酸辣米線 @ 大埔 ( SEP-2008 )

尋晚要參加一個醫治釋放嘅敬拜會   因為 8 點開始   所以唔可能煮到飯呢 ~

尋晚勁開心呀   因為可以同里奧大人一齊放工搭車番屋企   好耐無試過喇 ~

其實仲好感動   里奧大人知我好多病痛   難得呢個係醫治嘅敬拜會   所以特登早啲起身番工   7 點 40 分番到公司呀   我初初以為佢講錯添呀   為咗我   佢咁辛苦   個心真係有啲痛呀   所以放工去 Panash 買芝士麻薯比佢食下   等佢都知我對佢好好㗎 ~

因為我哋唔識去敬拜會   所以約埋里奧大人 2 姑奶一齊食酸辣米線   之後一齊搭車去呀 ~

敬拜會由 8 點至 10 點   但差唔多 11 點先散會   所以番到屋企沖埋涼都要成 12 點呢 ~

~~~~

今朝 6 點半起身梳洗   因為約咗媽咪同朱朱食早餐   好好好好攰呀   但又好好好好開心呢 ~

去到 7 點半   仲未咁肚餓   所以清清哋食吞拿魚治烘底 + 凍奶茶 ~

 

之後又上媽咪屋企坐陣傾下偈先番菇場   朱朱又比我抱到就嚟瞓咁   好唔想放手呀   如果唔駛番工幾好呢 ~

放工即刻走人   里奧大人今日 Off   所以等我番去食 Tea   又係去茶餐廳   今次我食墨魚丸腐皮角金邊粉   里奧大人食鹹魚雞粒炒飯   都明點解啲男人食 Tea 都要食得飽過人嘅 ~

得了神的醫冶 終於得到釋放 ( SEP-2008 )

尋晚同里奧大人參加了一個敬拜會   (當剛強作主的工   醫治釋放特會 - 黃約翰牧師) ~

參加這個敬拜會   我深深感受主給我無限嘅恩典   主給我嘅醫治   因為我真的得到釋放   我的病真的得了醫治 ~

牧師話有病痛嘅弟兄姊妹請舉手   當然我有舉啦   因為我真係有病痛嘛   之後牧師就話如果有腰骨痛   有腳痛嘅就出來醫治   有幾位弟兄姊妹上咗台   佢哋得了醫治得到釋放就會好自然咁放軟身體暈咗 (註: 有人在後面扶住   所以唔會跌倒)   嗰刻我覺得係咪真架 ?!   同時我憂慮唔知自己可唔可以上台得醫治   奇妙事情發生喇   因為牧師問邊位個肚   特別係右邊痛嘅人請出嚟   正正就是我嘅痛症呀 (我當時仲痛緊㗎)   當我上台嘅時候   牧師連續問了我 3 次   係咪右邊個肚位置好痛 ?!    我話係   仲痛咗都幾長時間   之後牧師同我禱告   再叫我跟了牧師講了幾句說話 (唔好意思   太緊張唔記得講了咩   印象當中係求主醫治嘅說話)   之後放鬆身體   我身體得了釋放   我嘅身體突然發軟暈咗   但感覺係好舒服好平靜   身體好似牧師所講嘅 "鬆哂"   我好快就清醒   醒咗之後牧師問咗我 3 次   要我摸自己嘅肚 3 次   要我 Sure 係咪真係唔痛   感謝神   親身感受主嘅醫治   我嘅肚真係無痛呀   真係好奇妙呀 ~

