明爐香烤櫻桃 BB 鴨 (外賣) + 雞中翼拚紅腸 (外賣) + 生菜苗 ( 18-JUN-2025 )

我特登唔剪隻肶   所以叫里奧大人食 1 隻同埋另 1 隻就帶飯   佢鍾意啖啖肉   我就唔係咁鍾意喇

( 18-JUN-2025  WED )

今朝鬧鐘響   但唔係自己手機嘅鈴聲   之後一望原來係里奧大人鬧鐘響   原來我無拎手機入房   真係好彩里奧大人今日要番工咋   咁啱我又好好瞓   如果無鬧鐘響   我肯定瞓到 9 點都得呀 ~

早餐食芝士條 + 丹麥酥   同里奧大人 Share 食   咁樣唔係齋食一個味道咁悶   哈哈 ~

我覺得落咗場雨真係無咁熱喎   因為今朝行番去菇場都無流汗 ~

菇場忙咗陣又做自己嘢   唔錯唔錯 ~

Lunch Time 蒸完飯就出去行下   真係唔知菇場凍得滯定係今日唔熱   行咗半個鐘都無汗   其實流汗唔係唔好   不過我流得太多汗   個人好易攰咁㗎   菇場又靜喎   好驚不期然會瞓着咗呀 ~

唔忙就睇下討論區   有時都學到啲嘢㗎 ~

放工買埋燒鴨就番屋企   今晚里奧大人 7 點先放工   我可以唔駛咁趕喇 ~

是日晚餐 - 明爐香烤櫻桃 BB 鴨 (外賣) + 雞中翼拚紅腸 (外賣) + 生菜苗

明爐香烤櫻桃 BB 鴨 (外賣) - 今次大隻咗啲咁呀   所以影比阿妹睇   但講明係免斬先 $59   因為我影咗已經斬開嘅比佢睇嘛   阿妹話我斬得咁靚嘅   我話我剪㗎咋   不過今次真係好易剪   唔會扯住扯住咁呢 ~

雞中翼拚紅腸 (外賣) - 加 $10 好抵   所以就買埋喇 ~

生菜苗 - 加埋尋晚嘅蠔油汁   咁唔好浪費嘛 ~

洗埋碗就開機洗衫   沖埋涼抖陣就食橙喇 ~

睇下 Youtube   今晚 10 點 15 分已經想瞓   不過都係等到 10 點半先瞓覺呢 ~