恩食食食精華遊 ♡ 吉隆坡。馬來西亞 DAY 6 ( 29-DEC-2011 )

( 29- DEC-2011  THU )

行程 : 酒店早餐 --> KL Tower --> 林家鋪子 @ Manjalara --> Bestari @ Soho KL (Solaris Mont Kiara) --> KLIA

話咁快就 Last Day 喺 KL 喇   時間過得好快   覺得啲時間超級唔夠用咁囉 ~

今朝又係 9 點起身食早餐   都係無炒米粉呀   點解㗎 ~

食完番到酒店沖涼再執好行李   之後等阿表   今朝小寶原本要番工   不過要整牙   所以佢番唔到工同埋食唔到嘢   咁將重任再次交比阿表喇   阿表帶我哋去 KL Tower ~

KL Tower

  

馬來屋 - 我初初以為佢係傻佬   因為佢係咁 R 痕   後尾有人叫佢   先知道佢係跟團嚟嘅呢

 

 

  

唔知點解見到椰樹好開心   加上藍天白雲   所以更加開心呢


  

    

阿表請我哋去食 Farewell Lunch   就係去 Manjalare 嘅 Lim Kitchen (林家舖子) 食魚麵炒腸粉喇   不過今次里奧大人話佢喉嚨唔舒服喇   因為尋晚食咗撈生嘅脆卜卜   所以都食唔到啲炸嘢   不過唔緊要   我可以食埋佢嗰份 ~






西刀魚丸 (RM6) - 好鮮味呀   完全唔腥

釀豆腐 (羊角豆 / 紅椒 / 豆腐 / 苦瓜) (RM10.80) - 我鍾意食   不過里奧大人話鍾意香港嘅煎釀三寶   香口啲喎   我覺得唔同食法呢

魚麵炒腸粉 (RM7.0) - 好味呀   魚麵唔腥   同埋腸粉都幾煙韌

炸腐竹 (RM1.5 x 3) / 炸豆根 (RM2.50 x 2) / 炸水餃 (RM4.0) - 脆卜卜好味道   同埋炸出嚟唔多油   正呀

Hainan Tea 海南茶 (RM3.50) - 其實同影相嘅唔一樣   點解我會知呢   就係因為店員主動話同我哋換過杯   話呢杯濃得滯喎   不過我同里奧大人都唔覺得濃喎   哈哈   所以我覺得呢間店好認真對待客人呀 

     

我嘅凍白咖啡 (RM3.50) / 阿表嘅桔仔酸梅 (RM2.0)

呢餐銀碼係 RM48.80   多謝阿表

以為食完去接小寶   點知原來係最後一擊去 Soho KL (Solaris Mont Kiara)  嘅 Bestari 食 Roti Tissue   因為阿表知我好想食   所以點都帶我去食呢 ~

 

Roti Tissue - 有啲沙糖喺面   又脆卜卜   慢慢拻嚟食   超正呀   阿表話越高係代表師傅嘅功力越勁


前 : Bandung Ais (玫瑰+奶) 
中 : Sirap Ais (玫瑰) 
後 Limau Ais 

粉紅色同紅色都好飲喎   我其實好怕印度飲品   覺得超多奶同古靈精怪   不過呢兩杯真係好好飲呢

食完再番屋企接小寶   原來小寶原本約咗牙醫 2 點   不過阿表話驚趕唔切送我哋機   所以叫小寶早啲去   如果無人做   佢可以做先   咁就可以送到我哋機喎   不過佢做完牙手術好痛   但都堅持要送我哋機呀   我哋真係好感動好感動呀 ~

我哋搭 6:45pm 機番香港   所以 3 點半左右要開車去機場喇 ~   

藍天白雲嘅馬來西亞   再見喇

好快到機場咁呀   嗚嗚嗚嗚   真係要走喇   幸運感恩食食食 1,189 公里大馬遊完美結束喇   我十萬個唔捨得呀   其實一上車去機場已經想喊啦   不過我好驚無啦啦咁快會嚇親佢哋   一落車喊到我吖   嚇到里奧大人話下個月再去馬來西亞搵阿表呀 ~

去 Check-In 仲好笑   Counter 個男仔見我喊   佢好驚呀   等我冷靜咗先同我 Say Hello   逐個字 "鄧" 出嚟講蝦 ~~ 佬 ~~ 好搞笑 ~

入到去又再去 Old Town Coffee 飲白咖啡   唔知係咪心情好低落   所以覺得唔好飲囉   之後我去洗手間   里奧大人知我又喊   佢都話好唔捨得阿表同小寶   有啲心酸   話見足咁多日唔係好事喎 ~

  

上機派咗啲小食   之後我瞓喇   唔係講笑   真係上機先叫做停一停無喊到   因為我對眼喊到好痛   同埋個頭好痛呀   所以好快瞓咗   之後到用餐先醒   都係食咗少少咋   飛機餐真係好難食 ~

我覺得啲坐位好 Colorful   好似好熟面口   原來係同去馬六甲嘅加油站一樣咁   啲櫈都係五顏六色好靚呀

 

今次估唔到可以買到一箱食物同醬料番香港   同埋阿表又比咗一喼零食我喎   所以要搭的士番屋企   唔係好難拎番屋企囉 ~

好在我買咗羊角豆同指天椒番香港   所以一定要第一時間拎出嚟放入雪櫃   點知一開喼   原來樽桔仔蜜個蓋扭唔實呀   好在阿表叫我哋包幾層保鮮紙   唔係成樽無哂都似 ~

呢次馬來西亞之旅真係好開心好盡慶   真係無諗過會咁囉   呢幾日阿表同小寶管接管送   又安排全程景點同美食   我同里奧大人都好感動有貴賓式款待   仍都覺得唔好意思打搞咗佢哋咁耐   今次呢個 Trip 對我哋嚟講真係畢生難忘呀   堅㗎   好多謝佢哋咁重視我哋呀   阿表小寶   Terima Kasih ~   

幸運感恩馬來西亞遊完美結束   再次多謝阿表同小寶嘅熱情款待 Terima Kasih ^^