好老實講   唔相信神嘅人真係好難明我所講嘅嘢   但我最希望妳哋唔好抗拒我所講嘅嘢   因為大能嘅神真係將我改變   令我得到醫治   令我得到釋放 ~

我以前都好抗拒基督教   同埋覺得就咁祈禱就得醫治同釋放   有無咁神奇呀  ?!

但我信咗主之後   我發覺自己真係身心靈都唔同咗   對人和事無以前嘅執着   遇到困難時   會知道這是神嘅美意   因為要在困難困苦當中學識倚靠神   經歷神與妳同在   得着一份真正嘅平安 !!

我每日都會不停祈禱   神真係聽我嘅禱告   所以我做每一件事都好得力   呢啲都係神給我嘅   我每日不停受神嘅恩典 ~

我上年住咗兩星期醫院   同時做咗一個小手術   但我居然無驚到   以前我少少事都會好驚   更何況係住醫院呢   但信了主之後   我知道愛我嘅主會時時刻刻咁陪住我   安撫我   我必不會有任何懼怕   是真的   我真的沒有任何懼怕   當中還得着一份平安   是真的   連里奧大人都難以相信   我一點兒都不懼怕呢 ~

我真的很感謝主   帶領我走每一步   令我每日都在平安喜樂中渡過 ~

感謝主  阿門 !!

食棧 @ 大埔 ( SEP-2008 )

尋日呢   好多嘢講   所以今日唔敢講咁多嘢   寫六百隻字算喇 ~

 
但女人天生鍾意講嘢嘛   我又係一個不折不扣嘅女人   做咩要迫自己唔講嘢喎   唔講嘢對身體唔好㗎   因為唔口乾   即係唔會飲水   即係無得去放水   咁即係無得排毒   仲有喎   好害人㗎   因為唔講嘢個口係好臭嘛   好似爆咗幾條大屎渠咁臭㗎   所以係男係女都要講嘢   知道嘛   無人會話妳多咀㗎   身體要緊呀 ~

尋晚同里奧大人探奶奶同平仔   兩個臉色都好好   不過我唔多舒服   所以 7 點 40 分就走喇 ~

好在同里奧大人搭巴士時都有位坐咋   仲孖位添   無咁悶 ~

番到屋企附近都仲未有胃口   只係唔想食乾爭爭嘅食物   所以就食越南菜喇 ~

食香茅豬扒湯濛 + 馬拉盞炒通菜 + 石榴子冰   合共 $100   唔駛加一又幾好喎 ~

我係一個好為食嘅靚女   但我都無胃口   真係好出奇   但無啦啦又想食雪糕   所以去麥當勞買朱古力新地   勁好味 ~

雖然我好攰   但忽然間覺得里奧大人仲攰   所以一路睇 "亮相" 一路幫佢錬骨   我覺得呢種感覺幾好   好 Relax 咁   同埋我覺得嗰刻自己好似好溫柔咁~

里奧大人今朝唔記得帶另一個手機   所以 7 點 10 分打番嚟   印象中佢好似同我講話 "我唔記得帶另一部電話   妳帶番比我吖   可唔可以呀"   又會咁搞笑嘅   問可唔可以   我點會 Say No 喎   我咁好人   不過最好下次記得帶囉   我醒咗好難再瞓番㗎 ~

~~~~

今朝 Happy Friday   所以食得豐富啲   去美心食炸魚柳腸配蘿蔔糕 + 即磨咖啡 ($21)   超飽   但呢排起身個口都苦苦咁   所以覺得今日份早餐麻麻哋   同埋覺得啲魚有啲鹹 ~

菇場又係靜英英   啲氣氛真係令人發悶 ~

晏晝同里奧大人食咖哩燒雞飯 + 沙爹豬肉 + 蒜蓉包 + 咖啡 ($44)   但樣樣都好鹹   我估我係熱氣呀 ~

川滬小館 ( SEP-2008 )

不得不承認人老了   接近中年嘅女人真係特別多病痛   麻鬼煩 ~

呢幾日受胃痛折磨   我覺得係食抗生素嘅關係   因為食一次痛一次   西藥真係醫得一樣就傷一樣   真係唔掂呀 ~

我頭痛都無咁驚   最怕係胃痛   因為痛到好似個胃想爆出嚟咁   連飲啖水   行步路都痛   真係人都顛呀 ~

做女人都幾煩   有每月一到嘅痛啦   生仔又痛喎   到咁上下又多婦女病   最慘係容易老嘛   病一病個樣真係好快殘   真係照鏡都驚㗎 ~

諗番起自己後生時   真係好似好遙遠嘅事咁   晚晚玩到朝早 5 點都唔及依家瞓少一個鐘個樣咁殘呀 ~

後生我唔會用日霜晚霜   敷 Mask 啲 麻煩嘢   但啲皮膚都好好㗎喎   但依家呢   見到啲幼紋就想暈   笑都唔敢咁大動作呀   依家仲要緊記每星期要敷 Mask   每日要查日霜晚霜   瞓覺唔好側埋一邊等等等等  ~

好在里奧大人唔介意我人老豬黃   仍唔介意我花錢買護膚品咋   如果唔係我真係唔想出街見人呀 ~

唔舒服咗成個星期   搞到個人好奄悶   唔係出街食   就係番屋企   一係就去醫院探奶奶   情緒真係有點低落   但又唔想叫里奧大人陪我出街行下 Hea 下   意思係衝出大埔   佢身心都好攰啦   工事繁忙 + 功課更繁忙 + 隔晚探奶奶   我又無咩煮飯好似好衰咁   倒不如有時間嘅話用嚟滾啖湯煮下飯好過   等佢有啲營養嘛 ~

有時真係好唔明奶奶   成日要啲仔女晚晚都要探佢   即係每日必要有人探佢   講真   啲仔女要搵食   年紀又唔係細    頻頻樸樸真係好辛苦家嘛   點解佢唔會體諒啲仔女辛苦嘅呢   我都住過醫院   我都好明白住醫院真係好悶   但我最唔開心係里奧大人 2 家姐話話得一兩個探佢   佢係唔滿足㗎   聽完之後我覺得真係有啲掹㗎 ~

不過老人家係咁㗎喇   又知道自己無啦啦突然心臟病發   又真係好驚嘅   今日唔知聽日事    做得幾多咪幾多囉   但我真係好心痛里奧大人咁辛苦囉 ~

自己將來病咗   唔知會唔會成日想仔女嚟探我嘅呢   不過應該係會好想   不過仔大仔世界   都唔輪到妳話想就想 lu ~

所以由呢一刻開始   都係對里奧大人好啲   晚晚煮飯過佢食   等佢老來都身體都好啲   我又咩事佢都可以晚晚嚟探我嘛   因為另一半才是終身伴侶呀 ~

黐咗線   無啦啦講呢啲嘢 ~

講番尋晚食咩先   本來好想去 Shakey's Pizza   但個胃真係好痛   所以都係食啲正氣嘅嘢 ~

去川滬小館食嘢   因為想食熱嘢   暖下個胃好似好啲   不過啲嘢食都幾油膩   食完都幾辛苦下 ~

番到屋企開機洗衫   如果唔係又唔知等幾時㗎喇   里奧大人本來話想跑步   但又覺得啲嘢食好似仲未落格咁   心大心細唔知點好   我就話幫下手熨自己嘅西褲   當做運動囉   又可以陪下我   一舉兩得   同埋最主要原因係我唔係咁識熨   又無佢咁有心機熨嘛 ~

做哂嘢即沖涼   之後坐定定睇 "家好月圓"   嫲嫲同 Sa 姨鬧交又幾搞笑   我覺得有啲驚喜   依家我開始鍾意睇呢套戲 lu   但一有鍾家欣同黃宗澤果 part 就最唔鍾意睇   成日喊    悶到爆 ~

~~~~

今朝個人超攰   唔知係咪尋晚食飯時飲咗兩啖茶   搞到瞓唔着   同埋個人好似好翳咁    勁唔舒服 ~

今朝太眼瞓   所以食腿蛋治 + 奶茶 ($16)   唔記得叫烘底   但估唔到又幾好食喎   同埋無咁熱氣   我其實點解成日要烘底係因為覺得三文治嘅麵包好似成日有陣 "酸酸叔叔" 咁嘅味   但烘底就無嘅   所以咪多數食烘底囉 ~

番到菇場撞鬼   個個都話眼瞓   包括自己在內   真係無哂 Mood 呀 ~

晏晝同里奧大人去 KFC 食 1 個餐 + 1 個包   $46.5 搞掂   不過食完好鬼漏 ~

淨韭菜餃 + 再黎茄汁雞肶腸仔蛋菜飯 ( SEP-2008 )

陰公咯   每月一到嘅唔舒服   搞到個人勁唔舒服   仲要我打的番屋企添   真係肉赤到爆咯   好在依家有 8 折無咁傷咋 ~

最慘係要食之前淋巴炎要食嘅抗生素   食到胃又痛   所以索性唔食喇 ~

呢幾晚我覺得里奧大人好慘   又要做嘢又要探奶奶   仲要無住家飯食添   呢幾晚都係要佢買外賣番屋企食咋   真係超無益呀 ~

尋晚諗住清清哋食韭菜餃   點知鹹到爆   唔知係咪個湯太多榨菜粒呢   食完仲 Feel 到個口係苦嘅   真係人都顛呀 ~

里奧大人仲衰   翻兜呢個超級多肉飯   仲駁咀駁舌話係菜飯   即係有菜喎 ~

~~~~

今朝仲係好口渴咁   所以食芝腿菠蘿包 + 凍奶茶 ($17)   飲完凍嘢真係好舒服   但番到菇場就胃痛呢   撞鬼 ~

番到菇場要同即刻同卡姑 冰姑 MSN   因為呢兩日無 M 過呀   所以番菇場真係好忙呢 ~

里奧大人今日又上咗大陸   所以得番自己食 Lunch   食豬紅豬皮韮菜米線   $14 咋   仲要係飽添喎   真係抵食下喎 ~

粟米磨菇粥 + 燒賣 + 腸粉 + 茄汁雞肶腸仔蛋菜飯 ( SEP-2008 )

尋晚放工即刻番屋企   因為攰到不得了呀   唯有要里奧大人買粟米磨菇粥 + 燒賣 + 腸粉 + 茄汁雞肶腸仔菜飯 ~ 

食完睇陣電視   好快就瞓覺 lu ~

~~~~

今朝有啲胃口   所以食奶油多 + 奶茶 ($16) ~

番到菇場做少少嘢   之後就可以休息下呢 ~

晏晝同里奧大人去美心食叉燒燒鵝飯 + 奶茶 ($35)   不過美心啲燒味麻麻哋   但又好多人排隊買黎食喎 ~

醫 學 Online 心 跳 頻 率 預 兆 心 臟 病

一 項 全 球 有 33 個 國 家 共 11,000 名 心 臟 病 患 者 參 加 的 研 究 發 現 ， 心 跳 頻 率 可 用 作 預 測 心 臟 病 發 。 負 責 有 關 研 究 的 澳 洲 悉 尼 大 學 心 臟 專 家 指 出 ， 心 跳 每 分 鐘 超 過 70 次 的 心 臟 病 患 者 ， 突 然 病 發 需 住 院 及 做 手 術 的 風 險 非 常 高 ， 高 心 跳 率 的 患 者 死 於 心 臟 病 發 的 風 險 可 增 加 46% ， 故 建 議 醫 生 要 正 視 患 者 心 跳 率 過 高 的 問 題 ， 接 受 藥 物 治 療 後 估 計 可 將 心 臟 病 發 率 減 低 逾 三 成 。

 

牛雜米 + 牛腩麵 + 生菜 ( SEP-2008 )

番到屋企睇下報紙   食完藥又瞓下   之後去食蘑菇粟米湯 + 餈飯   食完番屋企又瞓   無意慾想煮飯呀 ~

尋晚又無咩胃口   所以叫里奧大人買牛雜米 + 牛腩麵 + 生菜   無辣椒油真係咩味都無呀 ~

~~~~

番到公司攰到吖   所以早餐都無食   晏晝就瞓覺 ~